Zezi kpali akoto blu-nin-nɲɔn

Zan Batɛmun yofuɛ’n seli kɛ Zezi ti Ɲanmiɛn i Bua ba’n, i afuɛ kun nin sin yɛ. Kɛ Zezi boli i junman’n i dilɛ bo’n, yasua wie mɔ be kwla lafi be su’n, be kacili i sɔnnzɔnfuɛ. Be yɛle Andre nin Simɔn mɔ be flɛ i ekun kɛ Piɛli’n, ɔ nin Zan. Atrɛkpa’n, Zaki (m’ɔ ti Zan i niaan’n) ɔ o be nun wie. Zezi flɛli Filipu nin Batelemin wie. Be flɛ Batelemin ekun kɛ Natanaɛli. I sin’n, sran kpanngban kpa ekun be wa suli Klisi su.​​—Zan 1:45-47.

Siɛn’n, Zezi su wa fa be nun wie mun kaci i akoto. Ɔ nin sran sɔ mun yɛ bé wá nánti-ɔ. Kpɛkun ɔ́ klé be ninnge cinnjin wie mun ekun. Ka naan w’a fa be’n, ɔ dun mmua cuɛnnin i wun ɔli oka kun su. Atrɛkpa’n, oka sɔ’n wo Galile Jenvie’n i wun lɔ. Lika sɔ’n nin Kapɛɛnaɔmun nunman mmua dan. Ɔ srɛli Ɲanmiɛn kɔnguɛ lele aliɛ cɛnnin i. Atrɛkpa’n, ɔ srɛli Ɲanmiɛn kɛ ɔ mɛn i ngwlɛlɛ, yɛ ɔ yrɛ i su. Kɛ lika’n cɛnnin’n, ɔ flɛli i sɔnnzɔnfuɛ mun naan w’a fa be nun blu-nin-nɲɔn (12) w’a kaci i akoto.

Zezi kpali Matie m’ɔ ti lapo defuɛ’n, kpɛkun ɔ fɛ i ukali sran nsiɛn nga e dun mmua e boli be dunman’n be su. Yɛ ɔ kpali sran nnun ekun ukali be su. Be yɛle Zida (be flɛ i ekun kɛ Tade nin “Zaki i wa’n”), ɔ nin Simɔn m’ɔ ti wakawakafuɛ’n nin Toma, ɔ nin Zaki m’ɔ ti Alfe wa’n, yɛ Zida Iskariɔti.​​—Matie 10:2-4; Liki 6:16.

Sran blu-nin-nɲɔn (12) sɔ’m be nin Zezi be ɔli likalika’m be nun, yɛ ɔ si be kpa. Be nun wie’m be ti i osufuɛ. Afin ɔ yo kɛ Zaki nin i niaan bian Zan be nin Zezi be ti ngawangawa sa. Asa ekun’n, sran wie’m be bu i kɛ Alfe nin Zozɛfu m’ɔ tali Zezi’n, be ti niaan. Sɛ ɔ ti sɔ sakpa’n, nn akoto Zaki m’ɔ ti Alfe i wa’n, ɔ nin Zezi be ti ngawangawa wie.

Zezi si i akoto’m be kwlaa be dunman mun sɛsɛsɛ. ?Yɛ ɔ li, a si be dunman mun sɛsɛsɛ wie? Like kun m’ɔ kwla uka ɔ naan ɔ wla w’a kpɛn be dunman’m be su ndɛndɛ’n yɛ: Simɔn’m be ti nɲɔn, Zaki’m be ti nɲɔn, yɛ Zida’m be ti nɲɔn wie. Simɔn (Piɛli) i niaan bian yɛle Andre. Yɛ Zaki (Zebede i wa’n) i niaan yɛle Zan. Like ng’ɔ kwla uka wɔ naan w’a si akoto’m be nun mɔcuɛ be dunman mun yɛ ɔ o lɛ-ɔ. Akoto nnan onga’m be nun kun ti lapo defuɛ. Yɛle Matie. Kun ekun i akunndan’n yoli nɲɔnnɲɔn blɛ wie nun. Yɛle Toma. Kun liɛ’n, kɛ Zezi flɛ́ i’n, nn ɔ o waka kun bo. Yɛle Natanaɛli. Natanaɛli kusu’n, i janvuɛ yɛle Filipu.

Akoto’m be nun blu-nin-kun (11) be ti Galilefuɛ kɛ Zezi sa. Natanaɛli fin Kana klɔ’n su lɔ. Filipu nin Andre, yɛ Piɛli be fin Bɛtsaida. Sanngɛ i sin’n, Piɛli nin Andre be ko trannin Kapɛɛnaɔmun lɔ. Ɔ yo kɛ Matie trannin lɔ wie sa. Atrɛkpa’n, Zaki nin Zan be trannin lɔ wie annzɛ kusu’n, be trannin klɔ kun m’ɔ mantan Kapɛɛnaɔmun’n, i su. Be yoli jue trafuɛ lɔ. Atrɛkpa’n, Zida Iskariɔti mɔ kasiɛn su’n, ɔ fali Zezi mannin sran mun’n, i kunngba cɛ yɛ ɔ ti Zidefuɛ-ɔ.