Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 37: Pagmondo Asin Paggayagaya sa Pagkatapos kan Babilonya
11, 12. (a) Paano tinataraman ngonyan kan makosog na anghel an Dakulang Babilonya? (b) Paano si Jeremias naghula manongod sa apostatang Jerusalem, asin ano an kahulogan kaiyan para sa satong aldaw?
11 Ngonyan tinataraman kan makosog na anghel an Dakulang Babilonya, na sinasabi: “Asin an tingog nin mga paraawit na nag-aakompanyar kan saindang sadiri sa harpa asin nin mga musikero asin mga paraplauta asin nin mga paratrumpeta dai na noarin man madadangog giraray sa saimo, asin mayo na nin paragibo nin ano man na bagay na makukua giraray sa saimo, asin mayo na nin tanog nin gilingan na madadangog giraray saimo, asin mayo na nin liwanag nin lampara na masirang giraray saimo, asin mayo na nin tingog nin nobyo asin nobya an madadangog giraray saimo; huli ta an saimong mga parabariwas iyo an mga namomoon sa daga, huli ta paagi kan saimong espiritistikong mga gawe an gabos na nasyon nadayaan.”—Kapahayagan 18:22, 23.
12 Sa nakaaagid na mga termino, si Jeremias naghula manongod sa apostatang Jerusalem: “Hahaleon ko sa sainda an tanog nin kaogmahan asin an tanog nin kagayagayahan, an tingog kan nobyo asin an tingog kan nobya, an tanog kan gilingan asin an liwanag kan ilawan. Asin an bilog na dagang ini magigin gaba, bagay na pinagngangalasan.” (Jeremias 25:10, 11) Bilang an pangenot na kabtang kan Dakulang Babilonya, an Kakristianohan magigin daing buhay na kagabaan, arog kan buhay na ilinadawan kan pagkagaba nin Jerusalem pakalihis kan 607 B.C.E. An Kakristianohan na dati naggagayagaya asin buhay na buhay sa pan-aroaldaw na ribok manonompongan an sadiri na daog asin inabandono.
13. Anong biglang pagkaliwat an mangyayari sa Dakulang Babilonya, asin ano an epekto sa saiyang “mga parabariwas”?
13 An totoo, arog kan sabi digdi kan anghel ki Juan, an bilog na Dakulang Babilonya maliliwat hale sa makapangyarihan, internasyonal na imperyo asin magigin alang, garo disyertong kapatagan. An saiyang “mga parabariwas,” kaiba an haralangkaw an ranggong mga milyonaryo, ginamit an saiyang relihiyon para sa personal na bentaha o bilang pantakop, asin nanompongan kan klero na maganansia na umiba sa sainda sa kasikatan. Alagad ta an mga parabariwas na iyan mawawaran kan Dakulang Babilonya bilang komplise. Dai na nia madadaya an mga nasyon sa daga paagi sa saiyang mistikong relihiyosong mga gibo.
Grabeng Kasalan sa Dugo
14. Anong dahelan an itinatao kan makosog na anghel sa pagigin masakit kan paghokom ni Jehova, asin ano an kaagid na isinabi ni Jesus kan sia yaon digdi sa daga?
14 Bilang konklusyon, sinasabi kan makosog na anghel kun taano ta siring kasakit kan paghokom ni Jehova sa Dakulang Babilonya. “Iyo,” sabi kan anghel, “sa saiya nakua an dugo kan mga propeta asin kan mga banal asin kan gabos na ginadan sa daga.” (Kapahayagan 18:24) Kan nasa daga, sinabihan ni Jesus an mga namomoon sa relihiyon sa Jerusalem na sinda maninimbag sa “gabos na matanos na dugo na pinabolos sa daga, poon sa dugo kan matanos na si Abel” padagos. Kaya, an bikong kapag-arakian na idto linaglag kan 70 C.E. (Mateo 23:35-38) Ngonyan, an saro pang kapag-arakian nin mga relihiyonista may kasalan sa dugo para sa paglamag kaiyan sa mga lingkod nin Dios.
15. Paano an Iglesya Katolika sa Nazi Alemania nagkasala sa dugo sa duwang paagi?
15 Sa saiyang librong The Catholic Church and Nazi Germany, si Guenter Lewy nagsurat: “Kan an mga Saksi ni Jehova ipangalad sa Bavaria kan Abril 13 [1933] inako ngani kan Iglesya an asignasyon kan Ministri nin Edukasyon asin Relihiyon na ireport an siisay man na miembro kan sekta na nag-ootob pa kan ipinangangalad na relihiyon.” Kaya an Iglesya Katolika may kabtang sa paninimbagan para sa pagdara nin rinibong Saksi sa mga kampo de konsentrasyon; an kamot kaiyan nadigtaan kan dugo nin ginatos na Saksing ginadan. Kan ipaheling nin hoben na mga Saksi, arog ni Wilhelm Kusserow, na kaya nindang magadan nin mapuso paagi sa firing squad, nagdesisyon si Hitler na an firing squad sobra karahay para sa mga nagsasayumang magsoldados huli sa konsensia; kaya an tugang ni Wilhelm na si Wolfgang, sa edad na 20 anyos, nagadan sa gilotina. Kadungan kaiyan, an Iglesya Katolika sinasadol an hoben na mga Katolikong Aleman na magadan sa hukbo kan saindang nasyon. Malinaw na maheling an kasalan sa dugo kan iglesya!
16, 17. (a) Anong kasalan sa dugo an dapat na singilon sa Dakulang Babilonya, asin paano an Batikano nagkasala sa dugo manongod sa mga Judio na nagadan sa lagduan na mga pangadan kan mga Nazi? (b) Ano an sarong paagi na an falsong relihiyon maninigong basulon para sa paggadan sa minilyon na tawo sa ginatos na guerra sa siglo sanang ini?
16 Minsan siring, sinasabi kan hula na an dugo kan “gabos na ginadan sa daga” dapat na singilon sa Dakulang Babilonya. Iyan totoo nanggad sa modernong mga panahon. Halimbawa, mantang an intrigang Katoliko nakatabang na si Hitler magin makapangyarihan sa Alemania, an Batikano may grabeng kasalan sa dugo mapadapit sa anom na milyon na Judio na nagadan sa mga lagduan na pangadan na Nazi. Saro pa, sa ika-20 siglo sanang ini, labing sanggatos milyones katawo an nagadan sa ginatos na guerra. Dapat daw na basolon an falsong relihiyon sa bagay na ini? Iyo, sa duwang paagi.
17 An sarong paagi iyo na an dakol na guerra konektado sa relihiyosong pagkalaenlaen. Halimbawa, an kadahasan sa India sa pag-oltanan nin mga Muslim asin Hindu kan 1946-48 relihiyon an motibo. Ginatos na ribong buhay an nawara. An paglalaban kan Iraq asin Iran kan mga taon nin 1980 konektado sa pagkakalaen sektaryano, na ginatos na ribo an nagadan. An kadahasan sa pag-oltanan nin mga Katoliko asin Protestante sa Northern Ireland kuminua nin rinibong buhay. An nagpapadagos na kadahasan sa Lebanon may relihiyosong pasisikadan. Sa pagsiyasat sa bagay na ini, an kolumnistang si C. L. Sulzberger nagsabi kan 1976: “Makamomondo na seguro kabanga o labi pa sa mga guerrang pinaglalabanan ngonyan sa bilog na kinaban magsalang hayag na pag-iiwal nin relihiyon o may labot sa relihiyosong iriwal.” An totoo, siring an nangyari sa bilog na maribok na kasaysayan kan Dakulang Babilonya.
18. Ano an ikaduwang paagi na nagkasala sa dugo an mga relihiyon sa kinaban?
18 Ano an ikaduwang paagi? Sa punto-de-vista ni Jehova, an mga relihiyon sa kinaban may kasalan sa dugo ta dai ninda tinokdoan sa nakakokombensir na paagi an saindang mga parasunod kan katotoohan kan mga kahagadan ni Jehova sa saiyang mga lingkod. Dai ninda tinokdoan sa nakakokombensir na paagi an mga tawo na an tunay na mga parasamba sa Dios dapat na umarog ki Jesu-Cristo asin magpaheling nin pagkamoot sa iba dawa ano an saiyang nasyonal na ginikanan. (Miqueas 4:3, 5; Juan 13:34, 35; Gibo 10:34, 35; 1 Juan 3:10-12) Huli ta an mga relihiyon na minakompuwesto sa Dakulang Babilonya dai tinokdoan kan mga bagay na ini, an saindang mga miembro napadamay sa internasyonal na iriwal. Ini risang marhay sa duwang guerra kan enot na kabangaan kan siglong ini, na kapwa nagpoon sa Kakristianohan asin nagbunga kan pagginadanan nin magkakairiba sa relihiyon! Kun an gabos na naghihingakong Kristiano nangapot sa mga prinsipyo kan Biblia, seguro dai noarin man mangyayari an mga guerrang idto.
19. Ano an grabeng kasalan sa dugo kan Dakulang Babilonya?
19 An binabasol ni Jehova para sa gabos na pagpabolos na ini nin dugo iyo an Dakulang Babilonya. Kun an mga namomoon sa relihiyon, asin partikularmente an mga nasa Kakristianohan, tinokdoan an saindang mga miembro kan katotoohan sa Biblia, dai kutana nangyari an siring kagrabeng pagpabolos nin dugo. Tunay, kun siring, direkta o bakong direkta, an Dakulang Babilonya—an dakulang patotot asin an pankinaban na imperyo nin falsong relihiyon—dapat na manimbag ki Jehova bako sanang para sa “dugo kan mga propeta asin kan mga banal” na saiyang pinaglamag asin ginadan kundi para sa dugo “kan gabos na ginadan sa daga.” An Dakulang Babilonya talagang may grabeng kasalan sa dugo. Makaoogma kun mangyari na an saiyang ultimong kalaglagan!