Kapahayagan—An Mamuraway na Kulminasyon Kaiyan Harani Na

Kapitulo 1: Kapahayagan—An Maogmang Kulminasyon Kaiyan!

1. Paano niato naaaraman na boot nin Dios na kita magin maogma?

Kapahayagan ki Juan​—an makawiwiling librong ini kan Biblia dinadara an banal na rekord sa maogmang kulminasyon. Taano ta sinasabi niatong “maogma”? Bueno, an Autor kan Biblia inaapod na “an maogmang Dios,” na nagtatao nin “mamuraway na maogmang bareta” sa mga namomoot sa saiya. Boot nia na kita man magin maogma. Kaya, sa kapinonan an Kapahayagan naggagarantiya sa sato: “Maogma an nagbabasa . . . sa mga tataramon kan hulang ini.” Sa ultimong kapitulo kaiyan sinasabi sa sato: “Maogma an siisay man na nag-ootob kan mga tataramon nin hula kan balumbon na ini.”​—1 Timoteo 1:​11; Kapahayagan 1:​3; 22:7.

2. Ano an kaipuhan niatong gibohon tanganing makanompong nin kaogmahan paagi sa libro nin Kapahayagan?

² Paano kita makanonompong nin kaogmahan paagi sa libro nin Kapahayagan? Magigibo niato iyan paagi sa pagsiyasat sa kahulogan kan buhay na mga tanda, o simbolo kaiyan, asin paghiro oyon dian. An maribok na kasaysayan nin tawo madali nang umabot sa kapahapahamak na kulminasyon, kun hokoman na nin Dios asin ni Jesu-Cristo an maraot na palakaw ngonyan, na sinasalidahan iyan nin “bagong langit asin bagong daga,” na duman minsan “an kagadanan mawawara na.” (Kapahayagan 21:​1, 4) Bako daw na kita gabos boot na mabuhay sa siring na bagong kinaban, na may tunay na katoninongan asin katiwasayan? Iyan puwede kun pakokosogon niato an satong pagtubod paagi sa pag-adal sa Tataramon nin Dios, kaiba an nakapahihirong hula sa Kapahayagan.

Apocalipsis​—Ano Iyan?

3. Ano an paghona nin dakol na kahulogan nin Apocalipsis asin Armagedon?

³ Bako daw na an Kapahayagan inaapod man na Apocalipsis? Iyo, ta an “kapahayagan” (sa Ingles, “revelation”) iyo an pagtradusir sa a·po·kaʹly·psis sa tekstong Griego. An dakol na tawo ipinakakahulogan an Apocalipsis sa pagkalaglag kan kinaban paagi sa nuklear na ralaban. Sa sarong siudad sa Texas, E.U.A., na duman ginigibo an dakol na bomba nuklear, an relihiyosong mga tawo nagsasabi, “Kita an maeenot na magadan.” An mga klerigo sa lugar na iyan nabareta na “nakombensir na an Armagedon bako sanang dai malilikayan kundi harani na, asin na an ultimong ralaban sa pag-oltanan kan mga puwersa nin karahayan asin karatan, nin Dios asin ni Satanas, mangyayari bilang nuklear na pagkatunaw.”a

4. Ano an talagang kahulogan kan terminong “apocalipsis,” asin taano an ultimong libro sa Biblia ta tamang apodon na “Kapahayagan”?

⁴ Alagad ano man nanggad an apocalipsis? Minsan ngani tinatawan iyan nin kahulogan nin mga diksionaryo paagi sa paggamit nin mga termino na arog baga kan “sarong nagdadangadang na kosmikong kalamidad,” an Griegong a·po·kaʹly·psis sa pundamental nangangahulogan “paghahayag” o “pagtuklab.” Kaya, an ultimong libro kan Biblia tama an pagkaapod na “Kapahayagan.” Digdi manonompongan niato, bako sanang an dai na maliliwat na mensahe nin kapahamakan kan kinaban, kundi an paghahayag man nin banal na mga katotoohan na maninigong magpatalubo sa satong puso nin mamuraway na paglaom asin marigon na pagtubod.

5. (a) Siisay an lalaglagon sa Armagedon, asin siisay an makaliligtas? (b) Anong mamuraway na ngapit an naghahalat sa mga makaliligtas sa Armagedon?

⁵ Totoo, an Armagedon inaapod sa ultimong libro kan Biblia na “ralaban kan dakulang aldaw nin Dios na Makakamhan sa gabos.” (Kapahayagan 16:​14, 16) Alagad ta iyan magigin laen nanggad sa sarong nuklear na pagkatunaw! An siring na pagkatunaw posibleng mangahulogan kan pagkapara nin gabos na buhay sa ibabaw kan daga. Al kontraryo, an Tataramon nin Dios nagtatao kan maogmang garantiya na an maraot na mga paratumang sana sa Dios an lalaglagon​—nin mga puwersa na nasa pamomogol nin Dios. (Salmo 37:​9, 10; 145:20) An sarong dakulang kadaklan nin mga tawo, hale sa gabos na nasyon, makaliligtas sa kulminasyon kan banal na paghokom sa Armagedon. Dangan papastoran asin gigiyahan ni Cristo Jesus an mga ini pasiring sa buhay na daing katapusan sa sarong paraisong daga. Dai daw kamo nagmamawot na makabilang sa sainda? Makaoogma, ipinaheheling kan Kapahayagan na puwede kamong makabilang sainda!​—Kapahayagan 7:​9, 14, 17.

Pagsiyasat sa Banal na mga Hilom

6. Sa nag-aging mga taon, anong mga libro an ipinublikar kan Watch Tower Society tanganing tawan nin liwanag an Kapahayagan?

⁶ Kaidto pang 1917, ipinublikar kan Watch Tower Society an librong The Finished Mystery. Ini bersikulo-por-bersikulong komentaryo sa mga libro sa Biblia na Ezequiel asin Kapahayagan. Dangan, mantang naheheling an mga pangyayari sa kinaban bilang kaotoban kan hula sa Biblia, ginibo an napapanahon na duwang-tomong libro na may titulong Light, na ilinuwas kan 1930. Ini nagtao nin isinunod sa panahon na pagsiyasat sa Kapahayagan. An liwanag nagpadagos na ‘sumirang para sa matanos,’ kaya kan 1963 ipinublikar kan Sosyedad an 704-pahinas na librong “Babylon the Great Has Fallen!” God’s Kingdom Rules! Itinao kaini nin detalyado an kasaysayan kan paglataw asin pagbagsak kan Dakulang Babilonya, an pankinaban na imperyo nin falsong relihiyon, asin iyan tinapos nin pagpapaliwanag sa huring siyam na kapitulo kan Kapahayagan. Mantang ‘an dalan kan mga matanos paorog nang paorog na nagliliwanag,’ partikularmente mapadapit sa aktibidad sa kongregasyon, suminunod kan 1969 an 384-pahinas na libro, “Then Is Finished the Mystery of God,” na nagpaliwanag kan enot na 13 kapitulo nin Kapahayagan.​—Salmo 97:​11; Talinhaga 4:18.

7. (a) Taano ta ginibo kan Sosyedad an librong ini manongod sa Kapahayagan? (b) Anong mga pantabang sa pagtotokdo an itinao sa libro para sa kapakinabangan nin mga nagbabasa?

⁷ Taano ta maninigong magpublikar ngonyan nin saro pang libro manongod sa Kapahayagan? An kadaklan na impormasyon na nagluwas na detalyadong gayo, asin dai nahimo na iyan tradusiron asin ipublikar sa bilog na kinaban sa dakol na tataramon. Kaya, pinagmarahay na gumibo nin sarong libro manongod sa Kapahayagan na nasa saro sanang tomo asin sa porma na pasil na gibohon sa dakol na tataramon. Saro pa, inaprobetsaran an oportunidad sa tomong ini na tumao nin mga pantabang sa pagtotokdo, kaiba na an mga ilustrasyon, tsart, asin sumaryo, na makatatabang sa mga nagbabasa na malinaw na masabotan an nakaoogmang kahalagahan kan makangangalas na hulang ini.

8. Ano an mas makosog pang dahelan sa pagpublikar kan librong ini?

⁸ An mas makosog pang dahelan sa pagpublikar kan librong ini iyo an pangangaipo na sumubaybay sa presenteng katotoohan. Si Jehova padagos na nagtatao nin orog na liwanag sa kahulogan kan saiyang Tataramon, asin makalalaom kita na an pakasabot niato sa Kapahayagan, kaiba an ibang hula, dudugangan mantang kita nagrarani sa dakulang kahorasaan. (Mateo 24:​21; Kapahayagan 7:14) Mahalaga na kita nakaaaram kan nangyayari. Arog kan isinurat ni apostol Pedro manongod sa banal na hula: “Marahay an saindong ginigibo na maghinanyog kaiyan bilang sarong ilawan na nagliliwanag sa madiklom na lugar, sagkod na mamanaag na an aldaw asin an bitoon nin makaaaga sumirang na, sa saindong puso.”​—2 Pedro 1:19.

9. (a) Kaiba nin ibang hula, ano an ipinaheheling kan Kapahayagan na lalalangon nin Dios? (b) Ano an bagong kinaban, asin paano kamo puwedeng makaligtas pasiring dian?

⁹ Idinudugang kan Kapahayagan an patotoo kaiyan sa dakol na ibang hula kan Biblia, na ipinaheheling na katuyohan ni Jehova Dios na lumalang nin bagong kalangitan asin sarong bagong daga. (Isaias 65:​17; 66:​22; 2 Pedro 3:​13; Kapahayagan 21:​1-5) Sa pangenot, an mensahe kaiyan ipinanonongod sa linahidan na mga Kristiano, na binakal ni Jesus paagi sa saiyang dugo tanganing magin mga hade kaiba nia sa bagong kalangitan. (Kapahayagan 5:​9, 10) Minsan siring, an maogmang baretang ini magpaparigon man sa pagtubod kan minilyon na naglalaom sa buhay na daing katapusan sakop kan Kahadean ni Cristo. Saro daw kamo sa mga ini? Kun siring pakokosogon kan Kapahayagan an saindong paglaom na mabuhay sa Paraiso, bilang kabtang kan bagong daga, na magkakamit nin abundang katoninongan, mabagsik na salud, asin naglilipwas na mga probisyon nin Dios na noarin man dai matatapos. (Salmo 37:​11, 29, 34; 72:​1, 7, 8, 16) Kun boot nindo na makaligtas pasiring sa bagong kinaban na iyan, napakahalaga, iyo, kaipuhan, na kamo magtao nin atension sa buhay na pagkaladawan kan Kapahayagan sa memorableng kulminasyon na ngonyan harani na.​—Sofonias 2:​3; Juan 13:17.

[Nota sa Ibaba]