Pagkaligtas Pasiring sa Bagong Daga
Kapitulo 19: “Nabaretaan Niamo na an Dios Yaon Dian sa Saindo”
1, 2. (a) Ano an ihinuhula kan Zacarias 8:23 para sa satong kaaldawan? (b) Siisay an Dios na sinasabi digdi, asin paano idinodoon kan Biblia an saiyang personal na ngaran?
“MAIBA kami saindo, huli ta nabaretaan niamo na an Dios yaon dian sa saindo.” Iyan an ihinula kan Biblia na sasabihon nin mga tawo hale sa gabos na nasyon sa satong aldaw. (Zacarias 8:23) Asin siisay an Dios na ini na sinasabi kan hula sa Zacarias? Dai kita pinabayaan na magduda. Sa sadit na librong ini kan Biblia an saiyang personal na ngaran minalataw nin 135 beses. Iyan JEHOVA!
2 Sia mismo nagsabi manongod sa saiyang personal na ngaran na Jehova: “Ini an sakong ngaran sagkod sa panahon na daing katapusan, asin iyo ini an sakong girumdoman sa sunod-sunod na kapag-arakian.” (Exodo 3:15) An halaga kan ngaran na iyan ipinaririsa kan bagay na iyan minalataw nin haros 7,000 na beses sa bilog na teksto kan Hebreong Biblia—labi nanggad sa pinag-iribang total kan mga titulo na arog kan Kagurangnan asin Dios. Siring sa ihinula, sa “huring mga aldaw” na ini an ngaran na iyan iinaasosyar sa pambihirang paagi sa sarong grupo nin mga tawo.
“Maiba Kami Saindo”
3. Arog kan ihinula sa Zacarias 8:20-23, (a) siisay an maghahanap ki Jehova? (b) asin paagi sa pakikiasosyar kiisay?
3 Manongod digdi, si propeta Zacarias, kan panahon na itinotogdok liwat an templo ni Jehova sa suanoy na Jerusalem, pinasabngan nin Dios na sumurat: “Iyo ini an isinabi ni Jehova kan mga hukbo, ‘Mangyayari pa na madaratong an mga banwaan asin mga nag-eerok sa dakol na siudad; asin an mga nag-eerok sa sarong siudad maduruman sa mga nasa ibong, na nagsasarabi: “Paduman kita tanganing palumoyon an lalauogon ni Jehova asin tanganing hanapon si Jehova nin mga hukbo. Ako man maduman.” Asin dakol na banwaan asin makokosog na nasyon an madaratong tanganing hanapon si Jehova nin mga hukbo sa Jerusalem asin palumoyon an lalauogon ni Jehova.’ Iyo ini an isinabi ni Jehova nin mga hukbo, ‘Mangyayari sa mga aldaw na iyan na an sampulong tawo hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: “Maiba kami saindo, huli ta nabaretaan niamo na an Dios yaon dian sa saindo.”’”—Zacarias 8:20-23.
4. Taano an hulang ini ta dai minaaplikar sa Judaismo o sa Kakristianohan?
4 An limitadong kaotoban kan hulang ini mapadapit sa itinogdok liwat na templo sa Jerusalem, poon kan mga aldaw ni Zorobabel, nagtokdo sa mas dakulang kaotoban sa satong aldaw. Mapadapit sa anong banwaan? Tunay na bakong rasonable na an mga ‘naghahanap ki Jehova’ dumolok sa banwaan na superstisyosong nagsasayuma na isabi man lamang an ngaran nin Dios, arog kan mga Judio sa laman na nangangapot sa saindang tradisyonal na pagsamba. Ni sa Kakristianohan, na minaarog sa kaugalean na Judio sa paglikay na gamiton an banal na ngaran. Bakong sa daganon na Jerusalem na an mga tawo sa satong kaaldawan minadolok sa pagsamba ki Jehova. Arog kan ihinula ni Jesus, pinabayaan nin Dios an saiyang templo duman, asin idto linaglag kan 70 C.E., na noarin man dai na itinogdok giraray sagkod sa aldaw na ini. Ini nagpaparisa sa siisay man na rasonable na an Dios mayo na sa bakong Kristianong Israel.—Mateo 23:37, 38; ikomparar an 1 Hade 9:8, 9.
5. Paano ipinamimidbid kan Kasuratan (a) an “Jerusalem” na nagrerepresentar ki Jehova ngonyan? (b) an “sarong tawo na Judio” na manongod sa saiya si Zacarias naghula?
5 An “Jerusalem” na nagrerepresentar ngonyan ki Jehova inaapod sa Hebreo 12:22 na “siudad kan nabubuhay na Dios, an langitnon na Jerusalem.” Kun paanong an suanoy na Jerusalem naheheling na simbolo kan paghade ni Jehova, an “langitnon na Jerusalem” iyo an Mesiyanikong Kahadean nin Dios na dian si Jesu-Cristo pinatukaw sa trono bilang Hade kan matapos an Mga Panahon nin mga Hentil kan 1914. (1 Cronica 29:23; Lucas 21:24) An gobyernong iyan may mga representante digdi sa daga, an mga maimbod na nagbabalangibog kaiyan bilang an solamenteng seguradong paglaom nin katawohan. An enot na nagpaisi na an Kahadean tinindog kan 1914 iyo an natatada sa “sadangoton na aripompon.” An mga ini iyo an “Israel nin Dios,” sa espirituwal na pagtaram. Sinda an espirituwal na mga ‘Judio’ na ihinula ni Zacarias. (Lucas 12:32; Galacia 6:16; Roma 2:28, 29) Poon kan 1931, huli sa saindang pagkamoot sa Dios asin sa saindang pag-apresyar sa paninimbagan na ipahayag na si Jehova iyo an tunay asin Makakamhan sa gabos na Dios, inako ninda an ngaran na mga Saksi ni Jehova.—Isaias 43:10-12.
Kun Paano Mamimidbid?
6. (a) Ano an nakakombensir sa minilyon kun dapit sa kun arin an banwaan na nasa sainda an Dios ngonyan? (b) Arin na punto (o mga punto) an personal nindong hinangaan?
6 Bilang resulta kan bagay na an espirituwal na mga Judiong ini maimbod na inotob an saindang paninimbagan bilang mga Saksi ni Jehova, minilyon na sinserong mga tawo sa bilog na kinaban an natabangan na “hanapon si Jehova.” Narealisar ninda na si Jehova talagang nasa mga tawong ini na nagdadara kan saiyang ngaran. Ano an nakakokombensir sainda digdi? An dakol na bagay, na kabilang dian an mga ini an lataw:
(1) An pagtubod kan mga Saksi ni Jehova gabos basado sa Biblia—bako sanang sa piniling mga teksto kundi sa bilog na Tataramon nin Dios. Imbes na magtokdo nin gikan sa sadiri sana ninda, an mga Saksi ni Jehova nagsisimbag sa mga hapot paagi sa pagtokdo kan sinasabi kan Biblia. Iginagalang ninda si Jehova paagi sa pagpabaya na sia an magtaram. (Ikomparar an Juan 7:16-18.)
(2) Sinasabi kan Biblia na an Dios mismo makua sa mga nasyon nin “sarong banwaan para sa saiyang ngaran.” (Gibo 15:14) Sinda personal na mag-aapod sa saiyang ngaran asin maghihingoa na ipamidbid iyan sa bilog na daga. (Isaias 12:4, 5) Sa bilog na kinaban, an mga Saksi ni Jehova iyo an banwaan na midbid na asosyado sa personal na ngaran nin Dios, si Jehova.
(3) An mga Saksi ni Jehova abunda sa nakababasog na espirituwal na pagkakan. An nanonodan ninda sa Kasuratan asin an epekto kaini sa saindang punto-de-vista sa buhay ginigibo sindang maogmang banwaan, laen sa kinaban sa pankagabsan. Ini an isinabi ni Jehova na mangyayari sa saiyang mga lingkod. (Isaias 65:13, 14; ikomparar an Mateo 4:4.)
(4) Ginagamit nin mga Saksi ni Jehova an Tataramon nin Dios sa pagbugtak kan saindang pamantayan sa paggawe asin paggiya sa saindang mga desisyon sa pan-aroaldaw na gibo-gibo sa buhay—sa saindang pamilya, sa trabaho, sa eskuwelahan, sa pagpili nin aling-alingan, sa pagmidbid sa mga gibo na dapat isikwal, sa pagdeterminar sa pinakakapakipakinabang na gigibohon. Si Jehova nanuga na ‘itatanos nia an dana’ kan mga naggigibo kaini. (Talinhaga 3:5, 6)
(5) An pag-ataman sa mga kongregasyon nin mga Saksi ni Jehova iinarog sa kongregasyon nin Dios kan enot na siglo, na dian an kamagurangan arogan kan aripompon asin mga katabang para sa Kahadean nin Dios imbes na mas halangkaw na grupong klero. (1 Pedro 5:2, 3; 2 Corinto 1:24)
(6) An mga Saksi ni Jehova dai kalabot sa politikal na mga gibo-gibo kan kinaban kundi naggigibo kan gibohon na itinao kan Biblia sa tunay na mga Kristiano, arin na baga, an paghuhulit kan maogmang bareta kan Kahadean nin Dios sa bilog na kinaban para sa pagpatotoo bago dumatong an katapusan. (Mateo 24:14; ikomparar an Juan 17:16; 18:36.)
(7) An mga Saksi ni Jehova tunay na nagkakaminorootmootan, arog kan isinabi ni Jesus na gigibohon kan saiyang tunay na mga disipulo. An kolor nin kublit, pinaghalean na tribo, kamugtakan sa kuwarta, nasyonalidad, tataramon—mayo sa mga ini an nagigin causa na menuson nin saro an iba. Sa ibong nin mga pagkabakong sangkap nin tawo, sinda gabos tunay na sararo bilang internasyonal na kasararoan nin magturugang, asin ini gabos iinaatribuwir ninda sa Dios. (Juan 13:35; ikomparar an Gibo 10:34, 35.)
(8) Kapareho kan enot na mga Kristiano, an mga Saksi ni Jehova sa modernong mga panahon nagpapadagos na maglingkod sa Dios sa ibong nin paglamag. Nagsasarig sa Dios, sinda dai minabalos sa mga tumang. Arog kan nakaagi, an Dios nasa kaibanan kan saiyang mga lingkod tanganing iligtas sinda. (Jeremias 1:8; Isaias 54:17)
7. (a) Sairisay an “sampulong tawo”? (b) Paano sinda nagpapatotoo na si Jehova na man nanggad an saindang Dios?
7 Pira sana ini sa mga dahelan na, arog kan ihinula, “an sampulong tawo hale sa gabos na tataramon kan mga nasyon” nagsasabi na may tunay na kombiksion sa natatada sa mga paramana kan Kahadean: “Maiba kami saindo, huli ta nabaretaan niamo na an Dios yaon dian sa saindo.” (Zacarias 8:23) Ginagamit kan Kasuratan an “sampulo” na magrepresentar sa pagkakompleto kun dapit sa daganon na mga bagay, kaya an “sampulong tawong” ini nagrerepresentar sa gabos na minaako sa tunay na pagsamba ngonyan kaiba kan linahidan nin espiritung “mga tugang” ni Cristo. Sinda dai sana nakiaasosyar sa natatada sa saindang mga pagtiripon kundi ipinamimidbid an saindang sadiri na mga parasamba sa saindang Dios, si Jehova. Idinudusay ninda an saindang buhay sa saiya paagi ki Jesu-Cristo asin sinisimbolisaran ini paagi sa bautismo sa tubig, sa siring ipinaheheling na boot nindang ‘magin saro ki Jehova.’ Dangan sinda maogmang nakikakabtang sa gibohon na ginigibo sa bilog na daga kan saiyang mga saksi.—Zacarias 2:11; Isaias 61:5, 6.
Mga Halimbawa na Maninigong Arogon
8. (a) Ano an dahelan na an reyna sa Seba nagbiyahe pasiring sa Jerusalem? (b) Ano an ginibo nia pag-abot nia, asin may anong resulta? (c) Paano nagkaigwa nin mga tawo na kapareho nia sa satong kaaldawan? (Salmo 2:10-12)
8 An iba na minagibo kaini kapareho kan reyna sa Seba kan kaaldawan ni Salomon. Hale sa harayo “nadadangog [nia] an bareta manongod ki Salomon mapadapit sa ngaran ni Jehova.” Noarin man dai pa nia nakaolay nin personal si Salomon ni nakaduman man sia sa templo ni Jehova sa Jerusalem. May pagduda sia kun baga totoo gabos an nadangog nia. Pero guminibo sia kan paghihingoa na aramon iyan, na nagbiyahe nin tibaad 1,400 na milya (2,250 km) sa kamelyo tanganing magibo iyan. Nakua nia an simbag sa gabos niang “nakariribong na mga hapot” asin nagsabi: “Uya! Mayo pa sa kabanga an isinaysay sa sako.” Mayo siang maginibo kundi ikonklusyon na namomotan ni Jehova an saiyang mga parasamba. (1 Hade 10:1-9) An iba na prominente sa kinaban nag-arog sa saiyang halimbawa ngonyan, asin ginibo man iyan nin dakol na mas hababa an pinaghalean. Naheheling ninda an patotoo na an mga Saksi ni Jehova dai naglalaom sa tawo kundi ki Jesu-Cristo, an Orog na Dakulang Salomon, bilang saindang Hade. An simbag na itinatao sainda gikan sa Tataramon nin Dios nagpapanigo sa saindang isip asin puso, asin napahihiro sinda na iiba an saindang tingog sa pag-omaw ki Jehova.—Ikomparar an Lucas 11:31.
9. (a) Sa anong paagi na an iginawe ni Rahab napapalaen sa kan sa reyna sa Seba? (b) Ano an mahalagang magnohon manongod sa mga pangyayari na nagbunga kan pagkaligtas ni Rahab asin kan saiyang pamilya? (c) Ano an nagpapamidbid sa mga tawo na kapareho ni Rahab ngonyan?
9 An iba kapareho ni Rahab na taga-Jerico, na dati nang kombensido sa mga bareta na an Dios nin Israel “Dios sa kalangitan sa itaas asin sa daga sa ibaba.” (Josue 2:11) Kan an mga espiya hale sa Israel lumaog sa daga, inistimar nia sinda, itinago sinda asin isinapeligro an saiyang buhay tanganing protehiran sinda. May pagtubod sia asin pinatunayan iyan paagi sa saiyang mga gibo, na nanindogan sia kaiba kan banwaan ni Jehova. (Hebreo 11:31; Santiago 2:25) Maingat niang kinuyog an instruksion na itinao sa saiya para sa saiyang kaligtasan. Nagpaheling man si Rahab nin mamomoton na pagmakolog sa saiyang ama asin ina, sa saiyang mga tugang na lalaki asin babae, na binubukasan an dalan para sa sainda na maligtas kun kukuyogon ninda an mga kahagadan para sa kaligtasan. (Josue 2:12, 13, 18, 19) Bilang resulta sia asin an saiyang pamilya naligtas kan pohoon an Jerico asin an mga tagaduman na mga nagsasamba ki Baal. (Josue 6:22, 23) Ini may mapuwersang kahulogan para sa satong aldaw. Ipinaheheling kaiyan na ililigtas ni Jehova an mga tawong kapareho ni Rahab. Ano an nagpapaheling na sinda kapareho nia? Sinda minatubod ki Jehova, ipinamimidbid an sadiri kaiba kan mga miembro nin espirituwal na Israel, maingat na kinukuyog an mga pagboot na itinao paagi sa instrumentong ini asin odok na naghihingoa na tabangan an mga kaiba sa pamilya asin iba pang paryentes na masabotan an kadonongan nin paggibo kaiyan.
10. (a) Arog kan ipinaheheling kan hula ni Zacarias, ano an talagang nakadadagka sa mga tawo kaya sinda nakiaasosyar sa mga Saksi ni Jehova? (b) Paano niato ikapaheheling, sa kaisipan asin sa mga gibo, na an pagkamoot ki Jehova tunay na iyo an nakapapano sa satong puso?
10 Siyempre, an mayor na nakaaakit, an nakadadagka sa mga tawo hale sa gabos na nasyon na makiasosyar sa mga Saksi ni Jehova, iyo si Jehova Dios mismo. Nagugustohan ninda an saiyang Tataramon. Nadadagka sinda kan mga bunga kan saiyang espiritu sa buhay kan saiyang mga lingkod. Mantang namimidbid na gayo ninda an saiyang mga kuwalidad asin an saiyang mga ginigibo sa katawohan, minamawot ninda an panahon na an ngaran nin Dios mabibindikar sa gabos na paglanghad na itinambak dian ni Satanas asin nin daing pagtubod na mga tawo. Sinda mismo naghihingoa na gumawe sa paagi na makapaoogma sa saindang Kaglalang asin mapahiro sa iba na omawon sia. (1 Pedro 2:12) Sa bilog nindang puso sinda namimibi, arog kan itinokdo ni Jesus sa saiyang mga disipulo: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) Asin kaoyon sa saindang pamibi, sinda nagtatao nin banal na paglilingkod sa Dios na lubos na kasaro kan mga nagtatao nin dai mamamaluan na ebidensia na sinda iyo an “banwaan para sa ngaran [ni Jehova].”