Nagkakasararo sa Pagsamba sa Iyo Sanang Tunay na Dios
Kapitulo 13: Sarong Dakulang Kadaklan sa Atubang kan Trono ni Jehova
1. (a) Bago akoon an saindang balos kan bago-Kristianong mga lingkod nin Dios o kan 144,000, ano an kaipuhan nindang maeksperyensiahan? (b) Alagad ano an magigin posible para sa sarong dakulang kadaklan na nabubuhay sa panahon na umabot an “dakulang kahorasaan”?
Minsan ngani an mga maimbod na lingkod nin Dios poon ki Abel sagkod ki Juan Bautista inenot sa saindang buhay an pag-otob sa kabotan nin Dios, sinda gabos kinaipuhan na magadan asin maghalat nin pagkabuhay liwat. An 144,000 na makakaibanan ni Cristo sa saiyang langitnon na Kahadean kaipuhan man na magadan bago ninda maako an saindang balos. Kabaliktaran, ipinaheling ki apostol Juan sa bisyon na magkakaigwa nin sarong dakulang kadaklan na aktuwal na makaliligtas sa “dakulang kahorasaan” asin, dai nagagadan, may paglaom na mabuhay sagkod lamang.—Kap. 7:9-17.
Pagmidbid sa “Dakulang Kadaklan”
2. Ano an nagdara sa malinaw na pakasabot kun siisay an “dakulang kadaklan” kan Kapahayagan 7:9?
2 Sa laog nin dakol na siglo dai nasabotan kun siisay an “dakulang kadaklan” na ini. Alagad an progresibong pakasabot sa konektadong mga hula nag-andam kan dalan. Kan 1923 namansayan na an “mga karnero” sa parabola ni Jesus sa Mateo 25:31-46 asin an “ibang karnero” na sinasabi nia sa Juan 10:16 mga tawo na nabubuhay ngonyan na may oportunidad na mag-erok sagkod lamang digdi sa daga. Kan 1931 an mga sinasabi sa Ezequiel 9:1-11 na tinandaan sa saindang angog kan lalaki na may tintero kan sekretaryo ipinamidbid na iyo man sana an “mga karnero” sa Mateo kapitulo 25. Dangan, kan 1935, an “dakulang kaburonyogan,” o “dakulang kadaklan” sa Kapahayagan 7:9-17 nasabotan na kapareho man sana kan “mga karnero” kan parabola ni Jesus manongod sa mga karnero asin kanding. Minsan ngani kan 1923 narealisar na an nagkapira sa mga arog-karnerong indibiduwal na iyan nagpoon nang mahayag, kaidto sanang 1935 na an saindang kabilangan nagpoon na marikas na dumakol. Ngonyan igwa nin literal na minilyon na nagmamawot na midbidon bilang kabtang kan inooyonan nin Dios na “dakulang kadaklan” na iyan nin mga “ibang karnero.”
3. Taano an saindang ‘pagtindog sa atubang kan trono’ ta dai nangangahulogan na sinda langitnon na grupo?
3 An mga kabilang sa “dakulang kadaklan” ipinalalaen sa 144,000 na miembro kan espirituwal na Israel, na mas enot na nasabihan sa iyo man sanang kapitulo sa Kapahayagan. Sa saiyang bisyon dai naheling ni Juan na an “dakulang kadaklan” na ini nasa langit. An saindang ‘pagtindog sa atubang kan trono’ (Griego: e·noʹpi·on tou throʹnou, “naheheling sa trono”) nin Dios dai naghahagad na sinda mapasa langit. An saindang kamugtakan “naheheling” sana nin Dios, na nagsasabi sato na gikan sa langit naheheling nia an mga aki nin mga tawo. (Kap. 7:9; Sal. 11:4; ikomparar an Salmo 100:1, 2, siring man an Lucas 1:74, 75 asin Gibo 10:33, Kingdom Interlinear.) Siring man, dai kaipuhan na an “gabos na nasyon” mapasa langit tangani na sinda mapasa atubangan kan trono ni Cristo (sa literal, “sa atubang nia”), arog kan ilinaladawan sa Mateo 25:31, 32. An bagay na an “dakulang kadaklan, na dai nin siisay man na makakabilang,” bakong langitnon na grupo ipinaheheling kan pagkokomparar sa Kapahayagan 7:4-8 asin 14:1-4, na dian sinasabi an espisipikong kabilangan kan mga kukuanon hale sa daga tanganing makaduman sa langit.
4. (a) Ano an “dakulang kahorasaan” na maliligtasan ninda? (b) Arog kan sinasabi sa Kapahayagan 7:11, 12, siisay an nagmamasid sa “dakulang kadaklan” asin maiba sa sainda sa pagsamba?
4 Sa pagpamidbid kan “dakulang kadaklan,” si Juan nagsurat: “An mga ini an nagluwas sa dakulang kahorasaan.” An maliligtasan ninda tunay na iyo an pinakagrabeng kahorasaan na inagihan sa daga. (Kap. 7:13, 14; Mat. 24:21) An mga makaliligtas sa makangingirhat na aldaw na iyan ni Jehova dai magkakaigwa nin pagduda kun siisay an nagligtas sa sainda. Kun may pagpasalamat nindang iatribuwir an saindang kaligtasan sa Dios asin sa Kordero, dangan, arog kan naheling ni Juan sa bisyon, an gabos na maimbod na linalang sa langit idudungan an saindang tingog sa sainda sa pagsamba kan solamenteng tunay na Dios, na sinasabi: “Amen! An kaomawan asin an kamurawayan asin an kadonongan asin an pagpasalamat asin an dangog asin an kapangyarihan patin an kakosogan mapasa satong Dios sagkod lamang. Amen.”—Kap. 7:11, 12.
Nabalo Kun Dapit sa Pagigin Maninigo na Maligtas
5. (a) Paano niato maaaraman kun ano an kahagadan tanganing magin kabtang kan “dakulang kadaklan” na maliligtas? (b) Paagi sa pagsimbag sa mga hapot na nasa poro kan parapong ini, ipaliwanag kun ano an kinakaipuhan tanganing makaligtas sa “dakulang kahorasaan.”
5 An pagliligtas sa “dakulang kadaklan” mangyayari kaoyon sa matanos na mga pamantayan ni Jehova mismo. An maliwanag na mga pagparisa kan nagpapamidbid na mga ugale kan mga ililigtas nasa mga hula sa Biblia manongod sa sainda. Sa siring posible para sa mga mamomoton sa katanosan na humiro ngonyan na may paglaom na makaligtas. Nasabihan na niato an mga tekstong nasa ibaba. Alagad ngonyan maingat na analisaron an mga iyan, sa tabang kan dugang pang mga tekstong sitado, asin horophoropon kun ano an dapat nindong gibohon tanganing makapareho sa makahulang mga paglaladawan na ini.
An “ibang karnero” na sinasabi sa Juan 10:16
Ano an boot sabihon para sa saro kan talagang paghinanyog sa tingog ni Jesus? (Juan 10:27; Mat. 9:9; Efe. 4:17-24)
Paano niato ikakapaheling na minimidbid niato si Cristo bilang an satong “sarong pastor”? (Mat. 23:10, 11)
An “mga karnero” sa ilustrasyon ni Jesus kan mga karnero asin kanding (Mat. 25:31-46)
Sairisay an “mga tugang” ni Cristo na gigibohan nin marahay kan mga ini? (Heb. 2:10, 11; 3:1)
Sa irarom nin anong masakit na mga kamugtakan na sinda hinahagadan na ipamidbid an saindang sadiri na kaiba kan mga tugang ni Cristo sa daga? Asin sa anong gibohon sinda nagtatao nin maimbod na pagtabang? (Kap. 12:12, 17; Mat. 24:14; 28:19, 20)
An mga tawo na tinandaan para sa kaligtasan kan lalaki na may tintero nin sekretaryo (Ezeq. 9:1-11)
Paano ninda ipinaheheling na sinda dai oyon sa makababaldeng mga bagay na ginigibo sa antitipikong Jerusalem, o Kakristianohan? (Kap. 18:4, 5)
Ano an kaiba sa “tanda” na nagpapamidbid sa sainda na laen sa nagsasagin mga Kristiano asin nagbubugtak sa sainda sa linya para sa kaligtasan? (1 Ped. 3:21; Mat. 7:21-27; Juan 13:35)
6. Paano an paglaladawan ni Juan sa “dakulang kadaklan” nakatatabang sato na masabotan kun taano sinda ta ilinigtas?
6 An paglaladawan sa “dakulang kadaklan” na makukua sa Kapahayagan 7:9-15 nagtatao nin dugang pang importanteng mga detalye. Sa pagsabi sato kun paanong an mga kaiba sa “dakulang kadaklan” malataw pakalihis kan “dakulang kahorasaan,” an Kasuratan nag-aapod man kan atension sa mga bagay na nagbunga kan saindang pagkaligtas.
7. Ano an ginibo ninda bago an “dakulang kahorasaan,” asin paano ini ipinaririsa?
7 Minsan ngani sinda hale sa gabos na nasyon, tribo, banwaan asin tataramon, sinda ipinaheheling na sararong “nagtitindog sa atubang kan trono,” na nagmimidbid ki Jehova, an Saro na nagtutukaw sa trono, bilang an Unibersal na Soberano. Pinatunayan ninda paagi sa saindang pamumuhay na sinda maimbod na mga parasuportar sa saiyang pagkahade. An bagay na “hinugasan ninda an saindang mga gubing asin pinaputi iyan sa dugo kan Kordero” nagpaparisa na minidbid ninda an saindang pangangaipo kan nakatutubos sa kasalan na merito kan atang ni Jesus bilang an Kordero nin Dios. (Juan 1:29; 1 Juan 2:2) May pagtubod na idinusay ninda an saindang sadiri sa Dios basado sa atang na iyan, sinimbolisaran ini kan pagpabautismo sa tubig asin ngonyan igwa nin malinig na kamugtakan sa atubang nin Dios, na ilinaladawan kan maputing mga gubing. Dai sinda nag-alangan na ipahayag sa publiko an saindang pagtubod sa Aki nin Dios. (Mat. 10:32, 33) Kaoyon sa gabos na ini, ipinaheheling sinda na nasa templo nin Dios, o unibersal na harong nin pagsamba, bilang mga parasamba na nagtatao sa Dios nin “banal na paglilingkod aldaw asin banggi.” Sa siring nakagibo sinda nin rekord bilang maimbod na mga parasuportar sa tunay na pagsamba asin mga parabalangibog kan saiyang Kahadean.—Isa. 2:2, 3.
8. Tanganing makinabang kita sa impormasyon na ini, ano an kaipuhan na gibohon niato?
8 Tama daw sa saindo an mga detalye kan makahulang mga paglaladawan na ini? May mga paagi daw na kaipuhan nindong orog na ioyon an saindong buhay sa sinasabi digdi? Kun iyo, ngonyan na an panahon na gibohon iyan!
Pag-erok sa Espirituwal na Paraiso
9. Paano ilinaladawan ni Juan an espirituwal na mga bendisyon na nakakamtan kan “dakulang kadaklan” minsan ngonyan?
9 Saro daw kamo na naglalaom na makaligtas bilang kabtang kan “dakulang kadaklan”? Kun kamo nakapaoyon na sa matanos na mga dalan ni Jehova, kun siring sierto na kamo nagkakamit na kan ipinanugang mga kamugtakan na tamang inapod na espirituwal na paraiso. Si apostol Juan sinabihan: “Dai na sinda magugutom ni mapapaha man, minsan an aldaw dai na matama sa sainda ni an ano man na init, huli ta an Kordero, na nasa tahaw kan trono, aatamanon sinda, asin gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kap. 7:16, 17) Paano ini nagin totoo sa kaso nindo?
10. (a) Sa espirituwal na sentido paano totoo na an “dakulang kadaklan” “dai na sinda magugutom ni mapapaha man”? (b) Naeksperyensiahan na daw nindo ini?
10 Bago mapasairarom kan mamomoton na pangataman kan Marahay na Pastor, si Jesu-Cristo, kamo daw kaidto nagugutom asin napapaha sa katanosan? (Ikomparar an Mateo 5:6.) Iyo, an minamawot nindo bagay na solamente an makapagtatao iyo si Jehova paagi sa saiyang Aki. Kan kamo makanood manongod sa matanos na mga dalan ni Jehova—an saiyang katuyohan na laglagon an mga maraot, alagad siring man an saiyang dai na kutana maninigong kabootan sa pagpangyari sa kaligtasan para sa mga aki ni Adan—sierto na sa enot na pangyayari sa saindong buhay kamo nakamate nin tunay na pagkakontento. An espirituwal na kakanon asin inomon sa Tataramon nin Dios, na isiniserbi paagi sa saiyang organisasyon, padagos na nagtao saindo nin kabasogan. (Isa. 65:13, 14) Asin kun idinusay nindo an saindong sadiri sa Dios paagi ki Cristo kamo ngonyan igwa na nin tunay na katuyohan sa buhay. (Ikomparar an Juan 4:32-34.) Nasa atubangan nindo an maogmang paglaom na buhay na daing sagkod sa Paraisong daga, huli ta an Kordero “gigiyahan [an “dakulang kadaklan”] sa mga burabod kan tubig nin buhay.”
11. (a) Sa anong paagi na totoo na “minsan an aldaw dai na matama sainda ni an ano man na init”? (b) Gurano iyan kahalaga sa saindo?
11 Bilang may pagkompiar na “mga karnero,” an mga kaiba sa “dakulang kadaklan” iniingatan man asin ginigiyahan kan Marahay na Pastor. Iyan an dahelan kun taano ta, sa piguratibong pagtaram, “minsan an aldaw dai na matama sa sainda ni an ano man na init.” Dai ini nangangahulogan na, bilang saro sa “dakulang kadaklan,” dai na kamo magtitios nin paglamag hale sa kinaban. Imbes, iyan nangangahulogan na kamo protehido sa init kan kaanggotan mismo nin Dios. Asin kun paoranon nia an banal na paglaglag sa mga maraot, dai kamo kaiyan lalaglagon. An marahay na relasyon na ini puwedeng magpadagos sagkod lamang.—Ezeq. 38:22, 23; ikomparar an Salmo 11:6; 85:3, 4.
12. Paano pinahid minsan ngonyan an mga luha sa saindong mga mata?
12 Kamakangangalas nanggad kan mga dahelan sa kaogmahan na nasa saindo kun kamo talagang saro sa “dakulang kadaklan” na iyan! Igwa kamo kan makangangalas na paglaom na maheling an mga maraot na biyong haleon dangan an saindo mismong isip asin hawak aktuwal na makalda sa gabos na epekto nin kasalan. Alagad dawa ngonyan an kamondoan na namamatean nin mga tawo huli ta sinda ignorante sa Dios dai nindo namamatean. Nagpopoon na kamong makamate kan kaogmahan na yaon sana sa banwaan na an Dios iyo si Jehova. (Sal. 144:15b) Sa paaging ini nagpopoon na kamong makamate kan kaotoban kan panuga: “Papahidon nin Dios an gabos na luha sa saindang mga mata.”
13. Ano an makakadugang sa mga kaogmahan sa espirituwal na paraiso mantang nagpapadagos an milenyal na paghade ni Cristo?
13 Kun paanong an “dakulang kadaklan” makaliligtas sa katapusan kan palakaw na ini nin mga bagay, iyo man an espirituwal na paraiso. Kun kamo kabilang sa sainda, kun siring padagos kamong mag-aako nin espirituwal na bangkete nin matatabang mga bagay mantang nagpapadagos an milenyal na paghade ni Cristo. An saindong kaaraman manongod sa Dios mismo mararom mantang naheheling nindo na an saiyang dai nasusudyang katuyohan nagkakaigwa nin mamuraway na kaotoban. An saindong kagayagayahan madudugangan kun kamo nakikiiba na sa pagsabat sa padakol nang padakol na mga hale sa kagadanan tanganing makaibanan nindo sa tunay na pagsamba. Asin an pisikal na mga bendisyon na itatao sa panahon na iyan magigin espesyal na mahalaga sa gabos na maimbod na mga lingkod nin Dios mantang iyan naheheling bilang mga kapahayagan kan pagkamoot ni Jehova mismo.—Isa. 25:6-9; Sant. 1:17.
Pagrerepaso
● Sa anong pambihirang pangyayari iinaasosyar kan Biblia an “dakulang kadaklan,” asin paano?
● Kun talagang boot niatong makabilang sa inooyonan nin Dios na “dakulang kadaklan” na iyan, ano an kaipuhan na gibohon niato ngonyan?
● Gurano kahalaga sa saindo kan mga bendisyon kan espirituwal na paraiso?