Gbanflɛn nin talua mun, an nanti Ɲanmiɛn Ndɛ’n su
“Bu akunndan, suan ngwlɛlɛ.”—NYA. 4:5.
1, 2. (a) ?Ngue yɛ ɔ ukali akoto Pɔlu naan w’a jran sa nga be tɔli i su’n be ɲrun kekle ɔ? (b) ?Wafa sɛ yɛ amun kwla ɲan ngwlɛlɛ ɔ?
“CƐN kwlaa kɛ n klo kɛ ń yó sa kpa’n, kpɛkuun sa tɛ’n jin m bue.” ?Amun si sran ng’ɔ kɛnnin i sɔ ndɛ liɛ’n? Akoto Pɔlu ɔ. Kannzɛ Pɔlu kloli Zoova’n, sanngɛ ɔ juli blɛ wie’n sa kpa’n i yolɛ’n yoli kekle kpa mɛnnin i. ?Kɛ ɔ yoli sɔ’n, wafa sɛ yɛ i wun fa yoli i ɔ? Ɔ klɛli i kɛ: “Eee, n ti nyrɛnnɛnfuɛ dan!” (Rɔm. 7:21-24) ?Amun wun wafa nga Pɔlu i wun fa yoli i’n i wlɛ? ?Ɔ ju wie’n, sa kpa’n i yolɛ’n ti kekle man amun? ?I sɔ’n sanngan amun akunndan’n kɛ Pɔlu liɛ’n sa? Sɛ ɔ ti sɔ’n nán amun sa sin bubu amun. Kannzɛ bɔbɔ ɔ yoli kekle mannin Pɔlu sɛ’n, sanngɛ ɔ kwla yoli sa ng’ɔ ti kpa’n. Amun kwla yo sɔ wie.
2 Like nga ti yɛ Pɔlu kwla yoli sa kpa’n, yɛle kɛ ɔ tuli i klun fali ‘ndɛ nanwlɛ’n’ su. (2 Tim. 1:13, 14) I agualiɛ su’n, ɔ ɲannin ngwlɛlɛ naan w’a kwla jran sa’m be ɲrun kekle naan w’a fa ajalɛ kpa. Ɲanmiɛn Zoova kwla uka amun naan amun a si ngwlɛlɛ. (Nya. 4:5) Biblu’n m’ɔ ti Ɲanmiɛn Ndɛ’n i nun’n, Ɲanmiɛn mannin afɔtuɛ kpakpa mun. (An kanngan 2 Timote 3:16, 17 nun.) Wafa nga amun nin amun si nin amun nin amun tran’n, ɔ nin sika ndɛ’n nun’n, yɛ kɛ amun ngunmin amun o’n, amun nian wafa nga amun kwla ɲan Biblu’n nun mmla’m be su ye’n.
Awlo lɔ
3, 4. ?Ngue ti yɛ mmla nga amun si nin amun nin’m be kpɛ’n be su falɛ’n kwla yo kekle man amun ɔn? ?Yɛ ngue ti yɛ be kpɛ be ɔ?
3 ?Amun si nin amun nin’m be mmla’m be su nantilɛ’n ti kekle man amun? ?Ngue ti yɛ ɔ yo amun sɔ ɔ? Atrɛkpa’n, nga ti yɛ ɔ yo amun sɔ’n, yɛle kɛ amun kunndɛ kɛ be yaci amun nun naan amun yo amun klunklo like. I sɔ’n ti su. Kɛ sran’m be kwlaa bé yó kpɛnngbɛn bé kɔ́’n, ɔ yo be sɔ. Sanngɛ awlo lɔ’n, ɔ nin i fata kɛ amun ɲin yi amun si nin amun nin.—Efɛ. 6:1-3.
4 Sɛ amun wun like nga ti yɛ amun si nin amun nin’m be kpɛ mmla be man amun’n i wlɛ’n, i sɔ’n kwla yo naan be su falɛ’n w’a yo pɔpɔ. Atrɛkpa’n, amun wun kwla yo amun kɛ Bliɛlia m’ɔ le afuɛ 18 i liɛ’n sa. Ɔ kɛnnin i si’n nin i nin’n be ndɛ seli kɛ: “Sa ng’ɔ o talua kɛ min sa’n be su’n, be wla w’a fi su mlɔnmlɔn. Kɛ bé kán ndɛ’n, be kunndɛman kɛ m bua nun. Be kunndɛman kɛ n fa min tiaun ajalɛ annzɛ be te bu min bakan.” Kɛ Bliɛli sa’n, ɔ kwla yo amun kɛ amun si nin amun nin’m be manman amun atin naan amun a fa yo amun klunklo ninnge mun. Sanngɛ like cinnjin nga ti yɛ amun si nin amun nin’m be kpɛ mmla be man amun’n, yɛle kɛ amun ndɛ lo be. Asa ekun’n, siɛ nin niɛn nga be ti Klistfuɛ’n be si kɛ bé kán wafa nga be fa ta amun’n i su ndɛ klé Zoova.—1 Tim. 5:8.
5. ?Sɛ amun ɲin yi amun si’n nin amun nin’n, ye benin yɛ amun kwla ɲɛn i ɔ?
5 Amun si nin amun nin’m be mmla’m be su falɛ’n, ɔ ti kɛ banki wie i kalɛ yɛ ɔ o amun su sa. Sɛ amun tannin i kɛ ɔ nin i fata’n sa’n, banki’n kusu kwla bo amun bosia cɛn uflɛ. I kunngba’n, ɔ fata kɛ amun ɲin yi amun si ɔ nin amun nin. (An kanngan Nyanndra Mun 1:8 nun.) Sɛ amun ɲin yi be kpa’n, bé mán amun blɛ kpanngban naan amun a fa yo amun klunklo like. (Lik 16:10) Ɔ ti weiin kɛ sɛ amun faman be mmla’m be su’n, bé kpɛ́ amun blɛ’n su. Annzɛ kɛ nga banki’m be fa yo’n sa’n, cɛn uflɛ be su boman amun “bosia” kun.
6. ?Wafa sɛ yɛ siɛ nin niɛn’m be kwla uka ba mun naan b’a fa mmla nga be kpɛ man be’n be su ɔ?
6 Like kun nga siɛ nin niɛn’m be kwla yo naan be mma’m b’a fa be mmla’m be su’n, yɛle kɛ be yo maan ba’m be nanti be ajalɛ’n su. Wafa nga be klunklo su be yo Zoova i klun sa’n, ɔ nin i fata kɛ ɔ kle kɛ Ɲanmiɛn i mmla’m be su falɛ’n yoman ya. I sɔ’n úka ba mun naan b’a wun i wlɛ kɛ mmla nga be si nin be nin’m be kpɛ’n be su falɛ’n ti kpa. (1 Zan 5:3) Asa ekun’n, Biblu’n kan kɛ ɔ juli blɛ wie’n, Zoova mɛnnin i sufuɛ’m be atin kɛ be kan akunndan nga be bu i sa wie’m be su’n. (Bob. 18:22-32; 1 Fam. 22:19-22) ?Ɔ nin i fata kɛ blɛ wie nun’n, siɛ nin niɛn’m be man ba’m be atin naan be kan sa wie’m be su akunndan nga be bu’n?
7, 8. (a) ?Ngue yɛ ɔ ti kekle man gbanflɛn nin talua wie mun ɔn? (b) ?Like benin yɛ i wlɛ wunlɛ’n kwla uka amun naan kɛ be tu amun fɔ’n, amun a ɲan su ye ɔ?
7 Kɛ siɛ nin niɛn’m be kle ba’m be atin’n, i su falɛ’n kwla yo kekle man be. Afin be bu i kɛ fɔ nga be tu be’n, ɔ timan su. Atrɛkpa’n, ɔ ju wie’n amun wun yo amun kɛ gbanflɛn nga be flɛ i Klɛg i liɛ’n sa. Ɔ seli kɛ: “Min manmin yoli i liɛ kɛ Polisifuɛ sa. Blɛ kwlaa nun’n, fɔ nga n dili’n yɛ ɔ kunndɛ ɔ.”
8 Kpɛ sunman kɛ be tu e fɔ’n, ɔ yo e kɛ be kloman e sa sa. Biblu’n di i nanwlɛ kɛ fɔ nga be tu e’n, kannzɛ bɔbɔ ɔ ti su’n, sanngɛ i nun sɔlɛ’n ti kekle. (Ebr. 12:11) ?Ngue yɛ ɔ kwla uka amun naan amun a ɲan fɔ nga be tu amun’n i su ye ɔ? Like cinnjin kun m’ɔ fata kɛ ɔ tran amun klun’n, yɛle kɛ klolɛ’n ti yɛ amun si nin amun nin’m be man amun afɔtuɛ ɔ. (Nya. 3:12) Be waan bé úka amun naan amun wla nzuɛn tɛ’n i ase naan amun fɛ i kpafuɛ’n. Be wun i wlɛ kɛ sɛ b’a kleman amun atin’n, ɔ ti kɛ kpɔlɛ yɛ be kpɔ amun sa! (An kanngan Nyanndra Mun 13:24 nun.) Asa kusu maan amun wun i wlɛ kɛ, like nga bé súan’n, sɛ b’a fɔnman’n be simɛn i yo. Ɔ maan kɛ be kle amun atin’n, ngwlɛlɛ ng’ɔ o ndɛ nga be kannin’n nun’n yɛ ɔ fata kɛ amun nian ɔn. Biblu’n waan: “Mmlusuɛ nga be nyɛn i [ngwlɛlɛ’n] su’n, i nyrun ba nyan tra jɛtɛ ufue su mmlusuɛ liɛ’n. Ngwlɛlɛ’n i su like ng’ɔ nyɛn i’n, i kpa tra sika ɔkwlɛ.”—Nya. 3:13, 14.
9. ?Kɛ ɔ yo naan gbanflɛn nin talua’m be akunndan ka like nga be yoli be m’ɔ loli be ngasi’n i su sa trilili’n, ngue yɛ ɔ fata kɛ be yo ɔ?
9 Siɛ nin niɛn’m be kusu be fɔn wie. (Zak 3:2) Atrɛkpa’n kɛ bé tú amun fɔ’n, ndɛ nga be kan’n, be bumɛn i sin naan b’a kan. (Nya. 12:18) ?Ngue ti yɛ be kwla yo sɔ ɔ? Wie liɛ’n sa wie sanngan be akunndan’n annzɛ ɔ yo be kɛ sɛ amun fɔn’n, ɔ fin be bɔbɔ. Like nga be yoli amun m’ɔ loli amun ngasi’n, nán maan amun akunndan’n ka su sa trilili. Sanngɛ amun kle kɛ be ɲin nga be miɛn i kɛ bé úka amun’n, ɔ yo amun fɛ. Kɛ be tu amun fɔ’n sɛ amun sɔ nun klanman’n, kɛ amún wá yó kpɛnngbɛn’n i sɔ’n yó amun ye.
10. ?Kɛ amun si nin amun nin’m be kpɛ mmla mun annzɛ be tu amun fɔ’n, wafa sɛ yɛ amun kwla sɔ nun klanman ɔn?
10 ?Mmla nga amun si nin amun nin’m be kpɛ be’n, ɔ nin fɔ nga be tu amun’n, amun kunndɛ kɛ be su falɛ’n yo pɔpɔ man amun? Sɛ ɔ ti sɔ’n, ɔ fata kɛ wafa nga amun koko yalɛ’n, ɔ yo kpa tra laa’n. ?Wafa sɛ yɛ amun kwla yo sɔ ɔ? I klikli’n yɛle kɛ sɛ be kan ndɛ’n amun sie amun su tie. Biblu’n waan: “Maan sran’m be kwlakwla be sie be su be tie ndɛ nga be kan’n kpa, nán maan sran fi kan ndɛ ndɛndɛ, yɛ nán maan ɔ fa ya ndɛndɛ.” (Zak 1:19) Kɛ be kan ndɛ wie’n, nán amun se kɛ amún kplí amún íjɔ. Sanngɛ amun tra amun awlɛn tie be ndɛ’n. Ndɛ’n bɔbɔ ba’n yɛ ɔ fata kɛ amun nian ɔn, nán wafa nga be kannin ndɛ’n kleli amun’n niɔn. Kɛ be ko wie ijɔ’n, amun kle be kɛ amun wunnin ndɛ nga be kannin’n i wlɛ. Sɛ amun yo sɔ’n, bé wún i wlɛ kɛ amun tili ndɛ nga be kannin’n. ?Yɛ sɛ amun waan amún yíyí like nga ti yɛ amun kannin ndɛ wie annzɛ amun yoli sa wie’n i nun klé be’n nin? Kpɛ sunman’n, nán amun ‘ijɔ plapla.’ Ka naan amun a ijɔ’n, amun dun mmua yo like nga be waan amun yo’n. (Nya. 10:19) Kɛ amun si nin amun nin’m be wun kɛ amun tieli be ndɛ’n, be kusu bé tíe amun liɛ’n wie. Sɛ amun yo sɔ’n, ɔ́ klé kɛ Ɲanmiɛn Ndɛ’n kle amun atin.
Sika ndɛ’n nun
11, 12. (a) ?Sika’n i su afɔtuɛ benin yɛ Ɲanmiɛn Ndɛ’n man e ɔ? ?Yɛ ngue ti ɔ? (b) ?Wafa sɛ yɛ amun si nin amun nin’m be kwla uka amun sika’n i siesielɛ’n nun ɔn?
11 Biblu’n waan: ‘Be fa sika kpli be ti.’ Sanngɛ ndɛ mma kunngba’n kle kɛ ngwlɛlɛ’n ti kpa tra sika. (Aku. 7:12) Ɲanmiɛn Ndɛ’n wla e fanngan kɛ maan e wun i wlɛ kɛ sika’n ti cinnjin. Sanngɛ ɔ se e kɛ nán e klo i. ?Ngue ti ɔ? Maan e nian sunnzun ase nga. Sran nga m’ɔ si laliɛ nun junman di’n, sɛ be fa laliɛ ng’ɔ la kpa’n be mɛn i’n, ɔ kwla fa yo like kpa. Sanngɛ sɛ be fa laliɛ sɔ’n be man sran ng’ɔ siman nun junman di’n, annzɛ sran nga i ɲin kpa like su ndɛndɛ’n, ɔ kwla fa yo i bɔbɔ annzɛ sran wie i like yaya kpa. I wafa kunngba’n, sran ng’ɔ si sika’n i cɛcɛ yo’n, ɔ kwla yo i ye kpa. Sanngɛ be nga “be klo kɛ bé nyán be wun’n,” kpɛ sunman’n be nin be janvuɛ’m be afiɛn saci kpɛkun be nianman be awlo’n i lika. Wie liɛ bɔbɔ’n be yaci Ɲanmiɛn i sulɛ. I agualiɛ su’n, ‘awlaboɛ’n kun be kpo.’—An kanngan 1 Timote 6:9, 10 nun.
12 ?Wafa sɛ yɛ amun kwla si sika’n i cɛcɛ yo ɔ? ?Ngue ti yɛ amun seman amun si nin amun nin’m be kɛ be kle amun wafa nga amun kwla siesie amun sika’n niɔn? Salomɔn klɛli i kɛ: “Sɛ bɔ akunndanfuɛ’n bɔbɔ sie i su ti’n, ɔ́ sí sa uflɛ úka laa liɛ’n su. Sɛ sran nga be ti ngwlɛlɛfuɛ’n be ti’n, bé wún wafa ng’ɔ fata kɛ be nanti’n.” (Nya. 1:5) Talua kun mɔ be flɛ i Ana’n, ɔ usɛli i si nin i nin’m be ngwlɛlɛ afɛ. Ɔ seli kɛ: “Min si kleli min wafa ng’ɔ fata kɛ n siesie min sika’n. Kpɛkun ɔ kleli min kɛ like nga n fa awlobo’n i sika’n n yo’n i siesielɛ’n ti cinnjin kpa.” Ana i manmin’n kleli i ajalɛ kpa wie mun. Ana waan: “Ɔ kleli min kɛ ka naan m’an to like kun’n, ɔ fata kɛ n usɛusɛ i gua lika kpanngban nun naan n nian nga i gua’n yo fɛ’n.” ?Ajalɛ sɔ’n i su ye benin yɛ Ana ɲɛnnin i ɔ? Ɔ tɛ su kɛ: “Siɛn’n n kwla nian like nga n fa min sika’n n yo’n su kpa. N totoman ninnge’m be finfin. Ɔ maan kɛ n faman kalɛ ngbɛnngbɛn’n ti’n, min wla’n gua ase.”
13. ?Sika’n i dilɛ’n nun’n, wafa sɛ yɛ amun kwla nian amun wun su ɔ?
13 Sɛ amun toto ninnge’m be finfin annzɛ amun janvuɛ’m be ti yɛ amun to be’n, amún tɔ́ kalɛ nun ndɛndɛ kpa. ?Ngue yɛ ɔ kwla uka amun naan amun a tɔmɛn i sɔ aya’n nun ɔn? Sika’n i dilɛ’n nun’n, ɔ fata kɛ amun suan amun wun su nianlɛ. I sɔ yɛ Elena m’ɔ le afuɛ 20 tra su kan’n, ɔ yoli ɔ. I waan: “Ka naan e nin min janvuɛ mun y’a fite’n, n dun mmua m bu sika nga ń dí’n i akunndan n sie. [...] N wunnin i wie kɛ be nga be yoman be sika’n i finfin’n, mɔ be wla min fanngan kɛ nán n tɔ su n to ninnge mun’n, sɛ e nin be sɔfuɛ mun yɛ e kɔ gua bo’n, ɔ ti kpa.”
14. ?Ngue ti yɛ ɔ fata kɛ amun nian amun wun “anyanbeun i klolɛ’n” i lika ɔ?
14 Sika ɲanlɛ’n nin i siesielɛ’n ti cinnjin kpa e mɛn dilɛ’n nun. Sanngɛ Zezi seli kɛ be nga be di aklunjuɛ kpafuɛ’n, yɛle be nga “be si kɛ be di Nyanmiɛn ninnge’m be yalɛ’n.” (Mat. 5:3) Ɔ wlali e su nun kɛ ninnge kɛ “anyanbeun i klolɛ’n” sa’n, be kwla saci sran. Ɔ maan sran sɔ’n su fɛmɛn i wun wlɛmɛn i Ɲanmiɛn ninnge’m be nun kun. (Mar. 4:19) I sɔ’n ti’n, ɔ ti cinnjin kpa kɛ amun yo sa nga Ɲanmiɛn Ndɛ’n kle amun’n, naan amun bu sika’n kɛ ɔ nin i fata’n sa!
Kɛ amun ngunmin amun o’n
15. ?Blɛ benin nun yɛ Ɲanmiɛn i ndɛ’n i su falɛ titi’n kwla yo kekle man amun ɔn?
15 ?Blɛ benin nun yɛ Ɲanmiɛn i ndɛ’n i su falɛ titi’n kwla yo kekle kpa man amun ɔn? ?Kɛ amun nin sran’m be o’n annzɛ kɛ amun ngunmin amun o’n? Kɛ amun o suklu lɔ’n annzɛ junman su lɔ’n, amun nian amun wun su kpa naan like wie w’a saciman amun nin Ɲanmiɛn be afiɛn. Sanngɛ wunmiɛn lolɛ blɛ’n nun mɔ amun nianman amun wun su’n, yɛ amun kwla fɔn Ɲanmiɛn i mmla mun ɔn.
16. ?Ngue ti yɛ kɛ amun ngunmin amun o’n, ɔ fata kɛ amun fa Zoova i ndɛ’n su ɔ?
16 ?Ngue ti yɛ kɛ amun ngunmin amun o’n, ɔ fata kɛ amun fa Zoova i ndɛ’n su ɔ? Maan amun wla kpɛn su kɛ amun kwla yo maan Zoova fa ya annzɛ i klun jɔ. (Bob. 6:5, 6; Nya. 27:11) Ninnge nga amun yo be’n be kan Zoova, afin “ɔ nian amun lika.” (1 Piɛ. 5:7) Ɔ kunndɛ kɛ amun tie i nuan ndɛ’n naan amun ɲan ye. (Eza. 48:17, 18) Izraɛlifuɛ’m be blɛ su’n, kɛ Zoova i sufuɛ wie’m b’a fɛmɛn i ndɛ’n su’n, ɔ yoli i ya. (Jue. 78:40, 41) Sanngɛ Zoova kloli i nuan ijɔfuɛ Daniɛli kpa. I ti’n, anzi kun flɛli Daniɛli kɛ ‘Nyanmiɛn i awlɛn su sran.’ (Dan. 10:11) ?Ngue ti ɔ? Afin sran’m be afiɛn o annzɛ kɛ Daniɛli i ngunmin o’n nin o, ɔ fali Ɲanmiɛn i ndɛ’n su titi.—An kanngan Daniɛl 6:11 nun.
17. ?Be ɲin su yiyilɛ ninnge’m be nun’n, kosan benin yɛ amun kwla fa usa amun wun ɔn?
17 Kɛ amun ngunmin amun o’n, sɛ amun kunndɛ kɛ amún fá Ɲanmiɛn i ndɛ’n su titi’n, ɔ fata kɛ amun ‘kunndɛ sa ng’ɔ ti kpa’n nin tɛ’n be ngbaciɛ lele be si i kpa.’ Sɛ amun yo like nga amun si kɛ sɛ amun yo ɔ, ɔ ti kpa’n yɛ amun kwla yo sɔ ɔ. (Ebr. 5:14) I wie yɛle jue nga amun tie’n, ɔ nin flimu nga amun nian be’n, annzɛ ɛntɛnɛti’n i lika nga amun kɔ lɔ’n. Kosan nga’m bé wá úka amun naan amun a wun sa ng’ɔ ti kpa’n naan amun a faman tɛfuɛ’n. Be yɛ: ‘?Like sɔ’n yó maan ń sí aunnvuɛ annzɛ ɔ́ yó maan ‘sɛ ndɛ nyan min wiengu-ɔ ń srí i’?’ (Nya. 17:5) ‘?Ɔ́ yó maan ‘klun ufue yolɛ’n yɛ ɔ́ trán min awlɛn’n nun’ annzɛ ɔ́ yó maan kɛ be se kɛ ‘nán e fa sa tɛ yolɛ’n e sie e awlɛn’n nun’n,’ i sɔ yolɛ’n yó kekle mán min?’ (Amɔ. 5:15) Kɛ amun ngunmin amun o’n, like nga amun yo’n, ɔ yi like ng’ɔ ti amun cinnjin kpa’n i nglo.—Lik 6:45.
18. ?Sɛ nvialiɛ nun’n, amun yoli sa wie m’ɔ timan kpa’n, ngue yɛ ɔ fata kɛ amun yo ɔ? ?Yɛ ngue ti ɔ?
18 ?Sɛ nvialiɛ nun’n, amun yoli sa wie mɔ amun si kɛ ɔ timan kpa’n, ngue yɛ ɔ fata kɛ amun yo ɔ? Nán amun wla fi su kɛ “sran ng’ɔ fia sa tɛtɛ ng’ɔ yo be’n be su’n, ɔ yo-man kpa. Sanngɛ sran ng’ɔ kɛn i sɔ sa liɛ mun’n, b’ɔ yaci be yolɛ’n, Nyanmiɛn’n yaci i wun sa’n cɛ i.” (Nya. 28:13) Sɛ titi amun yo sa tɛ’n naan ‘an bo Nyanmiɛn Wawɛ’n i wla’n,’ nanwlɛ i sɔ’n ti sinnzin dilɛ! (Efɛ. 4:30) Ɔ fata kɛ amun di sa tɛ nga amun yoli’n i nanwlɛ kle Ɲanmiɛn nin amun si ɔ nin amun nin. Amun bɔbɔ amun kpa yolɛ ti ɔ. I sɔ yolɛ’n nun’n, “asɔnun kpɛnngbɛn mun” be kwla uka amun kpa. Zezi i sɔnnzɔnfuɛ Zaki seli kɛ: ‘Maan be gua [sa tɛ yofuɛ’n] i su ngo e Min’n i dunman nun yɛ be srɛ Nyanmiɛn kɛ ɔ yo i juejue. Nyanmiɛn su bɔ be lafi’n ti’n, Nyanmiɛn srɛlɛ sɔ’n maan tukpacɛfuɛ sɔ’n nyɛ́n i ti, yɛ e Min’n maan ɔ́ jáso. Yɛ sɛ ɔ yoli sa wie’n, ɔ́ yáci cɛ́ i.’ (Zak 5:14, 15) Ɔ ti su kɛ i sɔ yolɛ’n kwla kun ɲannzuɛn annzɛ ɔ kwla yo maan kekle kan tɔ amun su. Sanngɛ sɛ amun tra amun awlɛn kunndɛ ukalɛ’n, ɲrɛnnɛn dan kpa ng’ɔ fata kɛ ɔ ɲan amun’n, ɔ su ɲanman amun. Kpɛkun amun akunndan’n m’ɔ su buman amun fɔ kun’n ti’n, amun wla’n gúa ase.—Jue. 32:1-5.
Amun yo maan Zoova i klun jɔ
19, 20. ?Ngue yɛ Zoova kunndɛ kɛ amun ɲɛn i ɔ? ?Sanngɛ ngue yɛ ɔ fata kɛ amun yo ɔ?
19 Zoova ti Ɲanmiɛn m’ɔ ‘di aklunjuɛ’ ɔ. Yɛ ɔ kunndɛ kɛ amun di aklunjuɛ wie. (Jue. 104:31) Amun ndɛ lo i kpa. Kannzɛ bɔbɔ sran uflɛ’m be wunman amun ɲin nga amun mian naan amun a yo sa kpa’n, sanngɛ i liɛ’n ɔ wun i. Like wie fi sa nunman lɛ mɔ Zoova wunmɛn i ɔ. Sɛ ɔ nian amun’n, nán kɛ ɔ su sasa amun naan ɔ́ trá amun ti ɔ. Sanngɛ ɔ kunndɛ kɛ ɔ́ súan amun bo naan amun yo sa kpa. Ɲanmiɛn “nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 Nyo. 16:9.
20 I sɔ’n ti’n, amun yaci Ɲanmiɛn Ndɛ’n nun maan ɔ kle amun atin. Kpɛkun amun fa afɔtuɛ ng’ɔ man amun’n su. Sɛ amun yo sɔ’n, amún sí ngwlɛlɛ ng’ɔ fata kɛ amun si i’n, naan amun a kwla jran sa kekleekle nga be tɔ amun su’n be ɲrun. Kpɛkun amún kwlá fá ajalɛ kpa. Sɛ amun yo sɔ kusu’n, amun si nin amun nin ɔ nin Zoova be klun jɔ́. Sanngɛ nɛ́n i ngba ɔ. Amun bɔbɔ amún dí aklunjuɛ wie.
[Ja ngua lɛ ndɛ’n]
a Be kacili dunman mun.
?Amún tɛ́ su sɛ?
• ?Kɛ siɛ nin niɛn’m be kpɛ mmla annzɛ be tu gbanflɛn nin talua’m be fɔ’n, wafa sɛ yɛ be kwla sɔ nun klanman naan b’a ɲan su ye ɔ?
• ?Ngue ti yɛ ɔ ti cinnjin kpa kɛ sika’n i wun akunndan nga e bu’n, ɔ yo kpa ɔ?
• ?Kɛ amun ngunmin amun o’n, wafa sɛ yɛ amun kwla fa Zoova i ndɛ’n su titi ɔ?