Pagkaligtas Pasiring sa Bagong Daga
Kapitulo 13: Panahon nin Paglalang Liwat
1. (a) Anong makangangalas na oportunidad an natatagama sa mga makaliligtas pasiring sa “bagong daga”? (b) Ano an hahagadon kaiyan?
SARONG makangangalas na paglaom an makaligtas sa katapusan kan presenteng maraot na kinaban. Gustong-gusto na niatong makalda sa mga inhustisya, kapasloan asin kadahasan kan kinaban na ini. Alagad may saro pang bagay na ginigibong mas kawiliwili an pagkaligtas. Ano daw iyan? An bagay na an gabos na magigin kabtang kan “bagong daga” magkakaoportunidad man na makalda sa sainda mismong pagkabakong sangkap, sa helang asin buhay sa kakologan, iyo, pati sa kagadanan. (Kapahayagan 21:1-5) Alagad, tanganing ini mangyari an kasalan mismo dapat na biyong haleon. Paano daw iyan mahihimo? Iyan konektado sa isinabi ni Jesu-Cristo na “paglalang liwat.”
2. Ano an “paglalang liwat” na sinasabi sa Mateo 19:28?
2 Sa saiyang mga apostol, si Jesus nagsabi: “Sa paglalang liwat, kun an Aki nin tawo magtukaw na sa saiyang mamurawayon na trono, kamo na nagsurunod sako matukaw man kamo sa doseng trono, na maghohokom sa doseng tribo ni Israel.” (Mateo 19:28) An paglalang liwat magigin panahon nin “pagkamundag liwat,” panahon na “an gabos na bagay babagohon,” arog kan pagkasabi dian kan ibang traduksion kan Biblia. (The Emphasised Bible, ni Rotherham; The Jerusalem Bible) Paagi sa paglalang liwat na ini, magigin posible para sa mga tawo na kamtan liwat an pagkasangkap na yaon sa katawohan kan kapinonan.
3. (a) Ano an ibinunga kan kasalan ni Adan? (b) Taano ta mayo sa mga aki ni Adan an nakahimong kaldahon an sadiri sa mga epekto nin minanang kasalan?
3 Huli sa kasalan na minana ki Adan, an gabos niang aki kaipuhan na magadan, asin an dakol nagtios nin grabeng helang na nagdara sa kagadanan. (Roma 5:12) Dai mababakal nin kuwarta an pagkalibre sa kagadanan. Mayo nin mga gibo na kaya nin bakong sangkap na tawo an makakukua nin katalingkasan para sa saiya o sa iba. An banal na hustisya naghagad na tanganing kamtan liwat nin katawohan an oportunidad na magkamit nin buhay na daing sagkod, kaipuhan na idolot an sarong atang na kapantay sa halaga kan iwinara ni Adan, an sangkap na buhay nin tawo. Mayo sa mga aki ni Adan an igwa nin ikadodolot na siring na buhay.—Salmo 49:7-9; Eclesiastes 7:20.
4. (a) Paano itinao an kinakaipuhan na pantubos? (b) Paano kita puwedeng makinabang dian?
4 Huli sa pagkaherak, si Jehova mismo an naggibo kan kinakaipuhan na probisyon paagi sa pagsugo kan saiyang bugtong na Aki, si Jesus, sa daga bilang sangkap na tawo tanganing itao an saiyang buhay bilang “katimbang na pantubos.” (1 Timoteo 2:5, 6) Kanigoan kamakangangalas na kapahayagan nin dai na kutana maninigong kabootan asin pagkamoot nin Dios sa katawohan! An buhay na posible bilang resulta bakong bagay na puwede niatong makua na garo suweldo kundi sarong balaog hale sa Dios. Minsan siring, iyan itinatao sana sa mga tunay na nagmimidbid sa saindang pangangaipo sa banal na probisyon na ini, nagtutubod dian asin ipinaheheling an pagtubod na iyan paagi sa pagkuyog sa Aki nin Dios. (Roma 6:23; Juan 3:16, 36) Alagad noarin kakamtan nin katawohan an mga pakinabang sa atang na iyan?
Mga Pakinabang Ngonyan sa Atang ni Cristo
5. (a) Sairisay an enot na nakinabang sa atang ni Cristo? (b) Ano pang ibang grupo an nakinabang, asin partikularmente poon kasuarin?
5 An mga pakinabang nagpoon tolos na makaapektar sa buhay nin tawo pakatapos na ikapresentar ni Jesu-Cristo (sa katongdan na dakulang Halangkaw na Saserdote nin Dios) an halaga kan saiyang atang sa atubang nin Dios sa langit. Enot, poon kan Pentecostes nin 33 C.E., an mga pakinabang na ini nagpoon na makamtan kan mga, inapod na magin mga paramana kaiba ni Cristo, maglilingkod na hade asin saserdote kaiba nia sa langit. (Gibo 2:32, 33; Colosas 1:13, 14) Dangan, nangorogna kan 1935, an mga tawo na may paglaom sa buhay na daing sagkod sa daga nagpoon na mahayag. An saindang paglaom pinapangyari man kan atang ni Cristo. (1 Juan 2:1, 2) An progresibong pag-aplikar na ini kan halaga kan atang na iyan ipinaheling kan mga nangyayari sa Aldaw nin Pagtubos sa suanoy na Israel.
6. Isaysay sa halipot an nangyayari kun Aldaw nin Pagtubos.
6 An nangengenot sa seremonya sa banal na tabernakulo nin Israel, asin sa huri sa templo, iyo an sarong halangkaw na saserdote na kaiba sa Levitang harong ni Aaron. An ibang lalaki sa harong ni Aaron mga katabang na saserdote, asin an iba pang lalaki sa tribo ni Levi naglingkod na mga katabang. Tanganing matahoban an mga kasalan, an halangkaw na saserdote nag-aatang nin duwang hayop, na an dugo kan lambang saro iinaatubang nin magkasuhay sa Kabanalbanale, arog kan ipinagboot ni Jehova. Enot idinodolot an sarong ogbon na baka kan Aaronikong halangkaw na saserdote para sa “saiya man sana asin sa saiyang harong,” na kaiba an bilog na tribo ni Levi. (Levitico 16:11, 14) Sumunod an kanding na iinaatubang bilang dolot sa kasalan “para sa banwaan,” an iba pang doseng tribo. (Levitico 16:15) Dugang pa, an mga kasalan kan bilog na Israel itinutuga sa ibabaw kan payo nin sarong buhay na kanding, asin iyan dinadara sa kapatagan. (Levitico 16:21, 22) Ano an boot sabihon kan gabos na ini?
7. (a) Anong sarong atang an ipinanganino duman? (b) Taano ta bako sanang sarong atang na hayop an ginamit?
7 Ipinaliliwanag ni apostol Pablo na an kaotoban kaiyan nasisentro sa sarong atang ni Jesu-Cristo. “Si Cristo naglaog, bakong sa banal na lugar na ginibo nin mga kamot, na inarog sa tunay, kundi sa langit mismo, tanganing tumindog sa atubang nin Dios para sa sato . . . tanganing haleon an kasalan paagi sa pag-atang kan saiyang sadiri.” (Hebreo 9:24-26) Kun siring taano ta dugo nin bako sanang sarong hayop an dinadara sa Kabanalbanale sa Aldaw nin Pagtubos sa Israel? Ini tanganing darahon an atension sa laen-laen na kabtang kan nagigibo kan sangkap na atang na tawo ni Jesus. Asin saro pang kabtang an idinodoon kan pagtuga kan mga kasalan kan nasyon sa ibabaw kan payo nin sarong buhay na kanding dangan pagdara kaiyan sa kapatagan.
8. (a) Paano ipinarisa kan mga prosedimiento sa Aldaw nin Pagtubos kun siisay an enot na makikinabang sa atang ni Cristo? (b) Anong pag-aplikar kan atang ni Jesus an ipinarisa kan dolot sa kasalan “para sa banwaan”? (c) Ano pang dugang na bagay an ipinag-ilustrar kan pagdara sa kanding pasiring sa kapatagan?
8 Kun paanong an dugo kan baka na idinolot para sa harong ni Aaron enot na dinadara sa Kabanalbanale, siring man an mga pakinabang kan atang ni Jesus enot na iinaplikar sa mga makakaibanan ni Cristo sa langitnon na pagkasaserdote. Ini ginibo poon kan 33 C.E. padagos. Si Jesu-Cristo mayo nin kasalan na dapat na tubuson, kapareho kaidto ni Aaron, pero an mga magigin katabang na saserdote ni Cristo igwa. An mga ini ilinadawan kan tribo ni Levi. (1 Pedro 2:4, 5) An pag-atubang nin dugo hale sa ikaduwang atang, an kanding na dolot sa kasalan “para sa banwaan,” nagparisa na an iba sa katawohan makikinabang sa atang ni Jesus kasunod kan langitnon na grupo. An mga ini mga tawo na magkakamit nin buhay sa nakabalik na Paraiso sa daga. Sinda ipinagladawan kan “doseng [bakong saserdoteng] tribo ni Israel” kun Aldaw nin Pagtubos. (Mateo 19:28; Salmo 37:29) Bako sana na si Jesus nagadan para sa gabos na ini, kundi sa katotoohan saiyang dinadara parayo an mga kasalan kan mga para sa sainda sia nagadan bilang atang, na tinatawan sinda nin kaginhawahan. Ini ipinaririsa kan bagay na, ultimo, pakatapos na ikatuga an mga kasalan nin Israel sa ibabaw nin buhay na kanding, iyan dinadara sa kapatagan, na noarin man dai na maheheling.—Salmo 103:12; Isaias 53:4-6.
9. (a) Anong mga bendisyon an nakakamtan ngonyan kan mga nagtutubod sa atang ni Cristo? (b) Ano pang dugang na mga pakinabang an maabot sa huri?
9 Para sa gabos na nagtutubod sa mamomoton na probisyon ni Jehova paagi ki Cristo, an tunay na kapatawadan nin mga kasalan, malinig na kamugtakan sa atubangan nin Dios, posible na ngonyan ano man an saindang dating pamumuhay. Puwede nindang kamtan an daing kaagid na bendisyon na pagtao nin banal na paglilingkod sa Dios na may malinig na konsensia. (1 Corinto 6:9-11; Hebreo 9:13, 14) Alagad dai ini nangangahulogan na sa ngonyan sinda tinatawan nin buhay na libre sa gabos na epekto nin kasalan. (1 Juan 1:8-10; Roma 7:21-25) Para sa mga maghahade sa langit kaiba ni Cristo, an siring na buhay kakamtan sana kun natapos na ninda an saindang daganon na buhay asin binuhay na liwat sa inmortalidad sa kalangitan. Para sa iba sa katawohan, an lubos na pagkakalda sa kasalan papangyayarihon paagi sa paglalang liwat.
“Sa Paglalang Liwat”
10. (a) Kasuarin nagpoon an paglalang liwat? (b) Igwa na daw nin tinawan nin trono bilang kaotoban kan panuga ni Jesus?
10 Arog kan sabi ni Jesus, an paglalang liwat mangyayari “kun an Aki nin tawo [si Jesu-Cristo] magtukaw na sa saiyang mamurawayon na trono.” (Mateo 19:28) Siyempre, bakong gabos nangyari tolos kan sia tumukaw sa trono. Pagkatukaw ni Jesus sa trono kan 1914 C.E., enot lininigan nia an kalangitan, na pinahale si Satanas asin an saiyang mga demonyo. Dangan binuhay nia liwat an saiyang linahidan na mga parasunod pasiring sa langitnon na kamurawayan. (Kapahayagan 12:5, 7-12; 1 Tesalonica 4:15-17) An maimbod na mga apostol ni Cristo bako sanang tinawan kan “doseng trono” na ipinanuga sa sainda, kundi progresibo an gabos pang iba sa 144,000 pinatutukaw sa trono sa langit pagkabuhaya sa sainda liwat hale sa mga gadan.—Kapahayagan 3:21.
11. Sa anong paagi na an “ibang karnero” nakamamate na sa mga epekto kan paglalang liwat?
11 Mantang natatapos na an pagpili sa mga makompuwesto sa langitnon na grupo, an pagtipon sa dakulang kadaklan nin “ibang karnero” nagpoon, nangorogna poon kan 1935. An mga ini nagpoon na magkamit nin mga pakinabang sa atang ni Cristo, na ‘hinuhugasan an saindang mga gubing asin pinapuputi iyan sa dugo kan Kordero.’ Sinda tinatabangan na “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” (Kapahayagan 7:9, 10, 14; Efeso 4:20-24) Sa nagdadakol na kabilangan sinda nakikinabang sa mga probisyon nin Dios paagi ki Cristo na puwedeng magbunga kan saindang pagkabuhay sagkod lamang sa nakabalik na Paraiso.—Kapahayagan 7:17; 22:17.
12. (a) Siisay an ipinagrepresentar kan “doseng tribo ni Israel” na sinasabi digdi ni Jesus? (b) Sairisay pa apuwera sa mga makaliligtas an makikinabang sa paglalang liwat?
12 Dai na mahahaloy, an maraot na kinaban malalaglag. Ihoholog sa bungaw si Satanas asin an saiyang mga demonyo. Mapoon an milenyal na Aldaw nin Paghokom sa katawohan. Si Jesu-Cristo an Nangengenot na Hokom, asin sisiertohon nia na an gabos tawan nin lubos na oportunidad asin igong tabang tanganing manodan ninda an matanos na mga dalan ni Jehova asin makuyog iyan. An linahidan na mga parasunod ni Cristo na pinatunayan na sinda nagdadanay sa integridad sagkod sa kagadanan makakaibanan nia sa gibohon na iyan, na ‘naghohokom sa doseng tribo ni Israel.’ (Lucas 22:28-30; Kapahayagan 20:4, 6) Dai boot sabihon kaini na an hohokoman sana ninda iyo an gikan nin Israel sa laman. Imbes, hohokoman ninda an gabos na ipinanganino kan “doseng [bakong saserdoteng] tribo ni Israel” kan Aldaw nin Pagtubos. Kabale digdi an bilog na kinaban nin tinubos na katawohan. (1 Corinto 6:2) An mga nakaligtas sa dakulang kahorasaan iyo an enot na makikinabang sa programang ini sa pagpaomay sa katawohan. Alagad ta binilyon pa an makikikabtang, huli ta an mga hohokoman an ‘mga buhay asin mga gadan.’ (2 Timoteo 4:1; Gibo 24:15) Magigin nakaoogma nanggad kun an mga gadan na tinubos kan atang ni Cristo bumuwelta! Kanigoan an luha nin kagayagayahan kun nagkakaherilingan na giraray an mga nagkakaminootan!
13. Paano an mga epekto kan milenyal na Aldaw nin Paghokom tunay na magigin paglalang liwat?
13 Ini an panahon na an katawohan makakalda sa pisikal asin mental na mga diperensia na bunga nin kasalan. Kan nasa daga, sa panale pinaomayan ni Jesus an mga paralitiko, an mga buta o bongog o pula, asin an mga tawo na naraot an itsura o naubos na an kosog nin helang. An makangangalas na mga gibong idto panamit sana sa gigibohon niato para sa gabos na tawo sa saiyang Milenyal na Paghade. May marahay na dahelan, an siisay man na makaheling o makaeksperyensia sa makangangalas na patotoong iyan kan kabootan ni Jehova asin dangan magsikwal kan saiyang soberaniya lalaglagon sagkod lamang. Alagad paagi sa pag-adal sa matanos na mga dalan ni Jehova, an kaisipan asin motibasyon kan mga nagpapaheling nin odok na pagtubod asin pagkuyog luway-luway na maoswag sagkod na sinda makaabot sa lubos na pagkasangkap. An mga namomoot na iyan ki Jehova tunay na makakaagi nin pagkamundag liwat, paglalang liwat. Garo baga sinda tinawan nin bagong kapinonan sa buhay na may bagong ama, an Amang Daing Katapusan, si Jesu-Cristo.—Isaias 26:9; 9:6.
14. Anong mahalagang relasyon an magkakapribilehiyong kamtan kan gabos na makapasar sa ultimong pagbalo?
14 Dangan, pakapasar sa ultimong pagbalo sa katapusan kan sangribong taon, sinda aamponon ni Jehova Dios paagi ki Cristo bilang mga aki nin Dios, bilang kabtang kan saiyang sangkap na unibersal na pamilya. Nakapakokosog nanggad na paglaom ini—bako sanang para sa mga maliligtas sa dakulang kahorasaan kundi para man sa gabos na gadan na bubuhayon liwat tanganing makikabtang sa magayagayang buhay sa sarong Paraisong daga!—Roma 8:20, 21.