?Ɲanmiɛn le dunman?

Ndɛ nga Biblu’n kan’n

Sran kwlaa le dunman. ?Ɔ maan Ɲanmiɛn yɛ ɔ su ɲanman dunman-ɔn? Asa’n, sɛ e kunndɛ kɛ é trá sran kun janvuɛ’n, e usɛ i dunman yɛ e fa dunman sɔ’n e fa flɛ i. ?Yɛ Ɲanmiɛn li? ?Sɛ e kunndɛ kɛ é trɛ́ i janvuɛ’n, ɔ fataman kɛ e si i dunman naan e fa flɛ i wie?

Biblu’n nun’n, Ɲanmiɛn seli kɛ: “N ti Zoova. Min dunman’n yɛ ɔ o lɛ-ɔ.” (Ezai 42:8) Kannzɛ bɔbɔ Ɲanmiɛn le manmanlɛ dunman kaka kɛ “Ɲanmiɛn m’ɔ Kwla Like Kwlaa Yo” annzɛ “Miɛn m’ɔ Sie Like Kwlakwla” annzɛ “like kwlaa Yifuɛ’n” sa’n, sanngɛ ɔ le i bɔbɔ i dunman. Yɛ ɔ kunndɛ kɛ i sufuɛ’m be fa dunman sɔ’n be fa flɛ i.—Bo Bolɛ 17:1; Sa Nga Be Yoli’n 4:24; 1 Piɛli 4:19.

Biblu kaka nun’n, be boli Ɲanmiɛn i dunman Ezipti Lɔ Tulɛ 6:3 nun. Ndɛ mma sɔ’n se kɛ: “N yili min wun nglo n kleli Abraamun, nin Izaaki, ɔ nin Zakɔbu be kɛ n ti Ɲanmiɛn m’ɔ Kwla Like Kwlaa Yo’n. Sanngɛ min dunman Zoova fuɛ’n m’an yimɛn i nglo m’an kleman be.”

Wawle nun’n, Ɲanmiɛn i dunman’n yɛle Zoova. Fluwa sifuɛ sunman be waan i dunman “Yave’n” yɛ be klo i-ɔ. Sanngɛ i dunman nga sran kaka be si i’n yɛle Zoova. I bo bolɛ nun’n, Ebre aniɛn’n nun yɛ be klɛli Biblu’n niɔn. B’a klɛmɛn i Wawle’n nun. Kusu Ebre nun’n, be kanngan ndɛ mma mun fama su be fa kɔ bɛ su. Aniɛn sɔ’n nun’n, be fa ndɛ mma nnan yɛ be fa klɛ Ɲanmiɛn i dunman’n niɔn. Be klɛ i kɛ nga sa: יהוה. Kɛ be kaci ndɛ mma nnan sɔ mun’n, ɔ fite YHWH. Be flɛ ndɛ mma nnan sɔ mun kɛ Tetragramun.