?Sɛ e ti yalɛfuɛ’n, ɔ kle kɛ Ɲanmiɛn klun jɔman e wun?
LAA Ɲanmiɛn seli Izraɛlifuɛ’m be kɛ: “Yalɛfuɛ su tran-man amun afiɛn.” Ɔ seli sɔ afin Mmla ng’ɔ fa mannin be’n i nun’n, ɔ fali ajalɛ naan b’a nian yalɛfuɛ’m be lika. Naan kusu sɛ kalɛ o sran kun su’n, b’a kwla yaci b’a cɛ i. (Mmla’n 15:1-4, 7-10) Ɔ maan ɔ nin i fataman kɛ yalɛfuɛ tran Izraɛlifuɛ’m be afiɛn afin Zoova seli be kɛ ɔ́ rá be su. Kusu sɛ ɔ́ rá be su sɔ’n, ɔ fin Mmla’n i su falɛ’n. Sanngɛ Izraɛlifuɛ’m b’a kwlá faman su.
Nán kɛ Ɲanmiɛn bu be nga be leman wie’n, be fɔ ti ɔ. Annzɛ kusu be nga be le wie’n, Ɲanmiɛn ra be su ti ɔ. Ɲanmiɛn i sufuɛ kpa’m be nun kpanngban be ti yalɛfuɛ. Ɲanmiɛn nuan ijɔfuɛ Amɔsu ti bua tafuɛ nin afuɛ nuan junman difuɛ. (Amɔs 1:1; 7:14) Ɲanmiɛn nuan ijɔfuɛ Eli blɛ su’n, kɛ awe’n kpɛnnin Izraɛli lɔ’n, angbeti bla yalɛfuɛ kun yɛ ɔ niannin Eli lika ɔ. Bla sɔ’n i sanmlɛn nin i ngo kan ng’ɔ le i’n, ɔ juli be awe blɛ sɔ’n nun. Eli nin angbeti bla’n be wie fi w’a yoman aɲanbeunfuɛ. Like ng’ɔ mian be sa’n, yɛ Zoova fa mannin be ɔ.—1 Famiɛn Mun 17:8-16.
Sanvuɛ sa wie ti’n, sran’m be kwla yo yalɛfuɛ kpɛ kunngba. Asidan annzɛ tukpacɛ wie kwla yo maan sran kun jrɛn i junman’n kan annzɛ ɔ jrɛn i mlɔnmlɔn. Kpɛkun wie’n ti’n, sran wie’m be kwla kaci aika annzɛ angbeti. Kannzɛ i sɔ sa tɛtɛ’m be ɲan sran kun bɔbɔ’n, sanngɛ be kleman kɛ Ɲanmiɛn klun jɔman e wun. Naomi nin Riti be ndɛ’n m’ɔ wla fanngan’n, ɔ yi wafa nga Ɲanmiɛn Zoova nian yalɛfuɛ’m be lika klolɛ su’n i nglo. Kannzɛ bɔbɔ Naomi nin Riti be wun mɔ be wuli’n ti’n, yalɛ’n dili be kpa’n, sanngɛ Zoova rali be su yɛ ɔ yoli maan be ɲannin ninnge ng’ɔ mian be sa’n.—Rit 1:1-6; 2:2-12; 4:13-17.
I sɔ’n kle weiin kɛ sɛ sran kun ti yalɛfuɛ’n, nán kɛ Ɲanmiɛn bu i fɔ ti ɔ. Be nga be nin Ɲanmiɛn Zoova be nanti klanman titi’n, be kwla lafi ndɛ nga Famiɛn Davidi kɛnnin i yɛ’n su. I waan: “Kɛ ɔ fɛ i min bakan nun lele bɔ m’an fa yo oke yɛ’n, n nin a wunman kɛ Nyanmiɛn w’a yi i sran kpa’n i ase le. N nin a wunman kɛ i mma mun annzɛ i anunman’m be su srɛsrɛ aliɛ be sin le.”—Jue Mun 37:25.
[Foto, bue 8]
Kannzɛ Naomi nin Riti be ti yalɛfuɛ kpa’n, sanngɛ Ɲanmiɛn rali be su yɛ ɔ niannin be lika klolɛ su.