Pagsamba ki Satanas sa Satong Panahon

Dai mapagdududahan na si Satanas gustong sambahon. Kan sinusugotan si Jesus, sia nag-opresir na tawan sia nin dakulang balos sa saro sanang kondisyon: “Kun ika lumohod asin gumibo nin sarong akto nin pagsamba sa sako.” (Mateo 4:9) Siyempre, nagsayuma si Jesus, pero bakong gabos nag-arog sa saiyang halimbawa. An pagsamba ki Satanas lakop sa satong modernong kinaban.

Halimbawa, sa Canada an The Calgary Herald nagpublikar nin serye nin mga artikulo na may titulong “Mga Disipulo kan Diablo.” Kinotar kan peryodiko an report nin sarong imbestigador sa pulisiya, na an sabi: “Paagi sa mga interbio naaraman ko na an Satanismo bako sanang sa sarong partikular na grupo sa sosyedad. An impormasyon na natipon kan Calgary Police Service asin Royal Canadian Mounted Police nagpapaheling na sa Calgary sana igwa nin pinaghohonang 5,000 na aktibong mga Satanista.”

An iba pang bareta nagpapaheling na an kulto ni Satanas, sa laen-laen na porma, minalataw sa bilog na Estados Unidos asin Europa. Pati an polisiya nagkakainteres sa Satanismo. Taano? Huli ta sa dakol na kaso nakakanompong sinda nin koneksion sa pag-oltanan nin mga krimen asin kultong sataniko. Kasuarin pa sana, an sarong sekreta nin pulis kinotar na nagsabi: “An napapaatubang sato sarong relihiyon asin mga tawo na nagtutubod dian kapareho kan pagtubod nin iba sa Kristianismo, Judaismo o Islam. An naheheling nindo bako sanang ordinaryong mga krimen, kundi mga krimen huli sa relihiyon.”

An sarong lataw na halimbawa iyo an mga pangadan kan grupo nin Manson sa California kaidtong 1969. Sono sa propesor sa kasaysayan na si Jeffrey Russell, “si Manson naghingako na sia si Cristo asin si Satanas. . . . An parasunod ni Manson na si Tex Watson nagsabi, kan sia umabot tanganing gadanon si Sharon Tate. ‘Ako an diablo; nagdigdi ako tanganing gibohon an trabaho kan diablo.’” Pero bako man na perming arog kaini kahayag an Satanismo

Panraratak, Espiritismo, Asin Panlulumay

Tunay nanggad, an pagsamba ki Satanas bako sanang an direktang pagsamba ki Satanas sa ngaran. Si apostol Pablo nagpatanid: “An mga bagay na iinatang kan mga nasyon iinaatang ninda sa mga demonyo. ” (1 Corinto 10:20) Asin an pagsamba sa demonyo sa katotoohan pareho man sana kan pagsamba ki Satanas, ta si Satanas inaapod na “poon nin mga demonyo.” (Marcos 3:22) Anong mga gibo kan “mga nasyon” an masasabing pagsamba sa demonyo, o pagsamba ki Satanas? An mga tataramon nin Dios sa Israel nagtatao sato nin nagkapirang halimbawa: “Mayo nin maninigong makua sa saimo na . . . siisay man na minagamit nin pagtoodtood, salamangkero o siisay man na parahimalad o aswang, o saro na nag-eengkanto o siisay man na nakikihumapot sa patagolainan o parahula o siisay man na nakikihumapot sa gadan. Huli ta an gabos na naggigibo kan mga bagay na ini makababalde ki Jehova.”​—Deuteronomio 18:10-12.

Kaya, pinatatanidan kita tumang sa pag-atang nin dugo asin pakikikomunikar sa espiritu na ginigibo kan mga pading voodoo sa Brazil o kan mga houngan asin mambo sa Haiti. Asin pinatatanidan kita tumang sa nakaaagid na gayong mga kaugalean sa Santer­ia, na inootob nin pirang nadistiyerong mga Cubano sa Estados Unidos. Pinatatanidan man kita tumang sa mga aswang na naghihingakong nakikipag-olay sa gadan na mga kalag tanganing patakoton an mga nabubuhay.—Ikomparar an 1 Samuel 28:3-20.

An panraratak lakop sa laen-laen na kabtang nin Aprika. Halimbawa, sa South Africa an mga parasantiguwar may dakulang kapangyarihan, asin iginagalang na gayo sinda nin mga tawo. An bago pa sanang mga pangyayari na nabareta iyo an mga pagsolo nin mga magkasururog sa mga tawo na pinagsahotan na pinatamaan nin kikilat an saindang mga kabaryo! An lokal na mga parasantiguwar pinagsahotan an daing salang mga biktima kan “pambihirang” mga aktong ini dangan iginakod sinda sa sarong kahoy tanganing soloon. An siring na pagtubod sa panlulumay o mahika pagsamba man sa mga demonyo.

Alagad ta bako sanang sa Aprika an panraratak. Kan 1985, si Herbert D. Dettmer, na nasentensiahan na mabilanggo sa sarong correctional center sa Virginia, E.U.A., tinawan kan District Court sa Eastern District of Virginia kan diretso na magkaigwa kan gubing asin mga kasangkapan tangani na maotob nia an saiyang relihiyon sa bilanggoan. Asin ano an relihiyon nia? Sono sa rekord kan husgado, sia miembro kan “Church of Wicca (na mas midbid nin kadaklan na panraratak).” Kaya, si Dettmer nagkaigwa kan legal na diretso na gumamit sa saiyang pagsamba nin asupre, asin sa dagat, o asin na daing yodo; mga kandila, insenso; relong may alarma; asin puting bata.

Iyo, sono sa mga tanda, an panraratak lakop sa Solnopan. An peryodikong Britano na Manchester Guardian Weekly nagbareta: “Kaidtong limang taon na an nakaagi, may pinaghohonang mga 60,000 na aswang sa Britania: ngonyan [1985] kinakarkulo nin pirang aswang na an kabilangan nagin nang 80,000. An Prediction, an bulanan na magasin para sa astrolohiya asin okulto, may sirkulasyon na 32,000.

An Satanismo Asin Musika

Si Propesor Russell, sa saiyang librong Mephistopheles—The Devil in the Modern World, dinadara an satong atension sa saro pang paagi na naootob an mga katuyohan ni Satanas. Sia nagsurat: “An hayag na Satanismo marikas na napara pakalihis kan mga taon nin 1970, alagad an mga elemento nin kultural na Satanismo nagpadagos sa mga taon nin 1980 sa ‘heavy metal’ na musikang rock na may paminsanminsan na pag-arang sa ngaran kan Diablo asin dakulang paggalang sa Satanikong mga bagay na kaisogan, droga, kakanusan, labi-labing kamondoan, pagpangana sa sadiri, kadahasan, ribok asin karibarawan, asin kadaihan nin kaogmahan.”—Samo an italiko.

Seguro an mga musikero na may iinibang mga elemento nin Satanismo sa saindang musika dai man ini isinasaboot. Tibaad gusto sana nindang manbigla o magin palaen. Pero, naapektaran na gayo an pirang indibiduwal na madaling maimpluwensiahan. Si Propesor Russell nagsasabi na an “daing pondong medyo seryosong propaganda nin karatan nagkaigwa nin nakalalapang epekto sa rungaw asin maluyang mga isip. An sarong resulta iyo an pagdakol nin biko nanggad na mga krimen, kaiba na an pag-abuso sa mga aki asin pagputolputol sa mga hayop.”

An sarong bago pa sanang kaso nakakubhan sa mga taga-Nueva York sa sarong bareta sa peryodiko, an sarong 14-anyos na aking lalaki, “na nababangkag sa Satanismo,” sinaksak an saiyang ina sagkod na magadan dangan naghugot. An sarong parakonseho sa pamilya sa Canada nagsabi, sono sa ibinareta sa magasin na Maclean’s, na an nagdadakol na mga tin-edyer na nariribok an isip nagtuga na sinda naggigibo nin “satanismo, na parateng kakombinar nin droga asin kan mas maraot na klase nin heavy-metal na musikang rock.”

Bako Sanang Uso

An sarong uso na naglalakop ngonyan sa Estados Unidos inaapod na channeling. An mga tawo parateng nagbabayad nin pirang gatos na dolyar tanganing makikabtang sa mga sesyon na dian an sarong “channel,” an boot sabihon patagolainan, nagsasabi na sia (an mga channel parateng babae) nakikikomunikar sa espiritu nin sarong tawong haloy nang nagadan. Sa kaso nin sarong channel, an bareta kan peryodiko, an mga sesyon paminsanminsan durungan na ipinaaabot sa rinibo katawo sa kabangang dosenang siudad paagi sa sarong satelayt sa telebisyon.” An usong ini hayag na pakisuway sa hatol kan Biblia na likayan an mga patagolainan asin parahula. Kaya, iyan pagsamba na masasabing pagsamba sa mga demonyo. Asin kapareho nin gabos na espiritismo, iyan basado sa kaputikan ni Satanas na an kalag nin tawo inmortal.—Eclesiastes 9:5; Ezequiel 18:4, 20.

An Impluwensia kan Diablo sa Sarong Kinaban na Pano nin Pagkaongis

An labi-labi karaot na kamugtakan nin mga tawo sa ika-20 siglong ini nagpapaisip sa sato kun baga labi pa dian an impluwensia ni Satanas. Nasambitan ini ni Propesor Russell sa pagsabi nia: “Sa ngonyan, na kita may natatambak na mga armas nuklear na kinakarkulong setentang doble sa kaipuhan tanganing gadanon an gabos na nabubuhay na hayop na may udog sa ibabaw kan daga, kita may katagasan nin payong nag-aandam para sa sarong guerra na mayo nin itataong pakinabang sa indibiduwal, nasyon, o ideolohiya kundi makondenar sa rinibong milyon sa sarong makangingirhat sa kagadanan. Anong puwersa an nagtutulod sato sa dalan na nag-oorog an peligro aroaldaw? Kiisay na bentaha an nuklear na pagkalaglag kan planeta? Solamente an puwersa na poon sa kapinonan may labi-labing kakurihan asin maraot na intension na minawot an pagkalaglag kan uniberso.”

Siisay o ano an puwersang iyan? Itinatao kan propesor an sadiri niang simbag sa mga tataramon na ini: “An Diablo sinasabing iyo an espiritu na naghihingoang gibohon na imbalido asin laglagon an uniberso nin Dios sagkod sa makakaya nia. Posible daw na an puwersang nagtutulod sato na ipuwesto an mga armas nuklear iyo man sana an puwersa na poon kaidto naghihingoang deharan an saiyang sadiri? Sa pinakagrabeng krisis na ini kan satong planeta, dai niato maninigaran an posibilidad na iyan.” An mga Kristiano dai nanggad nininigaran an posibilidad na iyan! Si Jesus mismo nagpaheling kan dakulang impluwensia ni Satanas sa kinaban na ini kan apodon Nia siang “an poon kan kinaban na ini.” (Juan 12:31) Sa paglaladawan kan kaisipan ngonyan ni Satanas, an librong Kapahayagan nagsasabi na sia may “dakulang kaanggotan, sa pakaaram na halipot na sana an saiyang panahon.” (Kapahayagan 12:12) Sa pagtaram manongod sa hinihingoang gibohon ni Satanas sa satong panahon, an libro man sanang iyan nagsasabi na sia naggagagamit nin demonikong propaganda tanganing tiriponon an mga namomoon sa kinaban na ini “sa ralaban kan dakulang aldaw nin Dios na Makakamhan sa gabos.” (Kapahayagan 16:14) Dai, dai niato puwedeng lingawan an impluwensia ni Satanas na Diablo kun hinihingoa niatong masabotan an dahelan kan rungaw na paghuhugot nin katawohan.

Si apostol Pablo inapod si Satanas na “poon kan autoridad kan doros, an espiritu na naghihiro ngonyan sa mga aki nin kasumbikalan,” asin “dios kan palakaw na ini nin mga bagay.” (Efeso 2:2; 2 Corinto 4:4) Bakong makangangalas na dakol an naghahapot kun baga an gabos na kabikoan sa “naliwanagan nang” sientipikong panahon na ini—an duwang guerra mundial, mga paglaglag sa rasa sa Europa asin Kampuchea, gutom sa Aprika na may politikal na motibasyon, hararom na relihiyoso asin rasyal na pagkabaranga sa bilog na kinaban, pagkaongis, paggadan, sistematikong pagpasakit, kriminal na paglaglag sa mga tawo paagi sa droga, sa pagngaran sa nagkapira sana—dai nagsusunod sa pankagabsan na plano nin sarong makapangyarihan, maraot na puwersa na desididong irayo an katawohan sa Dios asin seguro darahon pati sa panglobong paghuhugot.

Kun siring, siisay si Satanas? Ano an talagang intension nia? Ano an magigibo niato manongod dian bilang indibiduwal? Inaagda mi kamong helingon an paliwanag sa mga hapot na ini sa minasunod na duwang artikulo.

[Ritrato sa pahina 7]

Isinisikwal an satanikong musika, an banwaan nin Dios naghahanap nin nakararahay na aling-alingan