B’A UKA NINNGE’M BE GUA’N SU ?É YÓ I SƐ?

Cɛ ɔ wiengu like

Sɛ ninnge’m be gua mɔ b’a uka su’n ti’n, sika ndɛ’n ti kekle ɔ su’n, a kwla bu i kɛ a kwlá cɛman sran like. Sanngɛ sɛ a cɛ sran like’n, a kwla ɲan su ye. Kannzɛ sika ndɛ’n ti kekle ɔ su’n, a kwla cɛ ɔ wiengu’m be like kpɛkun a kwla sie sika wie bɔbɔ.

LIKE NGA TI YƐ I SƆ’N TI CINNJIN’N

Sran ng’ɔ cɛ i wiengu’m be like’n, kannzɛ like ng’ɔ man’n ti kaan’n, sanngɛ ɔ di aklunjɔɛ. I kpa bɔbɔ’n, dɔɔtrɔfuɛ wie’m be seli kɛ be nga be cɛ be wiengu’m be like’n, blɛ sunman’n be wun sanndi be yɛ be akunndan sannganman. Sran like cɛlɛ’n kwla yo maan e kokoman dan, e klun titiman e dan. Be nga be yo sɔ’n, tansiɔn taman be yo, yɛ be wunnɛn kplo’n nun yoman be ya tikatika. Asa’n, be lafi kpa.

“Sɛ a cɛ sran like’n, ɔ klun jɔ kpa tra kɛ be cɛ wɔ like’n.”—Sa Nga Be Yoli’n 20:35.

Sɛ e man e wiengu’m be sika annzɛ e cɛ be like titi’n, cɛn nga e kusu e sa mian naan be waan bé úka e’n, ɲannzuɛn su kunman e. Bian kun m’ɔ tran Angle mɔ be flɛ i Owaadi’n, ɔ seli kɛ: “Kɛ mɔ e nin min yi e yo e wiengu’m be ye titi’n ti’n, cɛn nga e wiengu’m be waan bé úka e’n, ɔ yoman e kɛ y’a kaci be ti su trɔ sa.” Be nga be klun klo su be yo be wiengu’m be ye’n, be minndɛman kɛ be wiengu’m be yo be ye wie. Sanngɛ be ɲan janvuɛ kpa mɔ blɛ kekle nun’n be kwla uka be wie-ɔ.

“Amun cɛ sran like titi, i liɛ’n sran’m bé cɛ́ amun like wie.”—Liki 6:38.

LIKE NGA A KWLA YO’N

Like nga a le i’n, man ɔ wiengu’m be wie. Kannzɛ ɔ sa nun yoman fɛ’n, sanngɛ a kwla cɛ ɔ wiengu’m be like. I wie yɛle kɛ a kwla man be aliɛ kan. Bian kun m’ɔ tran Uganda mɔ be flɛ i Dɛnkan’n, ɔ nin i awlobofuɛ’m be ti yalɛfuɛ. Sanngɛ be cɛ be wiengu’m be like titi. Dɛnkan seli kɛ: “Mɔnnɛn cɛn kwlakwla’n, e nin min yi e yia sran kun e awlo lɔ naan e di like. Kɛ e nin e wiengu mun e o’n, ɔ yo e fɛ.”

Sanngɛ kɛ á mán ɔ wiengu’m be like’n, yo i ngwlɛlɛ su. Nán fa ɔ sa nun ninnge ngba man naan yalɛ’n di wɔ nin ɔ awlofuɛ mun.—Zɔbu 17:5.

Yo nga nian: Man sran kun i aliɛ kan annzɛ nzan kan. Sɛ a le like kun mɔ ɔ sa miɛnmɛn i wun kun m’ɔ kwla ti ɔ janvuɛ kun annzɛ ɔ mantanfuɛ kun i wun ɲanman nun’n, fa mɛn i.

Like uflɛ mɔ a kwla yo’n. Kannzɛ a leman sika’n, sanngɛ a kwla yo ninnge wie mɔ ɔ wiengu’m be kwla ɲan su ye-ɔ. I wie yɛle kɛ a kwla di junman wie mun fa uka be. Asa’n, a kwla kan ndɛ fɛ wie kle be. A kwla se be kɛ a klo be naan be ndɛ lo wɔ.

Yo nga nian: Uka ɔ wiengu mun naan be di be awlo lɔ junman mun, annzɛ uka be naan be siesie be sua’n nun ninnge’m be ye. Annzɛ kusu ko di be gua’n man be. Klɛ ɔ janvuɛ kun i fluwa annzɛ klɛ i mesazi. A kwla se i ngbɛn kɛ ɔ wla lo i.

Sɛ a yo ɔ wiengu’m be ye’n, á ɲán su ye dan.

“Nán an wla fi sa kpa yolɛ’n su. Kpɛkun like nga an le i’n, an man amun wiengu wie.”—Ebre Mun 13:16.

Bian kun nin i yi be su yo bla oke kun i awlo’n nun yɛinyɛin. Kɛ bé ísa waka nɲa mun’n, ɔ mannin be nzue kan.