Pagkaligtas Pasiring sa Bagong Daga
Kapitulo 24: An Pagbilang Harani Na sa Talaan na Panahon!
1. Sono sa bantog na mga sientista, gurano na karani an “pagkatunaw kan kinaban”?
KAIDTONG 1947, an mga sientista guminibo nin “relo sa pagkatunaw kan kinaban.” Iyan nasa tutub kan The Bulletin of the Atomic Scientists asin ginagamit tanganing ipaheling kun gurano na karani sa paghona ninda an kinaban sa nuklear na pagkatunaw. Paorootrong hiniro an kamot kan “relong” iyan—kun beses paabante, kun beses pasibog, depende sa kun gurano kapeligroso kan internasyonal na situwasyon. Sa kapinonan nin 1984 an mga kamot kaiyan iinabante sa tolong minuto bago an alas dose nin banggi. Kun iyan umabot sa alas dose, iyan mangangahulogan na nagpoon na an kinatatakotan na guerra nuklear.
2. Kasuarin pinonan ni Jehova an saiyang pagbilang, asin ano an magigin kahulogan kan itinalaan na oras kaiyan?
2 Alagad mga 6,000 na taon na poon kan ponan ni Jehova Dios an pagbilang na daing nakaoolang na nag-aabante, noarin man dai minasibog. Sa pagbilang na iyan an talaan na oras iyo an panahon na itinalaan nin Dios para sa pagbindikar sa saiyang soberaniya, na dian depende an katoninongan asin karahayan kan bilog na uniberso. Hayag niang isinabi an saiyang katuyohan asin nagtao sia nin mga tanda sa panahon na nagpapangyari sato na marisa an pag-abante kaiyan. Pakatapos tolos kan pagrebelde sa Eden, si Jehova nanuga na paluluwason nia sa saiyang “babae,” an saiyang organisasyon nin maimbod na mga espiritung linalang, an sarong “banhi” na malugad ki Satanas, “an gurang na halas,” sa payo asin sa katapustapusi roronoton sia sagkod lamang. (Genesis 3:15; Kapahayagan 12:9; Roma 16:20) Kanigoan an paghalat kan mga namomoot sa katanosan sa panahon na iyan!
3. (a) Ano an nagpapaheling na maingat na nakaiskedyul an pagdatong kan Mesiyas? (b) Ibinugtak kaidto an basihan para sa ano?
3 Sa itinalaan na panahon nin Dios, na ihinula haloy pa bago mangyari, an ipinanugang “banhi,” an Mesiyas, an Aki mismo nin Dios, naglataw sa daga. Bilang nag-aaningal na simbag sa pangahas na angat ni Satanas, pinapagdanay ni Jesus an sangkap na diosnon na debosyon sagkod sa kagadanan. Asin paagi sa saiyang kagadanan bilang tawong daing kasalan itinao man nia an paagi na mabalukat an mga aki ni Adan sa kasalan asin kagadanan. Kaya ikinabugtak an basihan sa ‘paglaglag sa mga gibo kan Diablo’ sa katapustapusi.—1 Juan 3:8; Daniel 9:25; Galacia 4:4, 5.
4. (a) Anong grupo an pinonan na tiponon ni Jesus kan sia nasa daga pa? (b) Kaoyon sa iskedyul nin Dios, kasuarin nagpoon na magsakop bilang Hade si Cristo? (c) Ano an saro sa enot niang ginibo?
4 Kan si Jesus nasa daga pa, pinonan niang tiponon an mga lalaki asin babae na magigin kairiba niang paramana sa saiyang langitnon na Kahadean. 144,000 sanang pinili, nabalo asin maimbod an iiiba. Kan umabot an panahon para sa pagtipon sa huring mga miembro kan grupong ini, “an paghade asin kamahalan patin kahadean” itinao ki Jesus sa langit. (Daniel 7:13, 14) Tama sa iskedyul, kan 1914, sia naghiro bilang natutukaw nang Hade. Si Satanas asin an saiyang mga demonyo ihinolog tolos hale sa langit, akto na naglinig sa kabesera kan gobyerno. (Kapahayagan 12:7-12) An presenteng palakaw kan kinaban naglaog na sa huring mga aldaw kaiyan.
5. Siisay an mabubuhay tanganing maheling an pagkabindikar kan soberaniya ni Jehova?
5 An pagbilang na mga anom na milenyo na an lawig ngonyan harani na sa talaan na oras. Iyan haranihon na kaya an mga tawo na buhay na kan 1914, asin ngonyan gurang na, dai gabos mawawara bago mangyari an nakaoogmang mga pangyayari na matanda sa pagkabindikar kan soberaniya ni Jehova.—Marcos 13:30.
6, 7. (a) Anong mga katunayan manongod sa “dakulang kadaklan” an nagpaparisa na seguradong haranihon na an dakulang kahorasaan? (b) Taano ta tinatanaw ninda an ngapit na may dakulang pag-antisipar?
6 Magkakaigwa man nin ibang maimbod na mga lingkod nin Dios na makaheheling sa mga mangyayari sa dakulang aldaw na iyan. Nangorogna poon kan 1935, kan malinaw na masabotan kun siisay an “dakulang kaburonyogan,” o “dakulang kadaklan,” an dakol sa mga ini nagpoon na lumataw. Sa primero ginatos, dangan rinibo, kan huri ginatos na ribo, asin ngonyan minilyon na an lakop sa bilog na kinaban. An dai masasalang Tataramon nin Dios ilinaladawan an grupong ini na ‘nagluwas sa dakulang kahorasaan,’ na nakaligtas dian, nagdadanay na buhay pasiring sa Bagong Areglo nin Dios na dai na noarin man kaipuhan na magadan. (Kapahayagan 7:9, 10, 14; Juan 11:26) An enot na mga miembro sa grupong ini ngonyan nag-eedad na nin 60 o 70 o mas gurang pa. Bakong sobra kaamay an pagtogot ni Jehova na an pagtipon sa grupong ini magpoon. An “dakulang kadaklan,” kaiba an dakol sa pinakaenot na mga miembro kaiyan, makaliligtas pasiring sa “bagong daga.”
7 An paglaom kan “dakulang kadaklan” dai maoolang nin ano man na nuklear na pagkatunaw na malaglag sa bilog na katawohan. May marahay na dahelan na sinda optimistiko asin mapuso. Mantang nangyayari an mga pangyayari sa “huring mga aldaw,” iyan pinagmamasdan ninda na may dakulang pag-antisipar, na iinaaplikar sa sainda man sana an hatol ni Jesus: “Tindog kamo nin tanos asin tingagan an saindong mga payo, huli ta an saindong kaligtasan naghaharani na.” (Lucas 21:28) Pero sa natatada pang panahon bago an kaligtasan na iyan, may mangyayari pang mga nakatatanyog sa kinaban.
Mga Pangyayaring Maabot Pa
8. (a) Anong makahulogan na gayong pangyayari na ihinula sa 1 Tesalonica 5:3 an maabot pa? (b) Kaidtong dakol nang taon an nakaagi, paano inandam an entablado para kaini? (c) Sa nakaaagi pa sanang mga taon, ano an ginibong dakulang pamimirit na maseguro an katoninongan sa kinaban?
8 Sa pagtokdo sa saro kaini, si apostol Pablo nagsurat: “Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda siring sa kolog kan bados na babae; asin dai sinda makaliligtas minsan sa anong paagi.” (1 Tesalonica 5:3) Dai pa niato aram kun paano an kapahayagan na iyan. Alagad mahalagang mangnohon na inandam na an entablado dai mahaloy paglaog kan kinaban sa “huring mga aldaw.” Kan 1919 an katuyohan kan Liga de Naciones isinabing an pagkaigwa nin “katoninongan asin katiwasayan.” Pakalihis kan Guerra Mundial II, an Carta kan Naciones Unidas sa giraray ibinugtak an “katoninongan asin katiwasayan” bilang pangenot na pasohan kan internasyonal na organisasyon na iyan. Dai kaiyan naotob an katuyohan na iyan. Minsan siring, sa nakaaagi pa sanang mga taon an mga tawo hale sa gabos na klase nin pamumuhay nakiiba sa darakulang demonstrasyon sa publiko sa dakol na kadagaan, na sinasadol an mga namomoon sa kinaban na ipondo an gabos na paggibo, pagprobar asin pagkolokar nin mga armas nuklear. Gusto nindang maseguro an katoninongan sa kinaban asin natatakot sa pinaghohona nindang ibang mangyayari.
9. Taano ta maabot an biglang pagkalaglag sa mga nagsusuportar sa ihinulang kapahayagan na iyan nin “Katoninongan asin katiwasayan”?
9 Baga man bilang resulta kaini o nin iba pang enot na tangga, an mga namomoon na tawo madali nang gumibo nin makosogon na kapahayagan nin “Katoninongan asin katiwasayan!” Iyan sa ibabaw sana. Pero an mga nagsusuportar dian masarabi na naabot ninda an saindang pasohan sa sadiri nindang mga paagi, na dai kaipuhan an Kahadean nin Dios. Huli sa pagsikwal na ini sa soberaniya ni Jehova, “an biglang pagkalaglag madaling maabot sainda.”
10. Paanong nagpopoon na an kamugtakan para sa paglaglag sa Dakulang Babilonya?
10 Marikas an magigin dalagan nin mga pangyayari. An Dakulang Babilonya, an pankinaban na imperyo nin falsong relihiyon, gagabaon kan saiyang dating politikal na mga sambay. Ngonyan pa, an mga namomoon nakarisa nanggad na an relihiyon sarong nagpaparibok na puwersa na nagprobokar nin pagkaongis, pagpabolos nin dugo asin guerra sa bilog na kinaban. An mga politiko nauuyam nang pagparapiriton kan klero. Sa dakol na parte kan kinaban, kuminadikit na gayo an mga nag-aatender sa mga lugar nin pagsamba. An ateistikong punto-de-vista, baga man hayag o patago, iyo an nagdidikta sa opinyon kan publiko. Siring man, an dakol na nasyon na miembro kan Naciones Unidas igwa nin makosog na mga palakaw na kontra sa relihiyon. Kun dumatong an itinalaan na oras ni Jehova para sa paghohokom, totogotan nia an politikal na mga namomoon, sa lakop na internasyonal na paghiro, na birikon an Dakulang Babilonya asin lubos siang laglagon.—Kapahayagan 17:15, 16; 19:1, 2.
11. (a) Siisay an sunod na bibirikon kan mga nasyon? (b) Sa ano pang mga pangyayari iyan magiya?
11 Burat sa kapangganahan na iyan asin sinusutsutan kan saindang dai naheheling na poon, si Satanas na Diablo, sasalakayon kan mga nasyon an maimbod na mga saksi ni Jehova sa daga. (Ezequiel 38:14-16) An bagay na an mga ini matoninong, makinuyog sa ley na dai nakilalabot sa politika o mayo nin paninimbagan sa guerra dai kokonsideraron. An mga nasyon mahagad nin biyong pagsuportar, pagsamba sa politikal na palakaw. Pero kun sinda humiro na tanganing ronoton an naheheling na organisasyon ni Jehova, an Dios mahiro nin desidido para sa saiyang maimbod na mga lingkod, na iliniligtas sinda. An mga hukbo sa langit biyong paparaon an kahurihurihing tada kan naheheling na organisasyon ni Satanas, na linalaglag an gabos na nangangapot dian. Dangan, an pangenot na kaiwal, si Satanas na Diablo mismo, dadakopon asin biyong papopondohon sa laog nin sangribong taon, na sa panahon na iyan an gabos na epekto kan saiyang marigsok na impluwensia biyong hahaleon asin an daga gigibohon na Paraiso. Pakalihis kaiyan, si Satanas bubutasan sa halipot na panahon, tanganing baloon an naomayan nang katawohan. An gabos na tawo na pilion na sumunod sa saiya paparaon, kaiba ni Satanas asin kan saiyang mga demonyo.—Kapahayagan 19:19-21; 20:1-3, 7-10.
Palalaogon sa Magayonon na “Bagong Daga”
12. (a) Kiisay iaatribuwir kan “dakulang kadaklan” an saindang kaligtasan? (b) Siisay an maiba sa sainda sa pag-omaw sa Dios?
12 Mantang natapos na an makatatakot na mga pangyayari sa katapusan kan presenteng kinaban asin nasa atubangan ninda an Milenyal na Paghade ni Cristo, an mapalad na mga nakaligtas sa daga mapapano nin labi-labing pagtanaw nin utang na boot mantang ilinalangkaw ninda an saindang tingog sa pagpasalamat sa Dios. May odok sa pusong pagmate an “dakulang kadaklan” makurahaw sa makosog na tingog: “Utang niato an kaligtasan sa satong Dios [si Jehova], na nagtutukaw sa trono, asin sa Kordero [si Jesu-Cristo].” Asin an bilog na maimbod na langitnon na organisasyon nin Dios, na napahiro nin pag-apresyar sa dakulang kahulogan kan mga pangyayaring ini, maiba sa sainda sa pagsamba, na sinasabi: “An kaomawan asin an kamurawayan asin an kadonongan asin an pagpasalamat asin an dangog asin an kapangyarihan patin an kakosogan mapasa satong Dios sagkod lamang. Amen.”—Kapahayagan 7:10-12.
13. Paano ilinaladawan kan Biblia an probisyon na ginibo sa pagbuhay asin pagpaomay sa katawohan?
13 An bilog na katawohan sa katapustapusi makompuwesto nin sararong sosyedad nin tawo na nag-oomaw sa tunay na Dios, nin “bagong daga” na sakop kan “bagong langit” na nagpapahayag kan mamomoton na soberaniya ni Jehova. Ginagamit an magayonon na mga simbolismo, ilinaladawan kan ultimong libro sa Biblia an makangangalas na mga pakinabang na mabolos sa katawohan sa panahon na iyan bilang “salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero” pasiring sa tahaw kan lansangan kan langitnon na Bagong Jerusalem. Sa pangpang kan salog na ini may mga “kahoy nin buhay” na namumunga tanganing bumuhay sa mga nagkakakan kaiyan asin may mga dahon para sa pagpaomay sa mga nasyon. Irinirepresentar digdi an bilog na probisyon na ginibo nin Dios para sa pagpaomay asin pagbuhay sa mga nagtutubod, makinuyog na katawohan asin pagpangyari sainda na magkamit nin buhay na daing sagkod paagi ki Jesu-Cristo.—Kapahayagan 21:1, 2; 22:1, 2.
14. Sa anong mga paagi na an mga kamugtakan sa “bagong daga” magigin laen sa mga nasa kinaban ngonyan?
14 An mga kamugtakan digdi sa daga sa panahon na iyan magigin laen nanggad sa ano man na nagibo kan daan na kinaban. Paagi sa pag-aplikar kan mga pakinabang kan atang ni Cristo asin sa pag-adal kan kabotan nin Dios, an mga makinuyog, kaiba an mga bubuhayon hale sa mga gadan, kakaldahon sa gabos na gira nin kasalan asin tatabangan na umoswag sa pisikal, mental, emosyonal asin espirituwal sagkod na makaabot sinda sa pagkasangkap. Imbes na magbunga kan nakababangang “mga gibo kan laman,” an gabos makakanood na abundang magbunga nin diosnon na mga bungang pagkamoot, kagayagayahan, katoninongan, pakatios, kabootan, karahayan, pagtubod, kahoyoan asin pagpopogol sa sadiri. (Galacia 5:19-23) Mantang siring na espiritu an lakop, an bunga kan daga gagamiton tanganing itao nin abunda an mga pangangaipo kan bilog na katawohan. An buhay magkakaigwa nin mas mayaman na kahulogan kisa kasuarin pa man mantang an katawohan nagtatarabang na maotob an orihinal na katuyohan kan Kaglalang para sa dagang ini asin sa mga nag-eerok dian.
15. (a) Anong nakaaagyat na pag-agda an itinatao na ngonyan sa katawohan? (b) Kaya, ano an maninigong gibohon kan lambang saro sato?
15 Sa magayagayang pag-antisipar kan gabos na ini, an espiritu nin Dios asin an nobya ni Cristo nagtatao ngonyan nin odok na pag-agda sa mga tawo sa gabos na lugar, na an sabi: “‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Kun siring, bako ining panahon na maghalat na sana sagkod na an pagbilang pasiring sa dakulang aldaw ni Jehova umabot sa itinalaan na oras kaiyan sa dakulang kahorasaan. Mantang inako na an maboot na pag-agda na “kumua kan tubig nin buhay na daing bayad,” may pribilehiyo na kamo ngonyan na itao an pag-agdang iyan sa iba. Iyan panahon nin maigot na aktibidad kan gabos na an dakulang kamawotan makaligtas pasiring sa magayonon na “bagong daga” nin Dios.