Zoova de ɲrɛnnɛnfuɛ’n

“Sa kekle ng’ɔ ju Anannganman i sufuɛ nanwlɛfuɛ’n i su’n ɔ sɔnnin, sanngɛ Anannganman de i sa sɔ’m be kwlaa be nun kpan.” —JUE MUN 34:20.

1, 2. ?Sa mennin yɛ ɔ tɔli e niaan bla kun su ɔ? ?Yɛ ngue ti yɛ i sɔ sa’n kwla tɔ e su wie ɔ?

BE FLƐ e niaan bla kun kɛ Keiko.a Ɔ ti Zoova i Lalofuɛ w’a di afuɛ 20 tra su. Blɛ wie nun’n, ɔ yoli titi atin bofuɛ, yɛ ɔ kloli i junman’n kpa. Sanngɛ koko nga nun’n, e niaan bla’n i wla wa boli i wun dan. Ɔ yoli i kɛ ɔ leman kisawlɛ sa. Ndɛ ng’ɔ kannin’n yɛ: “Cɛn kwlaa sunlɛ yɛ n sun ɔn.” Kɛ ɔ ko yo naan w’a cici i wla’n ti’n, ɔ wa ukɛli i Biblu’n nun like suanlɛ’n su. Sanngɛ i waan: “Ngbɛn ɔn. N wa buli i kɛ sɛ n wu bɔbɔ’n, ɔ flunman.”

² ?Amun wla w’a bo amun wun sɔ wie le? E si kɛ Zoova i Lalofuɛ mɔ e ti’n ti’n, dɔ nga su’n, ɔ ti kɛ e o mɛn klanman kun nun sa. Yɛ e klun jɔ. Afin be nga be fa be wun mantan Ɲanmiɛn’n, ‘bé ɲán nguan kɛ e o yɛ’n nin blɛ ng’ɔ́ bá lɔ’n nun.’ (1 Timote 4:8) Sanngɛ, nɛ́n i sɔ’n ti yɛ sa’m be kwlá tɔman e su ɔ. Afin Biblu’n waan: “Sa kekle ng’ɔ ju Anannganman i sufuɛ nanwlɛfuɛ’n i su’n ɔ sɔnnin.” (Jue Mun 34:20) I sɔ’n kusu boman e nuan. Afin mmusu’m be si Satan m’ɔ ti “Klunwifuɛ’n sie mɛn wunmuan’n.” (1 Zan 5:19) Ɔ maan e kwlaa e wun i su afɛ’n.—Efɛzfuɛ Mun 6:12.

Kɛ sran wun ɲrɛnnɛn’n

3. Ɲanmiɛn i sufuɛ wie mɔ be wla boli be wun dan, mɔ be ndɛ o Biblu’n nun’n, an kan be ndɛ.

³ Kɛ nzue’n yi dan’n, ɔ bo klɛ nuan. I wie yɛle ɲrɛnnɛn m’ɔ tɔ sran su’n. Kɛ ɔ yo dan tratra su’n, be siman wie se. (Nyanndra Mun 15:15) I wie yɛle Zɔbu m’ɔ ti sran kpa’n i liɛ’n. Kɛ ɲrɛnnɛn’n yoli dan i su’n, ɔ seli kɛ: ‘Klɔ sran’n mɔ bla yɛ ɔ wuli i’n i nguan’n ɔ ti tika. Kusu i nguan sɔ’n, ɔ ti afɛ ngunmin.’ (Zɔb 14:1) Zɔbu w’a wunmɛn i wun fɛ kun. Blɛ wie nun bɔbɔ’n, ɔ buli i kɛ Zoova w’a yi i blo. (Zɔb 29:1-5) Sanngɛ nán Zɔbu kunngba yɛ ɔ ti Ɲanmiɛn i sufuɛ m’ɔ wunnin ɲrɛnnɛn ɔn. Biblu’n se e wie kɛ Ana i klun kpan’n ti’n, i “klun wa kpɔtɔli saa.” (1 Samiɛl 1:9-11) Rebeka kusu’n, sa m’ɔ o i awlo’n nun ti’n, i wla boli i wun. Ɔ seli kɛ: “Be liɛ’n w’a flan min.” (Bo Bolɛ 27:46) Kɛ Davidi i wla kpɛn sa tɛ ng’ɔ yoli be’n su’n, i kusu seli kɛ: ‘Awlabɔɛ’n w’a kun min kpo, n ti nvuɛnnvuɛn tititi.’ (Jue Mun 38:7) Sran sɔ’m be kwlaa be ɲin yili Ɲanmiɛn, sanngɛ be wla boli be wun dan. Kɛ ɔ́ yó sɔ’n, nn e nin a juman Klistfuɛ klikli’m be blɛ su.

4. ?Sɛ andɛ Klistfuɛ wie’m be “awlɛn sɔman’n,’ ngue ti yɛ ɔ fataman kɛ i sɔ’n bo e nuan ɔn?

⁴ ?Yɛ Klistfuɛ’m be li? Akoto Pɔlu mannin Tɛsalokifuɛ’m be afɔtuɛ kɛ be ‘wla be nga be awlɛn sɔman’n be yakpa.’ (1 Tɛsalonikfuɛ Mun 5:14) Fluwa kun waan Glɛki aniɛn nun ndɛ nga be kacili i kɛ ‘be nga be awlɛn sɔman’n,’ ɔ kwla yo “be nga mɛn i kekle’n m’ɔ ti’n ti’n, ɔ ju cɛn wie be wla bo be wun’n.” Ɔ maan, Pɔlu i ndɛ’n kle kɛ Tɛsaloniki lɔ Klistfuɛ nga be kpali be sieli be ngunmin’n, be nun wie’m be angunndan’n sanngannin. Andɛ kusu’n, Klistfuɛ wie’m be angunndan’n kwla sanngan. ?Yɛ ngue ti ɔ? É wá kán sa nsan mɔ i ti yɛ ɔ kwla yo sɔ’n, be ndɛ.

Fɔ m’ɔ o e nun’n kwla bo e wla

5, 6. ?Wafa sɛ yɛ Rɔmfuɛ Mun 7:22-25 i nun ndɛ’n kwla cici e wla ɔ?

⁵ Andɛ sran’m be ‘siman ɲannzuɛn.’ Sanngɛ Klistfuɛ kpa’m be timan sɔ. Be liɛ’n, fɔ m’ɔ o be nun’n i ndɛ yo be ya. (Efɛzfuɛ Mun 4:19) Ɔ maan wie liɛ’n, be kwla bu angunndan nga Pɔlu buli’n i wie. Ɔ seli kɛ: ‘Ɲanmiɛn mmla’n i su falɛ’n yo n fɛ min awlɛn’n nun, sanngɛ n wun kɛ sa uflɛ o lɛ. Min nzuɛn mɔ maan n yo sa tɛ’n, ɔ nin angunndan nga mɔ maan n klo kɛ ń yó sa kpa’n, be ti kɛ sran nɲɔn mɔ be si akplowa sa, lele n fa tɛfuɛ’n su, ɔ maan n kaci sa tɛ yofuɛ mlɔnmlɔn. Eee, n ti ɲrɛnnɛnfuɛ dan!’—Rɔmfuɛ Mun 7:22-24.

⁶ ?Wafa ng’ɔ yoli Pɔlu lɛ’n, w’a yo amun sɔ wie le? Sɛ sran kun si kɛ i nzuɛn wie ti tɛ’n, i sɔ’n timan tɛ. Afin i sɔ’n kwla ukɛ i naan w’a wun i wlɛ kɛ kannzu fɔ o sran nun sakpa. Kpɔkun, i sɔ’n kwla wlɛ i fanngan naan w’a kpalo sa tɛ’n. Sanngɛ, sɛ fɔnlɛ mɔ e fɔn’n ti’n, e bu i kɛ e timan sran kpa mlɔnmlɔn’n, i sɔ’n nin i fataman. Afin Pɔlu bɔbɔ buli i wun kɛ ɔ ti ɲrɛnnɛnfuɛ dan. Sanngɛ i sin’n, ɔ seli kɛ: ‘Ɲanmiɛn kwla o! Afin i yɛ maan e Min Zezi Klist deli e ɔ.’ (Rɔmfuɛ Mun 7:25) Nanwlɛ, Pɔlu lafi su kpa kɛ, kannzɛ sa tɛ nun yɛ be wuli i’n, sanngɛ Zezi i tɛ m’ɔ yili’n kwla de i.—Rɔmfuɛ Mun 5:18.

7. ?Ndɛ mennin yɛ ɔ kwla uka sran kun naan i nzuɛn tɛ wie ti’n, i wla w’a bomɛn i wun ɔn?

⁷ Akoto Zan seli kɛ: ‘M mma mun, kɛ ɔ ko yo naan amun a yoman sa tɛ’n ti, ń klɛ́ ndɛ nga blɛ́ amun. Sanngɛ sɛ sran wie yo sa tɛ’n, e le e ti ndɛ kanfuɛ, ɔ o e Si Ɲanmiɛn wun lɔ, yɛle Zezi Klist m’ɔ ti sran kpa’n. Afin i bɔbɔ fɛ i wun yili e ti tɛ naan Ɲanmiɛn yaci sa nga e yoli i’n cɛ e. Nán e ngunmin e ti tɛ yɛ ɔ yili ɔ, sran’m be kwlaa be liɛ ɔ.’ (1 Zan 2:1, 2) Nanwlɛ, sɛ fɔ m’ɔ o e nun ti’n e wla bo e wun’n, ndɛ sɔ mɔ Zan kannin’n kwla fɔnvɔ e. Sɛ kusu e nzuɛn tɛ wie ti yɛ e wla’n bo e wun’n, nán maan e wla fi su kɛ sɛ Zezi Klist wuli’n, sa tɛ yofuɛ’m be ti yɛ ɔ wuli ɔ. I li bɔbɔ’n, ‘sran’m be kwlaa be yoli sa tɛ, ɔ maan aɲrunɲan nga Ɲanmiɛn waan ɔ́ mán be’n, ɔ to fuannin be.’—Rɔmfuɛ Mun 3:23.

8, 9. ?Ngue ti yɛ ɔ fata kɛ e kpalo angunndan mɔ maan sran bu i wun fɔ’n niɔn?

⁸ Atrɛkpa kusu’n, laa e yoli sa tɛ dan kun. Yɛ lele nin andɛ’n, ɔ te bo e wla. Sanngɛ nn kɛ e yoli sa sɔ’n, e tuli e klun e srɛli Zoova. Yɛ asɔnun kpɛnngbɛn’m be ukali e naan e nin Ɲanmiɛn e afiɛn’n w’a sɛ ekun. (Zak 5:14, 15) E kleli kɛ e wlali sa tɛ’n sɔ’n i ase, ɔ maan b’a tuman e asɔnun’n nun. Atrɛkpa kusu blɛ wie nun’n, sa wie ti’n be tuli e asɔnun’n nun, annzɛ e bɔbɔ e tuli asɔnun’n nun. Kpɔkun kɛ ɔ́ kɔ́ i ɲrun’n, e kacili e nzuɛn’n ɔ maan be sɔli e nun asɔnun’n nun ekun. Sanngɛ ɔ ju cɛn wie’n, sa sɔ’n ti’n, e wla bo e wun. Sɛ ɔ yo e sɔ’n, maan e wla kpɛn su kɛ Zoova liɛ’n, kɛ ɔ yaci sran’n i wun sa cɛ i’n, ɔ yaci ‘cɛ i weiin.’ (Ezai 55:7) Zoova kunndɛman kɛ e klun angunndan’n yo maan e bu e wun fɔ sa trilili. Satan yɛ ɔ klo i sɔ’n niɔn. (2 Korɛntfuɛ Mun 2:7, 10, 11) Ɔ si kɛ, ɔ ka kaan sa’n Zoova wá núnnún i. Ɔ maan, ɔ kunndɛ kɛ e bu i kɛ e kusu e nin nunnunlɛ’n fata wie. I sɔ angunndan’n kwla saci e Ɲanmiɛn sulafilɛ’n. Ɔ maan, nán e yaci Satan lɛ naan ɔ fɛ i sɔ angunndan’n wla e ti nun. (Efɛzfuɛ Mun 6:11) Nán e ‘lo e wun mɛn i,’ kɛ nga sa uflɛ nun e loman e wun e mɛnmɛn i’n sa.—1 Piɛr 5:9.

⁹ Sa Nglo Yilɛ 12:10 waan Satan ti ‘e niaan’m be sanmanfuɛ m’ɔ sanman be Ɲanmiɛn ja su wia nun nin kɔnguɛ’n.’ E niaan sɔ m’ɔ sanman be’n, yɛle Klistfuɛ nga Ɲanmiɛn kpali be sieli be ngunmin’n. Sɛ e wun ndɛ sɔ’n i bo’n, é wún i wlɛ kɛ Satan m’ɔ ti sran’m be sanmanfuɛ’n, ɔ kunndɛ kɛ e klun angunndan’n yo maan e bu e wun fɔ. Sanngɛ Zoova liɛ’n, ɔ sanmanman sran. Yɛ ɔ kunndɛman kɛ e klun angunndan’n yo maan e bu e wun fɔ. (1 Zan 3:19-22) ?Sɛ ɔ ti sɔ’n niɔn, ngue ti yɛ é kókó e sa tɛ nga e yoli’n su lele naan ɔ yo e kɛ e yaci Zoova sulɛ ɔ? Nán e man Satan i atin naan ɔ saci e nin Ɲanmiɛn e afiɛn. Yɛ nán e yaci i lɛ naan ɔ saci e angunndan’n naan e bu i kɛ Zoova m’ɔ ti ‘Ɲanmiɛn aklunyefuɛ, nin aunnvuɛ sifuɛ, m’ɔ faman ya ndɛndɛ’n,’ ɔ timɛn i sɔfuɛ.—Ezipt Lɔ Tulɛ 34:6.

Sa ng’ɔ o e su’n kwla bubu e sa sin

10. ?Ngue ti yɛ sa m’ɔ o e su’n kwla bubu e sa sin ɔn?

¹⁰ Sa m’ɔ o Klistfuɛ wie’m be su’n ti’n, be kwlá tuman be klun diman Ɲanmiɛn i junman’n kɛ nga be kunndɛ’n sa. I sɔ’n ti’n, be sa sin bubu be. Wie liɛ’n tukpaciɛ’n, annzɛ oke yolɛ’n, annzɛ sa uflɛ wie ti’n, be kwlá boman jasin fɛ’n i kpa kɛ laa’n sa. ?Kɛ ɔ yo amun sɔ wie ɔ? E si kɛ Biblu’n waan sɛ e ɲan e ti’n, nán e tran lɛ ngbɛn naan e di Ɲanmiɛn junman’n kpa. (Efɛzfuɛ Mun 5:15, 16) ?Sanngɛ, sɛ sa m’ɔ o e su’n ti’n, e kwlá ukaman e jasin fɛ’n bolɛ’n su naan i sɔ’n bo e wla’n, é yó i sɛ?

11. ?Wafa sɛ yɛ Pɔlu i ndɛ ng’ɔ o Galasifuɛ Mun 6:4 nun kwla uka e ɔ?

¹¹ Biblu’n wla e fanngan kɛ nán e yo nvɛɛfuɛ. Sanngɛ ‘be nga be lafi Ɲanmiɛn su’n, mɔ be tra be awlɛn mɔ maan be ɲan like nga i waan ɔ́ fá mán be’n, an nian be liɛ’n su yo.’ (Ebre Mun 6:12) Sanngɛ nɛ́n i sɔ ndɛ’n mɔ Pɔlu kannin’n, i ti yɛ é fá e wun súnnzun sran uflɛ kpɔkun é bú i kɛ e junman liɛ’n, ɔ juman lika fi ɔ. Sɛ e yo sɔ’n, ɔ su yoman e wun sa ye mlɔnmlɔn. Ndɛ mɔ Pɔlu kannin’n i bo’n yɛle kɛ be nga be lafi Ɲanmiɛn su kpa’n, maan e nian be liɛ’n su. I sɔ’n ti’n, maan e nanti ndɛ nga Pɔlu kɛnnin i yɛ’n su. Ɔ seli kɛ: ‘Maan sran kun niɛn i bɔbɔ i ɲoliɛ’n, sɛ ɔ wun kɛ ɔ ti kpa’n, ɔ́ yó i fɛ, ɔ maan ɔ su faman sran uflɛ liɛ’n sunnzunmɛn i liɛ’n.’—Galasifuɛ Mun 6:4.

12. ?Ngue ti yɛ e klun kwla jɔ junman nga e di e man Zoova’n i su ɔ?

¹² Kannzɛ bɔbɔ tukpaciɛ’n o Klistfuɛ kun su’n, sanngɛ i klun kwla jɔ dan. Afin Biblu’n waan: ‘Ɲanmiɛn yoman sa m’ɔ timɛn i su’n, i wla fiman junman nga an dili nin klolɛ nga an fa klo i’n su.’ (Ebre Mun 6:10) Sa wie mɔ e lemɛn i yowlɛ’n ti’n, e kwlá boman jasin fɛ’n kɛ laa’n sa. Sanngɛ Zoova fanngan nun’n, atrɛkpa’n e kwla di junman sɔ’n i wafa wie mun kpa. Yɛle kɛ e kwla fa telefɔnu, annzɛ lɛtri e bo jasin fɛ’n. Maan e lafi su kɛ e klun mɔ e tu e di Zoova i junman’n, ɔ nin klolɛ mɔ e klo i nin e wiengu mun’n ti’n, saan Zoova yrá su.—Matie 22:36-40.

‘Lika kekle’n’ ti’n, e wla’n kwla bo

13, 14. (a) ?‘Lika’n i kekle’ m’ɔ ti’n ti’n, sa mennin yɛ ɔ kwla tɔ e su ɔ? (b) ?Ngue yɛ ɔ kle kɛ andɛ’n, be kloman sran ɔn?

¹³ Kannzɛ e ɲin o Ɲanmiɛn i mɛn uflɛ’n i sin’n, sanngɛ dɔ nga su’n, ‘lika’n ti kekle.’ (2 Timote 3:1) E si kɛ, ɔ ka kaan é fíte nun. Sanngɛ dɔ nga su’n, afɛ’n o e kwlaa e su. Atrɛkpa’n, e diman junman. Yɛ junman bɔbɔ ba sa’n, be ɲɛnmɛn i naan se kɛ i dilɛ yɛ bé dí ɔ. Ɔ maan e kwla usa e wun kɛ: ?Zoova lii, ɔ wun min? ?Annzɛ srɛlɛ mɔ n srɛ i’n, ɔ ti? Wie liɛ kusu’n, lufle yɛ be bu e ɔ. Annzɛ be yo e sa uflɛ wie mun ekun. Nganniɛn nga e kanngan be zronali’m be nun kusu’n, be kwla yo e ya. Be kwla yo e ya kɛ Lɔtu m’ɔ ti sran kpa’n, mɔ sa tɛtɛ nga sran’m be yo’n, be ‘yoli i ya’n’ sa.—2 Piɛr 2:7.

¹⁴ Biblu’n kannin sa kun mɔ kɛ mɛn kɔ́ i bue nuan’n, é wá wún i’n, i ndɛ. Sa sɔ’n, e ɲin kwlá kpaman su. Ɔ seli kɛ sran kpanngban ‘be su kloman sran.’ (2 Timote 3:3) Sakpasakpa, andɛ awlo sunman be nunfuɛ’m be kloman be wun. Fluwa Violence au sein de la famille (be klɛli i Angle nun) seli kɛ siɛn’n, “awlo nunfuɛ’m be kun be wiengu. Be yo be wiengu i like yaya, be bo i wla, be nin i la kekle nun. Be yo i sɔ liɛ’n tra gua su lɔfuɛ mun bɔbɔ. Awlo mɔ i nun yɛ ɔ fata kɛ be klo sran kaklaakla ɔ nin ba mun naan be sasa be’n, i nun tranlɛ’n w’a yo tɛ. I tɛ liɛ’n, ɔ lemɛn i wunsu.” Kpɔkun be nga be kleli be ɲrɛnnɛn be awlo lɔ’n, kɛ ɔ́ kɔ́ i ɲrun’n, ɔ ju cɛn wie be wla tɔ blo, ɔ yo be kɛ be leman kisawlɛ sa. ?Sɛ i sɔ sa o amun su’n, ngue yɛ amun kwla yo ɔ?

15. ?Wafa sɛ yɛ Zoova i sran klolɛ’n, ɔ tra klɔ sran liɛ’n lele ɔ?

¹⁵ Jue tofuɛ Davidi seli kɛ: “Sɛ bɔ min si nin min nin be yi min blo’n, Anannganman ɔ́ fá min síe.” (Jue Mun 27:10) Kannzɛ siɛ kun, annzɛ niɛn kun klo i wa’n sɛ’n, sanngɛ ɔ juman Zoova liɛ’n nun. Nanwlɛ, i sɔ’n fɔnvɔ e dan! Atrɛkpa’n, amun si’n annzɛ amun nin’n be yoli amun tɛtɛ, annzɛ be yili amun blo. Ɔ maan amun wla’n bo amun wun dan. Sanngɛ Zoova liɛ’n, ɔ niɛnmɛn i sɔ’n naan w’a nian amun lika. (Rɔmfuɛ Mun 8:38, 39) Maan amun si kɛ be nga Zoova klo be’n, be yɛ ɔ fa be bɛ i sin ɔn. (Zan 3:16; 6:44) Ɔ maan kannzɛ be yoli amun tɛtɛ sɛ’n, sanngɛ amun Si’n m’ɔ o ɲanmiɛn su lɔ’n, ɔ klo amun!

Wafa nga e kwla fin awlabɔɛ’n nun fite’n

16, 17. ?Sɛ Klistfuɛ kun i wla bo i wun’n, ngue yɛ ɔ kwla yo naan i Ɲanmiɛn sulafilɛ’n w’a kpɔnzɔman ɔn?

¹⁶ Kɛ e wla bo e wun’n, e kwla yo ninnge wie mun naan y’a fin nun y’a fite. I wie yɛle kɛ, maan e siesie e wun naan e yo Ɲanmiɛn i ninnge liɛ mun. Sɛ e wun kɛ awlabɔɛ’n su yo dan’n, maan e bu Ɲanmiɛn Ndɛ’n i su angunndan. Jue tofuɛ’n seli kɛ: ‘Kɛ n waan: “Ndɛ liɛ m’an tɔ o!” Kpɔkun Anannganman, a suan min bo ɔ klunufue’n ti. Blɛ mɔ min angunndan’n sanngan sa sunman ti’n, a fɔnvɔ min ɔ maan n ɲan aklunjuɛ.’ (Jue Mun 94:18, 19) Sɛ e kanngan Biblu’n nun cɛn kwlaa, ɔ́ fɔ́nvɔ e, yɛ ɔ́ wlá e fanngan.

¹⁷ Ɔ fata kɛ e srɛ Ɲanmiɛn wie. Sɛ bɔbɔ e klun ndɛ nga e waan é kán’n e wunmɛn i kanwlɛ’n, sanngɛ Zoova si e klun angunndan’n. (Rɔmfuɛ Mun 8:26, 27) Jue tofuɛ’n seli kɛ: “Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo. Ɔ su yacimɛn i sufuɛ kpa’n lɛ maan srɛ kunmɛn i naan i wun usumɛn i.”—Jue Mun 55:23.

18. ?Ngue yɛ sran nga i wla bo i wun’n, ɔ kwla yo ɔ?

¹⁸ Sran wie’m be liɛ’n, be awlabɔɛ’n, ɔ ti be wun tukpaciɛ.b Sɛ amun ti i sɔfuɛ’n, amun mian amun ɲin blɛblɛblɛ naan Ɲanmiɛn i mɛn uflɛ mɔ i nun’n, sran fi ‘su seman kɛ: “N kpinndinman’n,”’ an fa amun ɲin sie su. (Ezai 33:24) Sɛ kusu awlabɔɛ’n tɔ amun su tikatika’n, amun ɔ dɔɔtrɔ. (Matie 9:12) Ɔ fata kɛ an nian amun wun su. An nian aliɛ nga amun di’n su. Amun kpinngbin amun wun, yɛ amun lo wunmiɛn kpa. Televiziɔn mɔ be trɛn i bo lele’n, nán amun yo sɔ. Be ɲin su yiyilɛ kusu nga be yiyi i lele be fɛ dan’n, nán an fa amun ti wla nun. Like ng’ɔ kwla uka amun dan’n yɛle Ɲanmiɛn junman’n i dilɛ! Yɛ kannzɛ bɔbɔ blɛ nga Ɲanmiɛn wá ‘núnnún be ɲinmuɛn’n kwlaa’ ɔ nin a juman’n, sanngɛ Ɲanmiɛn súan amun bo.—Sa Nglo Yilɛ 21:4; 1 Korɛntfuɛ Mun 10:13.

‘Ɲanmiɛn m’ɔ kwla sa kwlaa yo’n’ i sa o e su

19. ?Ngue yɛ Zoova waan ɔ́ yó mán ɲrɛnnɛnfuɛ mun ɔn?

¹⁹ Kannzɛ sa kekle ng’ɔ ju Zoova i sufuɛ nanwlɛfuɛ’n i su’n ɔ sɔnnin’n, sanngɛ Biblu’n waan ‘Zoova de i sa sɔ’m be kwlaa be nun kpan.’ (Jue Mun 34:20) ?Wafa sɛ yɛ Ɲanmiɛn de i ɔ? Kɛ ‘tukpaciɛ wie tɔli Pɔlu su m’ɔ kɛli i kplo nun’n,’ ɔ srɛli Ɲanmiɛn cɔcɔcɔ kɛ ɔ yi tukpaciɛ sɔ’n. Sanngɛ Ɲanmiɛn tɛli i su kɛ: ‘Ye nga n yo wɔ’n ɔ ju wɔ, afin kɛ sran’n ɔ leman wunmiɛn’n i nun sɔ’n nun yɛ n yi min wun nglo kɛ n kwla like’n kwlaa yo ɔ.’ (2 Korɛntfuɛ Mun 12:7-9) ?Kɛ e fa e wun i lɛ sa’n, Ɲanmiɛn seli Pɔlu sɛ? W’a semɛn i kɛ ɔ́ wíe i tukpaciɛ’n, sanngɛ ɔ seli kɛ ɔ́ súɛn i bo. I sɔ kunngba’n yɛ Ɲanmiɛn wá yó mán e ɔ.

20. ?Kannzɛ bɔbɔ sa kekle o e su’n, sanngɛ ndɛ mennin yɛ 1 Piɛr 5:6, 7 kan mɔ e lafi su ɔ?

²⁰ Akoto Piɛli seli kɛ: ‘I sɔ’n ti, an yo amun wun aenvuɛfuɛ Ɲanmiɛn m’ɔ kwla sa kwlaa yo’n i ɲrun naan sɛ cɛn ng’ɔ sieli’n ju’n w’a man amun su. An koko sa ng’ɔ o amun su’n i kwlaa kle i, afin i yɛ ɔ nian amun lika ɔ.’ (1 Piɛr 5:6, 7) Zoova nian e lika, ɔ su yimɛn i sa e su le. Kannzɛ ɲrɛnnɛn’n o e su sɛ’n, sanngɛ ɔ́ jrán e sin. Nán e wla fi su, ‘Ɲanmiɛn m’ɔ kwla sa kwlaa yo’n’ i sa o Klistfuɛ kpa’m be su. Zoova i sufuɛ kpa mɔ e ti’n ti’n, ɔ́ mán e wunmiɛn maan é jrán kekle. Sɛ e nin i e nanti klanman’n, like fi su saciman e nin i e afiɛn. I sɔ’n ti’n, maan e nin Zoova e nanti klanman titi. I liɛ’n, kɛ asiɛ’n wá káci mɛn klanman’n, é dí mɛn. Sran fi i wla su bomɛn i wun kun mlɔnmlɔn!

[Ja ngua lɛ ndɛ mun]

?Amun wla kwla kpɛn su?

• ?Ngue ti yɛ ɲrɛnnɛn tɔ Ɲanmiɛn i sufuɛ’m be su wie ɔ?

• ?Ngue yɛ ɔ kwla bo Ɲanmiɛn i sufuɛ wie’m be wla ɔ?

• ?Wafa sɛ yɛ Zoova uka e naan y’a fin awlabɔɛ’n nun y’a fite ɔ?

• ?Kɛ be se kɛ ‘Ɲanmiɛn m’ɔ kwla sa kwlaa yo’n’ i sa o e su’n, i bo’n yɛle mennin?

[Foto’m be su ndɛ mun, bue 18]

Kannzɛ bɔbɔ sa kekle o Zoova i sufuɛ’m be su’n, sanngɛ be klun jɔ.