Ɲanmiɛn i Famiɛn dilɛ blɛ’n nun’n, sran’m “bé nyán fɔundi lele.”

Nán andɛ sa yɛ e ɲin o Ɲanmiɛn i Famiɛn dilɛ blɛ’n i sin-ɔn. Ɔ ka kan’n, Ɲanmiɛn i Famiɛn dilɛ blɛ’n ɔ́ jú. Blɛ sɔ’n nun’n, sran’m be bo yó kun yɛ bé dí fɔundi. Jue Mun 72 i mma 7 se kɛ: “Bé nyán fɔundi.” ?Cɛn benin yɛ Ɲanmiɛn bó i Famiɛn dilɛ’n i bo asiɛ wunmuan’n su-ɔ? ?Ngue yɛ ɔ́ wá yó-ɔ? ?Kɛ Ɲanmiɛn wá síe sran mun ye benin yɛ bé ɲɛ́n i-ɔ?

?CƐN BENIN YƐ ƝANMIƐN I FAMIƐN DILƐ BLƐ’N JÚ-Ɔ?

Biblu’n kannin kɛ sa wie’m bé wá jú, naan sa sɔ’m bé klé kɛ Ɲanmiɛn i Famiɛn dilɛ’n blɛ’n su mantan koko. Sa sɔ’m be nun wie yɛle alɛ mɔ sran’m be kun’n, nin awe’n m’ɔ kpɛn’n, nin asiɛ’n m’ɔ keje’n yɛ sa tɛtɛ m’ɔ w’a sɔn’n.—Matie 24:3, 7, 12; Liki 21:11; Sa Nglo Yilɛ 6:2-8.

Biblu’n kɛn i ekun kɛ: “Mɛn’n i awieliɛ blɛ nun’n, lika’n wá yó kekle kpa. Afin sran’m bé bú be bɔbɔ be wun akunndan, bé yó sika klofuɛ, [...] be ɲin su yiman be si nin be nin, be su siman ye, be nin be wiengu’m be su nantiman klanman, be su kloman be wiengu, be su kunndɛman kɛ be nin be wiengu’m bé tí be wun aniɛn, bé sáci sran wun, be su siman be wun su nian, bé yó wlɛ, be su kloman like ng’ɔ ti kpa’n, [...] bé dí tutre. Be su kloman Ɲanmiɛn, fɛ dilɛ’n yɛ bé kló i-ɔ.” (2 Timote 3:1-4) Nán andɛ sa yɛ sran’m be yi nzuɛn tɛtɛ sɔ’m be nglo-ɔ. Sanngɛ dɔ nga su’n, sran’m be yi nzuɛn tɛtɛ sɔ’m be nglo tra laa’n.

Kɛ ɔ fɛ i afuɛ 1914 nun’n, yɛ Biblu’n nun ndɛ sɔ’m be su kpɛnlɛ’n boli i bo-ɔ. Mɛn nun sa sifuɛ mun, nin fluwa klɛfuɛ mun, nin politikifuɛ’m be seli kɛ, kɛ afuɛ sɔ’n sinnin’n mɛn’n kacili. Be flɛ fluwa sifuɛ kun kɛ Pitɛɛ Muncu. Ɔ seli kɛ: “Ka naan alɛ w’a tɛ afuɛ 1914 nun’n, sran’m be yi ninnge kpanngban. Sanngɛ kɛ alɛ’n wa tɛli afuɛ sɔ’n nun’n, mɛn’n w’a yoman kɛ laa’n sa kun. Siɛn’n, sanvuɛsa mun, nin sa kekleekle mun yɛ e wun be-ɔ. Asa ekun’n, sran’m be kpɔ be wiengu yɛ be wla guaman ase.”

Sa kekleekle sɔ’m be kle kɛ Ɲanmiɛn i Famiɛn dilɛ blɛ’n su wa ju naan sran’m be su wa di alaje. Zezi seli kɛ: “Bé wá bó Ɲanmiɛn i Famiɛn dilɛ’n i jasin fɛ’n nga mɛn wunmuan’n nun, naan nvlenvle’m be kwlaa be nunfuɛ’m be ti. I sin yɛ mɛn’n wíe-ɔ.”—Matie 24:14.

Ɲanmiɛn i Famiɛn dilɛ’n i jasin fɛ sɔ’n yɛ Zoova i Lalofuɛ’m be bo-ɔ. I kpa bɔbɔ’n, be flɛ Zoova i Lalofuɛ’m be fluwa nga be yi be’n, be nun cinnjin kpafuɛ’n kɛ Sasafuɛ Tranwlɛ’n bo Zoova i Sielɛ Blɛ’n i jɔ. Blɛ sunman’n, Sasafuɛ Tranwlɛ’n kan ninnge ɲɛnmɛnɲɛnmɛn nga Ɲanmiɛn i Famiɛn dilɛ blɛ nun sran’m bé wá ɲɛ́n i’n, be ndɛ.

?WAFA SƐ YƐ ƝANMIƐN BÓ I FAMIƐN DILƐ’N BO ASIƐ WUNMUAN’N SU-Ɔ?

Kɛ ɔ ko yo naan y’a wun kosan sɔ’n i su tɛlɛ’n, é wá fá e ɲin é síe i like nnan nga’m be su:

1. Ɲanmiɛn su sinman politiki anuannzɛ wie fi sin naan w’a yo i klun sa’n.

2. Asiɛ’n su famiɛn’m be su loman be wun naan Zoova nin sran ng’ɔ sieli i famiɛn’n, be sie be wie. Ɔ maan, bé núnnún be sekeseke.—Jue Mun 2:2-9.

3. Sran nga Ɲanmiɛn sieli i famiɛn’n, ɔ́ wá núnnún famiɛn kwlaa nga be yo ɲin kekle i su’n. (Daniɛl 2:44; Sa Nglo Yilɛ 19:17-21) Be flɛ alɛ sɔ mɔ bé wá dí’n, i kɛ Aamagedɔn alɛ’n.—Sa Nglo Yilɛ 16:14, 16.

4. Be kwlaa nga be jran Sran nga Ɲanmiɛn sieli i famiɛn’n i sin’n, bé ɲán be ti Aamagedɔn alɛ’n nun. Yɛ bé trán mɛn klanman kpa kun nun. Biblu’n waan be ti “sran kpanngban kpa,” naan sran fi kwlá kaman be.—Sa Nglo Yilɛ 7:9, 10, 13, 14.

?KƐ ƝANMIƐN WÁ SÍE ASIƐ’N SUFUƐ MUN’N, YE BENIN YƐ BÉ ƝƐ́N I-Ɔ?

Sɛ e waan é trán be nga Zezi wá síe be’n, be nun wie’n, ɔ fata kɛ e si Zoova nin Zezi. Cɛn kun’n, kɛ Zezi srɛ́ Ɲanmiɛn’n ɔ seli kɛ: “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn’n, ɔ nin sran nga a sunmɛnnin i’n mɔ yɛle Zezi Klisi’n.”—Zan 17:3.

Kɛ sran’m be si Zoova kpa’n, be ɲan su ye dan. I klikli’n yɛle kɛ be lafi i su. Kɛ mɔ be lafi i su ti’n, be si jrɛiin kɛ Ɲanmiɛn i Famiɛn dilɛ’n, i blɛ’n jú sakpasakpa naan ɔ su sɛnmɛn i wun. (Ebre Mun 11:1) I nɲɔn su’n, be klo Ɲanmiɛn nin be wiengu. Klolɛ mɔ be klo Ɲanmiɛn ti’n, be tu be klun be nanti i mmla’m be su. Yɛ klolɛ mɔ be klo be wiengu mun ti’n, be mian be ɲin be nanti Zezi i ndɛ nga su. Ɔ seli kɛ: “Like nga amun klo kɛ sran’m be yo be man amun’n, amun yo i kunngba’n man be.”—Liki 6:31.

Kɛ siɛ kpa kun m’ɔ klo i mma mun sa’n, Ɲanmiɛn m’ɔ yili e’n, ɔ kunndɛ kɛ e liɛ yo ye. Ɔ kunndɛ kɛ e ɲan “nguan kpafuɛ’n.” (1 Timote 6:19) Afin nán “nguan kpafuɛ’n” yɛ e le i andɛ-ɔ. Andɛ’n, lika’n ti kekle kpa sran miliɔn kpanngban be su. Aliɛ bɔbɔ ba sa’n, be fɛ lele naan b’a ɲɛn i. Be nga bé wá ɲán “nguan kpafuɛ’n” bé dí alaje dan. Afin Zezi wá yó ninnge ɲɛnmɛnɲɛnmɛn mun mán be. Maan e fa e ɲin e sie i ninnge sɔ’m be nun wie’m be su.