Yo naan a nin Zoova amun afiɛn sɛ kpa ekun

AFUƐ nuan kwlakwla’n, be nga be tuli be asɔnun’n nun’n, be nun sunman be sa be sin Zoova wun ekun. Kɛ be nun kun sɛ i sin’n, ‘aklunjɔɛ nga be nga be o ɲanmiɛn su lɔ’n be di’n,’ maan e bu i akunndan kan e nian. (Lik. 15:7, 10) Sɛ a o sran sɔ’m be nun wie’n, nán ɔ wla fi su kɛ ɔ balɛ’n yo Zezi nin anzi mun nin Zoova bɔbɔ be fɛ dan. E si kɛ kɛ ɔ ko yo naan a nin Zoova amun afiɛn w’a sɛ kpa ekun’n, i sɔ’n kwla yo kekle ɔ sa nun. ?Ninnge benin wie mun yɛ be kwla kle ɔ yalɛ-ɔ? ?Yɛ ngue yɛ a kwla yo naan w’a kwla jran be ɲrun kekle-ɔ?

NINNGE NGA BE KWLA KLE Ɔ YALƐ’N

Aniaan sunman be kacili be sa maan be kwla sali be sin asɔnun’n nun. Ɔ nin i sɔ ngba’n be akunndan’n te bu be fɔ. Atrɛkpa’n ɔ akunndan’n bu ɔ fɔ wie. Sɛ ɔ ti sɔ’n, nn a wun wafa nga Famiɛn Davidi i wun yoli i’n i wlɛ. Kɛ ɔ yoli sa tɛ’n, Ɲanmiɛn yacili i wun sa’n cɛli i. Ɔ nin i sɔ ngba’n, ɔ seli kɛ: “Sa tɛ nga n yoli be’n be ti’n n kpɔci min wun-ɔn ɔ yoman ye.” (Jue. 40:13; 65:4) Kɛ sran kun sɛ i sin Zoova wun’n, ɔ kwla bu i wun fɔ annzɛ ɲannzuɛn kwla kun i cɛ kpa. Sa sɔ’n wie juli aniaan bla kun m’ɔ suan Izabɛli’n i su.a Kɛ be tuli i asɔnun’n nun’n, ɔ dili afuɛ 20 ka naan w’a sɛ i sin. Ɔ seli kɛ: “Kɛ ɔ ko yo naan m’an lafi su kɛ Zoova yacili min wun sa’n cɛli min sakpa’n, ɔ yoli kekle.” Sɛ ɔ akunndan’n bu ɔ fɔ annzɛ ɔ sa sin bubu wɔ’n, ɔ cɛman naan a nin Zoova amun afiɛn w’a ti nun ekun. (Nya. 24:10) I sɔ’n ti’n, mian ɔ ɲin naan i sɔ sa liɛ’n w’a juman.

Kɛ sran kun sɛ i sin Zoova wun’n, ɔ fata kɛ ɔ miɛn i ɲin kpa naan ɔ nin Zoova be afiɛn w’a sɛ kpa ekun. Ɔ maan kɛ aniaan wie’m be bu i sɔ liɛ’n i akunndan’n, srɛ kun be. Kɛ aniaan kun m’ɔ suan Antuanin’n ɔ sɛli i sin asɔnun’n nun’n, ɔ seli kɛ: “Min wla fili ninnge nga n suannin be’n nin ninnge nga n yoli be’n i nun mɔ be nin-a tuman min asɔnun’n nun’n be nun sunman be su.” Aniaan sunman be wun yo be kɛ aniaan bian sɔ’n sa wie. I sɔ’n ti’n, be kwlá tuman be klun be suman Zoova kpa.

Maan e fa sa kun e yiyi ndɛ sɔ’n nun kpa ekun. Wienun-ɔn, aunmuan dan kpa kun tu kpɛkun ɔ saci bian kun i sua’n. Kɛ bian sɔ’n bu blɛ ng’ɔ fata kɛ ɔ fa siesie sua’n i ye’n ɔ nin ninnge ng’ɔ fata kɛ ɔ yo be’n be akunndan’n, i sa sin kwla bubu i. I wafa kunngba’n, kɛ sran kun yo sa tɛ dan kun’n ɔ nin Zoova be afiɛn saci. Yɛ kɛ ɔ bu ninnge ng’ɔ fata kɛ ɔ yo be naan ɔ nin Zoova be afiɛn w’a sɛ kpa kɛ laa’n sa’n be akunndan’n, i sa sin kwla bubu i wie. Sanngɛ Zoova kwla ukɛ i.

Zoova bɔbɔ seli kɛ: “Amun bla man e ti e wun aniɛn.” (Eza. 1:18) Kɛ a sali ɔ sin asɔnun’n nun’n, i sɔ’n kle kɛ a miannin ɔ ɲin kpa naan ‘a nin Zoova amun a ti amun wun aniɛn.’ I sɔ mɔ a yoli’n yo Zoova i fɛ kpa. Afin ɔ dunman nun ti’n, ɔ kwla tɛ i klɔklɔfuɛ Satan su.—Nya. 27:11.

Kɛ a sali ɔ sin Zoova wun’n, i sɔ’n kle ekun kɛ a fali ɔ wun mɛntɛnnin i. Ɔ maan a kwla lafi su kɛ i kusu fɛ́ i wun mántan ɔ wie. (Zak. 4:8) Kɛ a bali’n, ɔ yo aniaan’m be fɛ sɔ. Sanngɛ ɔ fata kɛ a mian ɔ ɲin naan a nin Zoova m’ɔ ti ɔ Si nin ɔ Janvuɛ’n amun afiɛn mantan kpa. ?Wafa sɛ yɛ a kwla yo i sɔ liɛ’n niɔn?

FA Ɔ ƝIN SIE I NINNGE TRELE WIE MƆ A KWLA YO BE’N BE SU

E si kɛ ɔ wla w’a fiman Zoova i su ninnge nga a suannin be’n ɔ nin like nga i waan ɔ́ fá mán e’n be su. Sanngɛ ɔ fata kɛ a yo ninnge trele wie mun naan a nin Zoova amun afiɛn w’a mantan kpa ekun. Ninnge sɔ’m be nun wie yɛle jasin fɛ bolɛ’n nin aɲia’m be bo kɔlɛ’n ɔ nin aniaan’m be wun kɔlɛ’n. Maan e kan ninnge sɔ’m be ndɛ kpa ekun.

Srɛ Zoova kpɛ sunman. Ɔ Si Zoova si kɛ sɛ sa nga a yoli’n ti’n ɔ akunndan’n bu ɔ fɔ’n, i srɛlɛ’n kwla yo kekle ɔ sa nun. (Rɔm. 8:26) Ɔ nin i sɔ ngba’n, i waan nán a ‘yaci srɛlɛ.’ Srɛ Zoova naan se i kɛ a kunndɛ kpa kɛ á káci i janvuɛ ekun. (Rɔm. 12:12) Be flɛ aniaan bian kun kɛ Andre. Ɔ seli kɛ: “Sa nga n yoli’n ti’n, min akunndan’n buli min fɔ yɛ ɲannzuɛn kunnin min dan. Sanngɛ kɛ n srɛli Ɲanmiɛn’n, min wun fali min feke. Kpɛkun min wla guali ase.” Sɛ a siman ndɛ trele nga á kán klé Zoova kusu’n, a kwla nian Jue Mun 51 nin 65 be nun. Lɔ’n, Famiɛn Davidi srɛli Ɲanmiɛn kɛnnin i klun ndɛ kwlaa kleli i.

Suan Biblu’n nun like titi. Sɛ a yo sɔ’n, á láfi Zoova su kpa ekun kpɛkun á kló i kpa trá laa’n. (Jue. 19:8-12) Be flɛ aniaan bian kun kɛ Felipe. Ɔ seli kɛ: “Kɛ mɔ m’an faman blɛ m’an kannganman Biblu’n nun, mɔ m’an suanman nun like’n ti’n, n kpɔnzɔli Ɲanmiɛn sulɛ nun. Yɛ i agualiɛ su’n, n kpɔcili Zoova. N kunndɛman kɛ ń yó sɔ kpɛ nɲɔn. I sɔ’n ti’n, n fuali kpa kɛ ń súan Biblu’n nun like titi.” É wlá ɔ fanngan kɛ a yo sɔ wie. Sɛ a siman ninnge nga á súan be su like kusu’n, a kwla se aniaan kun mɔ w’a tin Ɲanmiɛn i sulɛ’n nun’n kɛ ɔ uka wɔ.

Fa ɔ wun mantan aniaan mun. Be nga be sa be sin asɔnun’n nun’n, be nun wie’m be bu i kɛ be wun ndɛ o aniaan’m be klun. I sɔ’n ti’n, srɛ annzɛ ɲannzuɛn kun be. I wie yɛle aniaan bla kun m’ɔ suan Larisa’n i liɛ’n. Ɔ seli kɛ: “Ɔ yoli min kɛ m’an saci aniaan’m be dunman sa. I sɔ’n ti’n, ɲannzuɛn kunnin min dan. Ɔ yoli min sɔ cɛli kpa.” Sɛ ɔ wun yo ɔ sɔ wie’n, nán ɔ wla fi su kɛ asɔnun kpɛnngbɛn mun nin aniaan nga b’a tin Ɲanmiɛn sulɛ’n nun’n, be kunndɛ kpa kɛ bé úka wɔ naan a nin Zoova amun afiɛn w’a sɛ kpa ekun. (Nian kuku nga be flɛ i kɛ “Like nga asɔnun kpɛnngbɛn’m be kwla yo’n” i nun.) Ɔ balɛ’n yo be fɛ dan, yɛ be kunndɛ kɛ a wun ɔ wun fɛ asɔnun’n nun.—Nya. 17:17.

?Sanngɛ ngue yɛ a kwla yo naan a nin aniaan mun amun afiɛn w’a mantan kpa-ɔ? Fa ɔ wun wla ninnge kwlaa nga aniaan’m be yo’n nun. I wie yɛle kɛ kɔ aɲia’m be kwlaa be bo kpɛkun a nin be amun bo jasin fɛ’n tikatika. ?Sɛ a fa ɔ wun mantan aniaan mun’n, i su ye benin yɛ á ɲɛ́n i-ɔ? Be flɛ aniaan bian kun kɛ Felisi. Ɔ seli kɛ: “Kɛ be tuli min asɔnun’n nun’n, aniaan’m be ɲin trannin blɛ mɔ ń sá min sin’n i sin kpa. Yɛ kɛ n bali’n, be sɔli min nun klanman. Kpɛkun be ukali min maan n wunnin min wun fɛ asɔnun’n nun ekun. Asa’n, be dunman nun ti’n n lafili su kɛ Zoova yacili min wun sa’n cɛli min sakpa. I sɔ’n ti’n, n kwla suli Zoova kpa ekun.”—Nian kuku nga be flɛ i kɛ “Like nga a kwla yo’n” i nun.

NÁN Ɔ SA SIN BUBU WƆ!

Kɛ á mían ɔ ɲin naan a nin Zoova amun afiɛn sɛ kpa ekun’n, Satan liɛ’n ɔ́ wá yó like kwlaa ng’ɔ kwla yo naan ɔ sa sin w’a bubu wɔ’n. (Lik. 4:13) I sɔ’n ti’n, mian ɔ ɲin kpa naan a nin Zoova amun afiɛn w’a mantan kpa dɔ nga su.

Kɛ Zoova kɛ́n i sufuɛ mɔ be ti kɛ bua sa’n be ndɛ’n, ɔ seli kɛ: “Ń kúnndɛ nnɛn nga be mlin’n, ń fá be sá be sin. Nnɛn nga be boli be kannin’n ń cící be kannin’n su, yɛ nga be wunnɛn yo be ya’n ḿ mán be wunmiɛn.” (Eze. 34:16) Be nga Zoova ukali be naan be nin i be afiɛn w’a mantan kpa ekun’n, be diman be yalɛ. I sɔ’n ti’n, a kwla lafi su kɛ ɔ́ úka wɔ naan a nin i amun afiɛn w’a mantan kpa wie.

Like nga asɔnun kpɛnngbɛn’m be kwla yo’n

Asɔnun kpɛnngbɛn mun, amun kwla yo ninnge kpanngban fa uka aniaan nga b’a sa be sin Zoova wun’n naan be nin i be afiɛn w’a sɛ kpa ekun. Ninnge sɔ’m be nun wie mun yɛ:

Amun wla be fanngan. Akoto Pɔlu si kɛ, kɛ sran kun sɛ i sin Zoova wun’n, ‘i wla kwla bo i wun tratra su.’ (2 Kor. 2:7) Asa ekun’n, ɲannzuɛn kwla kun i yɛ i sa sin kwla bubu i. I sɔ’n ti’n, ɔ seli aniaan’m be kɛ: “An yaci i wun sa’n cɛ i klun ufue su, yɛ an yo maan i wla gua ase.” Kɛ sran kun sɛ i sin asɔnun’n nun’n, ɔ kunndɛ kɛ ɔ́ wún i wlɛ kɛ Zoova nin aniaan’m be te klo i. Ɔ maan sɛ asɔnun kpɛnngbɛn’m be wlɛ i fanngan naan be yo ninnge uflɛ wie mun fa ukɛ i’n, i wun kpɛ́jɛ i.

Amun nin be srɛ Ɲanmiɛn. Biblu’n se kɛ: “Sran kpa’n i Ɲanmiɛn srɛlɛ’n le ta.” (Zak. 5:16) Larisa mɔ e kɛnnin i ndɛ’n seli kɛ: “N seli asɔnun kpɛnngbɛn’m be kɛ srɛ kun min. I sɔ’n ti’n, be nin min srɛli Ɲanmiɛn yɛ be kannin min ndɛ kleli i. Ɔ maan n wunnin i wlɛ kɛ asɔnun kpɛnngbɛn’m b’a faman min wun ya. I kpa bɔbɔ’n, be kunndɛ kɛ bé úka min naan min nin Zoova e afiɛn w’a sɛ kpa ekun.” Aniaan bian kun suan Teo. I liɛ’n ɔ seli kɛ: “Kɛ asɔnun kpɛnngbɛn’m be nin min srɛli Ɲanmiɛn’n, n wunnin i wlɛ kɛ Zoova klo min sakpa naan ɔ fɛmɛn i ɲin siemɛn i min nzuɛn tɛ’n su. Sanngɛ min nzuɛn kpafuɛ’n i su yɛ ɔ fɛ i ɲin sie-ɔ.”

Amun tra be janvuɛ. Kɛ sran kun sɛ i sin asɔnun’n nun’n, i klikli nun’n ɔ leman janvuɛ kaka. I sɔ’n ti’n, asɔnun kpɛnngbɛn kun m’ɔ suan Zistɛn’n seli kɛ: “Ɔ fata kɛ asɔnun kpɛnngbɛn’m be nin aniaan sɔ’m be bo jasin fɛ’n likawlɛ tikatika yɛ be ko nian be osu. Asa ekun’n, ɔ fata kɛ be tra be janvuɛ. I sɔ’n ti cinnjin kpa.” Asɔnun kpɛnngbɛn uflɛ m’ɔ suan Anri’n seli kɛ: “Sɛ aniaan kun sɛ i sin asɔnun’n nun naan aniaan onga’m be wun kɛ asɔnun kpɛnngbɛn’m be fa be wun be mɛntɛn i naan be trɛ i janvuɛ’n, be kusu bé yó sɔ wie.”

Amun uka be naan be suan like. Aniaan nga b’a tin Ɲanmiɛn sulɛ nun’n be kwla uka aniaan nga be sali be sin Zoova wun’n naan b’a suan like kpa. Asɔnun kpɛnngbɛn kun m’ɔ suan Daako’n seli kɛ: “Kɛ min ngunmin n suan Biblu’n nun like mɔ n wun ninnge kpakpa wie mun’n, n bo su n kle be. Kpɛkun kɛ n suan like’n aklunjɔɛ nga n di’n, n kan kle be wie. Asa’n, n siesie min wun naan e nin be y’a suan like likawlɛ.” Asɔnun kpɛnngbɛn uflɛ suan Kletɔnun. Ɔ seli kɛ: “N wla be fanngan kɛ be suan Biblu’n nun ndɛ ng’ɔ nin be su sa’n be kɔ likawlɛ’n be su like.”

Amun nian be lika. Be nga be tu be asɔnun’n nun mɔ be sa be sin’n, be nun sunman be bu i kɛ asɔnun kpɛnngbɛn’m be ti jɔlɛ difuɛ. I sɔ’n ti’n amun uka be naan be wun i wlɛ kɛ amun klo be naan amun kunndɛ kɛ amún nían be lika kɛ bua tafuɛ fa niɛn i bua’m be lika’n sa. (Zer. 23:4) Kɛ amun nin be kókó yalɛ’n, amun sie amun su kpa be nuan bo. Kpɛkun kɛ be di junman’n, amun yo be mo. Amun nin be koko yalɛ tikatika. Asa’n, amun ko nian be osu kpɛ sunman. Be flɛ asɔnun kpɛnngbɛn kun kɛ Maakisi. Kɛ ɔ nin asɔnun kpɛnngbɛn uflɛ be ko nian aniaan sɔ’m be osu’n, be yo ninnge wie mun. Ɔ seli kɛ: “E nin be kanngan Biblu’n nun ndɛ mma wie’m be nun, yɛ e yo be mo. Asa’n, e se be kɛ kɛ be miannin be ɲin mɔ be sali be sin’n, i sɔ’n yo e fɛ naan ɔ yo Zoova i fɛ wie. Kɛ e nin be wie yalɛ koko’n, e ja nun lɛ’n e kle be cɛn nga é wá bá be osu nianlɛ ekun’n.”

a Ndɛ nga nun’n, e kacili sran’m be dunman’n.