Jeremias
47 Ini an tataramon ni Jehova na sinabi niya ki Jeremias na propeta manungod sa mga Filisteo,+ bago pabagsakon ni Faraon an Gaza. 2 Ini an sabi ni Jehova:
“Uya! May nagdadangadang na katubigan hali sa norte.
Iyan magigin sarong bahang makusog an sulog.
Asin babahaon kaiyan an kadagaan asin an gabos na yaon diyan,
An siyudad asin an mga nag-iistar diyan.
Makurahaw an mga lalaki,
Asin matarangis an gabos na nag-iistar sa kadagaan.
3 Sa tanog kan mga lagatak nin mga bitis* kan saiyang mga barakong kabayo,
Sa ragitnit kan saiyang mga karwaheng panggiyera
Asin sa ragot kan saiyang mga ruweda,
Dawa an mga ama dai mabalik para tabangan an mga aki ninda,
Huling an mga kamot ninda nangruruluya,*
4 Huli ta lalaglagon kan papaabot na aldaw an gabos na Filisteo;+
Pupuhuon kaini an lambang natatadang kaalyado kan Tiro+ asin Sidon.+
5 Maabot sa Gaza an pagkakalbo.*
An Askelon pinasilensiyo.+
O kamong natatada sa saindang kapatagan sa kababan,*
Sagkod nuarin nindo gugurutan an saindong sadiri?+
6 O espada ni Jehova!+
Gurano pa kahaloy bago ka magin tuninong?
Magbalik ka sa sarungan mo.
Magpahingalo ka asin magsilensiyo.
7 Paano man iyan magigin tuninong
Kun si Jehova an nagsugo kaiyan?
Laban sa Askelon asin sa baybayon kan dagat,+
Duman niya iyan iinasignar.”