Maan e fa e wun e mantan Zoova titi

“An fa amun wun mantan Nyanmiɛn, yɛ i kusu fɛ́ i wun mántan amun-ɔn.”​—ZAK 4:8.

?AMUN KWLA YIYI NUN?

?É yó sɛ naan ajulisu mannzin kanngan mun nin juejue yolɛ’n b’a yoman naan e nin Zoova afiɛn w’a ti nun?

?É yó sɛ naan y’a jran sika klolɛ’n nin be wun dandan yolɛ’n be ɲrun?

?É yó sɛ naan e nin Zoova e afiɛn w’a mantan titi?

1, 2. (a) ?Satan i “nzuɛn’n” yɛle benin? (b) ?Ngue yɛ ɔ́ úka e naan y’a fa e wun y’a mantan Ɲanmiɛn ɔn?

WAFA nga Ɲanmiɛn Zoova yili sran mun’n maan be kunndɛ kɛ bé fá be wun mɛ́ntɛn i. Sanngɛ Satan kunndɛ kɛ i akunndan liɛ’n wie yɛ e bu ɔ. Yɛle kɛ e bu i kɛ y’a mianman Zoova wun. Ato nga Satan fa lakali Ɛvu Edɛni fie’n nun lɔ’n, i su yɛ ɔ te jran ɔn. (Bob. 3:4-6) Kɛ ɔ fɛ i lɛ’n, lele nin andɛ, sran kpanngban b’a tɔ i ato ndɛ sɔ’n nun kpa.

² Y’a mianman kɛ e tɔ Satan i aya sɔ’n nun. “E si i nzuɛn’n.” (2 Kor. 2:11) Ɔ klo kɛ e fa ajalɛ tɛ naan e nin Zoova e afiɛn ti nun. Sanngɛ kɛ nga like suanlɛ ng’ɔ sinnin lɔ’n fa kleli’n sa’n, maan ɔ yo junman ndɛ’n nun o, annzɛ be ɲin su yiyilɛ’n nun o, annzɛ kusu e nin e awlofuɛ mun e tranlɛ’n nun o, e kwla fa ajalɛ kpa. Like suanlɛ nga ɔ́ wá kán ninnge nnan mɔ Satan fa laka e ekun’n be ndɛ. Be yɛle ɔrdinatɛli nin ajulisu mannzin kanngan mun, ɔ nin juejue yolɛ, nin sika yɛ wafa nga e fa bu e wun’n. Sɛ e fa ajalɛ kpa ninnge sɔ’m be nun’n, e kwla fa e “wun mantan Nyanmiɛn.”​—Zak 4:8.

ƆRDINATƐLI NIN MANNZIN KANNGAN MUN

3. An kan wafa nga be kwla fa ajulisu mannzin’m be yo ninnge kpakpa annzɛ ninnge tɛtɛ’n be ndɛ.

³ Ɔrdinatɛli nin ajulisu mannzin kanngan’m b’a tru asiɛ’n wunmuan’n su. Sɛ e si be nun tra’n, be kwla uka e kpa. Sanngɛ sɛ y’a siman be nun tra’n, be kwla kpɛ e nin e Si m’ɔ o ɲanmiɛn su lɔ’n, e afiɛn ce. Maan e fa ɔrdinatɛli naan e nian. Fluwa nga amún nían nun yɛ’n, ɔrdinatɛli yɛ be fa klɛli ɔ. Asa kusu’n, i yɛ be fa yili ɔ. Ɔrdinatɛli’n uka sran mun kpa naan b’a kunndɛ ninnge wie’m be su sa, naan kusu be nin be wiengu b’a koko yalɛ. Yɛ wie liɛ bɔbɔ’n, be fa yiyi be ɲin su klanman. Sanngɛ ɔrdinatɛli’n kwla di e blɛ’n ngba’n. Aata difuɛ’m be laka sran mun naan be bu i kɛ ɔ fata kɛ san fii be ɲan ajulisu mannzin kwlaa nga be fite’n. Gbanflɛn kun konvi sɔli ɔrdinatɛli wafa kun lele maan ɔ fiali yoli i aklɛnzia kun i atɛ naan ɔ́ fá tó. ?Like yɛ be yo i sɔ ɔ?

4. ?Ngue yɛ aniaan bian kun yoli naan w’a wla ɔrdinatɛli su junman ngboko dilɛ’n i ase ɔ?

⁴ Sɛ e fa mannzin kanngan mun e yo ninnge nga be nin yolɛ fataman’n, annzɛ e fa be e di junman e tratra su’n naan i ti’n e nin Zoova e afiɛn’n saci’n, i tɛ liɛ’n tra ngba. Aniaan bian Yɔna m’ɔ le afuɛ 28 seli kɛ: “N si kɛ Biblu’n waan ‘kɛ e nyan e ti’n, nán e tran lɛ ngbɛn’ naan e suan Ɲanmiɛn i su like. Sanngɛ ɔrdinatɛli fuɛ’n, nanwlɛ, ɔ kwla min yaya.” Blɛ sunman nun’n, Yɔn tran ɔrdinatɛli’n sin lele kɛ ɔ́ nían ɔn, kɔnguɛ mbluniɛn y’a to i. Ɔ seli kɛ: “Kɛ n ti ɔrdinatɛli’n i sin mɔ afɛ’n tí min kpa bɔbɔ’n, yɛ ɔ ti kekle man min kɛ e nin min janvuɛ mun e yaci e wun fluwa klɛlɛ ɛntɛnɛti su ɔ annzɛ n yaci video kanngan’m be nianlɛ ɔ. Nán blɛ ngba nun bɔbɔ yɛ i sɔ video’m be ti kpa ɔ.” Kɛ ɔ ko yo naan w’a yaci i aeliɛ tɛ sɔ’n, ɔ klɛli i lalɛ dɔ’n ɔrdinatɛli nun naan kɛ ɔ ko ju cɛ’n ɔrdinatɛli’n nuan.​—An kanngan Efɛzfuɛ Mun 5:15, 16 nun.

5, 6. (a) ?Ngue yɛ ɔ fata kɛ siɛ nin niɛn’m be yo be man be mma mun ɔn? (b) ?Ngue yɛ siɛ nin niɛn’m be kwla yo naan b’a wun kɛ be mma’m be nin sran kpa’m be nanti ɔ?

⁵ Siɛ nin niɛn mun, ɔ timan su kɛ amun fa amun ɲin sie ninnge tɛkɛtɛkɛ kwlaa nga amun mma’m bé yó’n be su. Sanngɛ ɔrdinatɛli’n liɛ’n, nán maan amun ɲin kpa su bɔ kaan sa. Nán amun se kɛ, kɛ ɔ ko yo naan b’a tranman lɛ ngbɛn annzɛ b’a kleman amun yalɛ’n ti’n, amún yáci be nun naan be nian sa sukusuku nin ngowa kekleekle mun nin bae dilɛ ɛntɛnɛti su. Annzɛ kusu amún yáci be nun naan be nin sran tɛ mun san nun ɛntɛnɛti su. Sɛ amun yo sɔ’n, be kwla se be wun kɛ: ‘Nán like tɛ ɔ, afin Baba nin Manmin bɔbɔ be tɛman su.’ Siɛ nin niɛn mun, amun yɛ ɔ ti mɔ amun sasa amun mma mun ɔn. Maan ɔ yo amun mma nga be su ɲin mun o, amun yɛ ɔ fata kɛ amun sasa be naan b’a kpɔciman Zoova ɔ. Nnɛn mun bɔbɔ’n, sɛ like wie su wa yo be mma mun’n, be kpli be ti. Siɛ nin niɛn’m be kusu ɔ fata kɛ be sasa be mma mun naan b’a tɔman sa tɛ nun.​—An nian Oze 13:8.

⁶ Amun uka amun mma mun naan be nin be niaan Klistfuɛ nga be kle ajalɛ kpa’n, i kpɛnngbɛn o, i bakan o, be yia be kan ngowa likawlɛ. Asa kusu, maan ɔ ka amun klun kɛ ɔ ti cinnjin kɛ amun nin amun mma mun be tran! I ti’n, maan amun kunndɛ blɛ naan amun nin be sri, be kan ngowa, be di junman yɛ “an fa amun mantan Nyanmiɛn” likawlɛ.b

JUEJUE YOLƐ

7. ?Ngue ti yɛ e kwlaa e kunndɛ kɛ é yó juejue titi ɔ?

⁷ Kpalɛ sunman’n, be usa sran’m be kɛ: “?Ɔ wun ti kpa?” Kosan sɔ’n yi awlabɔɛ sa kun nglo. Yɛle kɛ e si nin e nin klikli’m be mannin Satan i atin kɛ ɔ yo naan be nin Zoova be afiɛn ti nun ti’n, e kwlaa e tɔ tukpacɛ. Kɛ e ko tɔ tukpacɛ kusu’n, ɔ yo Satan fɛ kpa, afin kɛ ɔ ko yo sɔ’n Zoova i sulɛ’n yo kekle man e. Kɛ e ko wu kusu’n, e kwlá sumɛn i kun mlɔnmlɔn. (Jue. 115:17) Ɔ maan e kunndɛ kɛ é yó like kwlaa nga e kwla yo naan y’a yo juejue titi’n.c Yɛ ɔ fata kɛ e niaan’m be juejue yolɛ’n ɔ lo e wie.

8, 9. (a) ?Wafa sɛ yɛ e kwla kle kɛ ayre yolɛ’n timan e ndɛ tratraman su ɔ? (b) ?Ngue ti yɛ ɔ ti kpa kɛ e di aklunjuɛ titi ɔ?

⁸ Sanngɛ nɛ́n i sɔ’n ti yɛ é fá juejue yolɛ ndɛ’n fá cící e ti ɔ. Sran wie’m be kan ayre nin aliɛ wie’m be dilɛ annzɛ be cilɛ, ɔ nin ninnge nga be kwla yo naan b’a yo klanman i ndɛ sa’n ɔ leman kpɛ bo. Be wla be wun ase be yo i sɔ kpa tra Ɲanmiɛn Sielɛ’n i jasin fɛ’n i bolɛ bɔbɔ. Kɛ bé yó i sɔ’n, be bu i kɛ be su uka be niaan mun sakpa. Sanngɛ, kɛ e kɔ aɲia’m be bo Ɲanmiɛn Sielɛ Sua’n nun lɔ’n, annzɛ aɲia dandan’m be bo’n, ɔ nin i fataman kɛ e ko kan e ayre mun annzɛ klanman yolɛ i su ninnge’m be ndɛ lɔ. ?Ngue ti ɔ?

⁹ Biblu’n i nun like suanlɛ ɔ nin aklunjuɛ m’ɔ fin Ɲanmiɛn wawɛ’n i dilɛ ti yɛ e kɔ aɲia’m be bo ɔ. (Gal. 5:22) Sɛ e kɔ lɔ e ko kan e ayre’m be ndɛ’n, kannzɛ be usali e be su sa o, annzɛ b’a usaman e o, i sɔ’n yó maan sran’m be ɲin kpá like nga ti yɛ be ɔli’n su, kpɛkun be su diman aklunjuɛ. (Rɔm. 14:17) Wafa nga sran kun yo i wun ayre’n, ɔ ti i bɔbɔ i ndɛ. Asa kusu’n, sran fi sa siman tukpacɛ kwlaa ayre. Dɔɔtrɔfuɛ nga be si be junman’n i kpa bɔbɔ’n, be yo kpɛnngbɛn yɛ be tɔ tukpacɛ kpɛkun i agualiɛ su’n wie’n kun be. Yɛ kusu nán aunkpinndiɛ’n i ti kokolɛ mɔ é kókó tratra su’n yɛ maan é cɛ́ ɔ. (Lik 12:25) Biblu’n se kɛ “aklunjuɛ’n ti kɛ ayre sa.” Ɔ kwla yo maan e wun kpaja e.​—Nya. 17:22.

10. (a) ?Aeliɛ benin yɛ sran’m be kwla yi i nglo naan b’a yo klanman Zoova ɲrun ɔn? (b) ?Blɛ benin nun yɛ é yó juejue kpa sa ɔ?

¹⁰ I wafa kunngba’n, ɔ ti su kɛ wafa nga e fa siesie e wun’n, ɔ yo e cinnjin. Sanngɛ ɔ nin i fataman kɛ e jran su kɛ é yó naan sran’m b’a wunman kɛ e su yo oke. I li bɔbɔ kɛ be wun kɛ e su yo oke’n, be ɲin kwla yi e. Asa kusu’n, oke yolɛ’n ti klanman yolɛ’n wafa’n kun. Biblu’n se kɛ: “Be ti je’n ti kɛ famiɛn kle sa, afin nguan tɛnndɛn’n ti sran kpa’m be nvasuɛ.” (Nya. 16:31) Sran wafa nga e ti’n, ɔ ti cinnjin kpa Zoova ɲrun tra klanman yolɛ’n. I sɔ akunndan’n wie yɛ ɔ fata kɛ e bu ɔ. (An kanngan 1 Piɛr 3:3, 4 nun.) ?Ɔ maan sɛ klanman yolɛ ti’n sran kun kɔ dɔɔtrɔ naan be kpaci i nun be siesie i ye’n, annzɛ ɔ nɔn ayre wie m’ɔ kwla kun i’n, ngwlɛlɛ aeliɛ yɛle i sɔ’n? Maan e yo oke sɛ, annzɛ e yo juejue sɛ, klanman yolɛ’n i kpafuɛ’n fin “aklunjuɛ ng’ɔ fin Anannganman’n.” (Nee. 8:10) Saan mɛn uflɛ’n nun lɔ yɛ é yó juejue kpa sa ɔ, kpɛkun é sá e sin yó gbanflɛn nin talua ekun ɔn. (Zɔb 33:25; Eza. 33:24) Ka naan blɛ sɔ’n w’a ju’n, ɔ nin i fata kɛ e fa ngwlɛlɛ e nanti yɛ e lafi kasiɛ nga Zoova boli’n be su. I liɛ’n, é dí aklunjuɛ kɛ é sé yɛ’n, asa kusu e su faman juejue yolɛ’n ciciman e ti.​—1 Tim. 4:8.

SIKA

11. ?Wafa sɛ yɛ sika’n kwla yo maan e nin Zoova e afiɛn ti nun ɔn?

¹¹ Sika ɲanlɛ nin i kunndɛlɛ’n timan like tɛ. (Aku. 7:12; Lik 19:12, 13) Sanngɛ sɛ e klo sika’n saan e nin Zoova e afiɛn tí nun. (1 Tim. 6:9, 10) “Mɛn’n nun ninnge’n i ngokoɛ’n,” yɛle kɛ ninnge nga e mian be wun’n be ti kokolɛ ngboko’n, ɔ kwla yo maan e nin Zoova e afiɛn ti nun. “Anyanbeun’n i klolɛ’n” kwla yo maan e bu i kɛ sika’n yó maan é dí aklunjuɛ yɛ ɔ́ sásá e. (Mat. 13:22) Zezi kleli weiin kɛ “sran kun” sa kwlá yoman Ɲanmiɛn i sran naan i kunngba’n w’a yo sika’n i klofuɛ.​—Mat. 6:24.

12. ?Ngue yɛ sran’m be yo naan b’a ɲan sika ndɛndɛ ɔ? ?Ngue yɛ e kwla yo naan y’a tɔmɛn i sɔ aya’m be nun ɔn?

¹² Sɛ sika’n i wun akunndan nga e bu’n timan kpa’n, i sɔ’n kwla yo maan e yo sa tɛ. (Nya. 28:20) Sika kpanngban mɔ be se sran’m be kɛ be kwla ka lɛ be ɲɛn i’n ti’n, wie’m be toli sika nun mma. Aniaan wie’m be fali be wun wlali aata dilɛ wafa wie mɔ be bu i kɛ be kwla ɲan nun sika kpanngban ndɛndɛ’n be nun. Be cuɛnnin asɔnun’n nunfuɛ wie mun wluli i sɔ yolɛ’n nun wie bɔbɔ. Aniaan wie’m be liɛ’n, be ko usali asɔnun’n nunfuɛ wie’m be bosia naan bé fá dí aata wie. Kpɛkun be seli be kɛ i yilɛ su’n bé úka su kpa lɔuun. Sɛ e ti aɲinkplifuɛ’n e kwla kplin i sɔ ninnge’m be su kpɛkun i agualiɛ su’n e sika kpanngban fi e sa. I sɔ’n ti’n maan e fa ngwlɛlɛ e nanti. Blɛ sunman nun’n, sran kun kwlá kaman i ja nun lɛ sa ɲanman sika kpanngban ndɛndɛ.

13. ?Wafa sɛ yɛ Zoova klo kɛ e bu sika’n niɔn?

¹³ Kɛ e dun mmua e fa e ‘wun man Nyanmiɛn maan ɔ sie e’n, yɛ e yo i klun sa’n,’ ɔ yra e ɲin nga e mian naan y’a ɲan ninnge nga e mian be wun’n su. (Mat. 6:33; Efɛ. 4:28) Ɔ kunndɛman kɛ junman mɔ e di i dan’n ti’n, e lafi aɲia’m be bo. Yɛ ɔ kunndɛman kɛ kɛ e o aɲia’m be bo Ɲanmiɛn Sielɛ Sua’n nun lɔ’n, e bu sika akunndan. Mɛn nunfuɛ kpanngban be bu i kɛ sɛ be wla be wun ase be kunndɛ sika kpanngban’n, sa su ɲanman be, kpɛkun be ɲrun lɔ’n, be su diman junman kun. Kpɛ sunman’n be wla be mma’m be fanngan naan be yo ninnge nga mɔ maan bé ɲán sika kpanngban’n. Zezi kleli kɛ i sɔ aeliɛ’n timan kpa. (An kanngan Lik 12:15-21 nun.) I sɔ mɔ be yo’n maan e wla kpɛn Geazi su. Afin ɔ buli i kɛ ɔ kwla yo aɲinkpli naan i kunngba’n ɔ nin Zoova be afiɛn w’a sɛ titi.​—2 Fam. 5:20-27.

14, 15. ?Ngue ti yɛ sɛ e bu i kɛ sika ɲanlɛ yɛ maan é dí alaje’n nn y’a di sinnzin ɔn? An fa sa kun yiyi nun.

¹⁴ Be kɛnnin i kɛ anunman ɲin wie’m be mlɔnnin nzue nun afin kɛ be trali jue nga be kwlá fa tuman’n, b’a yiman be ase. ?I sɔ sa wie kwla ju Klistfuɛ kun su? Asɔnun kpɛnngbɛn kun m’ɔ suan Alɛksi’n seli kɛ: “N ti sran m’ɔ yo ninnge cɛcɛ ɔ. Sɛ m bu sanmlan nzue mɔ be fa wunnzin be ti su’n i kpanngban’n, n fa wie guɛ i buteli’n nun ekun.” Sanngɛ ɔ wa buli i kɛ sɛ ɔ ɲan sika kaka’n, ɔ́ kwlá yáci junman dilɛ naan ɔ́ yó atin bofuɛ. I ti’n ɔ wa suannin aata dilɛ wafa wie, yɛ ɔ fɛli i sika’n kwlaa wlali nun. Ɔ usali bosia bɔbɔ fa wlɛli aata sɔ’n nun! Sanngɛ i sika’n kali ninnge ng’ɔ toli’n nun. Alɛksi seli kɛ: “N kunndɛli kpa kɛ ń yó naan min sika’n sɛ i sin.” Ɔ buli i kɛ sɛ ɔ minndɛ kan’n ɔ́ yí i sika’n.

¹⁵ Alɛksi i aata’n su yɛ i akunndan’n kwlaa trannin ɔn. Kɛ ɔ yo naan ɔ fa Zoova i junman’n sie i like kwlaa ɲrun’n, ɔ yoli kekle mɛnnin i. W’a kwlá lafiman kun bɔbɔ. Sanngɛ w’a kwlá yimɛn i sika’n le. Alɛksi i sika’n kwlaa sacili ɔ maan ɔ yoli i sua’n i atɛ. I bɔbɔ seli kɛ ɔ fali afɛ yili i awlofuɛ’m be su. Sanngɛ i sɔ liɛ’n kleli i like cinnjin kpa kun. Ɔ seli kɛ sran kwlaa ng’ɔ fɛ i wla’n guɛ i Satan i mɛn tɛ nga su’n naan ɔ́ ɲán alaje’n, saan awlabɔɛ yɛ ɔ́ kún i ɔ. (Nya. 11:28) Sɛ e fa e wla guɛ i sika nga e le i’n su’n, annzɛ sika mɔ e si i kunndɛ’n su’n, nn Satan m’ɔ ti “mɛn nga i min’n” i su yɛ y’a fa e wla y’a gua ɔ. (2 Kor. 4:4; 1 Tim. 6:17) Alɛksi kacili i sa ɔ maan siɛn’n ɔ le blɛ kpanngban fa bo jasin fɛ’n. I sɔ liɛ’n yoli maan ɔ nin i awlofuɛ mun be dili aklunjuɛ yɛ ɔ ukali be naan b’a fa be wun b’a mantan Zoova.​—An kanngan Mark 10:29, 30 nun.

WAFA NGA E BU E WUN’N

16. ?Ngue yɛ sɛ e fa di e nuan’n, ɔ ti kpa ɔ? ?Sɛ e yo e wun dandan’n, i bo’n kwla gua sɛ?

¹⁶ Sɛ e fa like kpa e di e nuan’n, ɔ timan tɛ. I wie yɛle kɛ ɔ fata kɛ e di e nuan titi kɛ e ti Zoova i Lalofuɛ. (Zer. 9:23) I sɔ’n sú e bo maan é fá ajalɛ kpa, kpɛkun e su yoman ninnge finfin. Sanngɛ sɛ e yo e wun dandan’n, i sɔ’n yó maan e nin Zoova e afiɛn tí nun.​—Jue. 138:6; Rɔm. 12:3.

17, 18. (a) Biblu’n nun sran nga be yoli wun ase kanfuɛ nin nga be tuli be wun’n, an bobo be nun wie mun. (b) ?Ngue yɛ aniaan bian kun yoli naan tutre dilɛ’n w’a fɛmɛn i w’a siemɛn i Zoova wun mmua ɔ?

¹⁷ Biblu’n kan sran wie mɔ be yoli be wun dandan’n, ɔ nin wie mɔ be kannin be wun ase’n be ndɛ. Famiɛn Davidi kɛnnin i wun ase seli Zoova kɛ ɔ kle i atin, ɔ maan Zoova yrɛli i su. (Jue. 131:1-3) Sanngɛ Famiɛn Nɛbikadnɛzali nin Bɛlsazali be tutre dilɛ ti’n Zoova tuli be fɔ. (Dan. 4:27-34; 5:22-30) Andɛ’n, sa nga be ju’n be nun wie kwla sa e nian, sɛ e ti wun ase kanfuɛ o. Asɔnunfuɛ’m be lika nianfuɛ kun m’ɔ suan Ryan m’ɔ le afuɛ 32 ɔ ɔli asɔnun uflɛ kun nun. I waan: “M buli i kɛ bé wá síe min asɔnun kpɛnngbɛn ndɛndɛ kpa. Sanngɛ lele m’ɔ́ fá dí afuɛ nuan kun’n ɔ nin a yoman sɔ.” ?Ryan fá ya sé kɛ asɔnun kpɛnngbɛn’m be bumɛn i sran? ?Ɔ́ yáci asɔnun aɲia’m be bo kɔlɛ naan tutre’n ti’n, ɔ nin Zoova nin i anuannzɛ’n be afiɛn ti nun? ?Sɛ amun yɛ i sɔ sa’n tɔli amun su’n nn amun yoli i sɛ?

¹⁸ Ryan waan: “N niannin e Biblu’n i akua’m be nun n kunndɛli like nga sran lafi su kɛ ɔ́ ɲɛ́n i m’ɔ ɲɛnmɛn i’n i su ndɛ kwlaa nga n sa tɔli su’n.” (Nya. 13:12) Ɔ kan guali su kɛ: “N wa wunnin i kɛ ɔ fata kɛ m minndɛ, yɛ n kan min wun ase. Ɔ fata kɛ Zoova kle min ngwlɛlɛ.” Ryan w’a fɛmɛn i ɲin w’a siemɛn i bɔbɔ su kun sanngɛ ɔ kunndɛli wafa ng’ɔ kwla uka sran uflɛ asɔnun’n nun’n nin jasin fɛ’n i bolɛ nun’n. Ɔ wa ɲannin sran kpanngban m’ɔ kle be Biblu’n nun like ɔ. Sran sɔ’m be kɔ be ɲrun. Ɔ seli ekun kɛ: “Kɛ ɔ dili afuɛ kun nin sin mɔ bé síe min asɔnun kpɛnngbɛn’n siɛn’n, ɔ fuli min nun. Min ɲin mɔ wa trannin jasin fɛ’n i bolɛ’n su’n ti’n, m’an kokoman asɔnun kpɛnngbɛn yolɛ’n su kun.”​—An kanngan Jue Mun 37:3, 4 nun.

NÁN AMUN NIN ZOOVA AMUN AFIƐN TI NUN LE!

19, 20. (a) ?Wafa sɛ yɛ e kwla yo naan ninnge nga e kannin be ndɛ like suanlɛ nga nun’n b’a yoman naan e nin Zoova e afiɛn w’a ti nun ɔn? (b) ?Be nga b’a kpɔciman Zoova le’n mɔ be kle ajalɛ kpa’n, be nun wie yɛle benin?

¹⁹ Ninnge kwlaa nga e kannin be ndɛ like suanlɛ nga nin ng’ɔ sinnin lɔ’n nun’n, be ti cinnjin kpa e nantilɛ nun. E fa Zoova i sufuɛ’n mɔ e ti’n di e nuan. Juejue yolɛ’n nin awlobo tranlɛ fɛ’n be o ninnge kpakpa nga Zoova fa man e’n be nun. Junman nin sika’n be kwla uka e maan e ɲan ninnge kanngan nga e sa mian be wun’n. E ɲin su yiyilɛ’n kwla yo maan e wun fa e feke. Ajulisu mannzin kanngan’m be kusu, be kwla yo e wun sa ye. Sanngɛ sɛ nán blɛ ng’ɔ nin i fata’n i su yɛ e kunndɛ ninnge sɔ mun’n, annzɛ sɛ e fa e wun wla be kunndɛlɛ nun tratra su’n, annzɛ kusu sɛ ninnge sɔ’m be tanndan e ja nun Ɲanmiɛn sulɛ nun’n, ɔ cɛman naan e nin Zoova e afiɛn w’a ti nun.

²⁰ I yo, nga Satan kunndɛ’n yɛ ɔ lɛ ɔ. Sanngɛ e kwla mian e ɲin kpa e sasa e bɔbɔ nin e awlofuɛ mun naan y’a tɔmɛn i sɔ’n nun. (Nya. 22:3) Maan e fa e wun e mantan Zoova yɛ nán e nin i e afiɛn ti nun le. Biblu’n nun sran kpanngban be yoli sɔ. Enɔku nin Nowe be “nin Nyanmiɛn be nantili klanman.” (Bob. 5:22; 6:9, 10) Moizi lafili Ɲanmiɛn su kpa. “Ɔ ti kɛ w’a wun Nyanmiɛn bɔ be wun-mɛn i’n sa.” (Ebr. 11:27) Zezi yoli like nga i Si Ɲanmiɛn waan ɔ yo’n titi, ɔ maan i Si yrɛli i su. (Zan 8:29) Maan e nian be ajalɛ’n su. ‘Maan e klun jɔ tititi. E koko yalɛ kle Nyanmiɛn titi, nán e yaci. Sa’n kwlaa nun, e la Nyanmiɛn ase.’ (1 Tɛs. 5:16-18) Yɛ nán e man like fi atin naan ɔ yo maan e nin Zoova e afiɛn ti nun!

[Ja ngua lɛ ndɛ mun]

[Foto, bue 17]

[Foto, bue 18]

Siɛ nin niɛn mun, amun uka amun mma mun naan be si ajulisu mannzin kanngan’m be nun tra.

[Ndɛ kwle, bue 21]

Nán e man like fi atin naan ɔ yo maan e nin Zoova e afiɛn ti nun!

[Foto, bue 21]

Nán maan e koko junman nga é dí i asɔnun’n nun’n su, sanngɛ maan e tu e klun e bo jasin fɛ’n!