Yasua mun, an sie amun yi mun kɛ Klist sie sran mun’n sa
‘Klist yɛ ɔ sie yasua ɔ.’—1 KORƐNTFUƐ MUN 11:3.
1, 2. (a) ?Ngue su yɛ e kwla jran e se kɛ yasua kun ti yasua kpa ɔ? (b) ?Ngue ti yɛ ɔ ti cinnjin kpa kɛ yasua kun wun i wlɛ kɛ Ɲanmiɛn yɛ ɔ kpɛli aja’n i ba ɔ?
?NGUE su yɛ e kwla jran e se kɛ sran kun ti yasua kpa ɔ? ?Ngwlɛlɛ m’ɔ si i’n annzɛ wunmiɛn m’ɔ le i’n, annzɛ sika m’ɔ si i kunndɛ’n niɔn? ?Annzɛ kusu nɛ́n i yi nin i mma m’ɔ klo be m’ɔ nian be lika’n niɔn? I lɛ nun’n, yasua sunman be yoman sɔ. ?Ngue ti ɔ? Afin angunndan nga sran’m be bu’n yɛ be bu ɔ. Be buman Ɲanmiɛn i like fi naan se kɛ i mmla’m be su yɛ bé fá ɔ. Sanngɛ nn Ɲanmiɛn yɛ ɔ ‘fali yasua’n i nvɛnma kun fa yili bla naan w’a fɛ i w’a ɔ yasua’n wun lɔ’ ɔ.—Bo Bolɛ 2:21-24.
2 I nun mɔ Zezi o asiɛ’n su wa’n, ɔ kɛnnin i weiin kɛ Ɲanmiɛn yɛ ɔ kpɛli aja’n i ba ɔ. Ɔ seli kɛ: ‘Kɛ Ɲanmiɛn yí sran’n, ɔ yili yasua nin bla naan w’a se kɛ: “I sɔ’n ti yɛ maan yasua kpáci i si nin i nin yɛ ɔ́ fɛ́ i wun mɛ́ntɛn i yi yɛ be nɲɔn’n bé káci sran wunmuan’n niɔn.” ?An nin a kɛnngɛnmɛn i le? Kɛ ɔ ko yo sɔ’n, be timan sran nɲɔn kun, sanngɛ be ti sran wunmuan. Ɔ maan like nga Ɲanmiɛn kan be bo nun’n, nán maan sran fi ti be nun.’ (Matie 19:4-6) Ɔ maan, yasua ng’ɔ bu Ɲanmiɛn m’ɔ kpɛli aja’n i ba’n i angunndan m’ɔ nanti i mmla mɔ be o Biblu’n nun’n su’n, i sɔfuɛ’n i aja’n yó kpa.
?Yasua kpa’n yɛle onin?
3, 4. (a) ?Ngue ti yɛ Zezi si aja’n i nun ndɛ kpa ɔ? (b) ?Wan yɛ sɛ é kwlá sé’n, ɔ ti Zezi i yi’n niɔn? ?Yɛ wafa sɛ yɛ ɔ fata kɛ yasua’m be yo be yi mun ɔn?
3 Yasua ng’ɔ kunndɛ kɛ ɔ́ yó yasua kpa’n, ɔ fata kɛ ɔ suan Zezi nuan ndɛ’n naan ɔ niɛn i ajalɛ’n su. Zezi si aja’n i nun ndɛ kpa. Afin kɛ Ɲanmiɛn yí yasua nin bla’n m’ɔ́ já be’n, ɔ wunnin nun. Ɲanmiɛn Zoova seli kɛ: ‘E yi sran kɛ e bɔbɔ sa cɛ, maan ɔ fa e.’ (Bo Bolɛ 1:26) Sran nga Ɲanmiɛn se i sɔ lɛ’n, yɛle Zezi mɔ Ɲanmiɛn bɔbɔ dun mmua yili i naan w’a yi ninnge kwlaa’n. Blɛ sɔ nun’n, ɔ ‘o Ɲanmiɛn i wun lɛ nn i sa o junman’n su.’ (Nyanndra Mun 8:22-30) I yɛ ɔ ti Ɲanmiɛn i ‘Wa Kpɛn’n’ niɔn.—Kolɔsfuɛ Mun 1:15.
4 Cɛn kun’n, anzi kun seli sran kun kɛ: ‘Bla maan n kle wɔ atɔnvlɛ’n, m’ɔ ti Bua Gbaflɛn’n i yi’n.’ Zezi yɛ Biblu’n flɛ i kɛ ‘Ɲanmiɛn Bua Gbaflɛn’n’ niɔn. Ɔ kɛn i ndɛ kɛ sran mɔ w’a ja bla’n sa. (Zan 1:29; Sa Nglo Yilɛ 21:9) ?Yɛ wan yɛ ɔ ti i atɔnvlɛ bla’n niɔn? Klistfuɛ nga Ɲanmiɛn kpali be sieli be ngunmin mɔ be nin Klist bé dí famiɛn ɲanmiɛn su lɔ’n be wunmuan’n, be ti kɛ bla kun sa. Be yɛ be ti ‘Bua Gbaflɛn’n i yi’n’ niɔn. (Sa Nglo Yilɛ 14:1, 3) Ɔ maan, wafa nga Zezi yoli i sɔnnzɔnfuɛ sɔ mun asiɛ’n su wa’n, ɔ fata kɛ yasua’m be nian su be yo be yi mun wie.
5. ?Wan mun yɛ ɔ fata kɛ be nanti Zezi i ajalɛ’n su kpa ɔ?
5 Biblu’n waan: ‘Klist bɔbɔ wunnin ɲrɛnnɛn. Ɔ yoli sɔ kɛ an nian su naan an nanti i ajalɛ liɛ’n su.’ (1 Piɛr 2:21) Ndɛ sɔ’n kle kɛ, ɔ fata kɛ Zezi i sɔnnzɔnfuɛ’m be kwlaa be nanti i ajalɛ’n su. Sanngɛ be ng’ɔ fata kɛ be nanti su kpa’n, yɛle yasua mun. Afin Biblu’n waan: ‘Klist yɛ ɔ sie yasua ɔ, yasua kusu yɛ ɔ sie bla ɔ, yɛ Ɲanmiɛn kusu sie Klist.’ (1 Korɛntfuɛ Mun 11:3) Mmla sɔ mɔ Ɲanmiɛn mannin m’ɔ kle sran ng’ɔ sie i wiengu’n, kɛ awlo nunfuɛ’m be nanti su’n, awlo’n taka kpa yɛ be di aklunjuɛ. I sɔ’n ti’n, wafa nga Zezi nin i sɔnnzɔnfuɛ mɔ be ti kɛ i yi sa’n be trannin klolɛ su’n, ɔ fata kɛ yasua’m be nin be yi’m be tran sɔ wie.
Yasua nin i yi be afiɛn ndɛnngan’n i siesielɛ
6. ?Wafa sɛ yɛ ɔ fata kɛ yasua’m be nin be yi’m be tran ɔn?
6 Andɛ mɛn’n w’a yo kekle. I sɔ’n ti’n, ɔ fata kɛ yasua’m be nian Zezi i awlɛn tralɛ’n, ɔ nin i sran klolɛ’n su. Kpɔkun wafa ng’ɔ jrannin Ɲanmiɛn mmla’n su cinnjinjin’n, maan be nian su. (2 Timote 3:1-5) Wafa nga Zezi nin sran’m be trannin’n, ɔ kle yasua’m be ajalɛ. I sɔ’n ti’n, Biblu’n waan: ‘Nja mun, kɛ mɔ an si kɛ amun yi’m be wunmiɛn’n juman amun liɛ nun’n, amun nin be tran kpa.’ (1 Piɛr 3:7) Ɔ maan, sɛ ndɛnngan tɔ yasua’n nin i yi be afiɛn’n, ɔ fata kɛ yasua’n si ndɛ’n i bo naan w’a wun i trawlɛ. I sɔ yɛ Zezi yoli ɔ. Sa nga be tɔli i su’n, be nin a tɔman sran fi su le. Sanngɛ ɔ si sa sɔ’m be bo, ɔ si kɛ be fin mmusu’m be si Satan. (Zan 14:30; Efɛzfuɛ Mun 6:12) I sɔ’n ti’n, sa nga be tɔli Zezi su’n b’a fumɛn i nun le. I sɔ kunngba’n, kɛ yasua nin bla’n be ‘wun be ɲinsu’n,’ ɔ fataman kɛ i sɔ’n fu be nun. Afin Biblu’n kɛnnin i weiin kɛ be nga be ja bla nin bian’n, bé wún be ɲin su.—1 Korɛntfuɛ Mun 7:28.
7, 8. (a) ?Kɛ mɔ yasua’n si bla’n, wafa sɛ yɛ ɔ fata kɛ ɔ nin i be tran ɔn? (b) ?Ngue ti yɛ ɔ fata kɛ yasua’m be yɛyɛ be yi mun ɔn?
7 Biblu’n kan wafa ng’ɔ fata kɛ yasua’m be nin be yi’m be tran’n, i ndɛ. I waan: ‘Kɛ mɔ an si kɛ amun yi’m be wunmiɛn’n juman amun liɛ nun’n, amun nin be tran kpa. An bu be sran.’ (1 Piɛr 3:7) Biblu’n seli kɛ cɛn wie lele’n, yasua’m bé síe be yi mun mianmianlɛ nun. Sanngɛ, yasua nga Ɲanmiɛn klun jɔ i wun’n, ɔ su yoman sɔ. I liɛ’n, ɔ́ bú i yi’n i sran. (Bo Bolɛ 3:16) Ɔ fataman kɛ wunmiɛn m’ɔ le i’n ti’n, ɔ yo i yi’n i kpokokpoko. Sanngɛ ɔ fata kɛ sɛ é kwlá sé’n, ɔ yo i yi’n kɛ like m’ɔ le gua kpan’n sa. Kɛ ɔ́ yó ninnge’n, ɔ fata kɛ ɔ bu i yi’n i angunndan, ɔ bu i sran.
8 ?Ngue ti yɛ ɔ fata kɛ yasua’m be bu be yi’m be sran ɔn? Biblu’n waan: ‘Afin ye nga Ɲanmiɛn yoli amun mɔ maan amún ɲán nguan’n, ɔ yoli be wie. Sɛ an yoman sɔ’n, amun nin Ɲanmiɛn su kwlá kokoman yalɛ wafa ng’ɔ ti su’n.’ (1 Piɛr 3:7) Ɔ fata kɛ yasua’m be wun i wlɛ kɛ be nin be yi mɔ be su Zoova’n, Zoova buman be nun kun kpa traman kun. Bla nin yasua nga Ɲanmiɛn sɔ be nun’n, anannganman nguan kunngba’n yɛ bé ɲɛ́n i ɔ. I kpa bɔbɔ’n, bla sunman bé kɔ́ ɲanmiɛn su. Lɔ’n, ‘ɔ leman yasua nin bla.’ (Galasifuɛ Mun 3:28) Ɔ maan yasua mun, ɔ fataman kɛ amun wla fi su kɛ Ɲanmiɛn ɲrun’n, ɔ leman yasua nin bla, ɔ nin bakan. Ɲanmiɛn liɛ’n, sran ng’ɔ nin i nanti klanman’n yɛ ɔ bu i sran kpa ɔ.—1 Korɛntfuɛ Mun 4:2.
9. (a) ?Kɛ nga Piɛli fa kannin’n sa’n, ngue ti yɛ ɔ fata kɛ yasua’m be bu be yi’m be sran ɔn? (b) ?Wafa sɛ yɛ Zezi buli bla’m be sran ɔn?
9 Like cinnjin kpa nga ti yɛ ɔ fata kɛ yasua kun bu i yi’n sran’n, 1 Piɛr 3:7 i atabo’n kɛn i ndɛ weiin. I waan: ‘Sɛ an yoman sɔ’n, amun nin Ɲanmiɛn su kwlá kokoman yalɛ wafa ng’ɔ ti su’n.’ Laa’n, Ɲanmiɛn i sufuɛ wie mɔ be nantiman Ɲanmiɛn i mmla’n su’n, be srɛlɛ’n w’a toman Ɲanmiɛn lɔ. I sɔ kunngba’n, sɛ yasua kun bumɛn i yi’n i sran’n, i srɛlɛ’n su kwlá toman Ɲanmiɛn lɔ. ?I lɛ nun’n, yasua sɔ’n, ɔ́ yó kpa yɛ ɔ o lɛ? (Ngwlɛ Yilɛ 3:43, 44) I sɔ’n ti’n, ɔ fata kɛ Klistfuɛ yasua kwlaa nga be le bla’n, ɔ nin be nga be ɲin o bla jalɛ sin’n, be nian Zezi i liɛ’n su kpa. Bla’m be yoli Zezi i sɔnnzɔnfuɛ wie. Zezi kusu yoli be kpa, ɔ buli be sran. Blɛ wie nun’n, bla mun yɛ ɔ dun mmua yiyili abonuan sa wie nun kleli be ɔ. I sin’n, ɔ seli be kɛ be ko kan kle yasua mun.—Matie 28:1, 8-10; Lik 8:1-3.
Ajalɛ m’ɔ fata kɛ yasua’m be nian su’n
10, 11. (a) ?Ngue ti yɛ ɔ ti cinnjin kpa kɛ yasua’m be nian Zezi i ajalɛ’n su ɔ? (b) ?Wafa sɛ yɛ ɔ fata kɛ yasua’m be klo be yi mun ɔn?
10 E wunnin kɛ Biblu’n nun’n, Klist i sɔnnzɔnfuɛ nga Ɲanmiɛn kpali be sieli be ngunmin’n be akpasua’n, ɔ ti Klist i “atɔnvlɛ.” Naan wafa nga Klist nin i tran’n, i sɔ yɛ ɔ fata kɛ yasua’m be nin be yi’m be tran ɔn. Biblu’n waan: ‘Yasua yɛ ɔ ti bla i su kpɛn kɛ Klist kusu ti Asɔnun i su kpɛn’n sa.’ (Efɛzfuɛ Mun 5:23) ?Wafa sɛ yɛ Zezi m’ɔ ti asɔnun’n i su kpɛn’n, ɔ sieli i sɔnnzɔnfuɛ mun ɔn? Ɔ fata kɛ yasua’m be bu i sɔ liɛ’n i angunndan kpa. I liɛ’n, wafa nga Zezi kloli be m’ɔ niannin be lika’n, bé kwlá wún i wlɛ naan b’a nian su b’a fa yo be yi mun.
11 Biblu’n waan: ‘Yasua mun, kɛ Klist kloli Asɔnun’n, amun kusu an klo amun yi mun sɔ. Afin asɔnun’n ti’n, ɔ fɛ i wun mannin.’ (Efɛzfuɛ Mun 5:25, 26) Efɛzifuɛ’m be fluwa kunngba’n i ndɛ tre 4 nun’n, be flɛli “asɔnun’n” kɛ ‘Klist i wunnɛn.’ Zezi yɛ ɔ ti ‘asɔnun m’ɔ ti i wunnɛn’n i ti’n’ niɔn. Sran ti wunmuan kun, sanngɛ i lika’m be sɔnnin. Kɛ asɔnun m’ɔ ti Klist i wunnɛn’n ti sɔ wie ɔ. Asɔnun sɔ’n nun’n, yasua nin bla kpanngban be o nun. Be yɛ be ti Zezi i wunnɛn’n i likalika mun ɔn. Be kwlaa be di junman likawlɛ naan i wunnɛn sɔ’n w’a yo kpa.—Efɛzfuɛ Mun 4:12; Kolɔsfuɛ Mun 1:18; 1 Korɛntfuɛ Mun 12:12, 13, 27.
12. ?Wafa sɛ yɛ Zezi kleli kɛ ɔ klo asɔnun m’ɔ ti i wunnɛn’n niɔn?
12 Zezi kloli “asɔnun” m’ɔ ti i wunnɛn’n kpa. Like ng’ɔ kle sɔ’n, yɛle kɛ be ng’ɔ fali be kɛ be yo asɔnun’n i nunfuɛ’n, be ndɛ loli i. I wie yɛle kɛ cɛn kun mɔ i sɔnnzɔnfuɛ’m be fɛli’n, ɔ seli be kɛ: ‘An bla maan e wɔ e ngunmin e ko lo wunmiɛn kan.’ (Mark 6:31) Cɛn kun ekun’n, like ng’ɔ yoli ka naan b’a trɛ i b’a kun i’n, i akoto kun kɛnnin i ndɛ. Ɔ seli kɛ: ‘Zezi klo i fuɛ nga be o mɛn’n nun’n, ɔ klo be lele guɛ i ti nin i bo.’ (Zan 13:1) ?Nɛ́n i sɔ wie yɛ ɔ fata kɛ yasua’m be nin be yi’m be tran ɔn?
13. ?Wafa sɛ yɛ Biblu’n waan yasua’m be klo be yi mun ɔn?
13 Akoto Pɔlu fali yasua’m be ɲin sieli i Zezi i ajalɛ’n su ekun. Ɔ seli kɛ: ‘Yasua mun, an klo amun yi mun kɛ an fa klo amun bɔbɔ amun wun’n sa. Sran ng’ɔ klo i yi’n, nn ɔ klo i bɔbɔ wun. Sran fi kpɔmɛn i bɔbɔ wun, sanngɛ ɔ tɛ i wun, ɔ niɛn i wun su kɛ Klist kusu nian Asɔnun’n i lika’n sa. Maan yasua kun klo i yi kɛ ɔ fa klo i bɔbɔ wun’n sa.’—Efɛzfuɛ Mun 5:28, 29, 33.
14. ?Wafa sɛ yɛ yasua’m be nian be bɔbɔ be lika ɔ? ?I sɔ’n kle kɛ ɔ fata kɛ be yo be yi’m be sɛ?
14 Amun bu Pɔlu i ndɛ’n i sin be nian. ?Yasua mennin yɛ i bɔbɔ i ɲinfu ɔ kwla yo i wun like yaya ɔ? ?Yasua mennin yɛ sɛ ɔ fɔn’n, ɔ kwla kpɛ ɲantiaan fa bo i bɔbɔ i wun ɔn? ?Yɛ yasua mennin yɛ ɔ kwla se kɛ ɔ́ sókpɛ i bɔbɔ i wun i janvuɛ’m be ɲrun, annzɛ kusu ɔ́ íjɔ i konviabo i bɔbɔ i sa tɛ’n m’ɔ yoli’n su ɔ? Nanwlɛ, sɛ yasua sɔ’n kpɛn su’n, ɔ su kwlá yomɛn i sɔ ngalɛ’n wie fi! ?Yɛ nn ɔ yo sɛ ti yɛ sɛ bla fɔn’n, bé jrán su bé kpɛ́ i nzowa annzɛ bé yó i like yaya ɔ? Nanwlɛ, yasua mun, ɔ fataman kɛ an bu amun ngunmin be wun angunndan. Sanngɛ amun bu amun yi’m be angunndan wie.—1 Korɛntfuɛ Mun 10:24; 13:5.
15. (a) ?Kɛ Zezi i sɔnnzɔnfuɛ’m b’a yoman like ng’ɔ seli be kɛ be yo’n, ngue yɛ ɔ yoli ɔ? (b) ?Afɔtuɛ mennin yɛ i ajalɛ sɔ’n man e ɔ?
15 Kɔnguɛ nga bé wá trá Zezi bé kún i’n, i sɔnnzɔnfuɛ’m b’a kwlá yoman like ng’ɔ seli kɛ be yo’n. Sanngɛ, w’a yiman be ase. Afin amun nian. Kɔnguɛ sɔ’n nun m’ɔ nin be o lika mɔ be flɛ i Zɛtsemane lɔ’n, ɔ seli be flannin nun kɛ be tran be ɲin su naan be srɛ. Sanngɛ i kpɛ nsan su m’ɔ́ wún be’n, be su lafi. Kpɔkun be o lɛ ɔ, sonja’m b’a fu be nun. Kɛ ɔ yoli sɔ’n, Zezi usali sonja mun kɛ: “?An su kunndɛ wan?” Yɛ be tɛli i su kɛ: ‘Zezi m’ɔ fin Nazarɛti’n yɛ e kunndɛ i ɔ.’ Kpɔkun, kɛ mɔ Zezi si kɛ i liɛ’n ‘w’a wie’ ti’n, ɔ seli be kɛ: ‘N se amun kɛ min yɛ. Sɛ min yɛ an kunndɛ min’n, an yaci be nga’m be nun maan be wɔ.’ Ndɛ sɔ’n kle weiin kɛ Zezi i ɲin w’a kpaman i sɔnnzɔnfuɛ’m be su le. Ɔ yoli maan sonja’m b’a yoman be like fi. Nanwlɛ, be ndɛ loli i dan. Yasua mun, amun kusu an nian Zezi i ajalɛ’n su kpa. I liɛ’n, wafa nga amun nin amun yi’m bé trán’n, amún wún i wlɛ.—Zan 18:1-9; Mark 14:34-37, 41.
Zezi kloli sran mun ngwlɛlɛ su
16. ?Zezi bu Marti sɛ? ?Sanngɛ, wafa sɛ yɛ ɔ tuli i fɔ ɔ?
16 Biblu’n waan: ‘Zezi klo Marti nin i niaan bla yɛ Lazar be sa.’ Be flɛli Zezi be awlo lɔ bɔbɔ. (Zan 11:5) Kɛ be flɛli i sɔ’n, ɔ wunnin kɛ Marti ɲin ti blowa be lika nianlɛ’n ti naan i ɲin nunman Ɲanmiɛn ndɛ m’ɔ kan kle be’n su. I lɛ nun’n, Zezi w’a tranman lɛ w’a niɛnmɛn i, ɔ tuli i fɔ. Ɔ seli i kɛ: ‘Marti, Marti, a koko, yɛ ɔ ɲin blo like sunman su. Sanngɛ like kunngba cɛ yɛ ɔ ti kpa ɔ.’ (Lik 10:41, 42) Marti kusu m’ɔ si kɛ Zezi klo i sa’n, w’a totomɛn i ti, ɔ fali afɔtuɛ’n su. Yasua mun, amun kusu an yo kɛ Zezi sa. Yɛle kɛ, sɛ amun yi’m be yo like wie m’ɔ nin i fataman’n, an tu be fɔ. Sanngɛ kɛ amún íjɔ be’n, ɔ fata kɛ an bu ndɛ’n i sin naan an kɛn i amanniɛn su klolɛ su.
17, 18. (a) ?Wafa sɛ yɛ Piɛli ijɔli Zezi ɔ? ?Yɛ ngue ti yɛ ɔ fata kɛ be tu Piɛli fɔ ɔ? (b) ?Ngue yɛ ɔ fata kɛ yasua’m be yo ɔ?
17 Cɛn kun’n, Zezi boli i sɔnnzɔnfuɛ’m be kan klelɛ bo kɛ saan ɔ́ kɔ́ Zerizalɛmu ɔ́ wún ɲrɛnnɛn ‘kpɛnngbɛn mun, nin Ɲanmiɛn ɲrun jranfuɛ dandan mun, ɔ nin mmla klefuɛ’m be sa nun naan bé kún i, yɛ i le nsan su, ɔ́ cɛ́n.’ Kɛ Piɛli tili i sɔ ndɛ’n, ɔ fɛ i ɔli aamiɛn naan w’a ijɔ i. Ɔ seli i kɛ: ‘N kpla e! Nannan, nán maan Ɲanmiɛn di su maan sa nga tɔ wɔ su.’ Nanwlɛ, ndɛ nga Piɛli kɛnnin i lɛ’n, w’a kɛnmɛn i ngwlɛlɛ su. Ɔ maan, ɔ fata kɛ be tu i fɔ. I sɔ’n ti’n, Zezi seli i kɛ: ‘Satan fa jao min wun lɛ, a su saci min ti nun, afin wɔ angunndan’n timan Ɲanmiɛn liɛ, sran liɛ ɔ.’—Matie 16:21-23.
18 Like nga Zezi waan bé wá fá yó i lɛ’n, ɔ ti Ɲanmiɛn klun sa. Yɛle kɛ, bé klé i ɲrɛnnɛn naan bé kún i. (Jue Mun 16:10; Ezai 53:12) Ɔ maan ijɔlɛ mɔ Piɛli ijɔli i’n, ɔ leman bo. I sɔ’n ti’n, ɔ fata kɛ be tu Piɛli i fɔ kekle kpa. E kusu ɔ ju wie’n, ɔ fata kɛ be tu e fɔ sɔ. I sɔ kunngba’n, ɔ fata kɛ yasua m’ɔ sie awlo’n, ɔ tu i yi nin i mma’m be fɔ. Wie liɛ’n, fɔ tulɛ’n kwla yo kekle. Sanngɛ kusu’n, ɔ fata kɛ ɔ yo i nuan su klolɛ su. Ɔ maan kɛ nga Zezi tinngɛli Piɛli i angunndan’n, ɔ fata kɛ yasua’m be tinngɛ be yi’m be angunndan’n. Ɔ kwla yo be wun siesielɛ’n su. Yɛle kɛ tralɛ nga be wla’n, ɔ nin kɔmin ɲanman’n nin ninnge wie mun ekun sa. Sɛ yasua’n wun kɛ i yi’n yomɛn i sɛsɛ su kɛ ng’ɔ nin Klistfuɛ fata’n sa’n, ɔ nin i kwla koko su yalɛ amanniɛn su naan ɔ kaci.—1 Piɛr 3:3-5.
Sɛ yasua’m be tra be awlɛn ɔ ti kpa
19, 20. (a) ?Ndɛ mennin yɛ ɔ tɔli Zezi i akoto’m be afiɛn ɔn? ?Yɛ wafa sɛ yɛ Zezi siesieli ndɛ sɔ’n niɔn? (b) ?Kɛ Zezi kplili i akoto’m be wun’n, i bo’n guali sɛ?
19 Yasua mun, sɛ amun tu amun awlofuɛ’m be fɔ’n, nɛ́n i sɔ’n ti yɛ bé ká lɛ bé káci be nzuɛn’n niɔn. Zezi bɔbɔ fɛli i sɔnnzɔnfuɛ’m be wun kpa. Cɛn kun m’ɔ nin be fin jasin fɛ’n bolɛ’n, be sili akplowa kɛ bé wún be nun sran ng’ɔ ti dan tra be kwlaa’n. (Mark 9:33-37; 10:35-45) Cɛn kun ekun’n, be sili akplowa kunngba’n. Kɛ ɔ yoli sɔ’n, w’a cɛman yɛ Zezi nin be yiali naan be di Delɛ cɛn kasiɛn’n niɔn. Titi kɛ be yia aliɛ sin kɛ ngalɛ’n sa’n, sran kun wunnzin be wiengu ja. Sanngɛ cɛn sɔ’n nun’n, be nun wie fi w’a yoman. Ɔ maan, Zezi bɔbɔ yɛ ɔ jaso yoli ɔ. Kpɔkun ɔ seli be kɛ: ‘N yoli i sɔ kleli amun naan amun kusu an nian nga n yoli amun’n su yo.’—Zan 13:2-15.
20 Sɛ yasua’m be kan be wun ase kɛ Zezi sa’n, i sɔ’n kwla yo maan be yi’m be uka be. Be su keteman be kɔmin be su. Sanngɛ, kɛ be se kɛ bla’n lo i wun mɛn i wun’n, i sɔ yolɛ’n leman ba. I sɔ’n ti’n, ɔ fata kɛ yasua’n trɛ i awlɛn. Afin amun nian. Kɛ Zezi nin i sɔnnzɔnfuɛ’m be wieli Delɛ cɛn’n i di’n, be bo su lɛ’n, akplowa tɔli i akoto’m be afiɛn ekun kɛ bé wún be nun sran nga be bu i sran tra be kwlaa’n. (Lik 22:24) I sɔ’n kle kɛ sran’n i nzuɛn kacilɛ’n, ɔ timan pɔpɔ. Blɛblɛblɛ yɛ ɔ kaci ɔ. Kɛ ɔ ko kaci’n kusu’n, ɔ yo kpa. I sɔ yɛ akoto’m be wa yoli ɔ.
21. ?Kɛ sa tɔ yasua nin i yi be afiɛn’n, ngue yɛ ɔ fata kɛ yasua’n bu i angunndan naan w’a yo ɔ?
21 Sa nga andɛ be tɔ yasua nin i yi be afiɛn’n, be nin a wunmɛn i sɔ le. Sran sunman be buman nda nga kɛ bé já be wun be tali’n, i like. Sanngɛ yasua mun, amun bu Ɲanmiɛn Zoova m’ɔ ti sran klofuɛ m’ɔ kpɛli aja’n i ba’n i angunndan. Kusu’n, nán e ti kpɔlɛ ngunmin ti yɛ ɔ sunmɛnnin i Wa Zezi asiɛ’n su wa ɔ. Sanngɛ ɔ sunmɛnnin i naan yasua’m be niɛn i ajalɛ liɛ’n su wie.—Matie 20:28; Zan 3:29; 1 Piɛr 2:21.
?Wafa sɛ yɛ amún tɛ́ kosan’m be su ɔ?
• ?Ngue ti yɛ ɔ ti cinnjin kɛ e bu sran ng’ɔ kpɛli aja’n i ba’n i angunndan ɔn?
• ?Wafa sɛ yɛ Biblu’n waan yasua’m be klo be yi mun ɔn?
• ?Wafa sɛ yɛ Zezi yoli i sɔnnzɔnfuɛ mun m’ɔ fata kɛ yasua’m be nian su ɔ?
[Foto, bue 11]
Zezi buli i sɔnnzɔnfuɛ mɔ be fɛli’n be angunndan.
[Foto, bue 12]
Kɛ yasua’m bé tú be yi’m be fɔ’n, ɔ fata kɛ be bu ndɛ nga bé kán’n i sin naan be kɛn i amanniɛn su.