Maninigo daw Akong Magbalyo sa Ibang Relihiyon?

BAGO pa sanang lumupad an piloto sa Naha, Airport sa Okinawa na may sakay na 101 pasahero. Sa panale may naheling siang tolong eroplanong paramasid sa panahon na pasabat sa saiya. Sa listong paghiro, an piloto suminuki pawala, sa siring nalikayan an pagbanggaan sa itaas, na ikinaligtas an buhay nia asin an buhay kan saiyang mga pasahero. An baretang iyan nin haros dai pakalawos, na ibinareta sa sarong peryodiko sa parteng amihanan nin Hapon, nag-iilustrar na tanganing ikaliligtas an buhay an listong pagbalyo nin dalan kun beses kaipuhan.

Alagad, dakol an naghohona na an pagbalyo sa ibang relihiyon ibang bagay. Napapalabot an makokosog na pagkatakot. Yaon an takot sa paglakaw sa dalan na dai aram. Si Mrs. Tachi, na nakipag-adal kan Biblia sa mga Saksi ni Jehova, arog kaini an pagkasabi: “An dakol kong midbid may mga pagduda manongod sa relihiyon asin sa pagdodoon kaiyan sa kuwarta. Alagad ta dai kaming ibang namidbid asin naheling poon sa pagkaniaki kundi relihiyosong mga kapiyestahan asin kostumbre. Dai ming gayo , iniisip an espirituwal na kahulogan kan hoji [an paminsanminsan na Budhistang seremonya sa paggirumdom sa nagadan]. Mas iniisip mi an hoji bilang maogmang panahon na makaibanan an mga paryentes asin pagtaraed! An pag-isip na talikdan iyan gabos, o mas grabe pa, isikwal kan pamilya ikinatakot ko. An saboot na ini manongod sa relihiyon tibaad namamatean man nin mga tawo sa saindong lugar.

Igwa man nin iba pang kinatatakotan. Sa dakol na lugar, an mga tawo natatakot na padudusahan sinda nin Dios kun sinda magbalyo sa ibang relihiyon. An sarong babae na nagpoon na mag-adal kan Biblia sa Hapon sinabihan kan saiyang mga paryentes na sia nagkakaproblema sa salud asin sa pamilya huli ta “napabayaan nia an saiyang mga apoon” asin sia ikinaaanggot ninda huli sa pag-adal sa “ibang relihiyon.”

An saro pang pagkatakot na nakapopogol sa mga tawo na magbalyo sa ibang relihiyon iyo an pagkatakot na ikaanggot nin agom o mga magurang. Sa dakol na nasyon sa Sirangan, na an kaimbodan sa mga magurang asin pamilya ibinibilang na espesyalmenteng mahalaga, an bagong maagom na babae sa kadaklan linalaoman na suportaran an relihiyon kan pamilya kan nakaagom sa saiya. Dawa kun an mag-agom bako man na relihiyoso, an pagpapadanay asin sa marahay na relasyon sa pamilya asin sa presenteng relihiyosong kamugtakan ibinibilang na napakahalaga nanggad. An sarong hoben na mag-agom nagpondo sa pag-adal ninda kan Biblia pakatapos na umagi sa grabeng pangigipit sa sarong “komperensia kan pamilya.” “Sa pundamental, nagkaigwa kami nin takot sa tawo,” an paliwanag kan lalaki, na kan huri nagpadagos sa pag-adal. “An saboot mi maninigo ming kuyogon an kabotan kan samong mga magurang, asin habo ming kologan sinda paagi sa pagbalyo sa ibang relihiyon.

Ini nagpapagirumdom kan saro pang dahelan kun taano an dakol ta natatakot na magbalyo sa ibang relihiyon: an hinahaboan nin gabos na ibilang na palaen. Sa pamilyang nasambitan sa enotan, an sarong dahelan na itinao kan mga magurang na an hoben na mag-agom pumondo sa saindang pag-adal kan Biblia iyo na habo nindang an saindang mga aki ibilang na palaen o rayoan sa mga aktibidad kan komunidad.

Kaya napapalabot an makokosog na pagkatakot sa hapot na, Maninigo daw akong magbalyo sa ibang relihiyon? Bilang resulta, an dakol nagkakaigwa nin pilosopikong punto-de-vista. Bako man talagang importante kun ano an relihiyon nin saro, bako daw? Bako daw na an gabos na relihiyon magkakalaen sanang dalan patukad sa iyo man sanang bukid?’ Pag-abot sa relihiyon, sinda kapareho kan tolong kabalang sa talinhaga, daing naheheling na maraot, daing nadadangog na maraot, daing sinasabing maraot.

Alagad an iba nagbalyo nanggad sa ibang relihiyon. Taano? Para sa nagkapira sa mga ini, idto pag-ayon sana sa ibang relihiyon na nanuga nin mga pakinabang sa salud o pinansial, mantang pinapagdadanay man an saindang tradisyonal na mga relihiyosong ideya asin gawe. Alagad para sa iba, nagkaigwa nin tunay asin lubos na pagliliwat. Alagad tibaad iniisip nindo, ‘Talaga daw na igwa nin supisyenteng mga dahelan na ako magbalyo sa ibang relihiyon? Taano an iba ta nagustong magbalyo? Puwede daw na magkaigwa nin tunay na epekto sa sakong buhay an pagbalyo?’ Inaagda mi kamo na siyasaton an minasunod na artikulo para sa simbag.

[Ritrato sa pahina 3]

Ano an nagmomotibar sa tawo na mangapot sa saindang tradisyonal na relihiyosong mga kostumbre?