Kapahayagan—An Mamuraway na Kulminasyon Kaiyan Harani Na!
Kasumpay kan Kapitulo 34: Naliwanagan Na an Sarong Makangingirhat na Misteryo
Katoninongan Asin Katiwasayan—An Daing Kamanungdanan na Paglaom
10, 11. (a) Ano an iprinoklamar kan NU kan 1986, asin ano an resulta? (b) Pirang “relihiyosong pamilya” an nagtiripon sa Assisi, Italia, tanganing mamibi para sa katoninongan, asin sinimbag daw nin Dios an siring na mga pamibi? Ipaliwanag.
10 Sa paghingoa na suportaran an mga paglaom kan katawohan, ipinahayag kan Naciones Unidas an 1986 bilang an “Internasyonal na Taon nin Katoninongan,” na may temang “Sa Pag-iingat kan Katoninongan Asin Ngapit kan Katawohan.” An nagraralaban na mga nasyon pinakiolayan na isuko an saindang mga armas, nin kisuerra sarong taon. Ano an simbag ninda? Sono sa report kan International Peace Research Institute, labing limang milyon na soldados an nagadan sa paglalabanan kan 1986 sana! Maski ngani may nagkapirang espesyal na sensilyo asin selyo kan selebrasyon, dikit sana an ginibo kan kadaklan na nasyon sa pagpaoswag kan pasohan sa katoninongan kan taon na iyan. Alagad, an mga relihiyon sa kinaban—na perming nagmamawot nin marahay na relasyon sa NU—ipinublikar an taon sa manlaenlaen na paagi. Kan Enero 1, 1986, inomaw ni Papa Juan Paulo II an gibohon kan NU asin idinusay an bagong taon sa katoninongan. Asin kan Oktubre 27, tiniripon nia an mga lider nin dakol na relihiyon sa kinaban sa Assisi, Italia, tanganing mamibi para sa katoninongan.
11 Sinimbag daw nin Dios an siring na mga pamibi para sa katoninongan? Bueno, kiisay na Dios namibi an relihiyosong mga lider na idto? Kun hahapoton nindo sinda, an lambang grupo magtatao nin manlaenlaen na simbag. Igwa daw nin koleksion nin minilyon na dios na makadadangog asin masimbag kan mga kahagadan na ginibo sa manlaenlaen na paagi. An dakol sa mga nakikabtang nagsasamba sa Trinidad nin Kakristianohan.a An mga Budhista, Hindu, asin iba pa namibi sa kadakoldakol na dios. Sa kabilogan, 12 “relihiyosong pamilya” an nagtiripon, na irinepresentar kan mga bantog siring kan Anglikanong Arsobispo nin Canterbury, Dalai Lama kan Budhismo, sarong obispo kan Rusong Ortodokso, an presidente kan Shinto Shrine Association kan Tokyo, Aprikanong animista, asin duwang Amerikanong Indian na nadedekorasyonan nin takop sa payo na gibo sa mga pakpak nin gamgam. Minsan siring, iyan de-kolor na grupo, na angay sa pasale sa TV. Sarong grupo an namibi na daing ontok sa laog nin 12 oras. (Ikomparar an Lucas 20:45-47.) Alagad igwa daw sa mga pamibing idto na nakalampas sa panganoron na naglilindong sa bilog na pagtiripon? Dai, huli sa minasunod na mga rason:
12. Huli sa anong mga rason dai sinimbag nin Dios an mga pamibi para sa katoninongan kan relihiyosong mga lider sa kinaban?
12 Kabaliktaran kan mga “naglalakaw sa ngaran ni Jehova,” mayo ni saro sa mga relihiyonistang idto an namibi ki Jehova, an nabubuhay na Dios, na an ngaran naglataw nin mga 7,000 beses sa orihinal na teksto kan Biblia. (Miqueas 4:5; Isaias 42:8, 12)b Bilang sarong grupo, dai sinda nagdolok sa Dios sa ngaran ni Jesus, an mayoriya ngani sainda dai nagtutubod ki Jesu-Cristo. (Juan 14:13; 15:16) Mayo sainda an naggigibo kan kabotan nin Dios para sa panahon niato, na iyo an pagbalangibog sa bilog na kinaban kan madatong na Kahadean nin Dios—bakong an NU—bilang an tunay na paglaom nin katawohan. (Mateo 7:21-23; 24:14; Marcos 13:10) Sa kadaklan na kabtang, an saindang relihiyosong mga organisasyon napalabot sa madugong mga ralaban sa kasaysayan, kabilang an duwang guerra mundial sa siglong ini. Sa sainda, sinabi nin Dios: “Minsan pa mamibi kamo nin dakol, dai ako maghihinanyog; pano nin dugo an saindong mga kamot.”—Isaias 1:15; 59:1-3.
13. (a) Taano ta pambihira na an relihiyosong mga lider sa kinaban nakisumaro sa NU sa pag-arang para sa katoninongan? (b) An mga kurahaw para sa katoninongan matatapos sa anong banal an pagkahulang kulminasyon?
13 Saro pa, maririsang gayo na an mga relihiyosong lider sa kinaban nakikisumaro sa Naciones Unidas sa pag-arang nin katoninongan sa panahon na ini. Mawot nindang impluwensiahan an NU para sa sainda mismong bentaha, nangorogna sa modernong panahon na ini na an kadakol nindang sakop nagbabaya na sa relihiyon. Siring kan bakong maimbod na mga lider sa suanoy na Israel, nagkukurahaw sinda: “ ‘Igwa nin katoninongan! Igwa nin katoninongan!’ mantang mayo man nin katoninongan.” (Jeremias 6:14) Siertong an saindang kurahaw para sa katoninongan magpapadagos, na mag-oorog bilang patunay sa kulminasyon na manongod kaiyan si apostol Pablo naghula: “An aldaw ni Jehova madatong na kabaing na gayo nin parahabon kun banggi. Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda siring sa kolog kan bados na babae; asin dai sinda makaliligtas minsan sa anong paagi.”—1 Tesalonica 5:2, 3.
14. Ano an magigin porma kan kurahaw na “Katoninongan asin katiwasayan,” asin paano an saro makalilikay na madaya kaiyan?
14 Ano an magigin porma kaining mahalagang pagkurahaw nin “Katoninongan asin katiwasayan!”? Sinasambit digdi na pambihira bago an biglang pagkalaglag kan mga nagkukururahaw na idto. Kaya, iyan dapat na mas makosog kisa kan nakaaging mga deklarasyon kan mga lider sa kinaban. Siertong iyan pambilog na kinaban. Alagad, iyan pan-ibabaw sana. Sa irarom, mayo nin tunay na nabago. An kapasloan, pagkaongis, krimen, pagbagsak nin pamilya, inmoralidad, helang, kamondoan, asin an kagadanan anion pa man giraray. Iyan an dahelan na an maabot na pagkurahaw makadadaya sa mga bakong puka sa hula kan Biblia. Alagad dai iyan dapat na makadaya saindo, kun kamo nagin puka sa kahulogan kan mga pangyayari sa kinaban asin nagkukuyog sa makahulang mga patanid sa Tataramon nin Dios.—Marcos 13:32-37; Lucas 21:34-36.
[Mga Nota sa Ibaba]
a An ideya nin Trinidad naghale sa suanoy na Babilonya, kun saen an dios nin aldaw na si Shamash, an dios nin bulan na si Sin, asin an dios nin bitoon na si Ishtar sinamba bilang trinidad. Sinunod kan Egipto an arogan na ini, sa pagsamba ki Osiris, Isis, asin Horus. An pangenot na dios nin Asiria, si Assur, ilinadawan na may tolong payo. Sa pagsunod sa iyo man sanang arogan, manonompongan an mga imahen sa mga simbahan Katoliko na nagpapaheling sa Dios na may tolong payo.
b An Webster’s Third New International Dictionary kan 1981 nagtao nin kahulogan ki Jehova Dios bilang “an kaharohalangkaweng dios na minimidbid asin an solamenteng dios na sinasamba kan mga Saksi ni Jehova.”
[Kahon sa pahina 25]
An Masakit Paniwalaan na “Katoninongan”
Minsan ngani an 1986 iprinoklamar kan NU bilang an Internasyonal na Taon nin Katoninongan, nag-orog an siring sa paghugot na paorumbasan sa armas. An World Military and Social Expenditures 1986 nagtao kaining nakapagpapapensar na mga detalye:
Kan 1986 an panglobong gastos sa militar nakaabot sa $900 na ribong milyon.
An sarong oras na panglobong gastos sa militar igo na tanganing tawan nin imunisasyon an 3.5 milyones na nagagadan taon-taon huli sa malilikayan kutanang nakaiimpeksion na helang.
Sa bilog na kinaban, saro sa lima katawo an nabubuhay sa grabeng kadaihon. Ini gabos na nagugutom na tawo mapakakakan sa laog nin sarong taon kan halaga na ginagastos kan kinaban sa armas sa duwang aldaw.
An eksplosibong enerhiya sa nakatambak na mga armas nuklear sa kinaban 160,000,000 na beses na mas mapuwersa kisa sa nagputok sa Chernobyl.
Ngonyan an sarong bomba nuklear puwedeng pabagsakon na may puwersa sa pagputok na labing 500 na beses na mas mapuwersa sa bombang ihinolog sa Hiroshima kan 1945.
An mga armas nuklear ngonyan may katimbang na labing sarong milyon na Hiroshima. Nagrerepresentar iyan sa 2,700 na beses kan nagputok na enerhiya kan Guerra Mundial II, kan 38 milyones katawo an nagadan.
An mga guerra nagin mas parate asin mas nakagagadan. An bilog na kabilangan kan mga nagadan sa guerra 4.4 milyones kan ika-18 siglo, 8.3 milyones kan ika-19 siglo, 98.8 milyones sa 86 na taon kan ika-20 siglo. Magpoon kan ika-18 siglo, an mga nagadan sa guerra nag-oswag nin labing anom na beses an rikas kisa sa populasyon kan kinaban. Nagkaigwa nin sampulong beses na kalabihan an nagagadan kada guerra sa ika-20 siglo kisa sa ika-19 siglo.