?Wafa sɛ yɛ Biblu’n kwla uka e naan y’a bu sran ngba sran-ɔn?

Nvlenvle’m be anuannzɛ kun seli kɛ: “Sɛ ɔ ti kɛ sran’m be bu be nga be timan kɛ be sa’n be sran’n nn é kwlá trán fɔun asiɛ’n su.”—UNESCO Declaration of Principles on Tolerance, 1995.

Kɛ lika kun nun’n sran’m be buman be nga be timan kɛ be sa’n be sran’n be kpɔ be wiengu. I sɔ’n yo maan be kan ndɛ tɛtɛ kle be wiengu, be bu be wiengu lufle, yɛ be yo be wiengu’m be kpokokpoko.

Sanngɛ kɛ be se kɛ be bu be nga be timan kɛ be sa’n be sran’n, wafa nga sran’m be fa wun i wlɛ’n ɔ ti fanunfanun. Wie’m be waan kɛ be se kɛ sran kun bu be nga be timan kɛ i sa’n be sran’n ɔ fata kɛ sran sɔ’n klo like kwlaa nga be nga be timan kɛ i sa’n be yo’n. Wie’m be liɛ’n be waan sran ng’ɔ bu be nga be timan kɛ i sa’n be sran’n yɛle sran ng’ɔ niɛn i sɔ’n i su ndɛ nga Biblu’n kan’n su nanti’n. Yɛle kɛ kɛ sran uflɛ’m be yo like kun’n, kannzɛ i klun jɔman su’n, sanngɛ ɔ si kɛ sran kun bɔbɔ yɛ ɔ fɛ i tiaun ajalɛ-ɔ. Ɔ maan ɔ seman kɛ san fii be yo kɛ i sa.

?E blɛ liɛ nga nun’n, Biblu’n kwla uka sran mun naan b’a bu be nga be timan kɛ be sa’n be sran?

Biblu’n yo maan e bu sran ngba sran

Biblu’n wla e fanngan kɛ e nin sran’m be kwlaa e tran klanman. I waan: “Maan sran’m be kwlaa be wun kɛ amun like yolɛ yoman ya.” (Filipufuɛ Mun 4:5) Biblu’n se kɛ ɔ fata kɛ e ɲin yi wiengu mun, naan e yo be kpa. Be nga be fa afɔtuɛ sɔ’n su, atrɛkpa’n be su yoman like kun mɔ be wiengu’m be yo wie annzɛ be klun su jɔman su. Sanngɛ be se be wun kɛ sran kun bɔbɔ kwla fɛ i klunklo ajalɛ.

Kusu’n, Biblu’n waan Ɲanmiɛn kleli wafa ng’ɔ fata kɛ sran’m be nanti’n. Ɔ se kɛ: “Ee, klɔ sran, [Ɲanmiɛn] kannin sa ng’ɔ ti kpa’n i ndɛ kleli wɔ.” (Mise 6:8) Biblu’n kle like nga Ɲanmiɛn kunndɛ kɛ sran’m be yo naan b’a di aklunjɔɛ’n.—Ezai 48:17, 18.

Ɲanmiɛn w’a manman e atin kɛ e di e wiengu’m be jɔlɛ. Biblu’n se kɛ: “Sran kunngba cɛ yɛ ɔ ti Mmla Kpɛfuɛ nin Jɔlɛ Difuɛ-ɔ. […] ?A ti ɔ liɛ sɛ ti yɛ a di ɔ wiengu jɔlɛ-ɔ?” (Zaki 4:12) Ɲanmiɛn mannin e atin kɛ e fa e klunklo ajalɛ, yɛ ajalɛ nga e fa’n e bɔbɔ yɛ é ísɛ i bo nzuɛn’n niɔn.—Mmla’n 30:19.

Sran i sran bulɛ’n i su ndɛ nga Biblu’n kan’n

Biblu’n se kɛ e “bu sran’m be kwlaa be sran.” (1 Piɛli 2:17, Biblu Nyanmiɛn Ndɛ) I sɔ’n ti’n, be nga be nanti Biblu’n nun ndɛ’n su’n be bu sran’m be kwlaa be sran. Kannzɛ bɔbɔ be lafiman like kunngba’n su annzɛ be ayeliɛ’n timan kɛ be liɛ’n sa’n be yo sɔ. (Liki 6:31) I sɔ’n kleman kɛ be klun jɔ like kwlaa nga sran’m be lafi su’n annzɛ ndɛ kwlaa nga be kan’n annzɛ ajalɛ kwlaa nga be fa’n su. Sanngɛ be nin sran kwlaa be nanti klanman. I lɛ nun’n be sɔnnzɔn wafa nga Zezi bɔbɔ nin sran’m be fa nantili’n ɔ. Yɛle kɛ be yoman be finfin yɛ be yoman be kpokokpoko.

I wie yɛle kɛ cɛn kun’n, Zezi wunnin bla kun mɔ i Ɲanmiɛn sulɛ wafa’n timan Zezi i klun su’n. Asa’n, bla sɔ’n tran bian kun m’ɔ timɛn i wun’n i bo. Zezi i klun jɔman i sɔ like liɛ’n su. Ɔ nin i sɔ ngba’n, ɔ kannin ndɛ aɲinyiɛ su kleli bla’n.— Zan 4:9, 17-24.

Kɛ Zezi sa’n, Klisifuɛ’m be yiyi like nga be lafi su’n i nun be kle be nga be kunndɛ kɛ bé tíe be nuan ndɛ’n. Sanngɛ be yo sɔ “amanniɛn su.” (1 Piɛli 3:15) Biblu’n waan nán maan Klisifuɛ’m be mian sran mun kɛ be fa be ndɛ’n su. Ɔ se kɛ Klisifuɛ “nin utre dilɛ fataman. Sanngɛ ɔ fata kɛ ɔ nin sran’m be kwlaa be tran klanman.” Be nga be lafiman like ng’ɔ lafi su’n wie’n be o sran sɔ’m be nun wie.—2 Timote 2:24.

Sran kpɔlɛ’n i su ndɛ nga Biblu’n kan’n

Biblu’n se e kɛ ‘maan e nin sran’m be kwlaa e di anuansɛ.” (Ebre Mun 12:14) Sran ng’ɔ klo anuansɛ’n ɔ kpɔman sran. Ɔ miɛn i ɲin naan ɔ nin i wiengu’m b’a tran klanman titi. Sanngɛ nɛ́n i sɔ’n ti yɛ ɔ́ yó like nga i bɔbɔ klomɛn i’n niɔn. (Matie 5:9) I kpa’n, Biblu’n wla Klisifuɛ’m be fanngan kɛ be klo be kpɔfuɛ mun. Yɛle kɛ be nga be yo be tɛ’n, maan be yo be kpa.—Matie 5:44.

Ɔ ti su kɛ Biblu’n se kɛ Ɲanmiɛn “kpɔ” ayeliɛ nga be yo sran wanzo’n nin nga be fa ɲrɛnnɛn yi sran su’n. (Ɲanndra Mun 6:16-19) Sanngɛ Biblu’n nun ndɛ mma sɔ’n nun’n, kɛ be kan ayeliɛ wie’m be “kpɔlɛ” ndɛ’n wafa nga ayeliɛ sɔ’m be yo sran kun i kain’n i ndɛ yɛ be kan-ɔn. Biblu’n kle kɛ Ɲanmiɛn klo kɛ ɔ́ yáci be nga be kunndɛ kɛ bé káci be sa naan bé nánti i mmla’m be su’n be wun sa’n cɛ́ be naan ɔ́ úka be.—Ezai 55:7.

Biblu’n nun ndɛ mma wie mɔ be kan sran i sran bulɛ ndɛ’n

Titi 3:2: “Nán maan be like yolɛ yo ya, maan be nin sran’m be kwlaa be tranlɛ nun’n be yo wɛtɛɛfuɛ.”

Matie 7:12: “I sɔ’n ti’n, like kwlaa nga amun klo kɛ sran’m be yo be man amun’n, amun kusu amun yo man be wie.”

Zozie 24:15: “Andɛ’n, amun kle like nga amún sú i’n.”

Sa Nga Be Yoli’n 10:34: “Ɲanmiɛn kpaman sran nun.”

Abakiki 1:12, 13: “[Ɲanmiɛn] kwlá tranman lɛ nianman klunwi ayeliɛ’n.”

Rɔmunfuɛ Mun 12:19: “Amun man Ɲanmiɛn i atin naan ɔ yi i ya’n i nglo. Afin be klɛli i kɛ: ‘Min yɛ n tu klunngbɔ’n niɔn. Min yɛ ń túa be kalɛ-ɔ.’ Ndɛ nga Zoova kan’n yɛ ɔ o lɛ-ɔ.”a

Ɲanmiɛn Zoova w’a manman sran fi i atin kɛ ɔ tu i klunngbɔ. Sɛ blɛ nga i bɔbɔ sieli’n ju’n ɔ́ yó maan bé yó sa i nuan su sɛsɛsɛ. Sɛ a kunndɛ á sí nun kpa ekun’n, kanngan ndɛ “Y aura-t-il un jour la justice dans le monde ?” i nun.