Libro kan Biblia Numero 64—3 Juan
Kagsurat: Apostol Juan
Kun Saen Isinurat: Efeso, o sa harani
Natapos an Pagsurat: Mga 98 C.E.
GINIBO an surat na ini para ki Gayo, sarong maimbod na Kristiano na totoong namotan ni Juan. An ngaran na Gayo ordinaryo na sana kan panahon kan enot na kongregasyon. Iyan apat na beses na naglataw sa iba pang kabtang kan Kristianong Griegong Kasuratan, na nanonongod sa kisiera tolo asin posibleng apat na manlaenlaen na lalaki. (Gibo 19:29; 20:4; Roma 16:23; 1 Cor. 1:14) Mayo nin makukuang impormasyon na talagang makakapagsabi kun baga an saro sa mga ini an Gayo na sinuratan ni Juan. An aram ta sana ki Gayo iyo na sia miembro nin sarong Kristianong kongregasyon, na sia espesyal na katood ni Juan, asin na an surat personalmenteng para sa saiya, kaya pirmeng ginagamit kaiyan an mga tataramon na “ka,” “ika,” “mo,” asin “saimo.”
2 Huling an estilo kan pambukas asin pantapos na mga pataratara kapareho kan sa Ikaduwang Juan saka ipinamidbid giraray kan kagsurat an saiyang sadiri na “magurang na lalaki,” dai makukuestion na si apostol Juan man an naggibo kan surat na ini. (2 Juan 1) An pagkakaagid kan mga laog asin pananaram nagsusuherir man na iyan isinurat sa Efeso o harani dian kaidtong mga 98 C.E., siring kan duwa pa niang surat. Huli sa pagigin halipot kaiyan, bihira iyan na kotaron kan enot na mga parasurat, alagad iyan kaiba kan Ikaduwang Juan na manonompongan sa enot na mga katalogo kan ipinasabong na Kasuratan.
3 Sa saiyang surat ipinahayag ni Juan an pag-apresyar sa pagkamapag-istimar ni Gayo sa mga tugang na nagbibiahe, asin may sinambit siang problema dapit sa sarong ambisyosong tawo na si Diotrefes. An Demetrio na nasambitan garo baga iyo an nagdara kan surat na ini ki Gayo, kaya posibleng sia isinugo ni Juan asin nangangaipong istimaron ni Gayo sa saiyang pagbiahe, ta sinesegurado kan surat na iyan na sia iistimaron. Arog ki Gayo, mayo kita nin aram manongod ki Diotrefes asin ki Demetrio apuera sa mababasa niato digdi. Minsan siring, an surat nagtatao nin interesanteng ideya manongod sa dayupot na internasyonal na kasararoan nin magturugang kan enot na mga Kristiano. Kabilang sa iba pang mga bagay, kaiba digdi an kaugalean na pag-istimar sa mga nagbibiahe ‘dahelan sa ngaran nin Dios,’ minsan ngani sinda tibaad dai personal na midbid kan mga nag-iistimar sa sainda.—3 Juan Ber. 7.
KUN TAANO TA KAPAKIPAKINABANG
5 Ipinaheling ni apostol Juan na sia sarong arogan na paraataman sa saiyang kaigotan na protehiran an kongregasyon sa nakakaating mga impluwensia. Kaomaw-omaw an espiritu nin pagkamoot asin pagkamapag-istimar na lakop sa kongregasyon, asin tunay nanggad na obligasyon ninda na ingatan an maogmang kamugtakan na ini, tanganing an lokal na mga tugang asin “mga estranghero” (mga indibiduwal na dati dai midbid kan Kristiano na nag-istimar sa mga ini) na nagduman sa sainda iribang makapaglingkod bilang “mga kapwa trabahador sa katotoohan.” (Ber. 5, 8) Minsan siring, si Diotrefes may mapaabaw-abaw na mga mata, sarong bagay na ikinakaongis ni Jehova, asin sia dai nin paggalang sa teokratikong autoridad, na nagtatabil pa ngani nin maraot na mga bagay manongod ki apostol Juan. (Tal. 6:16, 17) Inoolang nia an Kristianong pagkamapag-istimar kan kongregasyon. Bakong makangangalas na si Juan nagin prangkang marhay tumang sa karatan na ini asin sa pagsuportar sa tunay na Kristianong pagkamoot sa kongregasyon. Maninigo na kita magin siring man kaiyan kaigot ngonyan sa pagpapadanay nin kapakumbabaan, paglakaw sa katotoohan, asin pagpaheling nin diosnon na pagkamoot saka pagigin buka an palad, kaoyon kan prinsipyo na sinabi ni Juan: “An naggigibo nin marahay gikan sa Dios. An naggigibo nin maraot dai nakaheling sa Dios.”—3 Juan 11.