Kosan’m be su tɛlɛ

◼ ?Fluwa nɲɛ yɛ ɔ fata kɛ e nin Biblu’n nun like suanfuɛ kun m’ɔ kɔ i ɲrun’n e suan nun like ɔ?

Maan e kle Biblu’n nun like suanfuɛ ng’ɔ kɔ’n i ɲrun’n i Biblu’n nun like’n lele maan ɔ wie fluwa nɲɔn be nun like suan weiin. Fluwa sɔ mun yɛle ?Ngue like yɛ Biblu’n kle i sakpasakpa ɔ? ɔ nin ‘Maan e yo sa nga e yo ɔ e si kɛ Ɲanmiɛn klo e’n.’ Wienun ɔn, Biblu’n nun like suanfuɛ’n w’a wieman fluwa nɲɔn sɔ’m be nun like suan yɛ be yoli i batɛmu ɔ. Sɛ ɔ ti sɔ’n, maan be kle i like lele naan ɔ wie be nun like suan. I lɛ nun’n, amun rapɔru’n su’n, maan amun klɛ dɔ’n ɔ nin i osu nga amun ko nian’n. Kpɛkun, amun kɛ i wla sran nga amun kle be Biblu’n nun like’n be nun wie. Jasin bofuɛ nga ɔ ko sunman amun’n, mɔ amun nin i kle like’n, ɔ kwla ka dɔ’n wie.—An nian afuɛ 2009 nun Ɲanmiɛn Sielɛ Blɛ junman fluwa’n Marsi liɛ’n, i bue 2 nun.

Kwlaa naan y’a yaci be nga e kle be Ɲanmiɛn ndɛ’n be Biblu’n nun like klelɛ’n, ɔ ti cinnjin kpa kɛ be bo wla ase kpa Ɲanmiɛn ndɛ’n i silɛ nun. Afin sa yalɛ wá tɔ́ be su. Ɔ maan kɛ ɔ yo naan b’a kwla jran kekle’n, ɔ fata kɛ be yo “kɛ sua bɔ be wlɛ i bo ase kpa’n sa,” yɛ be “lafi” Klist su. (Kol. 2:6, 7; 2 Tim. 3:12; 1 Piɛ. 5:8, 9) Asa ekun’n, ɔ fata kɛ like suanfuɛ’m be bɔbɔ be dun mmua wun “sa ng’ɔ ti nanwlɛ’n i wlɛ kpa,” naan b’a kwla si sran uflɛ i like kle. (1 Tim. 2:4) Kɛ e kle like suanfuɛ’m be like fluwa nɲɔn nun’n, ɔ uka be naan “atin nga be sin nun-ɔn be nyan nguan’n,” b’a si su nanti.—Mat. 7:14.

Kwlaa naan asɔnun kpɛnngbɛn’m b’a man atin kɛ be yo sran kun i batɛmu’n, maan be nian sɛ ɔ wun Ɲanmiɛn Ndɛ’n klelɛ’n i bobolɛ nun ninnge’m be wlɛ kpa o. Naan kusu’n, ɔ nian be su nanti o. Sɛ be nin like suanfuɛ kun mɔ w’a wieman fluwa klikli’n i nun like suan be su koko batɛmu yolɛ’n i su yalɛ’n, maan be bo be ɲin ase kpa. Sɛ be nian naan ɔ nin a juman batɛmu yolɛ’n, maan be fa ajalɛ naan b’a ukɛ i kpa. I liɛ’n, cɛn uflɛ ɔ kwla yo ye.—An nian fluwa ‘An wɔ ko kle be like maan be kaci n sɔnnzɔnfuɛ, yɛ an yo be batɛmu’ i bue 57-60 nun.

[Ndɛ kwle, bue 2]

Ɔ fata kɛ be nga e kle be Ɲanmiɛn ndɛ’n be bo wla ase kpa Ɲanmiɛn ndɛ’n i silɛ nun.