Kapahayagan—An Mamuraway na Kulminasyon Kaiyan Harani Na

Kapitulo 43: An Magayon na Siudad

Bisyon 16—Kapahayagan 21:9–22:5

Tema: An pagladawan sa Bagong Jerusalem

Panahon nin Kaotoban: Pakatapos kan dakulang kahorasaan asin kan pagholog sa bungaw ki Satanas

1, 2. (a) Saen dinara kan anghel si Juan tanganing helingon an Bagong Jerusalem, asin anong kabaliktaran an maririsa niato digdi? (b) Taano ta ini an mamuraway na kulminasyon kan Kapahayagan?

Sarong anghel an nagdara ki Juan sa kapatagan tanganing ipaheling saiya an Dakulang Babilonya. Ngonyan an saro sa iyo man sanang anghelikong grupo nagdara ki Juan sa sarong halangkaw na bukid. Anong kabaliktaran an naheheling nia! Digdi mayong marigsok, inmoral na siudad na arog kan Babilonikong patotot, kundi an Bagong Jerusalem—malinig, espirituwal, banal—asin iyan naghihilig hale sa langit mismo.—Kapahayagan 17:1, 5.

² Maski an daganon na Jerusalem nungkang nagkaigwa nin kamurawayan na siring kaini. Sinasabi sato ni Juan: “Asin nagdatong an saro sa pitong anghel na igwa kan pitong mangko na pano kan pitong huring damat, asin sia nakiolay sa sako asin nagsabi: ‘Madia, ipaheheling ko sa saimo an nobya, an agom kan Kordero.’ Kaya dinara nia ako sa kapangyarihan kan espiritu sa sarong dakula asin halangkaw na bukid, asin ipinaheling nia sa sakuya an banal na siudad na Jerusalem na naghihilig hale sa langit hale sa Dios asin igwa kan kamurawayan nin Dios.” (Kapahayagan 21:9-11a) Hale sa marahay na posisyon sa halangkaw na bukid na iyan, siniyasat ni Juan an magayon na siudad kabilang an gabos na nakaaakit na kabtang kaiyan. An mga tawong may pagtubod interesadong naglaom sa pagdatong kaiyan magpoon kan pagkaholog kan katawohan sa kasalan asin kagadanan. Sa katapustapusi iyan uya na! (Roma 8:19; 1 Corinto 15:22, 23; Hebreo 11:39, 40) Iyan an makangangalas na espirituwal na siudad, na kompuwesto nin 144,000 na maimbod na nagdadanay sa integridad, na magayon sa kabanalan kaiyan asin nagpapaheling kan mismong kamurawayan ni Jehova. Uya an mamuraway na kulminasyon kan Kapahayagan!

3. Paano ilinadawan ni Juan an kagayonan kan Bagong Jerusalem?

³ An Bagong Jerusalem pambihira sa kagayonan kaiyan: “An liwanag kaiyan nakakabaing sa pinakamahalagang gapo, siring sa gapong jaspe na malinaw siring sa kristal. Iyan igwa nin dakula asin halangkaw na lanob asin igwa nin kagduwang tata, asin sa mga tata kagduwang anghel, asin may mga ngaran na nakasurat na iyo an mga ngaran kan kagduwang tribo kan mga aki ni Israel. Sa sirangan tolong tata, asin sa amihanan tolong tata, asin sa timog tolong tata, asin sa solnopan tolong tata. An lanob kan siudad igwa man nin kagduwang pundasyon na gapo, asin sa ibabaw kan mga iyan an kagduwang ngaran kan kagduwang apostol kan Kordero.” (Kapahayagan 21:11b-14) Angay nanggad na an enot na impresyon na irinekord ni Juan iyo an nagsisinag na kaliwanagan! Nagkikinang siring sa bagong nobya, an Bagong Jerusalem angay na kairiba ni Cristo. Iyan nagkikinang nanggad, na angay para sa linalang kan “Ama kan langitnon na liwanag.”—Santiago 1:17.

4. Ano an nagpaparisa na an Bagong Jerusalem bakong an nasyon nin Israel sa laman?

⁴ Sa 12 tata kaiyan, nasusurat an ngaran kan 12 tribo nin Israel. Kaya, an simbolikong siudad na ini kompuwesto nin 144,000, na tinatakan “hale sa lambang tribo kan mga aki ni Israel.” (Kapahayagan 7:4-8) Kaoyon kaini, an pundasyon na mga gapo igwa kan ngaran kan 12 apostol asin kan Kordero. Iyo, an Bagong Jerusalem bakong an nasyon nin Israel sa laman na pinundar sa 12 aki ni Jacob. Iyan an espirituwal na Israel, na pinundar sa “mga apostol asin mga propeta.”—Efeso 2:20.

5. Ano an ipinaririsa kan “dakula asin halangkaw na lanob” kan Bagong Jerusalem asin kan katunayan na an mga anghel ibinugtak sa kada pintoan?

⁵ An simbolikong siudad may dakulang lanob. Kan suanoy na mga panahon, ipinatindog an mga lanob nin siudad para sa seguridad tanganing dai makalaog an mga kaiwal. An “dakula asin halangkaw na lanob” kan Bagong Jerusalem nagpapaheling na iyan protektado sa espirituwal. Daing kaiwal nin katanosan, daing marigsok o bakong sadiosan, an makalalaog. (Kapahayagan 21:27) Alagad para sa mga palalaogon, an paglaog sa magayon na siudad na ini arog kan paglaog sa Paraiso. (Kapahayagan 2:7) Pakapahalea ki Adan, an mga kerubin ibinugtak sa atubangan kan orihinal na Paraiso tanganing dai makalaog an marigsok na mga tawo. (Genesis 3:24) Siring man, ibinugtak an mga anghel sa kada pintoan kan banal na siudad na Jerusalem tanganing masierto an espirituwal na seguridad kan siudad. Iyo nanggad, sa bilog na huring mga aldaw, an mga anghel nagbabantay sa kongregasyon nin linahidan na mga Kristiano, na nagigin an Bagong Jerusalem, sa pagkaolakit sa Babilonya.—Mateo 13:41.

Pagsokol sa Siudad

6. (a) Paano ilinadawan ni Juan an pagsokol sa siudad, asin ano an ipinaririsa kan pagsokol na ini? (b) Ano an puwedeng magpaliwanag na an ginamit na pagsokol “oyon sa sokol nin tawo, siring man sa sokol nin anghel”? (Helingon an nota sa ibaba.)

⁶ Ipinadagos ni Juan an saiyang tala: “Ngonyan an nakikiolay sako may kapot na gahong bulawan bilang panokol, tanganing masokol nia an siudad asin an darakulang tata kaiyan asin an lanob kaiyan. Asin an siudad kuwadrado, na an kalabaan kaiyan siring man sana sa kalakbangan kaiyan. Asin sinokol nia kan gaho an siudad, dose mil na estadio; an kalabaan asin kalakbangan patin langkaw kaiyan parareho. Siring man, sinokol nia an lanob kaiyan, sarong gatos asin apat na polo may apat na maniko, oyon sa sokol nin tawo, siring man sa sokol nin anghel.” (Kapahayagan 21:15-17) Kan sokolon an santuaryo kan templo, ini naggarantiya sa kaotoban kan mga katuyohan ni Jehova manongod kaiyan. (Kapahayagan 11:1) Ngonyan, an pagsokol kan anghel sa Bagong Jerusalem nagpapaheling kun paanong dai maliliwat an mga katuyohan ni Jehova manongod sa mamuraway na siudad na ini.a

7. Ano an pambihira manongod sa sokol kan siudad?

⁷ Kanigoan kapambihira an siudad na ini! Sarong sangkap na kubikong 12,000 na estadio (mga 1,380 milyas) sa kabilogan, na napalilibotan nin lanob na 144 maniko, o 210 piye an langkaw. Daing literal na siudad an puwedeng magkaigwa nin siring na sokol. Iyan magkokobre sa teritoryo na mga 14 beses na siring kadakula kan modernong Israel, asin iyan malangkaw nin haros 350 milyas sa kahiwasan kan espasyo! An Kapahayagan itinao sa mga tanda. Kaya, ano an sinasabi sato kan mga sokol na ini manongod sa langitnon na Bagong Jerusalem?

8. Ano an ipinaririsa kan (a) 144-maniko kalangkaw na lanob kan siudad? (b) 12,000-estadiong sokol kan siudad? (c) pagigin sangkap na kubiko an porma kan siudad?

⁸ An 144 manikong lanob nagpapagirumdom sato na an siudad kompuwesto nin 144,000 na ipinaniaki sa espiritung mga aki nin Dios. An bilang na 12 na minalataw sa 12,000-estadiong sokol kan siudad—na parareho an laba, lakbang, asin langkaw—piguratibong ginamit sa organisasyonal na mga eksena sa hula kan Biblia. Kaya, an Bagong Jerusalem iyo an eksperto an pagkadisenyong organisasyonal na areglo sa paggibo kan daing sagkod na katuyohan nin Dios. An Bagong Jerusalem, kabilang an Hadeng si Jesu-Cristo, iyo an organisasyon kan Kahadean ni Jehova. Dangan an porma kan siudad: sarong sangkap na kubiko. Sa templo ni Salomon, an Kabanalbanale, na may simbolikong representasyon kan presensia ni Jehova, sangkap na kubiko. (1 Hade 6:19, 20) Kaya, angay nanggad na an Bagong Jerusalem, na naliliwanagan kan kamurawayan ni Jehova mismo, naheheling bilang sangkap, dakulang kubiko! An bilog na sokol kaiyan sangkap an pagkatimbang. Iyan siudad na daing iregularidad o depekto.—Kapahayagan 21:22.

Mahalagang Materyales sa Pagpatindog

9. Paano ilinadawan ni Juan an mga materyales sa pagpatindog kan siudad?

⁹ Nagpadagos si Juan sa saiyang paglaladawan: “Asin an kana kan lanob kaiyan jaspe, asin an siudad anas na bulawan na kabaing nin malinaw na salming. An mga pundasyon kan lanob kan siudad nasasamnohan nin lambang klase nin mahalagang gapo: an enot na pundasyon jaspe, an ikaduwa safiro, an ikatolo calcedonia, an ikaapat esmeralda, an ikalima sardonica, an ikaanom sardio, an ikapito crisolito, an ikawalo berilo, an ikasiyam topacio, an ikasampulo crisopraso, an ikaonse jacinto, an ikadose amatista. Siring man, an doseng tata doseng perlas; an kada saro kan mga tata ginibo sa perlas. Asin an tinampo kan siudad anas na bulawan, siring sa silag na salming.”—Kapahayagan 21:18-21.

10. Ano an ipinaririsa kan katunayan na an siudad ipinatindog sa jaspe, bulawan, asin “lambang klase nin mahalagang gapo”?

¹⁰ An pagkagibo sa siudad tunay nanggad na magayon. Imbes na ordinaryo, daganon na materyales sa pagpatindog arog kan laboy o gapo, nabasa niato an jaspe, anas na bulawan, asin “lambang klase nin mahalagang gapo.” Angay nanggad na iladawan kaini an makalangit na mga materyales sa pagpatindog! Dai nang ibang orog pang pambihira. An suanoy na kaban nin tipan napapatos nin anas na bulawan, asin sa Biblia an elementong ini parateng nagrerepresentar sa mga bagay na marahay asin mahalaga. (Exodo 25:11; Talinhaga 25:11; Isaias 60:6, 17) Alagad an bilog na Bagong Jerusalem, asin pati an tinampo kaiyan, na ginibo sa “anas na bulawan na siring sa malinaw na salming,” naglaladawan sa kagayonan asin sa natural na kahalagahan na nakalulunos sa imahinasyon.

11. Ano an nagsisierto na an makompuwesto sa Bagong Jerusalem magkikinang sa pinakahalangkaw na klase nin espirituwal na kadalisayan?

¹¹ Daing tawong paratunaw nin bulawan an makapoprodusir nin siring kadalisay na bulawan. Alagad si Jehova an Poon na Paradalisay. Sia nagtutukaw “bilang paradalisay asin paralinig nin pirak,” asin dinadalisay nia an indibiduwal, maimbod na mga miembro kan espirituwal na Israel “siring sa bulawan asin siring sa pirak,” na hinahale sainda an gabos na ati. Solamenteng an mga indibiduwal na tunay na dinalisay asin lininig an sa katapustapusi makompuwesto sa Bagong Jerusalem, asin sa paaging ini ipinatitindog ni Jehova an siudad na may nabubuhay na mga materyales sa pagpatindog na nagkikinang sa pinakahalangkaw na klase nin espirituwal na kadalisayan.—Malaquias 3:3, 4.

12. Ano an ipinaheheling kan katunayan na (a) an mga pundasyon kan siudad naaadornohan nin 12 mahalagang gapo? (b) an mga tata kan siudad mga perlas?

¹² Maski an mga pundasyon kan siudad magayon, na naaadornohan nin 12 mahalagang mga gapo. Ini nagpapagirumdom sa suanoy na Judiong halangkaw na saserdote, na sa seremonyal na mga aldaw may sulot na efod na naaadornohan nin 12 manlaenlaen na mahalagang gapo na garo kaagid kan mga ilinadawan digdi. (Exodo 28:15-21) Sierto nanggad na bako ining pagkanorongod sana! Imbes, iyan nagdodoon sa makasaserdoteng pagpunsionar kan Bagong Jerusalem, na dian si Jesus, an mamuraway na Halangkaw na Saserdote, iyo an “ilaw.” (Kapahayagan 20:6; 21:23; Hebreo 8:1) Siring man, paagi sa Bagong Jerusalem ipaaabot sa katawohan an mga pakinabang kan ministeryo kan halangkaw na pagkasaserdote ni Jesus. (Kapahayagan 22:1, 2) An 12 tata kan siudad, na an lambang saro perlas na may dakulang kagayonan, nagpapagirumdom kan ilustrasyon ni Jesus na ibinaing an Kahadean sa perlas na may dakulang halaga. An gabos na nag-aagi sa mga tatang idto kaipuhan na magpaheling nin tunay na apresasyon sa espirituwal na mga bagay.—Mateo 13:45, 46; ikomparar an Job 28:12, 17, 18.

Sarong Siudad nin Liwanag

13. Ano an masunod na sinabi ni Juan manongod sa Bagong Jerusalem, asin taano an siudad ta dai nangangaipo nin ano man na literal na templo?

¹³ Kan panahon ni Salomon, an Jerusalem pinangengenotan kan templo na ipinatindog sa pinakahalangkaw na lugar sa Bukid nin Moria sa amihanan. Alagad kumusta an Bagong Jerusalem? Sinasabi ni Juan: “Asin dai ako nakaheling nin templo dian, huli ta si Jehova Dios na Makakamhan sa gabos an templo kaiyan, siring man an Kordero. Asin an siudad dai na mangangaipo kan aldaw o kan bulan tanganing paliwanagon iyan, huli ta an kamurawayan nin Dios iyo an nagpaliwanag kaiyan, asin an ilaw kaiyan iyo an Kordero.” (Kapahayagan 21:22, 23) An totoo, dai kaipuhan na magpatindog nin literal na templo digdi. An suanoy na templong Judio arogan sana, asin an katunayan kan arogan na iyan, an mamuraway na espirituwal na templo, nag-eksister na magpoon kan linahidan ni Jehova si Jesus bilang Halangkaw na Saserdote kan 29 C.E. (Mateo 3:16, 17; Hebreo 9:11, 12, 23, 24) An templo nangangaipo man nin makasaserdoteng grupo na magdodolot nin mga atang ki Jehova sa kapakanan kan banwaan. Alagad an gabos na kabtang kan Bagong Jerusalem mga saserdote. (Kapahayagan 20:6) Asin an dakulang atang, an sangkap na buhay bilang tawo ni Jesus, idinolot nin makasaro sa gabos na panahon. (Hebreo 9:27, 28) Saro pa, si Jehova mismo madaling manompongan kan gabos na nabubuhay sa siudad.

14. (a) Taano an Bagong Jerusalem ta dai nangangaipo nin aldaw asin bulan tanganing magliwanag dian? (b) Ano an ihinula ni Isaias manongod sa unibersal na organisasyon, asin paano kalabot an Bagong Jerusalem digdi?

¹⁴ Kan an kamurawayan ni Jehova nag-agi ki Moises sa Bukid nin Sinai, iyan nagpangyari sa lalauogon ni Moises na magliwanag na gayo kaya kinaipuhan na tahoban nia iyan sa saiyang kapwa mga Israelitas. (Exodo 34:4-7, 29, 30, 33) Kaya, naiimahinar daw nindo an kaliwanagan kan siudad na permanenteng naliliwanagan kan kamurawayan ni Jehova? An siring na siudad dai nin banggi. Dai iyan nangangaipo nin literal na aldaw o bulan. Iyan magliliwanag sagkod lamang. (Ikomparar an 1 Timoteo 6:16.) An Bagong Jerusalem nakokobrehan kan klaseng iyan nin maliwanag na kakinangan. Iyo nanggad, an nobyang ini asin an Nobyong Hade kaiyan an nagigin kabisera kan unibersal na organisasyon ni Jehova—an saiyang “babae,” “an Jerusalem na nasa itaas”—na manongod kaiyan naghula si Isaias: “Para sa saimo an aldaw bako nang an liwanag kun aldaw, asin para sa liwanag an mismong bulan dai na matao saimo nin ilaw. Asin si Jehova an magigin daing sagkod na ilaw para sa saimo, asin an saimong Dios iyo an magigin saimong kagayonan. An saimong aldaw dai na masolnop, ni masadit man an saimong bulan; huli ta si Jehova iyo an magigin daing sagkod na ilaw para sa saimo, asin matatapos na an mga aldaw kan saimong pagmondo.”—Isaias 60:1, 19, 20; Galacia 4:26.

Sarong Liwanag Para sa mga Nasyon

15. Anong mga tataramon sa Kapahayagan manongod sa Bagong Jerusalem an kaagid kan hula ni Isaias?

¹⁵ An iyo man sanang hulang ini naghula man: “Asin an mga nasyon maduruman nanggad sa saimong liwanag, asin an mga hade sa kaliwanagan kan saimong pagsirang.” (Isaias 60:3) An Kapahayagan nagpapaheling man na kairiba sa mga tataramon na ini an Bagong Jerusalem: “Asin an mga nasyon maglalakaw paagi sa liwanag kaiyan, asin an mga hade kan daga magdadara dian kan saindang kamurawayan. Asin an darakulang tata kaiyan dai noarin man pipintoan kun aldaw, huli ta mayo dian nin banggi. Asin dadarahon ninda dian an kamurawayan asin dangog kan mga nasyon.”—Kapahayagan 21:24-26.

16. Sairisay an “mga nasyon” na maralakaw paagi sa liwanag kan Bagong Jerusalem?

¹⁶ Sairisay an “mga nasyon” na ini na maglalakaw paagi sa liwanag kan Bagong Jerusalem? Sinda an mga banwaan, na dating kabtang kan mga nasyon kan maraot na kinaban na ini, na naghimate sa liwanag na nagsirang paagi sa mamuraway na langitnon na siudad na ini. Pangenot sainda an dakulang kadaklan, na nagruluwas na hale sa “gabos na nasyon asin tribo asin banwaan patin tataramon” asin nagsasaramba sa Dios aldaw asin banggi kairiba kan grupong Juan. (Kapahayagan 7:9, 15) Pakatapos na maghilig hale sa langit an Bagong Jerusalem asin gamiton ni Jesus an mga liyabe nin kagadanan asin nin Hades sa pagbuhay liwat sa mga gadan, iibanan sinda nin minilyon pa, na sa orihinal hale sa “mga nasyon,” na namoot ki Jehova asin sa saiyang Aki, an arog-Korderong Agom kan Bagong Jerusalem.—Kapahayagan 1:18.

17. Sairisay an “mga hade sa daga” na “magdadara kan saindang kamurawayan” sa Bagong Jerusalem?

¹⁷ Sairisay kun siring, an “mga hade kan daga” na “magdadara dian kan saindang kamurawayan”? Sinda bakong an literal na mga hade sa daga bilang sarong grupo, huli ta sinda mapasiring sa kalaglagan sa pakilaban sa Kahadean nin Dios sa Armagedon. (Kapahayagan 16:14, 16; 19:17, 18) An mga hade daw iyo an ibang haralangkaw an ranggo sa mga nasyon na nagin kabtang kan dakulang kadaklan, o sinda daw an binuhay liwat na mga hade na magpapasakop sa Kahadean nin Dios sa bagong kinaban? (Mateo 12:42) Bako nanggad, huli ta sa kadaklan na kabtang, an kamurawayan kan siring na mga hade kinabanon asin haloy nang napara. Kaya, an “mga hade sa daga,” na nagdadara kan saindang kamurawayan sa Bagong Jerusalem siertong an 144,000, na “binakal . . . hale sa lambang tribo asin tataramon asin banwaan patin nasyon” tanganing magsakop bilang mga hade kairiba kan Kordero, si Jesu-Cristo. (Kapahayagan 5:9, 10; 22:5) Dinadara ninda an saindang itinao nin Dios na kamurawayan sa siudad na iyan tanganing dugangan an kaliwanagan kaiyan.

18. (a) Sairisay an dai ibibilang sa Bagong Jerusalem? (b) Sairisay sana an palalaogon sa siudad?

¹⁸ Nagpadagos si Juan: “Alagad sa ano man na paagi dai makalalaog dian an ano man na bakong banal asin an siisay man na nagsasagibo nin nakababaldeng bagay asin nin kaputikan; idto sanang nakasurat sa balumbon nin buhay kan Kordero an makalalaog dian.” (Kapahayagan 21:27) Dai nin siisay man na nadigtaan kan palakaw nin mga bagay ni Satanas an puwedeng magin kabtang kan Bagong Jerusalem. Maski ngani an mga tata kaiyan permanenteng nakabukas, dai nin siisay man na “nagsasagibo nin nakababaldeng bagay asin nin kaputikan” an palalaogon. Dai nin mga apostata sa siudad na iyan ni nin ano man na kabtang kan Dakulang Babilonya. Asin kun an siisay man magprobar na langhadan an siudad paagi sa pagramog sa mga miembro kaiyan sa ngapit mantang sinda nasa daga pa, an saindang mga pagmamaigot tatapuson. (Mateo 13:41-43) Solamenteng an mga “nasusurat sa balumbon nin buhay kan Kordero,” an 144,000, an sa katapustapusi maralaog sa Bagong Jerusalem.b—Kapahayagan 13:8; Daniel 12:3.

An Salog kan Tubig nin Buhay

19. (a) Paano ilinadawan ni Juan an Bagong Jerusalem bilang agihan kan mga bendisyon sa katawohan? (b) Noarin mabolos an “salog nin tubig nin buhay,” asin paano niato naaraman?

¹⁹ An magayon na Bagong Jerusalem magpapaabot kan makangangalas na mga bendisyon sa katawohan sa daga. Ini an masunod na nanodan ni Juan: “Asin ipinaheling nia sa sako an salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero pasiring sa tahaw kan lansangan kaiyan.” (Kapahayagan 22:1, 2a) Noarin magbobolos an “salog” na ini? Mantang iyan nagbobolos “hale sa trono nin Dios asin kan Kordero,” iyan kaipuhan na pakatapos sana na magpoon an aldaw kan Kagurangnan kan 1914. Iyan an panahon para sa pangyayari na ipinahayag kan pagpatanog kan ikapitong trumpeta asin kan mamuraway na paisi: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo.” (Kapahayagan 11:15; 12:10) Bago an petsang iyan, “an Kordero” dai pa nagtukaw sa trono bilang an Mesiyanikong Hade. Dugang pa, mantang an salog nagbobolos sa lansangan kan Bagong Jerusalem, an kaotoban kan bisyon siertong pakatapos kan kalaglagan kan kinaban ni Satanas, kun an Bagong Jerusalem ‘naghilig na hale sa langit hale sa Dios.’—Kapahayagan 21:2.

20. Ano an nagpaparisa na may makukua nang tubig nin buhay?

²⁰ Bako ini an enot na pangyayari na an nagtataong buhay na tubig iinalok sa katawohan. Kan anion pa sia sa daga, nagtaram si Jesus manongod sa tubig na nagtataong buhay na daing sagkod. (Juan 4:10-14; 7:37, 38) Saro pa, si Juan makadadangog na kan mamomoton na imbitasyon: “An espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) An imbitasyon na ini ibinabalangibog minsan ngonyan, na nagpapaheling na may makukua nang tubig nin buhay. Alagad sa bagong kinaban, an mga tubig na ini magbobolos hale sa trono nin Dios asin paagi sa Bagong Jerusalem bilang sarong tunay na salog.

21. Ano an irinerepresentar kan “salog nin tubig nin buhay,” asin paano an bisyon ni Ezequiel kan salog na ini nakatabang sato na makaaram?

²¹ Ano ining “salog nin tubig nin buhay”? An literal na tubig sarong mahalagang elemento sa buhay. Kun daing pagkakan an tawo puwedeng mabuhay nin nagkapirang semana, alagad kun daing tubig magagadan sia sa laog nin sarong semana. An tubig panlinig man asin mahalaga sa salud. Kaya, an tubig nin buhay siertong nagrerepresentar sa bagay na mahalaga sa buhay asin salud kan katawohan. Si propeta Ezequiel tinawan man nin bisyon kaining “salog nin tubig nin buhay,” asin sa saiyang bisyon, an salog nagbobolos hale sa templo sa Jerusalem asin pasiring sa Gadan na Dagat. Dangan, milagro nin mga milagro! An daing buhay, nasasagom nin kemikal na katubigan na iyan naliwat na magin matabang na tubig na pano nin sira! (Ezequiel 47:1-12) Iyo, an salog sa bisyon nagtao nin buhay sa dating mga gadan, na nagpapatunay na an salog nin tubig nin buhay naglaladawan sa probisyon nin Dios paagi ki Jesu-Cristo sa pagbalik nin buhay tawo sa “gadan” na rasa nin tawo. An salog na ini “malinaw siring sa kristal,” na nagpapaheling kan kalinigan asin kabanalan kan mga probisyon nin Dios. Iyan bakong siring kan nadigtaan nin dugo, nakagagadan na “katubigan” kan Kakristianohan.—Kapahayagan 8:10, 11.

[Mga Nota sa Ibaba]