Magin Mapanggana sa Paghihingoang Mapahiwas an Istada!

‘KAIPUHAN ko nin mas mahiwas na istada!’ Pira na nindong beses na nadangog—o isinabi—an usong reklamong iyan? An solusyon daw mas dakulang harong o apartment? Tibaad bako. An kadaklan sa sato dai kaya kan bulsa na bumalyo. Asin minsan an iba sa sato na puwedeng bumalyo tibaad dai mahaloy makarisa na yaon na naman an problema sa lugar.

An totoo, minsan gurano kasadit kan satong istada, parate na may bastanteng lugar para sa mga bagay na kaipuhan niato. An mga ekstra an sa kadaklan ginigikanan kan problema. Asin kun an harong disorganisado asin marangkay, iyan puwedeng magin dai nawawarang gikanan nin kadepisilan, pagkabigo, asin tension. Kun siring, isentro niato an atension sa tolong paagi na “madiskobre” an dagdag na lugar sa mismong istada nindo—an saindong harong!a

Num. 1: Haleon an mga Bagay na Dai Kaipuhan

Sa dakol na harong an paglinig kun tigsoli o tigholog rituwal nin pagbarobalyo kan posisyon nin mga bagay, paglinig dangan pagbalik kaiyan sa dating kamugtakan. Alagad taano ta dai ini gamiton na oportunidad na haleon an mga bagay na dai kaipuhan?

Nagin ugale na daw nindong sarayon an daan na mga diaryo asin magasin? Probaran na tabason an mga artikulong talagang gusto nindong sarayon (na isinusurat dian an ngaran kan babasahon, an petsa, asin pahina tanganing magin reperensia sa ngapit) dangan iapon an diaryo o magasin. Magngangalas kamo kun gurano kadakulang bagong lugar an ibubunga kaini!

Helingon man an saindong mga muwebles. Igwa daw nin mga muwebles na mayo man nin nagigibo kundi dagdagan sana an rangkay? Tibaad mas magagamit iyan nin sarong katood. Asin kumusta man an saindong mga kloset? Iyan daw pano nin mga gubing na dakol nang taon na dai nindo isinusulot? Taano ta dai isipon na haleon an ano man na mga sarong taon na nindong dai isinusulot?

Totoo, garo ini dakulang proyekto, asin totoo man. Kaya gibohon iyan na proyekto kan pamilya. Ilabot an mga aki asin an saindong agom. Kun ganahan na an saindong mga aki sa proyekto, tibaad magusto na sindang haleon an pirang dai kaipuhan na bagay na rogaring ninda. An resulta? Tibaad an kapinonan nin parasiyempreng kalinigan.

Num. 2: Gamiton an Gabos na Lugar

Ngonyan liboton niato an saindong harong asin aramon an gabos na puwedeng pagsarayan. Kaiba digdi an mga lanob, istante, pinto, pasilyo, kloset, asin kisame. An baratong mga basket o sablayan puwedeng ibugtak sa mga lanob nin pasilyo o pinto tanganing sarayan nin mga sapatos, tuwalya, asin iba pa. An mga kahon na karton o kahoy magagamit na sarayan nin mga libro, kawatan, album nin mga retrato, asin iba pa na gusto nindong sarayon. Paagi sa pagbugtak kan mga kahon na ini sa saindong kloset, magagamit nindo an nasasayang na lugar sa salog.

Dakol daw na lugar an okupado nin tirutiklop na mga silya? Tibaad iyan puwedeng sarayon sa sirong nin sofa o sa likod kan saindong kurtina. Naookupar daw nin saradit na istante nin libro an mahalagang lugar sa sala? Taano ta dai bugtakan nin poon-salog-sagkod-kisameng istante nin libro sa saindong pasilyo? Kun iyan bubugtakan nindo nin mga pinto, magagamit man iyan sa pagsaray nin mga bagay na laen pa sa mga libro.

Dai paglingawan an lugar sa sirong kan saindong katre. An mga kahon na plastik o karton ikabubugtak dian na sarayan nin mga gamit sa katre na mayo sa panahon. Asin kumusta man an saindong mga lanob? An darakulang espiker nin stereo puwedeng itakod sa lanob asin makaekonomiya nin lugar sa salog. Kun an mga kawatan nagrarangkay sa salog kan kuwarto kan saindong aki, probaran na bugtakan nin hababang mga istante sa lanob. Ini nagtatao nin kombenyenteng lugar na masasarayan kan aki nindo kan saiyang mga kawatan, imbes na itambak iyan sa dakulaon na baul. An mga kawatan perming naheheling kan mga aki, asin an istante puwedeng palangkawon sa lanob mantang nagdadakula an aki. Tibaad magin man kombenyente an mga istante sa saindong banyo tanganing sarayan nin mga tuwalya, sabon, asin mga gamit sa pag-alinyar.

Num. 3: Areglaron an Saindong Istada

Parateng nagkakaigwa nin lugar paagi sana sa pag-areglar sa pirang bagay. An dakol na kagharong pinasasandig sa lanob an gabos nindang muwebles, kaya nababakante an sa tahaw. Probaran na pagtalikodon an duwang istante nin libro o lamesa tanganing magserbing dibisyon kan kuwarto. O horophoropon an pag-instalar nin poon-salog-sagkod-kisameng istante nin libro na puwedeng magin sarayan asin dibisyon. Ngonyan magagamit na sa duwang katuyohan an iyo man sanang kuwarto—an sarong lado para sa pag-adal, an saro naman para sa pankagabsan na aktibidad kan pamilya. Partikularmenteng kaipuhan an mga dibisyon sa kuwarto kun iriba sa kuwarto an magturugang. Dinudugangan kaiyan an pagkapribado sa hababang kantidad.

Alagad kun limitado an lugar, kun beses minsan an pinakamarahay na mga paghihingoa sa pagreorganisar dai nakaootob sa minamawot na mga resulta. Tibaad minsan paano magibo nindong garo mahiwas paagi sa paggamit nin mga salming sa lanob o pagpintura kan saindong harong sa mas maliwanag na kolor. An paggibo kan arin man sa mga bagay na ini gigibohon na mas mahiwas an saindong harong.

Kun problema an limitadong lugar, taano ta dai probaran an simpleng mga suhestion na ini? Tibaad madiskobre nindo na kun malinig asin organisado an saindong harong, nakadudugang iyan sa karahayan asin katoninongan nin isip kan bilog na pamilya—angay na balos sa pagigin mapanggana sa paghihingoang mapahiwas an istada!

[Nota sa Ibaba]