Ano an Kahulogan nin Sarong Ngaran?
ARAM daw nindo kun ano ta an ngaran nindo ngonyan an inginaran saindo kan saindong mga magurang? Kan mga panahon kan Biblia an ngaran nin mga tawo parateng nagpaparisa nin pagtubod sa Dios asin sa saiyang mga panuga. Halimbawa, an ngaran na Abraham, na itinao saiya nin Dios, nangangahulogan “Ama nin Sarong Kadaklan (Kaburonyogan).” An Ismael nangangahulogan “An Dios Nagdadangog (Naghihinanyog).” Asin an Jesus nangangahulogan “Si Jehova Kaligtasan.”
Sa mga nasyon sa Aprika ngonyan, an pagtao nin ngaran sa parate nagpaparisa nin relihiyosong mga tinutubod asin pamantayan. Ini totoo nanggad sa dakol na Saksi ni Jehova sa Aprika.
Sa Nigeria an sarong hoben na babae nag-eestorya: “An ama ko nakanood kan katotoohan kan Biblia sa mga Saksi ni Jehova sarong taon bago ako mamundag. Kan taon man sanang idto, ilinuwas sa Ingles an librong The Truth That Leads to Eternal Life. Dangan, kaidtong mamundag ako, an librong Truth nagluwas sa samong tataramon na Yoruba. Huli kaiyan, inisip kan ama ko na angay na itao sako an ngaran na Truth [Katotoohan].”
An saro pang saksi ni Jehova, sarong lalaki, nag-eestorya: “An tatay ko nagin Saksi kan taon bago ako mamundag. Sia nagtatrabaho sa sarong lugar na pinamamahalaan nin maimbod na mga Katoliko, asin huli sa saiyang pagtubod, nawaran sia nin trabaho. Kan ako mamundag, mayo sia nin trabaho asin kakadikit an kuwarta nia. Pero dai sia nanluya. ‘Mayo akong trabaho huli sa kaimbodan ko sa Kahadean nin Dios,’ sabi nia. Kaya nginaranan nia akong Kingdom [Kahadean].”
“Nginaranan ako kan sakong mga magurang na Ifeanyichukwu, ngaran sa Igbo,” sabi nin saro pang barobata. “Depisil iyan na pronunsiaron para sa mga dai tataong mag-Igbo, kaya gusto ko nin ngaran na mas pasil. Gusto ko man na maglingkod sa Bethel [an lokal na sangang opisina kan Watch Tower Society], asin may amigo ako na an ngaran Bethel. Kaya ihinapot ko sa sakong mga magurang kun puwede akong magpangaran nin ‘Bethel.’ Nagusto sinda.”
“An mga magurang ko payunir [bilog na panahon na mga ministro],” an estorya nin saro pang lalaking taga-Nigeria. “Gusto kan ama ko na ngaranan an saro nindang aki kan saindang karera. Kaya ako nginaranan na Pioneer [Payunir]. Naglaom sinda na maeksperyensiahan ko man an nagsosopay na mga bendisyon nin bilog na panahon na paglilingkod.”
Kan an sarong miembro kan Namamahalang Grupo nin mga Saksi ni Jehova yaon sa Côte d’Ivoire kan Disyembre 1978, nakamidbid nia an sarong tugang na babae na may aking an ngaran Victorious Faith (Mapangganang Pagtubod) ta namundag sia kan an ina nag-aatender sa “Mapangganang Pagtubod” na Kombension.
Si Truth (Katotoohan), Kingdom (Kahadean), Bethel, asin Pioneer (Payunir) gabos nagtatrabaho sa sangang opisina kan Watch Tower Society sa Nigeria. May naglilingkod man duman na mga Saksi na an ngaran Bible (Biblia), Wisdom (Kadonongan), Christian (Kristiano), Love (Pagkamoot), Innocent (Daing Sala), Genesis (Kapinonan), asin Blessing (Bendisyon). Ini gabos na Kristianong ministrong ini naghihingoa na papagdanayon an marahay na dangog, o ngaran, sa atubangan ni Jehova Dios, na sa saiya utang kan lambang pamilya sa langit asin daga an ngaran kaiyan.—Ikomparar an Efeso 3:14, 15.