Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 9: Pangangapot nin Marigon sa Ngaran ni Jesus
‘Natatagong Manna Asin Maputing Gapo’
17. Anong balos an naghahalat sa linahidan na mga Kristiano na ‘makadadaog,’ asin ano an kaipuhan na mapangganahan kan mga Kristiano sa Pergamo?
17 May makangangalas na balos na naghahalat sa gabos na nagkukuyog sa hatol ni Jesus, na itinao sa paggiya kan banal na espiritu ni Jehova. Hinanyoga! “An igwa nin talinga magdangog sa isinasabi kan espiritu sa mga kongregasyon: Sa makadaog matao ako kan natatagong manna, asin tatawan ko sia nin maputing gapo, asin dian sa gapo nasusurat an sarong bagong ngaran na mayo nin nakaaaram kundi an minaako kaiyan.” (Kapahayagan 2:17) Kaya, an mga Kristiano sa Pergamo, arog kan mga Kristiano sa Smirna, sinadol na ‘mandaog.’ Tangani sindang magin mapanggana, an mga yaon sa Pergamo, na namumugtakan kan trono ni Satanas, kaipuhan na isikwal an idolatriya. Kaipuhan na madaog ninda an inmoralidad, an sektaryanismo, asin an apostasiya na konektado ki Balac, Balaam, asin sa sekta ni Nicolas. Sa siring, an linahidan na mga Kristianong idto aagdahon na kumakan sa “natatagong manna.” Ano an boot sabihon kaini?
18, 19. (a) Ano an manna na itinao ni Jehova para sa mga Israelitas? (b) Anong manna an natatago? (c) Ano an isinisimbolo kan pagkakan sa natatagong manna?
18 Kan aldaw ni Moises, si Jehova nagtao nin manna tanganing mabuhay an mga Israelitas kaidtong saindang pagbaklay sa kapatagan. An mannang idto dai natatago, ta kada aga—apuwera kun Sabbath—iyan milagrosong minalataw, na garo mahimpis na mga yelo na nakatatakop sa daga. Idto probisyon nin Dios tanganing buhayon an mga Israelitas. Bilang pagirumdom, pinagbotan ni Jehova si Moises na sarayon an kadikit kan “tinapay” na ini sa sarong lalagan na bulawan sa laog kan banal na kaban kan tipan “sa bilog na kapag-arakian” nin Israel.—Exodo 16:14, 15, 23, 26, 33; Hebreo 9:3, 4.
19 Ini angay nanggad na simbolo! An manna natatago sa Kabanalbanale kan tabernakulo, na duman an milagrosong liwanag sa ibabaw kan takop kan Kaban nagsisimbolo sa mismong presensia ni Jehova. (Exodo 26:34) Mayo nin siisay man na tinotogotan na makalaog sa banal na lugar na idto tanganing kumakan sa natatagong manna. Minsan siring, si Jesus nagsabi na an saiyang linahidan na mga parasunod na makadadaog makakan kan “natatagong manna.” Kapareho ni Cristo na naenot sa sainda, sinda malaog, “bakong sa banal na lugar na ginibo nin mga kamot, na inarog sa tunay, kundi sa langit mismo.” (Hebreo 9:12, 24) Sa pagkabuhay ninda liwat, sinda masulot nin pagkadaing kalapaan asin inmortalidad—na sarong makangangalas na probisyon ni Jehova, na isinisimbolo kan pagtao sainda kan dai nawawarang “natatagong manna.” Kadakula kan pribilehiyo kan sadit na grupong iyan nin mga nakadaog!—1 Corinto 15:53-57.
20, 21. (a) Ano an isinisimbolo kan pagtao nin maputing gapo sa linahidan na mga Kristiano? (b) Mantang 144,000 sana an maputing gapo, ano an paglaom kan dakulang kadaklan?
20 An mga ini maako man nin “maputing gapo.” Sa mga hokoman sa Roma, an gapo ginagamit sa pagtao nin sentensia.a An maputing gapo nangangahulogan nin pagpahayag na daing sala, mantang an maitom na gapo nangangahulogan nin pagkakondenar, na parateng sa kagadanan. An pagtao ni Jesus nin “maputing gapo” sa mga Kristiano sa Pergamo magpaparisa na hinohokoman nia sinda bilang daing sala, puro, asin malinig. Alagad an mga tataramon ni Jesus puwedeng magkaigwa nin dugang pang kahulogan. Kan mga panahon na Romano, an mga gapo ginagamit man na garo tiket sa paglaog sa mahahalagang okasyon. Kaya an maputing gapo puwedeng magin tanda nin bagay na napakaespesyal para sa nakadaog na linahidan na Kristiano—an pag-ako sa saiya sa sarong mamuraway na lugar sa langit sa kasal kan Kordero. 144,000 sanang gapo an itatao.—Kapahayagan 14:1; 19:7-9.
21 Ini daw nangangahulogan na dai na kamo kinonsiderar kun saro kamo sa dakulang kadaklan nin mga kairibang parasamba? Dai man! Minsan ngani dai maako kan maputing gapo sa paglaog sa langit, kamo puwede man, kun kamo magtagal, na lumuwas sa dakulang kahorasaan tanganing magkaigwa nin kabtang sa maogmang gibohon na pagbabalik kan Paraiso digdi sa daga. Makikiiba sa saindo digdi an mga binuhay liwat na maimbod kaidtong mga panahon bago-Kristiano asin an mga kabilang sa ibang karnero na tibaad nagadan nin mas bago pa. Sa katapustapusi, an gabos na ibang binalukat na gadan tatawan nin pagkabuhay liwat sa buhay sa sarong paraisong daga.—Salmo 45:16; Juan 10:16; Kapahayagan 7:9, 14.
22, 23. Ano an kahulogan kan ngaran na nasusurat sa gapo na itinatao sa linahidan na mga Kristiano, asin anong pagpakosog an maninigong itao kaini?
22 Ano an bagong ngaran na nasusurat sa gapo? An ngaran paagi na ipamidbid an sarong tawo asin ipalaen sia sa iba. An linahidan na mga Kristianong ini mag-aako kan gapo pagkatapos ninda kan saindang daganon na buhay bilang mga nakadaog. Kaya malinaw na an ngaran sa gapo may koneksion sa saindang pribilehiyo na makasaro ni Jesus sa langit—sarong dayupot na gayong katongdan nin makahadeng paglilingkod na lubos sanang maaapresyar asin makakamtan kan mga magmamana kan langitnon na Kahadean. Kaya, iyan sarong ngaran, o titulo nin katongdan, “na mayo nin nakaaaram kundi an minaako kaiyan.”—Ikomparar an Kapahayagan 3:12.
23 Ini kanigoan na pandagka sa grupong Juan na “magdangog sa isinasabi kan espiritu sa mga kongregasyon” asin iaplikar iyan! Asin ini nagpapakosog nanggad sa saindang kairiba, an dakulang kadaklan, na maimbod na maglingkod kaiba ninda mantang puwede ninda sindang makaibaiba digdi sa daga asin makikabtang sa sainda sa pagpapahayag kan Kahadean ni Jehova!
[Nota sa Ibaba]
a Helingon an Gibo 26:10 asin nota sa ibaba, New World Translation Reference Bible.