Nán e yi e ɲin Zoova su mlɔnmlɔn
‘N yiman min ɲin Anannganman su mlɔnmlɔn.’—JUE. 16:8.
1. ?Wafa sɛ yɛ laa ndɛ nga be o Biblu’n nun’n, be kwla yo e ye ɔ?
WAFA nga Ɲanmiɛn nin sran’m be nantili’n, Biblu’n kɛn i ndɛ fɛfɛ kpa. Ɲanmiɛn sinnin sran sunman be lika yoli i klun sa. Ndɛ nga sran sɔ’m be kusu be kannin’n, ɔ nin sa nga be yoli’n, be klɛli be Biblu’n nun wie. Sanngɛ, nán ndɛ fɛfɛ sa ngbɛn ɔn. Be klɛli be naan be uka e naan e fa e wun mantan Ɲanmiɛn.—Zak. 4:8.
2, 3. Amun yiyi Jue Mun 16:8 nun.
2 Kɛ e bo Biblu’n nun sran kɛ Abraamu, ɔ nin Sara nin Moizi nin Riti, ɔ nin Davidi nin Ɛstɛr nin akoto Pɔlu sa’n, ɔ nin sran wie mun ekun be dunman’n, e kwlaa e si be. Afin, e kan be ndɛ titi. Wie’m be o lɛ kusu’n, e taman be ndɛ kan. Sanngɛ, be su ndɛ m’ɔ o Biblu’n nun’n, ɔ kwla yo e ye wie dan. Sɛ e kanngan be nun naan e bu be su akunndan’n, é yó like nga jue tofuɛ’n yoli’n wie. Ɔ seli kɛ: ‘N yiman min ɲin Anannganman su mlɔnmlɔn. Sɛ ɔ nin min wo nun’n, srɛ kunman min, min wun usuman min.’ (Jue. 16:8) ?E wun ndɛ sɔ’n i bo kpa?
3 Yɛle kɛ sɛ e yiman e ɲin Zoova su’n, ɔ maan e yo i klun sa’n, ɔ́ sásá e. I sɔ’n ti’n, amun e fa sa nga laa Ɲanmiɛn i sufuɛ wie’m be yoli mɔ Biblu’n kɛn i ndɛ’n e nian. I liɛ’n, é wún wafa nga e kwla yo naan y’a lafi Zoova su kpa naan y’a ‘yiman e ɲin i su’n.’
Zoova tɛ e srɛlɛ’m be su
4. Amun kan Biblu’n nun sa kun m’ɔ kle kɛ sɛ e srɛ Ɲanmiɛn ɔ́ tɛ́ su’n, i ndɛ.
4 Sɛ e yiman e ɲin Zoova su mlɔnmlɔn naan e srɛ i’n, ɔ́ tɛ́ e su. (Jue. 65:3; 66:19) I wie yɛle Abraamu i sufuɛ’m be su kpɛnngbɛn’n i liɛ’n. Cɛn kun’n, Abraamu sunmɛnnin i kɛ ɔ wɔ Mezopotami lɔ ko ja bla m’ɔ sro Ɲanmiɛn’n, ɔ fa blɛ i wa Izaaki. Kɛ ɔ juli lɔ’n, ɔ fali ndɛ’n wlali Zoova sa nun. Ɔ maan, kɛ Rebeka bali m’ɔ mɛnnin i ɲɔnngɔnmɛn’m be nzue’n, ɔ wunnin i wlɛ kɛ srɛlɛ ng’ɔ srɛli’n, i su yɛ Zoova w’a tɛ ɔ. Nanwlɛ, kɛ mɔ Abraamu i sufuɛ’n tuli i klun srɛli Ɲanmiɛn ti’n, ɔ ɲannin Izaaki i awlɛn su bla. (Bob. 24:12-14, 67) I yo, nán kɛ bé wá sunman e kɛ e ko ja bla e blɛ sran kɛ nga Abraamu i sufuɛ’n yoli’n sa ɔ. Sanngɛ kusu’n, like kwlaa nga be se e kɛ e yo’n, sɛ e srɛ Zoova e fa wlɛ i sa nun kɛ Abraamu i sufuɛ’n i liɛ’n sa’n, ɔ́ tɛ́ e su.
5. ?Ngue ti yɛ e kwla se kɛ sɛ e srɛ e klun lɔ naan srɛlɛ sɔ’n yo kpe kan’n, Zoova kwla tɛ e su ɔ?
5 Wie liɛ kɛ sa tɔ e su’n, ɔ fata kɛ e srɛ Ɲanmiɛn ndɛndɛ e ja nun lɛ. I sɔ yɛ Neemi yoli ɔ. Kɛ ɔ́ yó sɔ’n, nn ɔ ti Artaksɛrkzɛsi m’ɔ ti Pɛrsi famiɛn’n i nzan sufuɛ. Cɛn kun’n, famiɛn’n wunnin kɛ Neemi i ɲrun’n ti mlanwa. Ɔ maan, ɔ usɛli i kɛ: ‘?Ɔ yo sɛ ti yɛ ɔ ɲrun’n ti mlanwa sɔ ɔ?’ Yɛ Neemi ‘srɛli nglo lɔ Ɲanmiɛn’n niɔn.’ Srɛlɛ sɔ mɔ atrɛkpa Neemi srɛli ndɛndɛ i klun lɔ’n, Ɲanmiɛn tɛli su. Yɛle kɛ, ɔ yoli maan kɛ Neemi kɔ́ Zerizalɛmu klɔ’n i talɛ’m be kplanlɛ’n, famiɛn’n i sa nun w’a yoman tankantankan. (Kanngan Neemi 2:1-8 nun.) I sɔ’n kle weiin kɛ sɛ e srɛ e klun lɔ naan srɛlɛ sɔ’n yo kpe kan’n, Ɲanmiɛn kwla tɛ e su.
6, 7. (a) ?Ɲanmiɛn srɛlɛ nun’n, ngue yɛ Epafrasi yoli i titi mɔ e kwla nian su ɔ? (b) ?Ngue ti yɛ ɔ fata kɛ e srɛ Ɲanmiɛn man e wiengu mun ɔn?
6 Biblu’n wla e fanngan kɛ e ‘srɛ Ɲanmiɛn man e wun.’ I yo, sɛ Ɲanmiɛn tɛ́ e su blɛ ng’ɔ timan e liɛ’n su’n i nun o, i li maan e srɛ. (Zak 5:16) I sɔ yɛ Epafrasi m’ɔ ‘di Klist junman’n kpa’n,’ ɔ yoli ɔ. Yɛle kɛ, ɔ tuli i klun srɛli Ɲanmiɛn mɛnnin i wiengu Klistfuɛ mun. I sɔ liɛ’n, kɛ Pɔlu o Rɔmu lɔ m’ɔ́ klɛ́ Kolɔsfuɛ’m be fluwa’n, ɔ kɛnnin i ndɛ. Ɔ seli kɛ: ‘Epafras m’ɔ ti amun nun kun’n, i waan ɔ́ yó amun like. Klist Zezi i junman difuɛ sɔ’n ɔ miɛn i ɲin srɛ Ɲanmiɛn kɛ an yo sran, ɔ srɛ kɛ an wun sa ng’ɔ ti Ɲanmiɛn i klun sa’n i wlɛ kpa naan an jran kekle. Kɛ n niɛn i lele’n, n wun kɛ amun nin Laodisefuɛ mun nin Zerapolisfuɛ’m be ti ɔ fɛ dan kpa.’—Kol. 1:7; 4:12, 13.
7 Kolɔsu nin Laodise nin Zerapolisi klɔ’n, be o Azi Minɛli akpasua kunngba’n nun. Klɔ sɔ’m be su tranlɛ ti kekle kpa. Afin, Zerapolisfuɛ’m be sɔ amuin. Laodisefuɛ’m be liɛ’n, aɲanbeun kunndɛlɛ’n yɛ ɔ lo be ɔ. Kolɔsfuɛ’m be liɛ kusu’n, klɔ sran ngwlɛlɛ’n su yɛ be nanti ɔ. (Kol. 2:8) Klistfuɛ mɔ be tran sran kɛ ngalɛ sa’m be afiɛn’n, ɔ cɛman naan b’a saci. Epafrasi si sɔ weiin, afin ɔ fin Kolɔsu. I sɔ’n ti’n, sɛ ‘ɔ miɛn i ɲin srɛ Ɲanmiɛn’ man lɔfuɛ mun’n, i sɔ’n boman e nuan! Srɛlɛ nga Epafrasi srɛli Ɲanmiɛn’n, Biblu’n kanman wafa nga Ɲanmiɛn tɛli su’n i ndɛ. Sanngɛ i kwlaa yoli o, ɔ srɛli Ɲanmiɛn mɛnnin i wiengu Klistfuɛ mun titi. Maan e kusu e yo sɔ wie. Kannzɛ bɔbɔ e su faman e nuan ‘wlɛwlɛmɛn i sran wie’m be ndɛ nun’n,’ sanngɛ kusu atrɛkpa’n, e si e niaan wie mɔ kekle’n o su, annzɛ sa wie tɛnndɛn i Ɲanmiɛn sulafilɛ’n i ɲrun ɔn. (1 Piɛ. 4:15) ?I lɛ’n nun niɔn, nán Ɲanmiɛn cɛ yɛ ɔ fata kɛ e srɛ mɛn i ɔ? I nun mɔ kekle’n tɔli Pɔlu su’n, srɛlɛ nga i wiengu’m be srɛli Ɲanmiɛn mɛnnin i’n, ɔ yoli i ye dan. Sɛ e kusu e srɛ Ɲanmiɛn man e wiengu mun’n, ɔ́ yó be ye sɔ wie.—2 Kor. 1:10, 11.
8. (a) ?Ngue yɛ ɔ kle kɛ Ɲanmiɛn srɛlɛ’n yoli Efɛzi lɔ asɔnun kpɛnngbɛn’m be cinnjin ɔn? (b) ?Wafa sɛ yɛ ɔ fata kɛ e bu Ɲanmiɛn srɛlɛ’n niɔn?
8 ?Sran’m be wun kɛ Ɲanmiɛn srɛlɛ’n ti e nzuɛn? Amun e fa Pɔlu i ndɛ e nian. Kɛ ɔ nin Efɛzi lɔ asɔnun kpɛnngbɛn’m be yiali’n, ‘ɔ nin be kwlaa be kotoli naan ɔ nin Ɲanmiɛn b’a koko yalɛ.’ Kɛ ɔ yoli sɔ’n, ‘be kwlaa be ɲinmuɛn guali, be to be sa blɛli i. Sa ng’ɔ bo be wla trɛ i kwlaa’n yɛle kɛ ɔ seli be kɛ be su wunmɛn i kun.’ (Yol. 20:36-38) Asɔnun kpɛnngbɛn sɔ mɔ be nin Pɔlu be srɛli Ɲanmiɛn’n, e siman be kwlaa be dunman. Sanngɛ i kwlaa yoli o, e si kɛ Ɲanmiɛn srɛlɛ’n yoli be cinnjin. E kusu’n, maan Ɲanmiɛn srɛlɛ’n yo e cenjele like. Nán e fa kan ngowa. Maan e lafi e Si’n m’ɔ o ɲanmiɛn su lɔ’n i su, e ‘man e sa’m be su’ e srɛ i. Sɛ e yo sɔ’n, ɔ́ tɛ́ e su.—1 Tim. 2:8.
Maan e nanti Ɲanmiɛn i atin’n su e guɛ i ti’n nin i bo
9, 10. (a) ?Ajalɛ kpa benin yɛ Zɛlɔfsad i mma mmla’m be fali mɔ e kwla nian su ɔ? (b) ?Wafa sɛ yɛ Klistfuɛ nga be ɲin w’a ti Ɲanmiɛn sulɛ’n nun mɔ be nin a jaman bla annzɛ bian’n, be kwla nian Zɛlɔfsad i mma mmla’m be ajalɛ’n su ɔ?
9 Sɛ e yiman e ɲin Zoova su mlɔnmlɔn’n, é nánti i atin’m be su. Ɔ maan, ɔ́ rá e su. (Mml. 28:13; 1 Sam. 15:22) I sɔ yɛ be nga be ti aɲinyiɛfuɛ’n, be yo ɔ. Amun e fa Moizi blɛ su bla nnun be ndɛ e nian. Bla sɔ’m be ti aniaan yɛ be si’n suan Zɛlɔfsad. Izraɛli lɔ’n, ba yasua mun yɛ be di be si’m be aja ɔ. Sanngɛ, Zɛlɔfsad w’a wuman ba yasua naan w’a wu. I sɔ’n ti’n, Zoova seli kɛ be fɛ i aja’n kwlaa mɛn i mma mmla mun. Sanngɛ kusu’n, ɔ fata kɛ be yo like kun. Yɛle kɛ, be ja Manase i mma yasua mun naan aja’n ka be si i akpasua’n nun.—Kal. 27:1-8; 36:6-8.
10 Zɛlɔfsad i mma mmla’m be si kɛ sran ng’ɔ sro Ɲanmiɛn’n, Ɲanmiɛn jrɛn i sin. Ɔ maan Biblu’n waan: ‘Zɛlɔfsad i mma bla’m be fali Anannganman i ndɛ ng’ɔ kan kleli Moizi’n su. Makla, Tirza, Ɔgla, Milka yɛ Nɔa be jali be si niaan bian’m be mma yasua mun. Manase m’ɔ ti Zozɛf i wa’n i osu nunfuɛ mun. Kpɛkun be asiɛ’n kali be si i akpasua’n su.’ (Kal. 36:10-12) Kɛ nga e fa kɛnngɛn i lɛ’n, e wun kɛ ba bla nnun sɔ’m be nantili Zoova i ndɛ’n su. (Zoz. 17:3, 4) Andɛ kusu’n, Klistfuɛ nga be ɲin w’a ti Ɲanmiɛn sulɛ’n nun mɔ be nin a jaman bian annzɛ bla’n, be lafi Ɲanmiɛn su yɛ be nanti i ndɛ’n su. Yɛle kɛ, sran nga bé jɛ́ i’n, be jɛ i “e Min’n i klun su.”—1 Kor. 7:39.
11, 12. ?Wafa sɛ yɛ Kalɛbu kleli kɛ ɔ lafi Ɲanmiɛn su ɔ?
11 Sran kun m’ɔ kleli ajalɛ kpa m’ɔ fata kɛ e nian su’n, yɛle Kalɛbu. Ɔ nantili Zoova i atin’n su kɛ ɔ fata’n sa lele guɛli i ti’n nin i bo. (Mml. 1:36) Kɛ Izraɛlifuɛ’m be fin Ezipti lɔ fiteli’n i sin naan b’a ko fa Kanaan mɛn’n, Moizi sunmannin sran 12 kɛ be ko kpla mɛn sɔ’n be nian. Kɛ be sali be sin’n, Kalɛbu nin Zozie be sran nɲɔn cɛ, be wlali nvlefuɛ’m be fanngan kɛ be lafi Ɲanmiɛn su naan b’a kwla fa mɛn’n. (Kal. 14:6-9) Lele mɔ afuɛ ko ju ablanan fá sín’n, b’a kpɔciman Zoova le. Ɲanmiɛn fanngan nun kusu’n, Zozie fali Izraɛlifuɛ mun wluli mɛn m’ɔ seli kɛ ɔ́ fá mán be’n nun. Sanngɛ sran blu nga be ɔli mɛn’n i kplalɛ wie mɔ b’a lafiman Ɲanmiɛn su’n, be kwlaa be wieli wu afuɛ 40 nga be dili i aawlɛ flɛnnɛn’n nun lɔ’n nun.—Kal. 14:31-34.
12 Kɛ nga e fa kɛnnin i lɛ’n, sa kwlaa nga Izraɛlifuɛ’m be wunnin i blɛ nga be dili i aawlɛ flɛnnɛn’n nun lɔ’n, Kalɛbu fiteli nun. Ɔ maan, ɔ seli Zozie kɛ: “N nantili Anannganman i atin’n su kɛ ɔ fata’n sa.” (Kanngan Zozie 14:10-15 nun.) Kɛ ɔ́ sé sɔ’n, nn ɔ le afuɛ ablaɔcuɛ nin nnun. Ɔ nin i sɔ’n ngba’n, ɔ seli kɛ be fa oka lika nga Ɲanmiɛn boli i kasiɛ kleli i’n, be mɛn i. Kusu nn be kpɔfuɛ mɔ be klɔ’m be ti dandan yɛ be si be wun talɛ’n, be tran lɔ lika’n nun.—Zoz. 14:10-15.
13. ?Kannzɛ e ti sɛ e ti sɛ, ngue yɛ sɛ e yo’n, e liɛ yó ye ɔ?
13 Kɛ Kalɛbu sa’n, sɛ e ‘nanti Zoova i atin’n su kɛ ɔ fata’n sa’n,’ Ɲanmiɛn su yiman e ase le. Kannzɛ kekle’n tɔ e su sɛ’n, ɔ́ jrán e sin. Sanngɛ, kɛ ɔ ko yo naan y’a nanti Ɲanmiɛn i atin’n su lele y’a guɛ i ti’n nin bo kɛ Kalɛbu sa’n, ɔ kwla yo kekle man e. I wie yɛle famiɛn Salomɔn liɛ’n. Kɛ ɔ́ bó famiɛn dilɛ’n i bo’n, ɔ nantili Zoova i atin’m be su. Sanngɛ kɛ ɔ yoli kpɛnngbɛn’n, i yi’m be cuɛnnin i kɛ ɔ sɔ ninnge mun. Ɔ maan, ‘i ɲin w’a yiman Zoova kɛ i si Davidi yoli’n sa.’ (1 Fam. 11:4-6) I sɔ’n kle kɛ kannzɛ e ti sɛ e ti sɛ, maan e nanti Ɲanmiɛn i atin’n su titi, nán e yi e ɲin Ɲanmiɛn su mlɔnmlɔn.
Maan titi e lafi Zoova su
14, 15. ?Kɛ e bu Naomi i akunndan’n, ngue ti yɛ ɔ fata kɛ e lafi Ɲanmiɛn su ɔ?
14 Kɛ sa tɔ e su mɔ e wunman e ɲrun nin e sin’n, yɛ ɔ fata kɛ e lafi Ɲanmiɛn su kpa ɔ. I lɛ nun’n, amun e fa Naomi i su ndɛ e nian. Naomi ti angbeti, yɛ ɔ ti oke. Ɔ le ba yasua nɲɔn, kpɛkun ba sɔ’m be wa wuli i sa nun. ?Ɔ́ yó i liɛ sɛ? Kɛ ɔ jasoli Moabu lɔ m’ɔ juli Zida’n, ɔ seli kɛ: ‘Nán amun flɛ min Naomi [yɛle kɛ “Min aklunjuɛ;” an nian Biblu’n nun ndɛ mma’n i ngua lɛ] amun flɛ min Mara [yɛle kɛ “klunngbɔ;” an nian Biblu’n nun ndɛ mma’n i ngua lɛ] afin Ɲanmiɛn m’ɔ kwla like kwlaa yo’n, w’a wla min klunngbɔ. Kɛ ń fɛ́ wa ń kɔ́’n, n le wie, sanngɛ Anannganman takali min, ɔ maan m’an sa min sin n sa ngbɛn. ?Anannganman m’ɔ kwla like kwlaa yo’n, w’a kle min ɲrɛnnɛn kwlaa niɔn, min Naomi flɛlɛ liɛ ekun tre?’—Rit 1:20, 21.
15 Naomi i wla boli i wun dan sɔ. Sanngɛ, kɛ e kanngan Biblu’n nun fluwa mɔ i dunman o su’n i nun’n, e wun kɛ w’a kpɔciman Zoova le. ?I sɔ’n niɔn, nɛ́n i agualiɛ’n yɛ ɔ́ gúa kpa ɔ? Kɛ ɔ́ kɔ́ i ɲrun’n, Boazi wa jali Riti m’ɔ ti Naomi i sewi’n naan b’a wu ba yasua kun. Ba’n yoli Naomi liɛ, i yɛ ɔ tɛli i ɔ. Biblu’n waan: ‘Bla nga be nin be tran lɛ’n be waan: “Ee! Naomi w’a ɲɛn i wa kun.” Yɛ be tɔnnin i dunman kɛ Obɛd. Obɛd sɔ’n yɛ ɔ ti David i nannan’n niɔn. I wa yɛle David i si liɛ Izai.’ (Rit 4:14-17) Kɛ i blɛ wá jú mɔ Ɲanmiɛn wá cɛ́n Naomi nin Riti’n, bé kán klé be kɛ be yoli Zezi m’ɔ ti Mɛsi’n i nannan. (Mat. 1:5, 6, 16) Kɛ Naomi sa’n, sɛ é dí yalɛ’n, nán e kun e wun. Maan e lafi Ɲanmiɛn su titi kɛ nga Nyanndra Mun 3:5, 6 fa kan’n sa. I waan: ‘Nán lafi ɔ bɔbɔ wɔ akunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman, yɛ bo ɔ. Sɛ a bo i dunman’n, ɔ́ bó ɔ ɲrun atin’n.’
Maan e lafi su kɛ Ɲanmiɛn wawɛ’n kwla uka e
16. ?Wafa sɛ yɛ laa Izraɛli lɔ’n, Ɲanmiɛn wawɛ’n ukali kpɛnngbɛn wie mun ɔn?
16 Se e yiman e ɲin Zoova su mlɔnmlɔn’n, i wawɛ’n síe e. (Gal. 5:16-18) Moizi blɛ su’n, Ɲanmiɛn fɛli i wawɛ’n mannin Izraɛlifuɛ kpɛnngbɛn 70 naan Izraɛli ‘nvle’n m’ɔ ti kɛ trɔ sa’n i sualɛ nun’n,’ be uka Moizi. Sran nɲɔn, be flɛ kun kɛ Ɛldad yɛ be flɛ kun ekun Medad, be yɛ be boli be dunman ɔn. Sanngɛ, Ɲanmiɛn wawɛ’n sieli be sran ableso’n kwlaa naan be di be junman’n. (Kal. 11:13-29) Sɛ Ɲanmiɛn kpali be’n, nán ngbɛn ti ɔ. Afin, kɛ sran nga be dun mmua kpali be’m be sa’n, be kusu be le ɲrun, be ɲin yi Ɲanmiɛn, be lafi i su yɛ be klo nanwlɛ’n. (Tul. 18:21) Andɛ kusu’n, kɛ asɔnun kpɛnngbɛn’m be ti sɔ wie ɔ.
17. ?I nun mɔ bé kplán Ɲanmiɛn i tannin sua’n aawlɛ flɛnnɛn’n nun lɔ’n, ngue yɛ Zoova fɛli i wawɛ’n yoli ɔ?
17 I nun mɔ bé kplán Ɲanmiɛn i tannin sua’n aawlɛ flɛnnɛn’n nun lɔ’n, Ɲanmiɛn wawɛ’n suannin junman difuɛ’m be bo wie. Yɛle kɛ bian kun o lɛ’n, be flɛ i Bɛzaleɛli. Zoova maan be fali sua’n i kplanlɛ’n wlɛlɛ i sa nun. Kpɛkun, Ɲanmiɛn ‘fɛli i wawɛ’n mɛnnin i kɛ ɔ́ síe i yɛ ɔ́ mɛ́n i akunndan nin ngwlɛlɛ, ɔ nin sa silɛ kɛ ɔ si junman wafawafa kwlaa di.’ (Tul. 31:3-5) Sanngɛ nán Bɛzaleɛli ngunmin yɛ ɔ dili junman’n dan sɔ’n niɔn. Ɔɔliabu nin sran wie mɔ be si ‘ngwlɛlɛ’n,’ be ukɛli i. Asa ekun’n, Zoova wawɛ’n maan sran kwlaa ng’ɔ ti klun ufuefuɛ’n, ɔ yili like mannin naan be fa kplan sua’n. (Tul. 31:6; 35:5, 30-34) Andɛ kusu’n, like kunngba’n yɛ Klistfuɛ’m be yo ɔ. Yɛle kɛ, Ɲanmiɛn wawɛ’n fanngan nun’n, be tu be klun naan b’a dun mmua fa be wun b’a man Ɲanmiɛn naan w’a sie be. (Mat. 6:33) Ɔ maan, kannzɛ e si junman wie di naan i sɔ junman’n yɛ be fa man e kɛ e di’n, kɛ m’ɔ ti Zoova i junman’n ti’n, maan e srɛ i kɛ ɔ fɛ i wawɛ’n uka e.—Lik 11:13.
Maan titi e sro Zoova m’ɔ sie mɛn wunmuan’n
18, 19. (a) ?Nzuɛn kpa benin yɛ Ɲanmiɛn wawɛ’n maan e yi i nglo ɔ? (b) ?Ajalɛ kpa benin yɛ Simeɔn nin Ani be kle amun ɔn?
18 Kɛ e yiman e ɲin Zoova su mlɔnmlɔn’n, i wawɛ’n yo maan e sro i. Zoova seli i sufuɛ mun kɛ: ‘Anannganman m’ɔ sie mɛn wunmuan’n i kunngba yɛ ɔ fata kɛ amun sro i ɔ.’ (Eza. 8:13) I sɔ yɛ laa Zerizalɛmu lɔ Klistfuɛ klikli’m be blɛ su’n, bian oke kun nin bla oke kun be yoli ɔ. Be flɛ bian’n kɛ Simeɔn yɛ bla’n suan Ani. Be sro Ɲanmiɛn kpa. (Kanngan Lik 2:25-38 nun.) Simeɔn lafi Ɲanmiɛn su yɛ ɔ “minndɛ Izraɛli i wla cicilɛ’n.” Ɲanmiɛn wawɛ’n bo su kleli i kɛ saan ɔ́ wún Defuɛ naan w’a wu. Ɔ yoli sɔ sakpa. Yɛle kɛ, kɛ Mali nin Zozɛfu be wuli Zezi’n, cɛn kun be fɛ i ɔli Ɲanmiɛn sua’n nun lɔ. Kɛ ɔ́ yó sɔ’n, nn Simeɔn o lɔ. Simeɔn fali ba’n, Ɲanmiɛn wawɛ’n maan ɔ kannin Defuɛ’n i wun ndɛ. Kpɛkun, waka’n su mɔ cɛn kun bé wá bóbó Zezi’n, ɔ maan Mali i awlɛn kpɛ́ i klun’n, ɔ kɛnnin i ndɛ wie. Sanngɛ i kwlaa yoli o, kɛ Simeɔn fali ‘e Min Ɲanmiɛn i Klist’ i sa nun m’ɔ́ níɛn i’n, wafa ng’ɔ yoli i fɛ’n, amun bu i akunndan be nian! Lele nin andɛ’n, Simeɔn i Ɲanmiɛn srolɛ klanman sɔ’n, Ɲanmiɛn i sufuɛ’m be nian su!
19 Ani liɛ’n, ɔ ti angbeti yɛ ɔ le afuɛ 84. Ɔ ‘tumɛn i bo Ɲanmiɛn i sua’n nun.’ Ɔ su Ɲanmiɛn kɔnguɛ nin wia nun, ɔ ‘kpɛ srɛ nun yɛ ɔ srɛ Ɲanmiɛn.’ Kɛ bé fá Zezi wlú Ɲanmiɛn i sua’n nun lɔ’n, nn ɔ o lɔ wie. Kɛ ɔ wunnin ba m’ɔ́ wá yó sran’m be Defuɛ’n, ɔ yoli i fɛ dan wie! Ɔ maan, ɔ ‘manmannin Ɲanmiɛn, yɛ ɔ kannin Zezi ndɛ kleli be kwlaa nga be minndɛ kɛ Ɲanmiɛn de Zerizalɛmufuɛ mun’n.’ Nanwlɛ, ndɛ’n yo fɛ dan! Ɔ maan, Ani w’a kwlá fiaman su. Kɛ Simeɔn nin Ani sa’n, andɛ Klistfuɛ mɔ b’a yo oke’n, be bo jasin fɛ’n aklunjuɛ su wie.
20. ?Kannzɛ e ti sɛ e ti sɛ, ngue yɛ ɔ fata kɛ e yo ɔ? ?Yɛ ngue ti ɔ?
20 Kɛ nga y’a fa wun i lɛ’n, sɛ e ti sɛ e ti sɛ o, nán e yi e ɲin Zoova su mlɔnmlɔn. E ɲin mɔ e mian e kɛn i sielɛ’n, ɔ nin i abonuan sa’m be ndɛ e kle e wiengu mun’n, i wla su fiman su. (Jue. 71:17, 18; 145:10-13) Sanngɛ, kɛ ɔ ko yo naan y’a yi Zoova i ayɛ’n ti’n, ɔ fata kɛ e nzuɛn’n yo kɛ i liɛ’n sa. Nzuɛn sɔ mɔ laa i sufuɛ’m be yili i nglo mɔ Biblu’n kan be nun wie be ndɛ’n, like suanlɛ ng’ɔ́ bá lɛ’n wá yíyí nun. I liɛ’n, é wún wafa nga e kwla nian be ajalɛ’n su’n.
?Wafa sɛ yɛ amún tɛ́ kosan’m be su ɔ?
• ?Ngue yɛ ɔ kle kɛ Zoova tɛ e srɛlɛ’m be su ɔ?
• ?Ngue ti yɛ ɔ fata kɛ e nanti Ɲanmiɛn i atin’n su e guɛ i ti’n nin i bo ɔ?
• ?Kɛ sa tɔ e su mɔ e wunman e ɲrun nin e sin’n, ngue ti yɛ ɔ fataman kɛ e yaci Zoova su lafi mlɔnmlɔn ɔn?
• ?Wafa sɛ yɛ Ɲanmiɛn fɛ i wawɛ’n ukɛ i sufuɛ mun ɔn?
[Foto, bue 8]
Zoova tili Neemi i srɛlɛ’n.
[Foto, bue 9]
Kɛ e bu wafa nga Zoova yoli Naomi ye’n i akunndan’n, ɔ maan e lafi i su.