?Ngue ti yɛ Zoova i Lalofuɛ’m be diman Paki-ɔ?
Ndɛ nga sran’m be kan m’ɔ timan su’n
Ndɛ nga sran’m be kan’n: Like nga ti yɛ Zoova i Lalofuɛ’m be diman Paki’n yɛle kɛ be timan Klisifuɛ.
Ndɛ nanwlɛ’n: E lafi su kɛ Zezi Klisi ti e Defuɛ yɛ e mian e ɲin e ‘nian like ng’ɔ yoli’n su seiin e nanti.’—1 Piɛli 2:21; Liki 2:11.
Ndɛ nga sran’m be kan’n: Zoova i Lalofuɛ’m be lafiman su kɛ Zezi cɛnnin nguan.
Ndɛ nanwlɛ’n: E lafi su kɛ Zezi cɛnnin nguan yɛ e wun i wlɛ kɛ i su yɛ Klisifuɛ’m be Ɲanmiɛn sulafilɛ’n taka-ɔ. Asa’n kɛ é bó jasin fɛ’n e kɛn i cɛnlɛ’n i ndɛ.—1 Korɛntifuɛ Mun 15:3, 4, 12-15.
Ndɛ nga sran’m be kan’n: Amun kunndɛman kɛ amun mma’m be di Paki’n i su aklunjɔɛ’n wie.
Ndɛ nanwlɛ’n: E klo e mma mun. Ɔ maan e yo like kwlaa nga e kwla yo naan y’a ta be kpa naan kusu b’a di aklunjɔɛ’n.—Titi 2:4.
?Ngue ti yɛ Zoova i Lalofuɛ’m be diman Paki-ɔ?
Paki dilɛ’n takaman Biblu’n su.
Zezi w’a seman kɛ e di i cɛnlɛ’n i ti cɛn, sanngɛ i wie’n yɛ i waan e wla kpɛn su-ɔ. Ɔ maan afuɛ kwlaa’n e wla kpɛn i wie’n su. Yɛ e yo i kɛ nga laa Klisifuɛ’m be fa yoli’n sa.—Liki 22:19, 20.
E wun i wlɛ kɛ Ɲanmiɛn kunndɛman kɛ e di Paki. Afin ninnge nga be yo i cɛn sɔ nun’n nin ninnge nga laa kɛ bé sɔ́ ba wulɛ amuin’n be yo’n be ti kun. Ɲanmiɛn kunndɛ kɛ e ‘su i kunngba cɛ.’ Ɔ maan sɛ i sulɛ nun’n e fa ninnge uflɛ e wla nun’n ɔ su yomɛn i fɛ.—Ezipti Lɔ Tulɛ 20:5; 1 Famiɛn Mun 18:21.
E lafi su kpa kɛ ajalɛ nga e fɛli i kɛ e diman Paki’n ɔ taka Biblu’n su. Afin Biblu’n wla e fanngan kɛ nán e fa e wun e wlɛ i ninnge nga klɔ sran’m be yo be’n be nun. Sanngɛ i waan e yo ‘ngwlɛlɛfuɛ nin akunndanfuɛ.’ (Ɲanndra Mun 3:21; Matie 15:3) Kannzɛ e kan like nga ti yɛ e diman Paki’n i ndɛ e kle sran mun’n, sanngɛ e mianman sran’m be kɛ be yo kɛ e sa. Afin e wun i wlɛ kɛ cɛn dilɛ nun’n sran kun bɔbɔ le atin fɛ i tiaun ajalɛ.—1 Piɛli 3:15.