Pagkaligtas Pasiring sa Bagong Daga
Kapitulo 7: Humirong May Kadonongan sa Atubang nin Kapahamakan
1. Taano ta nagadan nin basang sana an mga tawo (a) kan malunod an Titanic? (b) pumutok an Mount Pelée?
Kun pinatanidan nin masasarigan na bareta na may nagdadangadang na kalamidad, an madonong na mga tawo minahiro tanganing maingatan an saindang buhay. (Talinhaga 22:3) Alagad an dai mabilang na rinibo nagadan nin basang sana huli ta napasala an saindang pagsarig. Sa ibong nin mga patanid na sumakay sa mga bote salbabida, an ginatos na pasahero nalamos kaiba kan bapor na Titanic kan 1912 huli ta naniwala sinda sa sabi na idto dai malulunod. Kan an Mount Pelée sa Martinique magpoon na tumuga nin abo asin gapo kan 1902, natakot an mga nag-iistar sa haraning Saint-Pierre, alagad huling nakataya an pansadiring intereses kan prominenteng mga miembro kan komunidad, an lokal na mga politiko asin an editor kan lokal na peryodiko naghingoa na kalmahon an takot kan mga tawo, na sinasadol sindang dai maghale. Sa panale puminutok an bukid, asin 30,000 katawo an nagadan.
2. (a) Anong apretadong patanid an itinatao sa satong aldaw? (b) Taano ta seryoso an kamugtakan?
2 Sa satong aldaw itinatao an mas apretadong patanid—bakong manongod sa sarong lokal na kalamidad kundi manongod sa kaharanihan kan unibersal na ralaban nin Dios na Armagedon. (Isaias 34:1, 2; Jeremias 25:32, 33) An mga Saksi ni Jehova paorootrong nagsosongko sa harong nin mga tawo sa bilog na kinaban, na sinasadol sindang humirong may kadonongan, sa katuyohan na iligtas an saindang buhay. Kamo daw may igong pagkamoot sa buhay tanganing gibohon an kinakaipuhan na paghiro, asin gibohon iyan tolos, na daing pag-atraso?
“An Kinaban Maagi Sana”
3. Taano an satong kaisipan manongod sa kinaban ta makaaapektar sa satong paglaom sa kaligtasan?
3 An kritikal na bagay sa saindong paglaom sa kaligtasan iyo an saindong kaisipan manongod sa kinaban. Sagkod na kamo nabubuhay bilang tawo kamo nasa kinaban. Alagad dai kamo kaipuhan na makikabtang sa salang mga kamawotan kaiyan asin umarog sa maraot na mga gibo kaiyan. Dai kamo kaipuhan na magin kabtang kaiyan paagi sa pagsarig sa mga tawo asin sa saindang mga pakana imbes na sa Dios asin sa saiyang katuyohan. Alagad kaipuhan kamong pumili; dai kamo puwedeng nasa man-ibong-ibong na lado. “An siisay man . . . na boot na magin katood kan kinaban ginigibo an saiyang sadiri na kaiwal nin Dios.” Taano? Huli ta, arog kan sabi sato kan Tataramon nin Dios, “an bilog na kinaban namumugtak sa kapangyarihan kan maraot.”—Santiago 4:4; 1 Juan 5:19; Salmo 146:3-5.
4. (a) Ginagamit an saindong Biblia, ipaliwanag kun anong mga gawe asin kaisipan an maolang sa mga tawo na magkamit nin buhay sakop kan Kahadean nin Dios. (b) Taano ta maninigong talikdan tolos nin siisay man na naggibo kaiyan an mga bagay na ini?
4 Siyempre, dai ililigtas ni Jehova para sa saiyang matanos na Bagong Palakaw an mga tawo na an pamumuhay nagpapatunay na sinda nagdadanay sa kinokondenar nin Dios. Ano an pira sa mga bagay na ini? An dakol mga aktibidad asin kaisipan na ibinibilang na ordinaryo kan kinaban. Alagad kun boot niatong makaligtas sa katapusan kan maraot na kinaban na ini, kun siring, ano man an ginigibo asin iniisip nin ibang tawo, kukuyogon niato an patanid kan Biblia na an mga parapakisaro, parasambay, homoseksuwal asin an mga naggigibo nin inmoral na karigsokan asin kalaswaan dai makabibilang sa mga maliligtas. Minsan pa gurano kaparate na an iba nagpuputik o naghahabon, sasayumahan niato an siring na pamumuhay. Sa ibong kan pagkapopular nin mga gibo sa okulto, lilikayan niato iyan. Minsan pa an iba nauuri, nakiiiwal, napadadara sa mga pagputok nin kaanggotan, o minadulag sa mga pagkabigo paagi sa droga o sobrang paggamit nin mga inomon na de alkohol, dai niato sinda aarogon. Asin kun kita naggibo kan mga bagay na ini, aatubangon niato an pangangaipo na magbakle. Dawa kun an iba digdi garo baga “normal” para sa sato kan mga nakaagi, tatalikdan niato iyan. Taano? Huli ta kita tunay na namomoot sa Dios, kita namomoot sa buhay, asin an Tataramon nin Dios nagpapatanid na “an mga naggigibo kan siring na mga bagay dai magmamana kan kahadean nin Dios.”—Galacia 5:19-21; Efeso 5:3-7; 1 Corinto 6:9, 10; 2 Corinto 7:1; Kapahayagan 22:15.
5. (a) Kun mahalaga sa sato an buhay, ano an kaipuhan na manodan niatong gibohon? (b) Anong marahay na mga kuwalidad an sinasabi sa mga teksto na nasa poro kan parapong ini? Gurano iyan kahalaga? Paano niato iyan makukultibar?
5 Kun mahalaga sa sato an oportunidad na mabuhay sagkod lamang na may kaogmahan, kaipuhan na manodan niato kun paano makapaoogma sa Kagtao nin buhay, si Jehova Dios. (Gibo 17:24-28; Kapahayagan 4:11) Luway-luway kaipuhan na iaplikar niato an saiyang Tataramon sa gabos na kabtang kan satong buhay. Mantang ginigibo niato iyan, dai mahahaloy seryoso niatong kokonsideraron an satong kaisipan manongod sa satong sadiri asin sa iba, manongod sa personal na mga rogaring asin inadalan, asin hohorophoropon kun paano ini nakaaapektar sa satong kamugtakan sa atubang nin Dios. An mga tawo sa palibot niato tibaad may halangkawon na pagheling sa sadiri, sa saindang tribo o rasa o nasyon, alagad odok niatong hohorophoropon an teksto na nagsasabi: “An Dios minatumang sa mga maabhaw, alagad sia minatao nin dai na kutana maninigong pagkaherak sa mga mapakumbaba.”—Santiago 4:6; Sofonias 2:2, 3; Salmo 149:4.
6, 7. Taano ta maninigo niatong siyasaton an satong buhay sa liwanag kan 1 Juan 2:15-17?
6 Minsan an iba nagpapabaya na maoripon kan mga kamawotan na gikan sa materyalistikong sosyedad o pinahihiro nin kamawotan sa personal na kabantugan, sisiyasaton niato an satong buhay sa liwanag kan 1 Juan 2:15-17, na nagsasabi: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban—an horot nin laman asin an horot nin mga mata asin an pagpaabaw-abaw kan kaya sa buhay—bakong gikan sa Ama, kundi gikan sa kinaban. Siring man, an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” Kun kaipuhan kitang magbakle, ini na an panahon na gibohon iyan.
7 An kinaban na ini asin an pamumuhay kaiyan dai magdadanay sagkod lamang. Iyan bakong “dai malulunod.” An kinabanon na mga tawo tibaad maghingoa na mapagdanay sa sainda an saindang mga parasunod, na ipinamamate sainda na an saindang mga paghihingoa makapararahay sa kinaban. Alagad an solamenteng paagi na makaligtas sa nagdadangadang na kapahamakan iyo an pagkuyog sa mensahe nin patanid hale sa Dios. Digdi an mga taga-Nineve kan kaaldawan ni propeta Jonas nagtao nin halimbawa na marahay na isapuso niato.
“Sinda Nagsorolsol sa Ihinulit ni Jonas”
8. Paano an mga taga-Nineve nagpaheling nin kadonongan kan itao ni Jonas sa sainda an patanid nin Dios, asin may anong resulta?
8 Kan ikasiyam na siglo B.C.E., si Jonas isinugo ni Jehova na paduman sa mga taga-Nineve, an kabesera nin Asiria, tanganing ibalangibog na, huli sa karatan ninda, an Nineve ibabagsak. Kan si Jonas magpatanid na sa laog na sana nin 40 aldaw sinda mapapara, ano an reaksion ninda? Imbes na magtuya, sinda “nagturubod sa Dios, asin nagbalangibog sinda nin pag-ayuno asin naggurubing nin sako.” An hade mismo nag-iba sa sainda asin sinadol an bilog na banwaan na maigot na mag-arang sa Dios asin talikdan an saindang maraot na gibo asin an saindang kadahasan. Sia nangatanosan: “Siisay an nakaiisi kun baga an tunay na Dios . . . sumibog sa saiyang naglalaad na kaanggotan, tangani na kita dai mapara?” Huling tinalikdan ninda an maraot nindang mga gibo, pinahelingan sinda nin pagkaherak ni Jehova. Naligtas an saindang buhay.—Jonas 3:2-10.
9, 10. (a) Sa anong bagay na sinabi ni Jesus na an mga taga-Nineve sarong halimbawa na maninigong arogon? (b) Siisay ngonyan an kapareho kan mga taga-Nineve?
9 Bilang pagsagwe sa daing pagtubod na mga Judio kan enot na siglo C.E., inapod ni Jesus an atension sa makasaysayan na pangyayaring iyan, na an sabi: “An mga taga-Nineve matindog sa paghokom kaibanan kan kapag-arakian na ini asin makondenar kaiyan; huli ta sinda nagsorolsol sa ihinulit ni Jonas, alagad, uya! an sarong labi pa ki Jonas yaon digdi.”—Mateo 12:41.
10 Ano man sa satong aldaw? May nagpapaheling daw nin siring na pagsolsol? Igwa; may rinibo sa bilog na kinaban na, kapareho kan mga taga-Nineve, tibaad noarin man dai naghingakong nagsasamba sa Dios kan Biblia alagad ngonyan nagkukuyog na sa mensahe nin patanid hale ki Jehova. Kan maaraman ninda kun taano ta may nagdadangadang na kalaglagan sa kinaban na ini, hinagad ninda an pagkaherak nin Dios. Sinda tunay na nagliliwat sa isip asin puso manongod sa saindang dating pamumuhay asin ngonyan naghihingoa na gibohon an “mga gibo na angay sa pagsolsol.” (Gibo 26:20; helingon man an Roma 2:4.) Boot daw nindong makabilang sa sainda? Kun iyo, dai kamo mag-atraso.
Makipagkatoninongan Tolos
11. (a) Ano an nagin buhay kan mga Gabaonita? (b) Taano sinda ta nakipagkatoninongan sa Israel?
11 An mga Gabaonita kan kaaldawan ni Josue naghiro man na may kadonongan tanganing maligtas an saindang buhay. Sinda mga Cananeo na an pamumuhay inmoral asin materyalistiko, idolatroso asin demonistiko. Ipinagboot ni Jehova an paglaglag sa sainda. Aram ninda kun paano ilinigtas ni Jehova an Israel sa Egipto kaidtong 40 taon na an nakaagi asin na an makapangyarihan na mga hadeng Amorrheo sa sirangan kan Salog nin Jordan dai nakapanindogan sa atubangan ninda. An gabos nakaaaram na, daing ginagamit na mga pangaba, an mahibog na mga lanob nin Jerico natumpag sa atubangan ninda asin na an siudad nin Hai nagin na sanang sarong tambak nin kagabaan. (Josue 9:3, 9, 10) An mga tagasiudad nin Gabaon boot na mabuhay, pero aram ninda na nungka sindang manggagana sa pakikilaban tumang sa Dios nin Israel. May kaipuhan na gibohon tolos. Ano? Dai sinda makapag-iinsister sa sarong pakipagtratado sa Israel, pero inisip ninda na maninigo na probaran nindang makakua kaiyan minsan paano. Paano?
12. (a) Sa ibong kan paaging ginamit ninda, taano ta naligtas an mga Gabaonita? (b) Anong mga pagbakle an kinaipuhan na gibohon ninda, asin anong trabaho an itinao sa sainda?
12 Sinda naghirong may kadonongan, na nagsugo ki Josue nin mga lalaki na an itsura nagparisa na sinda nagbaklay nin harayo. Sa pagdolok ki Josue, sinabi ninda na sinda hale sa harayong daga, na nabaretaan ninda an makangangalas na mga bagay na ginibo ni Jehova asin, bilang mga representante kan saindang banwaan, sinda nagduman tanganing magpresentar na magin mga oripon asin makiolay na gibohon an pakipagtipan sa sainda. Si Josue asin an mga namomoon sa Israel nag-oyon. Kan huri, kan mabuyagyag an pandadaya, an mga Gabaonita mapakumbabang nagtuga na sinda natakot para sa saindang buhay asin ipinaheling ninda na sinda andam na gibohon an ano man na hagadon sa sainda. (Josue 9:4-25) Namasdan ni Jehova an bilog na pangyayari. Dai sia nadaya. Naheling nia na dai man ninda katuyohan na raoton an saiyang banwaan, arog kan ginibo kan mga Moabita bago kaini, asin inapresyar nia an saindang makosog na kamawotan na mabuhay. Kaya tinogotan nia sindang idestinong magtrabaho sakop kan mga Levita sa banal na tabernakulo, na nangungua nin songo asin nagsasakdo, sa siring nagsusuportar sa pagsamba ki Jehova. Siyempre, tanganing magin maninigo sa siring na paglilingkod, kaipuhan na talikdan ninda an saindang dating marigsok na mga gibo.—Josue 9:27; Levitico 18:26-30.
13. (a) Paano kita makikinabang sa makahulang dramang iyan may koneksion sa mga Gabaonita? (b) Tanganing iligtas kan Mas Dakulang Josue, ano an hinahagad sa mga tawo ngonyan?
13 Huling kita nabubuhay sa paghinanapos na kan “huring mga aldaw,” kaipuhan na an gabos na boot na makaligtas humiro nang daing pag-atraso, asin may lubos na pagkasinsero. Si Jesu-Cristo, na iyo an parakastigo ni Jehova ngonyan, dai madadaya na arog ni Josue. An solamenteng paagi na an siring na mga tawo makalalaog sa ano man na pakipag-areglo saiya tanganing dai sinda laglagon iyo na sinda magpahayag sa publiko kan saindang pagtubod ki Jehova bilang an tunay na Dios. (Ikomparar an Gibo 2:17-21.) Kaipuhan man na akoon ninda si Jesu-Cristo sa mga katongdan na itinao sa saiya nin Dios asin mamuhay bilang mga tawo na dai namomoot sa pamumuhay kan nakondenar nang kinaban na ini. Dangan sinda kaipuhan na magin mapakumbabang mga lingkod nin Dios, na nagtatao sa saiya nin banal na paglilingkod kaiba kan kongregasyon kan saiyang banwaan.—Juan 17:16; Kapahayagan 7:14, 15.
14. Taano ta makahulogan sa sato an pagliligtas ni Jehova sa mga Gabaonita tumang sa mga hukbong kaiwal?
14 Dai nahaloy pakatapos na an mga Gabaonita manindogan kaiba kan banwaan ni Jehova, sinda napairarom sa grabeng kagipitan. An limang hade kan mga Amorrheo sinalikopan an Gabaon tanganing piriton an mga tagaduman na kumampi giraray sa sainda, tumang sa Israel. An mga Gabaonita nagpadara nin apretadong pakimaherak ki Josue para sa tabang, asin an kaligtasan na naeksperyensiahan ninda saro sa pinakamakangangalas sa bilog na kasaysayan. Rinibaraw ni Jehova an kaiwal, pinaoranan sinda nin graniso hale sa langit, asin pinapangyari na lumawig an aldaw sa milagrosong paagi sagkod na biyong madaog kan Israel an kaiwal. (Josue 10:1-14) An pagliligtas na idto sa mga Gabaonita makahula sa mas makangangalas pang pagliligtas sa dakulang kadaklan nin mga parasamba sa tunay na Dios sa unibersal na ralaban nin Armagedon. An oportunidad na makinabang sa pagliligtas na iyan bukas sa mga tawo hale sa gabos na nasyon kun sinda mahirong may kadonongan ngonyan. Inaaprobetsaran daw nindo an oportunidad na iyan?—Kapahayagan 7:9, 10.