?Zoova i Lalofuɛ’m be ti Klisifuɛ?

Ɛɛn, e ti Klisifuɛ. Sa nga ti yɛ e se sɔ’n yɛ:

• E mian e ɲin e nian Zezi Klisi i ajalɛ’n nin ndɛ ng’ɔ kannin be’n be su sɛsɛsɛ.—1 Piɛli 2:21.

• E lafi su kɛ Zezi kunngba cɛ yɛ ɔ kwla de sran mun-ɔn. Naan “sran uflɛ fi kwlá deman sran mun. Afin sran fi nunman ɲanmiɛn’n i bo wa mɔ i dunman nun’n, klɔ sran kwla fite nun-ɔn.”—Sa Nga Be Yoli’n 4:12.

• Kɛ sran’m be kaci Zoova i Lalofuɛ’n, be yo be batɛmun Zezi dunman nun.—Matie 28:18, 19.

• Zezi dunman nun yɛ e srɛ Ɲanmiɛn-ɔn.—Zan 15:16.

• E lafi su kɛ Zezi yɛ ɔ sie yasua kwlaa-ɔ, yɛle kɛ be fɛ i sieli i yasua kwlaa su kpɛn.—1 Korɛntifuɛ Mun 11:3.

Sanngɛ ngbaciɛ dan o e nin sran wie mɔ be waan be ti Klisifuɛ’n e afiɛn. I wie yɛle kɛ, e lafi su kɛ Biblu’n se kɛ Zezi ti Ɲanmiɛn i Wa naan ɔ timan atre nsan nga sran’m be kɛn i ndɛ’n i nun sran kun. (Marki 12:29; Matie 16:16) E lafiman su kɛ, kɛ sran wu’n like kun o i nun m’ɔ wuman wie-ɔ. Biblu’n i lika kun kleman kɛ Ɲanmiɛn kle sran’m be ɲrɛnnɛn sin fɛtɛ kun nun. Yɛ e lafiman su kɛ ɔ fata kɛ be nga be dun mmua asɔnun’n nun’n be ɲan manmanlɛ dunman wie m’ɔ kle kɛ be kpa tra asɔnun’n nunfuɛ onga mun-ɔn.—Akunndanfuɛ’n 9:4-5; Ezekiɛl 18:4; Matie 23:8-10.