Kun Taano an Iba ta Nagbalyo sa Ibang Relihiyon

TANGANING an saro gumibo nin madahas na paghiro na siring sa pagbalyo sa ibang relihiyon, tunay na seguradong igwa sia nin marahay na mga dahelan. An mga pakinabang kaipuhan na mas magabat kisa mga disbentaha.

Sa paghona daw nindo marahay na dahelan an pakamidbid sa saindong Kaglalang asin pakakultibar nin relasyon sa saiya? Para sa dakol iyo. Tanganing makultibar an relasyon sa saro, kaipuhan na mamidbid na gayo niato sia. Halimbawa, an sarong aki tibaad matakot na kaptan an kamot nin sarong estranghero, sagkod na sia mamidbid na nia. Siring man kita, kaipuhan na mamidbid na gayo niato an Dios bago kita makasarig sa saiya. Totoo, an kadaklan na relihiyon igwa nin sentral na persona na sinasamba ninda bilang Dios. Alagad bako daw totoo man na para sa kadaklan an Dios malibog asin harayo na mayo nin klarong personalidad? Kaya paano niato sia mamimidbid?

Kun kita nangangalagkalag sa mga bagay sa palibot niato, minahanga kita sa sarong naheheling. Naririsa niato an kagayonan, intelihensia, asin kapangyarihan. An ginikanan kaini gabos nakariribong sa dakol, alagad igwa nin libro na malinaw na nagpapaliwanag kaiyan. Iyan an Biblia. Sa mga pahina kaiyan, nanonodan niato na an mga ngangalasan na ini gikan sa Kaglalang na may ngaran asin personalidad. Sa maingat na pag-adal niato sa Biblia, an personalidad nin Dios nagigin klaro nanggad para sa sato. Naheheling niato sia bilang Dios nin pagkamoot asin pangataman. “An Dios pagkamoot,” sabi kan Biblia. (1 Juan 4:8) Napaparani kita sa makangangalas na personalidad na ini, na sangkap an pagkatimbang sa pagkamoot, kadonongan, hustisya, asin kapangyarihan. Minasunod an dayupot na relasyon.

Naeksperyensiahan ni Misae an makarani ki Jehova. Sia nagpaliwanag: ‘Kan aki pa ako, tinokdoan ako na dakol an dios. May dios para sa tubig, dios para sa mga kahoy, asin dios para sa harong. Minsan ngani duda ako sa pag-eksister ninda, talagang natutubod ako na igwa nin sarong tunay na Dios. Huli sa estriktong pagpadakula sako bilang Budhista-Shinto an pagheling ko sa Dios saro na makatatakot, saro na nagpapadusa sa mga salang gibo. Minsan ngani minawot ko na paduman sa sarong simbahan asin aramon an manongod sa Kristianong Dios, pinogolan ako kan sakong pagigin Budhista. Dangan may sarong babae na nagduman sa harong asin inopresiran ako na makipag-adal sa sako sa Biblia. Paagi sa pag-adal na iyan, nanodan ko na an Dios may ngaran, si Jehova. Ikinaogma ko nin labi-labi na maaraman na sia bakong makatatakot na Dios kundi mamomoton, na permi kitang binabantayan, bakong sa pagpadusa, kundi sa pagtabang. Boot kong maglingkod sa Dios na iyan, kaya nagbalyo ako nin relihiyon!’ 29 anyos na siang may nakakokontentong relasyon sa Dios.

Relasyon na Nagtatao nin Katalingkasan Asin Paglaom

May iba pang pakinabang na inako an dakol huli sa pagkultibar nin relasyon sa Dios. Mantang an ibang relasyon naiinaan nin halaga sa saindang buhay, an dakol nagkamit nin katalingkasan sa nakaooripon na takot sa tawo asin nakapagagabat na kostumbre na mayo nin tunay na kahulogan asin halaga. Kaya, nakatalingkas sinda sa magabat na mga gastos sa pagpapadanay sa mga pinagkatodan asin tradisyon, na huli kaiyan dai nawawaran nin utang an dakol na pamilya. “An pagtakig sa tawo sarong siod,” an patanid kan Biblia, na idinugang an garantiya, “An nananarig ki Jehova iingatan.”—Talinhaga 29:25.

An saro pang katalingkasan na makakamtan iyo an katalingkasan sa pagkatakot sa kagadanan. An kinotar sa itaas na si Misae nagsasabi: “Kan 22 anyos ako natipus ako. Mantang ako naghihigda na paling, nadadangog ko an mga katood asin an sakong pamilya na pinag-oolayan ako na garo hinahalat ninda na ako magadan. Alagad ta takot akong magadan. An solamenteng naiisip ko iyo na gusto kong mabuhay, asin marahay sana ta narahayan ako. Paagi sa pag-adal ko sa Biblia, nakatalingkas ako sa pagkatakot na iyan sa kagadanan. Nanodan ko na an kagadanan nangangahulogan sana nin dai pag-eksister.” An Biblia nagsasabi: “Kun dapit sa mga gadan, mayo man lamang sinda nin pakaaram.” (Eclesiastes 9:5, 10) Kun may magadan, yaon an makangangalas na paglaom sa pagkabuhay liwat huli ta an mga gadan pinapagdadanay nin Dios na buhay sa saiyang paggirumdom.—Juan 5:28, 29.

An dakol pang iba na nag-aadal sa Biblia nadiskobre man na an saindang mga nanodan nagtao nin tunay na kahulogan asin paglaom sa saindang buhay. Ini sarong dahelan na isinurat an Biblia, arin na baga, tanganing “magkaigwa kita nin paglaom.” (Roma 15:4) An Budhismo daing itinotokdo manongod sa Kaglalang o Dios. Sinasabi na an karatan asin pagsakit yaon na poon pa sa kapinonan asin magpapadagos sagkod lamang paagi sa daing sagkod na mga siklo nin pagkamundag liwat. An kadaklan na relihiyon sa Solnopan nagtotokdo na an mga marahay maduman sa langit, sarong lugar na bakong depinido, alagad kun baga ano an gigibohon ninda duman, dai ninda segurado. Kabaliktaran sa relihiyosong mga pilosopiyang ini na kakadikit kan itinataong paglaom o kahulogan sa saindang buhay, itinotokdo kan Biblia na an tawo ginibo tanganing maogmang mabuhay sagkod lamang sa daga bilang paraataman dian. (Genesis 2:15-17; Isaias 45:18) Kaya tibaad paagi kaiyan marealisar niato na an buhay maninigong gamiton bako sanang sa pagtipon nin mga rogaring asin pagpanigo sa sadiri kundi sa paglilingkod sa Dios asin sa iba pa sa paaging bakong paslo.—Eclesiastes 12:13; Mateo 22:37-39.

Pagkakamit kan katotoohan Asin Tunay na mga Katood

An iba napahihirong magbalyo sa ibang relihiyon huli sa ibang dahelan. Kabilang dian an kamawotan na hanapon an relihiyosong katotoohan. Siyempre, dakol an naghohona na mayo nin absolutong katotoohan, asin arog kan sabi kan Biblia, sinda ’dai naghahanap.’—Salmo 10:4.

Alagad igwa nin mga talagang naghahanap. Si Sakae, na tagaduman sa parteng sentral nin Hapon, nagpabarobalyo sa mga sektang Budhista sa laog nin 25 taon sa paghanap kan katotoohan. Dai sia noarin man manigoan. Sa pag-asenso nia sa responsableng mga katongdan sa lambang organisasyon, permi siang may naheheling na ikinasisingkog nia, arog baga kan komersialismo, inmoralidad, asin pag-aprobetsar. Nagduman pa ngani sia sa India sa paghanap sa gamot nin Budhismo sa makasaysayan na mga lugar na pinag-istaran asin pinagtokdoan ni Budha. Nanluyang gayo an saiyang boot na madiskobre na kakadikit an interes sa Budhismo sa nasyon na iyan na Hindu. Dangan sa mga pakikipag-olay nia sa mga Saksi ni Jehova, sinabihan sia na bakong gabos na relihiyon gikan sa Dios kundi gikan sa saiyang kaiwal, si Satanas na Diablo.—1 Corinto 10:20.

Dai makatubod digdi si Sakae, pero pinapag-isip asin pinapagsiyasat sia kaiyan. Binasa nia an librong What Has Religion Done for Mankind?a asin iba pang publikasyon. Narealisar nia na mantang an Budhismo, na ginigibo sa Hapon, nag-agi sa dakol na pagkaliwat sa pag-agi nin mga taon, an Biblia nagdanay na daing pagkaliwat sa laog nin rinibong taon. Sa huri nagkabunga an saiyang pagsiyasat. Nanompongan nia an katotoohan na hinahanap nia. An kagayagayahan nia kapareho kan kagayagayahan kan tawo sa parabola ni Jesus na nakakua nin kayamanan na nagtatago sa sarong oma: “Sa kaogmahan nia sia naglalakaw asin nagpabakal kan gabos niang sadiri asin binakal an oma.”—Mateo 13:44.

An mga nakanompong sa relihiyosong katotoohan nagpapaheling nin “pakikipagkapwa” para sa iba na naghahanap kaiyan. (1 Pedro 3:8) An totoo, an saindang init asin tunay na pagkamoot iyo an enot na nakaagyat sa dakol na mag-adal kan Biblia. “An gabos makaaaram na kamo an sakong mga disipulo, kun kamo nagkakaminorootmootan,” sabi ni Jesus. (Juan 13:35) Saen daw niato manonompongan an siring na pagkaminootan ngonyan. Si Kazuhiko Nagoya, sa pagsurat sa saiyang kolumna sa Daily Yomiuri nin Tokyo, nagkomento sa mainit na tratamiento sa saiya kan songkoon nia an sarong tiriponan nin mga Saksi ni Jehova. “Sa paghuyom ninda,” sabi ni Nagoya, “garo dati na ninda akong midbid asin naoogma sindang maheling giraray ako.” Alagad ta bako man. “Pinagmasdan kong marhay an saindang lalauogon asin nadiskobre ko na talagang dai ko sinda midbid.” Kan maghuyom man an duwa pa, “Naogma nanggad ako,” an paggirumdom ni Nagoya. ’Arog kaiyan an paghuyom ninda sa sarong estranghero, kun naheheling sia ninda sa arin man sa saindang pagtiripon.”

An init asin pagkamoot bakong resulta nin pagkamiridbidan na gayo huli sa dayaday na pagtiripontipon. Imbes iyan resulta nin regular na pag-adal sa Biblia asin pag-aplikar kan mga prinsipyo kaiyan sa saindang buhay. An dakol na inimbitaran na umatender sa “Mga Nagdadanay sa Integridad” na Pandistritong mga Kombension nin mga Saksi ni Jehova sa ibang mga nasyon kan 1985-86 napahirong gayo an puso kan pagkamoot asin pagkamapagpasakat na ipinaheling sa sainda kan mga nag-istimar sa sainda. An sarong hoben na mag-agom na taga-Hapon na nag-atender kan kombension sa Pilipinas nagkomento: “Kan kami gabos mag-iriba sa ultimong awit, na an kada saro nag-aawit sa sadiri niang tataramon, napahiro na gayo kami. Sa enot na pangyayari namatean mi kun ano an boot sabihon kan pagigin miembro nin sarong tunay na internasyonal na kasararoan nin magturugang.”

Ultimo, dakol an nagsasaysay kan darakulang pagkaliwat na ginibo ninda sa saindang buhay bilang resulta kan pag-adal sa Biblia asin pag-aplikar kaiyan. An mga tawo na an pagka-kalaen kan personalidad dati arog karayo kan karnero sa lobo ngonyan matoninong na nag-iiriba sa Kristianong asamblea. (Isaias 11:6) An iba purunguton asin bakong makikatood, halipot an pasensia asin matatakton pa ngani. An iba man may problema sa labi-labing kamondoan. An iba pa sadiri sana an iniisip asin paslo. An dakol may maraot na mga bisyong kaipuhan na haleon. Alagad paagi sa maigot na paghihingoa, kaiba an pagmawot na makapaogma sa Dios, nakagibo sinda nin darakulang pagbakle.

Kumusta man kamo? May nagugustohan daw kamo sa arin man sa nasabing mga dahelan para sa pagbakle? Kun iyo, dinadagka mi kamo na odok na pag-adalan an Biblia. Ipinaheheling kan Biblia na an gabos na falsong relihiyon nasa pakipagbanggaan sa Dios kan Biblia. Kapareho kan piloto na nasambitan sa sinusundan na artikulo, tibaad kaipuhan kamong gumibo nin listong paghiro tanganing iligtas an buhay nindo asin an buhay kan saindong mga namomotan. “Halakbang asin mahiwas an dalan na pasiring sa kalaglagan,” sabi ni Jesus, “asin dakol an mga nagraralaog dian; sa ibong na kampi piot an tata asin hayakpit an dalan pasiring sa buhay.” (Mateo 7:13, 14) Iyo kun kamo naglalakaw sa “halakbang asin mahiwas” na dalan, may marahay na dahelan na kamo bumalyo sa ibang relihiyon!

[Nota sa Ibaba]

[Ritrato sa pahina 5]

Huli sa estriktong pagpadakula sako bilang Budhista-Shinto an pagheling ko sa Dios saro na makatatakot

[Ritrato sa pahina 7]

‘Hayakpit an dalan pasiring sa buhay’