B’A UKA NINNGE’M BE GUA’N SU ?É YÓ I SƐ?

Yo ɔ sika’n i cɛcɛ

Kɛ be uka ninnge’m be gua’n su’n, sika ndɛ’n ti kekle e ngba e su. Sanngɛ nán bu i kɛ a lemɛn i yowlɛ. A kwla yo ninnge wie mun naan sika ndɛ’n w’a yoman kekle ɔ su dan.

LIKE NGA TI YƐ I SƆ’N TI CINNJIN’N

Sɛ a yoman ɔ sika’n i cɛcɛ’n, sika ndɛ’n wá yó kekle kpa ɔ su. Ɔ maan akluntitiɛ’n nin ngokɔɛ’n nun yɛ á trán sa titi-ɔ. Kannzɛ bɔbɔ ɔ sika’n w’a sɔnman’n, sanngɛ a kwla yo ninnge wie mun naan w’a yo i cɛcɛ.

LIKE NGA A KWLA YO’N

Nán to like nga ɔ sa juman su’n. I liɛ’n, á kwlá yó ɔ sika’n i cɛcɛ. Kpɛkun sɛ kalɛ wie fu ɔ nun’n, á kwlá tánnin.

Kɛ ɔ ko yo naan w’a yo ɔ sika’n i cɛcɛ’n, klɛ sika nga a le i’n ɔ nin ninnge ng’ɔ fata kɛ a to be’n sie. I sɔ yolɛ’n nun’n, ninnge nga ɔ sa mian be wun sakpa’n yɛ ɔ fata kɛ be yo ɔ cinnjin-ɔn. I sin’n, mian ɔ ɲin di ajalɛ nga a fali’n su. Sɛ be uka ninnge’m be gua’n su annzɛ sɛ ɔ akatua’n kaci’n, bu ajalɛ uflɛ mɔ a kwla fa’n i akunndan. Sɛ a le bla annzɛ bian’n, maan a nin i amun bo yo kun be fɛ i sɔ ajalɛ mun.

Yo nga nian: Nán fa ninnge mun kalɛ nun. Sɛ sika wo ɔ sa nun’n, tuɛ i kpɛkun. Sran wie’m be sieli i nzɔliɛ kɛ, kɛ be yo sɔ’n be yo be sika’n i cɛcɛ kpɛkun kalɛ tranman be su. Asa’n, cɛn kunngun’n nian ɔ sika ng’ɔ o banki lɔ’n. Sɛ a si ɔ sika ng’ɔ o lɔ’n i nuan’n, a su kokoman dan.

Ɔ ti cinnjin kɛ e to ninnge nga e sa ju su’n. Kannzɛ i sɔ yolɛ’n timan pɔpɔ’n, sanngɛ sɛ e bu ninnge nga é tó be’n i sin kpa’n, i sɔ’n kwla uka e. Asa’n, e su kokoman sika ti ngboko.

‘Tran ase bu ɔ sika’n i akunndan ka.’—Liki 14:28.

Mian ɔ ɲin naan ɔ junman’n w’a fiman ɔ sa. ?Ninnge trele benin wie mun yɛ a kwla yo be naan ɔ junman’n w’a fiman ɔ sa-ɔ? Ju ɔ junman’n su lɔ dɔ su. Bu junman nga a di’n i wun akunndan kpa. Uka ɔ wiengu mun, yɛ tu ɔ klun di junman. Bu ɔ wiengu’m be sran. Fa ɔ junman’n su lɔ mmla’m be su. Kpɛkun mian ɔ ɲin naan ɔ sa tɔ junman nga a di’n nun kpa.

Nán saci ɔ sika’n. Usa ɔ wun kɛ: ‘?N klo ninnge nga be timan cinnjin’n annzɛ be kwlá yoman min wun sa ye’n be tolɛ?’ Sran wie’m be saci sika nga be fɛli lele naan b’a ɲɛn i’n. Be fa to drɔgi annzɛ siklɛti. Wie’m be fa wlɛ i nzan’n nun. Wie mun kusu be fa to mma. Ninnge sɔ’m be yolɛ’n ti’n, be tɔ tukpacɛ annzɛ be junman’n fi be sa.

“Sran ng’ɔ si ngwlɛlɛ’n, i liɛ su ti ye. […] Afin ngwlɛlɛ’n i silɛ ti kpa tra sika ɲanlɛ.”—Ɲanndra Mun 3:13, 14.

Sie sika kan. I liɛ’n sɛ sa wie fu ɔ nun’n, a kwla fa ti ɔ wun ɲanman nun. Sɛ ɔ bɔbɔ annzɛ ɔ awlofuɛ wie tɔ tukpacɛ’n, annzɛ sɛ ɔ junman’n fi ɔ sa’n, annzɛ sɛ sa uflɛ wie tɔ ɔ su’n, i sɔ sika liɛ’n kwla uka ɔ kpa.

‘Blɛ kekle nin sa wie mɔ y’a sunnzunman’n be ju e kwlaa e su.’—Akunndanfuɛ’n 9:11.

Sika’n i cɛcɛ yolɛ’n i su ajalɛ wie mun

Ɔ bɔbɔ tɔn aliɛ nga á dí’n.

Sɛ a ta gua su lɔ aliɛ to’n, á dí ɔ sika’n dan. Ɔ ti su kɛ, kɛ ɔ bɔbɔ a tɔn aliɛ nga á dí’n, i sɔ’n fa blɛ yɛ ɔ timan pɔpɔ. Sanngɛ ɔ kwla uka wɔ naan w’a sie sika kan. Kpɛkun a si kɛ aliɛ nga a di’n, ɔ su manman wɔ tukpacɛ.

Ka naan w’a to like kun’n, bu i sin.

Klɛ ninnge nga á tó be’n fluwa kun su. Kpɛkun mian ɔ ɲin di su. Nán tɔtɔ ninnge’m be su sa to be.
Kɛ a wun kɛ ninnge’m b’a bu’n, sɛ a le i wun alaje’n to i kpanngban sie. Kpɛkun kunndɛ lika nga á síe be naan b’a saciman ndɛndɛ’n.
Sɛ a wun kɛ ninnge wie’m be gua’n ti pɔpɔ naan be ti kpa’n, a kwla to be.
A kwla ko nian ninnge nga be yo be atɛ ɛntɛnɛti su’n naan w’a wun nga be gua’n ti pɔpɔ’n. I sɔ’n úka wɔ naan w’a toman ninnge mun sa ngbɛnngbɛn. Asa’n, á sí sika nga a fa wlɛ i ninnge sɔ’m be nun’n. Sɛ amun asa’n su lɔ’n be yo ninnge’m be atɛ ɛntɛnɛti su’n, i sɔ’n kwla uka wɔ kpa.
Toto ɔ ninnge mun blɛ nga be ti ninnge’m be gua’n su’n i nun. Fa ninnge’m be gua’n sunnzun be wiengu.

Ka naan w’a to mannzin uflɛ’n, bu i sin.

Be nga be yi pɔɔtablu mun nin mannzin onga mun’n, be yi ninnge sɔ’m be uflɛ titi naan b’a ɲan sika kpanngban kpa. Ɔ maan ka naan w’a to mannzin uflɛ’n, usa ɔ wun kɛ: ‘?Sɛ n to like sɔ’n, ń ɲán su ye sakpa? ?N miɛn i sɔ like’n i wun dɔ nga su? ?Yɛ sɛ min waan ń tó’n, ɔ ti cinnjin kɛ i uflɛuflɛ nga w’a fite’n yɛ n to-ɔ?’

Siesie ɔ ninnge nga be saci’n be ye.

Nian ɔ flizidɛli’n nin ɔ mannzin onga’m be lika kpa naan b’a kwla cɛ. Sɛ be saci naan a wun kɛ a su boman kalɛ dan be ye siesielɛ nun’n, fa kɔ naan be siesie be ye. Asa’n, a kwla to mannzin nga sran’m b’a dun mmua b’a fa di junman mɔ be te yo kpa’n.

Di ɔ bɔbɔ fie.

Sɛ a kunndɛ lika kan fa di ɔ fie’n, ɔ ti kpa. I liɛ’n, a su faman sika kaka wlɛmɛn i aliɛ tolɛ’n nun. Asa’n, a kwla yo wie atɛ, yɛ a kwla man ɔ wiengu’m be wie.

“Sran ng’ɔ bo i ɲin ase yo like’n, like ng’ɔ sunnzun kɛ ɔ́ yó’n, ɔ́ yó ye.”—Ɲanndra Mun 21:5.

Bian kun m’ɔ tran Angle mɔ be flɛ i kɛ Mailisi’n ɔ seli kɛ: “E niannian ninnge’m be gua’n cɛn kwlakwla. Blɛ sunman’n e seman kɛ é fá ninnge mun kalɛ nun naan sɛ anglo wie’n y’a tannin.”

Bian kun m’ɔ tran Etazinin mɔ be flɛ i kɛ Zeremin’n ɔ seli kɛ: “E nin min yi nin e mma mun e liɛ’n, kwlaa naan y’a ko di gua’n, e dun mmua klɛ ninnge nga e sa mian be wun’n fluwa su titi.”

Bla kun m’ɔ tran Izraɛli mɔ be flɛ i kɛ Yaɛli’n ɔ seli kɛ: “Titi’n e nian sɛ e sa kwla ju ninnge nga e sunnzun kɛ é tó be’n be su-o. Yɛ e siesie sika kan ainman ndɛ ti.”

Bian kun m’ɔ tran Etazinin mɔ be flɛ i kɛ Jefre’n, ɔ seli kɛ: “E kleli e mma mun kɛ sɛ e loto’n annzɛ e sua’n nun ninnge wie saci’n, sɛ e siesie i ye’n ɔ flunman tra kɛ e to uflɛ’n. Asa’n, e nin min yi e nian e wun su naan sɛ like uflɛuflɛ kun fite’n y’a kaman lɛ y’a toman.”

Bian kun m’ɔ tran Biimanin mɔ be flɛ i kɛ Ono’n, ɔ seli kɛ: “Kɛ ɔ ko yo naan min sika ngba’n w’a wluman aliɛ tolɛ’n nun’n, n di fie kan kpɛkun n ta akɔ. Ɔ ju wie bɔbɔ’n, n fa min fie su ninnge mun wie n man sran mun.

Bian kun su titi i fie’n nun ninnge mun.