?Ɲanmiɛn Sielɛ’n wo e awlɛn’n nun?
Ndɛ nga Biblu’n kan’n
Cɛcɛ, Ɲanmiɛn Sielɛ’n timan like kun m’ɔ o Klisifuɛ’m be awlɛn’n nun-ɔn.a Biblu’n bɔbɔ flɛ i kɛ “ɲanmiɛn su lɔ famiɛn diwlɛ.” I sɔ’n kle e lika nga Ɲanmiɛn Sielɛ sɔ’n wo’n. (Matie 4:17) Maan e fa e ɲin e sie i ndɛ nga Biblu’n kan m’ɔ kle kɛ Ɲanmiɛn Sielɛ’n ti awa jrɛin kun m’ɔ o ɲanmiɛn su lɔ’n su.
Ɲanmiɛn Sielɛ’n ɔ le i famiɛn mun, nin be nga ɔ sie be’n, ɔ nin i mmla mun. Yɛ junman ng’ɔ fata kɛ ɔ di’n yɛle kɛ ɔ yo maan be yo Ɲanmiɛn i klun sa’n ɲanmiɛn su lɔ nin asiɛ’n su wa.—Matie 6:10; Sa Nglo Yilɛ 5:10.
Ɲanmiɛn Sielɛ’n ɔ́ wá síe “sran wafawafa kwlaa, nin nvlenvle mun, nin sran mɔ be aniɛn’n ti fanunfanun’n” asiɛ’n su. (Daniɛli 7:13, 14) Nán be ng’ɔ sie be’n yɛ be mɛn i kwlalɛ-ɔ. Sanngɛ i kwlalɛ’n fin Ɲanmiɛn bɔbɔ.—Jue Mun 2:4-6; Ezai 9:7.
Zezi seli i sɔnnzɔnfuɛ nga b’a kpɔcimɛn i’n be kɛ “bé trán famiɛn bia’m” be su Ɲanmiɛn i Famiɛn Diwlɛ’n nun lɔ.—Liki 22:28, 30.
Ɲanmiɛn Sielɛ’n ɔ le i kpɔfuɛ mun, yɛ ɔ́ wá núnnún be.—Jue Mun 2:1, 2, 8, 9; 110:1, 2; 1 Korɛntifuɛ Mun 15:25, 26.
Biblu’n seman kɛ Ɲanmiɛn Sielɛ’n o sran’m be awlɛn’n nun lɔ, naan lɔ yɛ ɔ sie-ɔ. Sanngɛ ɔ se kɛ e ti “Ɲanmiɛn Sielɛ’n i su ndɛ’n” annzɛ “Ɲanmiɛn Sielɛ’n i jasin fɛ’n” ɔ kwla kan e awlɛn’n.—Matie 13:19; 24:14.
?Kɛ Biblu’n se kɛ “Ɲanmiɛn Sielɛ’n wo amun afiɛn’n” i bo’n yɛle benin?
Wafa nga be klɛli ndɛ ng’ɔ o Liki 17:21 nun Biblu wie’m be nun’n ti’n, sran wie’m be wunman lika trele nga Ɲanmiɛn Sielɛ’n wo’n. I wie yɛle kɛ Biblu La Bible du Roi Jacques se kɛ “Ɲanmiɛn Sielɛ’n wo amun afiɛn.” Kɛ ɔ ko yo naan y’a wun ndɛ mma sɔ’n i wlɛ kpa’n, maan e kan sa nga ti yɛ Zezi kannin ndɛ sɔ’n i ndɛ.
Ɲanmiɛn Sielɛ’n nunman Zezi i kpɔfuɛ mɔ be timan sran kpa’n be awlɛn’n nun
Farizifuɛ mun yɛ Zezi kannin ndɛ sɔ’n kleli be-ɔ. Sran akpasua sɔ’m be tɛnndɛn i ɲrun, yɛ be cicili i wun ndɛ kɛ bé kún i. (Matie 12:14; Liki 17:20) ?Kɛ a niɛn i sa’n, be kwla se kɛ Ɲanmiɛn Sielɛ’n wo sran sɔ mɔ be awlɛn timan kpa’n, be awlɛn’n nun? Zezi kannin sran sɔ’m be ndɛ seli kɛ: “gblɛ’n nin sa tɛtɛ yolɛ’n, b’a yi amun awlɛn’n piɛ.”—Matie 23:27, 28.
Wafa nga be klɛli Liki 17:21 i nun ndɛ’n Biblu uflɛ wie’m be nun’n, ɔ uka e naan y’a wun i wlɛ kpa. I wie yɛle kɛ Mɛn uflɛ Biblu’n nun’n be seli kɛ “Ɲanmiɛn Sielɛ’n wo amun afiɛn.” Kɛ Biblu’n se kɛ be nga Nyanmiɛn Sielɛ’n wo Farizifuɛ’m “be afiɛn’n” i bo’n yɛle kɛ sran nga Ɲanmiɛn sieli i Famiɛn’n ɔ o Farizifuɛ’m be ɲin bo lɛ.—Liki 1:32, 33.
a Asɔnun sunman be se kɛ Ɲanmiɛn Sielɛ’n ɔ o sran kun i awlɛn’n nun. I wie yɛle kɛ Etazinin lɔ asɔnun Batisi’n i akpasua kun seli kɛ ‘Ɲanmiɛn Sielɛ’n i bo’n sɔnnin naan i kun yɛle kɛ ɔ sie e awlɛn’n nun lɔ yɛ ɔ le ta e su.’ Asa’n, fluwa kun m’ɔ Papu Benua 16 klɛli’n i nun’n, ɔ seli kɛ: “Sɛ sran kun i awlɛn ti kpa’n, i nun yɛ Ɲanmiɛn i sielɛ’n sin ba-ɔ.” (Jesus of Nazareth)