Zoova fɛ i “wawɛ’n man be nga be srɛ i’n”
‘Sɛ amun mɔ an ti sran tɛ’n, an fa like kpa cɛ amun mma mun’n, nn e Si m’ɔ o ɲanmiɛn su lɔ’n kusu, ɔ́ fɛ́ i wawɛ’n mán be nga be srɛ i’n kpɛ blu.’—LIK 11:13.
1. ?Blɛ mennin nun yɛ e kunndɛ kɛ Ɲanmiɛn wawɛ’n jran e sin kpa ɔ?
KƐ SA tɔ Klistfuɛ sunman be su’n, wie liɛ be se kɛ: ‘Sa nga liɛ’n, sɛ Ɲanmiɛn wawɛ’n w’a jranman n sin mlɔnmlɔn’n, n su kwlá fiteman nun!’ ?Amun nin a seman sɔ wie le? Atrɛkpa’n, kɛ be seli amun kɛ tukpaciɛ tɛ wie o amun wun’n, amun seli sɔ. Annzɛ kusu’n kɛ amun yi’n, annzɛ amun wun’n mɔ amun nin i o nun w’a cɛ kpa’n ɔ sacili’n, amun seli sɔ. Annzɛ kɛ amun o lɛ juejue bɔɔ cɛ mɔ awlabɔɛ’n tɔli amun su m’ɔ kacili amun wun tukpaciɛ’n, yɛ amun seli sɔ ɔ. ?Nanwlɛ, blɛ kekle nun’n, w’a yoman amun kɛ sɛ ɔ timan Zoova m’ɔ “kwla like kwlaa yo’n” i wawɛ’n i fanngan nun ti’n, nn amun a kwlá fiteman nun?—2 Korɛntfuɛ Mun 4:7-9; Jue Mun 40:2, 3.
2. (a) ?Sa mennin yɛ ɔ o Klistfuɛ’m be su ɔ? (b) ?Kosan mennin yɛ é wá tɛ́ be su like suanlɛ nga nun ɔn?
2 E mɔ e ti Klistfuɛ kpa’n, andɛ sran mɔ be siman Ɲanmiɛn’n be kle e yalɛ. (1 Zan 5:19) Kpɔkun mmusu’m be si Satan bɔbɔ nin e kun. Afin e ‘fa Ɲanmiɛn mmla’n, nin ndɛ nanwlɛ nga Zezi yili i nglo’n su.’ (Sa Nglo Yilɛ 12:12, 17) Ɔ maan dɔ nga su’n, sɛ Ɲanmiɛn wawɛ’n w’a jranman e sin’n, e liɛ’n su yoman ye mlɔnmlɔn. ?Sanngɛ, ngue yɛ é yó naan Ɲanmiɛn w’a fɛ i wawɛ’n w’a man e titi ɔ? ?Ngue ti yɛ ɲrɛnnɛn blɛ nun’n, e si kɛ Zoova su sisimɛn i bo naan w’a suan e bo ɔ? Ɲanndra nɲɔn wie mɔ Zezi buli’n, be kwla uka e naan y’a tɛ kosan sɔ’m be su.
Maan e srɛ Ɲanmiɛn e jran su
3, 4. ?Ɲanndra mennin yɛ Zezi buli ɔ? ?Yɛ wafa sɛ yɛ ɔ fa kannin Ɲanmiɛn srɛlɛ’n i ndɛ ɔ?
3 Le kun’n, Zezi i sɔnnzɔnfuɛ’m be nun kun seli i kɛ: ‘Nannan, kle e sran nin Ɲanmiɛn be yalɛ kokolɛ’n.’ (Lik 11:1) Zezi buli ɲanndra nɲɔn fa tɛli su. Ɲanndra klikli’n kan bian kun m’ɔ ɲannin aofuɛ’n, i ndɛ. Kpɔkun i nɲɔn su’n, ɔ kan siɛ kun m’ɔ fa like nga i wa’n srɛ i’n fa mɛn i’n, i ndɛ. Amun e fa ɲanndra sɔ mun naan e yiyi be nun kunngunngun e nian.
4 Zezi seli kɛ: ‘An bu i angunndan nian, sɛ amun nun kun le i janvuɛ m’ɔ w’a to i kɔnguɛ afiɛn naan i janvuɛ’n se i kɛ: “Janvuɛ, man min kpaun nsan naan ɔ yo ɔ m’an sie i osu. N janvuɛ kun fin lika w’a to min kɔnguɛ’n, n leman like fi naan m’an fa mɛn i,” sɛ i janvuɛ sɔ’n se i kɛ: “Nán kle n yalɛ, b’a to anuan’n nun, min nin m mma mun y’a la, n kwlá jaoman naan m’an fa kpaun m’an man wɔ’n,” nanwlɛ, nán kɛ ɔ ti i janvuɛ’n ti yɛ maan ɔ́ jáo fá mɛ́n i ɔ, sanngɛ i yalɛ m’ɔ kle i’n ti yɛ maan ɔ́ jáo fá like ng’ɔ miɛn i sa’n mɛ́n i ɔ.’ I sin’n, Zezi yiyili ɲanndra’n nun. Ɔ seli kɛ: ‘Ɔ maan n kusu ń kán klé amun kɛ, an srɛ, bé fá mán amun, an kunndɛ, amún ɲɛ́n i, an bobo, bé tíke amun nuan. Afin sran kwlaa ng’ɔ srɛ like’n, be mɛn i, sran ng’ɔ kunndɛ like’n, ɔ ɲɛn i, yɛ sran ng’ɔ bobo anuan’n, be tike.’—Lik 11:5-10.
5. ?Ɲanmiɛn srɛlɛ nun’n, ngue yɛ bian mɔ Zezi fɛli i ndɛ’n buli ɲanndra’n i ayeliɛ’n kle e ɔ?
5 Zezi i ɲanndra klanman sɔ’n kle e wafa nga kɛ é srɛ́ Ɲanmiɛn’n, ɔ fata kɛ e yo’n. Sɛ e sie i nzɔliɛ kpa’n, Zezi waan sɛ bian’n i janvuɛ’n fali like ng’ɔ miɛn i sa’n mɛnnin i’n, “i yalɛ m’ɔ kle i’n” ti ɔ. (Lik 11:8) Glɛki aniɛn’n nun ndɛ nga be kaci i kɛ ɔ “kle i yalɛ’n,” ndɛ sɔ’n i bo’n yɛle kɛ “sran’n siman ɲannzuɛn.” Titi kɛ be se kɛ sran kun siman ɲannzuɛn’n, nn sran’n timan kpa. Sanngɛ sɛ like kpa kun ti yɛ ɔ siman ɲannzuɛn’n, i sɔ’n ti kpa. I wie yɛle Zezi i ɲanndra’n nun sran m’ɔ ɲannin aofuɛ’n i liɛ’n. Ɲannzuɛn w’a kunmɛn i kɛ ɔ ko srɛ like nga i sa miɛn i wun’n. Kɛ mɔ Zezi kle kɛ bian’n i ayeliɛ sɔ’n ti kpa’n ti’n, ɔ fata kɛ e kusu kɛ é srɛ́ Ɲanmiɛn’n, e jran su kekle kpa. Zoova bɔbɔ kunndɛ kɛ e srɛ, e kunndɛ, yɛ e bobo. Be nga be yo sɔ’n, ɔ́ fɛ́ i ‘wawɛ’n mán be.’
6. ?Wafa sɛ yɛ Zezi blɛ sufuɛ’m be bu aofuɛ nun sɔlɛ’n niɔn?
6 Nán Ɲanmiɛn srɛlɛ m’ɔ fata kɛ e jran su kekle’n, i ngunmin yɛ Zezi kle i ɲanndra’n nun ɔn. Sanngɛ, Zezi kle e like nga ti yɛ ɔ fata kɛ e yo sɔ’n i wie. Sɛ e waan é wún i sɔ liɛ’n i wlɛ kpa’n, amun e fa be nga Zezi buli ɲanndra’n kleli be’n naan e nian wafa nga be bu aofuɛ nun sɔlɛ’n. Biblu’n nun ndɛ mma sunman kle kɛ aofuɛ nun sɔlɛ’n, ɔ ti lalafuɛ’m be nzuɛn. I li Ɲanmiɛn i sufuɛ mun yɛ ɔ ti be cinnjin kpa ɔ. (Bo Bolɛ 18:2-5; Ebre Mun 13:2) Sran ng’ɔ sɔman aofuɛ nun’n, nn ɔ ti klunwifuɛ. (Lik 7:36-38, 44-46) Siɛn’n mɔ y’a wun i wlɛ kɛ ngalɛ’n sa’n, amun e sa e sin Zezi i ɲanndra’n su ekun e nian.
7. ?Zezi i ɲanndra’n nun’n, kɛ bian m’ɔ ɲannin aofuɛ’n ɔ́ kó tínnge i janvuɛ’n, ngue ti yɛ ɲannzuɛn w’a kunmɛn i ɔ?
7 Ɲanndra sɔ’n nun’n, Zezi waan bian kun ɲannin aofuɛ kɔnguɛ afiɛn. Bian’n kunndɛ kɛ ɔ́ sɔ́ i aofuɛ’n nun. Sanngɛ, ɔ leman ‘like fi naan w’a fa mɛn i.’ Yɛ kusu’n, ɔ kwlá yacimɛn i lɛ sa ngbɛn awe nun. Nanwlɛ, bian’n i sa w’a mian! Sɛ i waan ɔ́ fá ɲannzuɛn dí anglannan’n, i nzue’n gúɛ i wue’n nun. I sɔ’n ti’n, ɲannzuɛn w’a kunmɛn i. Ɔ ko toli i janvuɛ’n, ɔ jrɛnnin i anuan’n sin cɔcɔcɔ kɛ ɔ jaso. Ɔ seli i kɛ: “Janvuɛ, man min kpaun nsan.” W’a yacimɛn i janvuɛ’n i yalɛ klelɛ lele ɔ ɲannin like nga i sa miɛnnin i wun’n. Kpaun m’ɔ ɲɛnnin i’n ti’n, ɔ kwla sɔ i aofuɛ’n nun siɛn’n.
Kɛ e sa mian kpa’n, e srɛ kekle kpa
8. ?Ngue ti yɛ kɛ e srɛ Ɲanmiɛn wawɛ’n e jran su ɔ?
8 Like nga ti yɛ ɔ fata kɛ e srɛ e jran su’n, Zezi i ɲanndra’n yi i nglo. Sran mɔ aofuɛ toli i’n, ɔ ko srɛli kpaun. Afin, kpaun yɛ i sa miɛnnin i wun ɔn. (Ezai 58:5-7) I sɔ like m’ɔ lemɛn i’n ti’n, ɔ kwlá sɔmɛn i aofuɛ nun kɛ ng’ɔ nin i fata’n sa. I wie yɛle kɛ Ɲanmiɛn wawɛ’n sa. Sɛ Ɲanmiɛn w’a fɛmɛn i wawɛ’n w’a manman e’n, e su kwlá diman e Klistfuɛ junman’n kɛ ɔ nin i fata’n sa. I sɔ’n ti yɛ e srɛ i kɛ ɔ fɛ i wawɛ’n man e’n niɔn. (Zakari 4:6) Nanwlɛ, sɛ Ɲanmiɛn wawɛ’n nunman e su’n, e liɛ’n kwlá yoman ye mlɔnmlɔn. (Matie 26:41) ?E wun Zezi i ɲanndra’n i nun afɔtuɛ’n i wlɛ siɛn’n? Yɛle kɛ sɛ Ɲanmiɛn wawɛ’n ti e like cinnjin kpa’n, é srɛ́ Ɲanmiɛn é jrán su kɛ ɔ fa man e.
9, 10. (a) Amun fa sunnzun ase kun kle like nga ti yɛ ɔ fata kɛ e srɛ Ɲanmiɛn e jran su kɛ ɔ fɛ i wawɛ’n man e’n. (b) ?Kosan mennin yɛ ɔ fata kɛ e fa usa e wun ɔn? ?Yɛ ngue ti ɔ?
9 ?Wafa sɛ yɛ e kwla fa afɔtuɛ sɔ’n su ɔ? Amun e fa sunnzun ase kun. ?Sɛ kɔnguɛ afiɛn e la lɛ naan e fuɛ kun i wunnɛn’n yo i ya’n, ngue yɛ é yó ɔ? Sɛ i wunnɛn ya’n timɛn i kekle’n, e su ko tinngeman dɔɔtrɔ. Sanngɛ sɛ i awlɛn ba yɛ ɔ yo i ya’n, saan é yó sɔ. Afin, sran’n wo wie nuan. I sɔ kunngba’n sɛ é kwlá sé’n, e Klistfuɛ kpa mun e o wie nuan. Afin Satan m’ɔ ti kɛ ‘asɔmɔli m’ɔ wlanwlan’n’ sa’n, ɔ kunndɛ kɛ ɔ́ dí e. (1 Piɛr 5:8) Ɔ maan, sɛ y’a srɛman Ɲanmiɛn kɛ ɔ fɛ i wawɛ’n man e’n, ɔ́ yó tɛ kpa mán e. Yɛle kɛ e nin Zoova e afiɛn’n sáci. I sɔ’n ti yɛ e srɛ Ɲanmiɛn e jran su kɛ ɔ fɛ i wawɛ’n man e’n niɔn. (Efɛzfuɛ Mun 3:14-16) Sɛ y’a yoman sɔ’n, e su ɲanman wunmiɛn naan y’a ‘tra e awlɛn lele y’a ju i awieliɛ.’—Matie 10:22; 24:13.
10 I sɔ’n ti’n, ɔ ti cinnjin kpa kɛ cɛn kunngun e tran e usa e wun kosan yɛ’n: ‘?N srɛ Ɲanmiɛn n jran su kpa sakpa?’ Nán e wla fi su, sɛ e wun i wlɛ kpa kɛ ɔ fata kɛ Ɲanmiɛn uka e’n, é srɛ́ i é jrán su kpa kɛ ɔ fɛ i wawɛ’n man e.
Like nga ti yɛ e fa e wla gua Ɲanmiɛn su e srɛ i’n
11. ?Wafa sɛ yɛ Zezi fa siɛ kun nin i wa’n be su ɲanndra’n kan Ɲanmiɛn srɛlɛ’n i ndɛ ɔ?
11 Bian mɔ aofuɛ toli i’n i su ɲanndra mɔ Zezi buli’n, ɔ yi angunndan nga sran m’ɔ srɛ like’n, yɛle kɛ sran m’ɔ lafi Ɲanmiɛn su’n ɔ bu’n, i nglo. Kpɔkun like nga sran mɔ be srɛ i’n kwla yo’n, yɛle kɛ like nga Ɲanmiɛn Zoova m’ɔ ti e srɛlɛ’n klo kɛ ɔ́ yó’n, yɛ ɲanndra’n i nɲɔn su mɔ é wá yíyí nun’n, ɔ yi i nglo ɔ. Zezi i ɲanndra sɔ’n yɛ: ‘?Amun nun onin yɛ sɛ i wa se i kɛ ɔ mɛn i kpatra’n, ɔ yaci fa wuo mɛn i ɔ? ?Kusu sɛ ɔ se i kɛ ɔ mɛn i klenzua’n, ɔ fa ɲannglan mɛnnin i ɔ?’ Ɲanndra’n i nun yiyilɛ’n nun’n, Zezi kan guali su kɛ: ‘Sɛ amun mɔ an ti sran tɛ’n, an fa like kpa cɛ amun mma mun’n, nn e Si m’ɔ o Ɲanmiɛn su lɔ’n kusu, ɔ́ fɛ́ i wawɛ’n mán be nga be srɛ i’n kpɛ blu.’—Lik 11:11-13.
12. ?Wafa sɛ yɛ siɛ m’ɔ fa like nga i wa’n srɛ i’n ɔ fa mɛn i’n i su ɲanndra’n, ɔ yi wafa nga Zoova tɛ e srɛlɛ’n su’n i nglo ɔ?
12 Siɛ’n m’ɔ fa like nga i wa’n srɛ i’n fa mɛn i’n, Zezi fɛ i su ɲanndra’n fa yi angunndan nga Zoova bu i be nga be srɛ i’n be lika’n, i nglo. (Lik 10:22) Amun e sie i nzɔliɛ kɛ Zoova timan kɛ sran mɔ ɲanndra klikli’n nun’n, be srɛ i like m’ɔ sisi i bo’n sa. Sanngɛ, ɔ ti kɛ ɲanndra nɲɔn su nun’n siɛ m’ɔ fa like nga i wa’n srɛ i’n, ɔ fa mɛn i’n sa. (Jue Mun 50:15) Sanngɛ i sin’n, Zezi kleli kɛ Zoova i like liɛ’n ng’ɔ man’n, ɔ tra klɔ sran’n i liɛ’n lele. Ɔ kleli kɛ klɔ sran mɔ fɔ’n o i nun m’ɔ ti “sran tɛ’n,” sɛ ɔ fa like kpa cɛ i wa’n, nn e kwla lafi e Si m’ɔ o ɲanmiɛn su lɔ’n i su kɛ ɔ́ mán e sɔ kpɛ blu. Nanwlɛ, Ɲanmiɛn i sufuɛ mɔ be ti kɛ awlo kun nunfuɛ mun sa’n, sɛ be srɛ i kɛ ɔ fɛ i wawɛ’n man be’n, i klunklo su ɔ́ fá mán be!—Zak 1:17.
13. ?Kɛ é srɛ́ Zoova’n, ngue yɛ e kwla fa e wla’n gua su kɛ ɔ́ yó ɔ?
13 ?Afɔtuɛ nga ɲanndra sɔ’n man e’n yɛle mennin? Yɛle kɛ, kɛ é srɛ́ e Si’n m’ɔ o nglo lɔ’n kɛ ɔ fɛ i wawɛ’n man e’n, e kwla fa e wla guɛ i su kɛ i klunklo su ɔ́ fá mán e. (1 Zan 5:14) Yɛ kannzɛ bɔbɔ e srɛ Zoova e jran su sɛ’n, sanngɛ sɛ é kwlá sé’n, ɔ su seman e le kɛ: ‘Nán kle n yalɛ, b’a to anuan’n nun.’ (Lik 11:7) I kpa bɔbɔ’n, Zezi seli kɛ: ‘An srɛ, bé fá mán amun, an kunndɛ, amún ɲɛ́n i, an bobo, bé tíke amun nuan.’ (Lik 11:9, 10) Nanwlɛ, “be kwlaa nga be kpan flɛ Anannganman’n, ɔ mantan be.”—Jue Mun 145:18.
14. (a) ?Kɛ ɲrɛnnɛn tɔ sran wie’m be su’n, angunndan tɛ mennin yɛ be bu ɔ? (b) ?Ngue ti yɛ sɛ ɲrɛnnɛn tɔ e su’n, e kwla fa e wla’n gua Zoova su e srɛ i ɔ?
14 Siɛ kpa’n i su ɲanndra mɔ Zezi buli’n, ɔ kle ekun kɛ Zoova ti kpa lele tra klɔ sran’n. I sɔ’n ti’n, sɛ e nun kun su wun ɲrɛnnɛn’n, ɔ fataman kɛ ɔ bu i kɛ Zoova klun jɔmɛn i wun kun ti yɛ ɔ su wun ɲrɛnnɛn ɔn. Satan m’ɔ ti e kpɔfuɛ dan’n, i yɛ ɔ kunndɛ kɛ e bu i sɔ angunndan’n niɔn. (Zɔb 4:1, 7, 8; Zan 8:44) Sanngɛ Biblu’n i lika fi kleman kɛ e bu i sɔ angunndan’n. Afin Zoova kwlá lakaman e “sa fi nun.” (Zak 1:13) Nanwlɛ, e Si m’ɔ o nglo lɔ’n kwlá manman e like kɛ wuo sa, annzɛ like kɛ ɲannglan sa naan e wun ɲrɛnnɛn. Sanngɛ ɔ fa “like kpa man be nga be srɛ i’n.” (Matie 7:11; Lik 11:13) Sɛ e wun i wlɛ weiin kɛ Zoova ti kpa dan naan ɔ uka e i klunklo su’n, é fá e wla’n gúɛ i su é srɛ́ i kpa. Sɛ e yo sɔ’n, é kwlá kán ndɛ nga jue tofuɛ’n kannin’n wie. Ɔ seli kɛ: ‘Ɲanmiɛn tieli min flɛlɛ’n, ɔ sieli i su min srɛlɛ’n bo.’—Jue Mun 10:17; 66:19.
Wafa nga Ɲanmiɛn wawɛ’n uka e’n
15. (a) ?Ngue yɛ Zezi seli kɛ Ɲanmiɛn wawɛ’n wá yó ɔ? (b) ?Wafa kun nga Ɲanmiɛn wawɛ’n uka e’n yɛle mennin?
15 Ka naan b’a tra Zezi b’a kun i’n, ɔ kannin fɔnvɔlɛ ndɛ ng’ɔ o i ɲanndra’n nun’n flannin nun. Like nga Ɲanmiɛn wawɛ’n wá yó’n, ɔ kɛnnin i ndɛ kleli i akoto mun. Ɔ seli be kɛ: ‘Ń kó srɛ́ e Si’n, yɛ ɔ́ blɛ́ amun sran uflɛ [‘ukafuɛ kun,’ NW] m’ɔ́ úka amun, yɛle Ɲanmiɛn wawɛ’n m’ɔ ti nanwlɛfuɛ’n, ɔ nin amún trán titi.’ (Zan 14:16) Kɛ nga Zezi fa kɛnnin i lɛ’n sa’n, ukafuɛ kun mɔ yɛle Ɲanmiɛn wawɛ’n, ɔ nin i sɔnnzɔnfuɛ’m bé wá trán titi. ?Sanngɛ wafa trele kun nga Ɲanmiɛn wawɛ’n uka e andɛ’n yɛle mennin? Yɛle kɛ, ɔ uka e maan e tra e awlɛn ɲrɛnnɛn fanunfanun nga be tɔ e su’n, be nun. Ukalɛ’n i wafa sɔ’n, akoto Pɔlu mɔ ɲrɛnnɛn tɔli i su wie’n, ɔ dili i nanwlɛ. Fluwa kun m’ɔ klɛli ko mannin Korɛnti lɔ Klistfuɛ mun’n i nun’n, ɔ kannin wafa nga Ɲanmiɛn wawɛ’n ukɛli i’n i ndɛ. Amun e fiti su kan e nian.
16. ?Wafa sɛ yɛ sa m’ɔ o e su’n kwla yo kɛ Pɔlu liɛ’n sa ɔ?
16 I bo bolɛ nun’n, Pɔlu seli i niaan Klistfuɛ mun kɛ ‘tukpaciɛ wie tɔli i su ɔ kɛli i kplo’n nun’ naan ɔ kle i yalɛ kpa. I sin’n, ɔ seli kɛ: ‘M’an srɛ e Min’n Zoova kpɛ nsan kɛ ɔ yi tukpaciɛ sɔ’n min kplo’n nun.’ (2 Korɛntfuɛ Mun 12:7, 8) Pɔlu srɛli Ɲanmiɛn sɔ, sanngɛ tukpaciɛ’n kɛli i kplo’n nun. Kɛ Pɔlu sa’n, atrɛkpa’n sa m’ɔ o e su’n, y’a srɛ Zoova lele sanngɛ ngbɛn ɔn, sa’n tumɛn i bo. ?I lɛ nun’n, é sé kɛ Zoova timan e srɛlɛ’n naan i wawɛ’n ukaman e? Cɛcɛ, nán e se sɔ! (Jue Mun 10:1, 17) Afin amun nian ndɛ nga Pɔlu kɛnnin i kasiɛn’n.
17. ?Wafa sɛ yɛ Zoova tɛli Pɔlu su ɔ?
17 Ɲanmiɛn tɛli Pɔlu su kɛ: ‘Ye nga n yo wɔ’n ɔ ju wɔ, afin kɛ sran’n ɔ leman wunmiɛn’n i nun sɔ’n nun yɛ n yi min wun nglo kɛ n kwla like’n kwlaa yo ɔ.’ Yɛ Pɔlu kusu seli kɛ: ‘Ɔ maan n klun jɔ n fuɛn mɔ n ti’n su naan Klist yi i dan’n m’ɔ ti’n i nglo.’ Pɔlu i ndɛ’n i bue ng’ɔ se kɛ ‘naan Klist yi i nda m’ɔ ti’n i nglo’n,’ Biblu Traduction du Monde Nouveau se kɛ ‘naan Klist i dan m’ɔ ti’n, ɔ yo kɛ tannin sua yɛ ɔ kata n su sa.’ (2 Korɛntfuɛ Mun 12:9; Jue Mun 147:5) Ɔ maan Ɲanmiɛn fanngan nun’n, Pɔlu wunnin kɛ Klist i dan m’ɔ ti’n, ɔ ti kɛ tannin sua m’ɔ kɛtɛ i su’n sa. I sɔ kunngba’n yɛ andɛ Zoova tɛ e srɛlɛ’n su ɔ. Yɛle kɛ sɛ é kwlá sé’n, ɔ fɛ i wawɛ’n kata i sufuɛ’m be su.
18. ?Ngue ti yɛ kɛ sa’m be tɔ e su’n, e kwla tra e awlɛn ɔn?
18 Kɛ nzue’n tɔ dan annzɛ aunmuan’n fita kekle’n, nanwlɛ, tannin sua’n kwlá yoman like fi. Sanngɛ i kwlaa yoli o, ɔ ti fiawlɛ. I sɔ kunngba’n, “Klist i dan m’ɔ ti’n” mɔ sɛ é kwlá sé’n, ɔ kata e su’n, ɔ jranman yalɛ kekleekle annzɛ ɲrɛnnɛn’n i tɛtɛ nga be tɔ e su’n. Sanngɛ kɛ Satan nin i mɛn’n nunfuɛ’m be nin e kun’n, ɔ sasa e naan y’a kwla su Ɲanmiɛn titi. (Sa Nglo Yilɛ 7:9, 15, 16) I sɔ’n ti’n, kannzɛ ɲrɛnnɛn’n o e su naan ɔ ka ‘e kplo’n nun’n,’ maan e si kɛ Zoova wun e afɛ’n naan kɛ e “kpan flɛ” i’n, ɔ ti. (Ezai 30:19; 2 Korɛntfuɛ Mun 1:3, 4) Pɔlu seli kɛ: ‘E kwla fa e wla’n kwlaa guɛ i Ɲanmiɛn su, afin ɔ kplinman su kɛ sa ng’ɔ sɔnman e nun’n ɔ tɔ e su. I sɔ’n ti’n, sɛ sa tɔ e su’n, ɔ́ yó maan ɔ́ sɔ́n e nun yɛle kɛ ɔ́ yó sa nga mɔ maan é fíte nun’n.’—1 Korɛntfuɛ Mun 10:13; Filipfuɛ Mun 4:6, 7.
19. ?Ngue yɛ amun kunndɛ kɛ amun mian amun ɲin be yo ɔ? ?Yɛ ngue ti ɔ?
19 Andɛ mɛn tɛ nga mɔ sran’m be siman Ɲanmiɛn yɛ nun’n, kɛ ɔ́ “kɔ́ i buɛ nuan’n,” nn “lika’n ɔ́ yó kekle.” (2 Timote 3:1) Sanngɛ Ɲanmiɛn i sufuɛ’m be kwla suɛn i sɔ liɛ’n i bo. Afin, be nga be fa be wla’n gua Ɲanmiɛn su be srɛ i tantrantan’n, ɔ fɛ i wawɛ’n fa suan be bo yɛ ɔ fa sasa be. I sɔ’n ti’n, maan e srɛ Ɲanmiɛn cɛn kwlaa kɛ ɔ fɛ i wawɛ’n man e.—Jue Mun 34:7; 1 Zan 5:14, 15.
?Wafa sɛ yɛ amún tɛ́ kosan’m be su ɔ?
• ?Ngue yɛ ɔ fata kɛ e yo naan Ɲanmiɛn w’a fɛ i wawɛ’n w’a man e ɔ?
• ?Kɛ e srɛ Zoova kɛ ɔ fɛ i wawɛ’n man e’n, ngue ti yɛ e kwla fa e wla’n guɛ i su kɛ ɔ́ fá mán e ɔ?
• ?Kɛ ɲrɛnnɛn tɔ e su’n, wafa sɛ yɛ Ɲanmiɛn wawɛ’n uka maan e tra e awlɛn ɔn?
[Foto, bue 13]
?Bian m’ɔ ɲannin aofuɛ m’ɔ ko kleli i janvuɛ’n i yalɛ’n i su ɲanndra mɔ Zezi buli’n, afɔtuɛ mennin yɛ ɔ kwla man e ɔ?
[Foto, bue 15]
?E srɛ Ɲanmiɛn e jran su kɛ ɔ fɛ i wawɛ’n man e?
[Foto, bue 16]
?Zoova i su like mennin yɛ ɲanndra m’ɔ kan siɛ kpa’n i ndɛ’n, ɔ kle e ɔ?