LIKE SUANLƐ 14

Ndɛ cinnjin’m be nun yiyilɛ

Ebre Mun 8:1

LIKE NG’Ɔ FATA KƐ A YO’N: Uka ɔ ndɛ tiefuɛ mun naan be ɲin tran ndɛ nga a su yiyi nun’n i su. Maan be wun kɛ ndɛ cinnjin’m be nin ndɛ’n i flɛlɛ’n be kɔ likawlɛ. Kpɛkun like nga ti yɛ a su yiyi ndɛ sɔ’m be nun’n, maan be wun i wlɛ.

WAFA NGA Á YÓ’N:

Like nga ti yɛ a su yiyi ndɛ’n nun’n, maan ɔ tran ɔ klun. Wienun-ɔn a kunndɛ kɛ á kán ndɛ trele wie klé ɔ ndɛ tiefuɛ mun. Annzɛ kusu a kunndɛ kɛ be lafi ndɛ wie su, annzɛ be fa ajalɛ wie. Bu i kwlaa sɔ’n i akunndan naan w’a di ɔ junman’n. Ndɛ cinnjin kwlaa nga be kwla uka wɔ naan w’a di ɔ junman’n kɛ ɔ nin i fata’n sa’n, fa ɔ ɲin sie su kpa.

Usa ɔ wun kɛ: ‘?Kosan benin yɛ min ndɛ tiefuɛ’m be kwla fa usa be wun-ɔn? ?Ndɛ benin yɛ atrɛkpa’n, ɔ su yoman be klun su-ɔ? ?Sɛ bé úsa kosan’n, kosan benin yɛ bé dún mmua úsa-ɔ?’ Niɛn i sɔ’n su siesie ɔ ndɛ’n. I liɛ’n, ɔ ndɛ tiefuɛ’m be ɲin trán ɔ ndɛ’n su, bé wún i wlɛ, yɛ bé sɔ́ nun klanman.
Yo maan ɔ ndɛ’n i flɛlɛ’n i ɲin’n fite kpa. Kɛ á yíyí ndɛ’n nun kɔ́’n, bo ndɛ’n i flɛlɛ’n i nun ndɛ mma cinnjin’m be su flan nun. Annzɛ kusu a kwla kan ndɛ kunngba’n i wafa uflɛ.
Yiyi ɔ ndɛ cinnjin’m be nun weinwein, yɛ maan be wlɛ wunlɛ’n yo pɔpɔ. Ndɛ nga be nin ɔ ndɛ’n i flɛlɛ’n be kɔ likawlɛ mɔ a kwla ɲan blɛ yiyi be nun’n, be ngunmin yɛ ɔ fata kɛ a fa-ɔ. Nán fa ndɛ cinnjin kpanngban. Bo ndɛ cinnjin’m be kwlaa be su. Kɛ a ko wie kun nun yiyi’n, jran kan naan w’a yiyi uflɛ nun. Maan ndɛ cinnjin’m be lɔngɔ su klanman.

Ɔ ndɛ’n i su fitilɛ nun’n, a kwla bo ndɛ cinnjin’m be su. I liɛ’n, ndɛ tiefuɛ’m be ɲin trán be su. Asa kusu’n, ɔ ndɛ’n i atabo’n nun’n a kwla bo be su ekun. I liɛ’n ɔ́ ká be klun.