Maninigo daw Kamong Tumubod sa Trinidad?: An Dios daw Perming Mas Halangkaw ki Jesus?
1, 2. Ano an malinaw na ipinaheling ni Jesus manongod sa saiyang relasyon sa Dios?
SI Jesus nungka na naghingakong Dios. An gabos na sinabi nia manongod sa saiya man sana nagpaparisa na dai nia ibinilang an saiyang sadiri na kapantay nin Dios sa ano man na paagi—sa kapangyarihan, sa kaaraman, sa edad.
2 Sa gabos na panahon kan saiyang buhay, baga man sa langit o sa daga, an saiyang pagtaram asin gawe-gawe nagpaparisa nin pagpasakop sa Dios. An Dios an perming mas halangkaw, si Jesus an mas hababa na linalang nin Dios.
Ipinamimidbid an Kalaenan ni Jesus sa Dios
3. Ano an sinabi ni Jesus manongod sa saiyang sadiri na nagpaheling na sia separado sa Dios?
3 Paorootro, ipinaheling ni Jesus na sia linalang na separado sa Dios asin na sia, si Jesus, may Dios na mas halangkaw sa saiya, Dios na saiyang sinasamba, Dios na inaapod niang “Ama.” Sa pamibi sa Dios, an boot sabihon, sa Ama, si Jesus nagsabi, ‘Ika, an iyo sanang tunay na Dios.’ (Juan 17:3) Sa Juan 20:17 sinabihan nia si Maria Magdalena: “Ako masakat sa sakong Ama asin sa saindong Ama, sa sakong Dios asin sa saindong Dios.” (RS, edisyon na Katoliko) Sa 2 Corinto 1:3 pinatutunayan ni apostol Pablo an relasyon na ini: “Omawon logod an Dios asin Ama kan satong Kagurangnan na si Jesu-Cristo.” Mantang si Jesus may Dios, an saiyang Ama, dai man sia puwedeng magin an Dios na iyan.
4. Paano ipinarisa ni apostol Pablo na an Dios asin si Jesus separado asin magkalaen?
4 Si apostol Pablo dai nagduwaduwa sa pagtaram manongod ki Jesus asin sa Dios bilang magkalaen: “Sa sato igwa nin sarong Dios, an Ama, . . . asin igwa nin sarong Kagurangnan, si Jesu-Cristo.” (1 Corinto 8:6, JB) Ipinaheheling kan apostol an pagkakalaen kan masambitan nia “an presensia nin Dios asin ni Cristo Jesus patin kan piniling mga anghel.” (1 Timoteo 5:21, RS Common Bible) Kun paanong si Pablo nagtataram manongod ki Jesus asin sa mga anghel bilang magkalaen sa langit, iyo man si Jesus asin an Dios.
5. Mantang hinagad kan Pagboot ni Moises na duwang saksi an magpatunay sa sarong bagay, ano an ipinaheheling kaini manongod ki Jesus asin sa Dios sa saindang pagpatotoo?
5 An mga tataramon ni Jesus sa Juan 8:17, 18 makahulogan man. Sabi nia: “Sa saindong sadiring Pagboot nasusurat: ‘An patotoo nin duwang tawo totoo.’ Ako saro na nagpapatotoo dapit sa sakong sadiri, asin an Ama na nagsugo sako nagpapatotoo dapit sa sako.” Digdi ipinaheheling ni Jesus na sia asin an Ama, an boot sabihon, an Makakamhan sa gabos na Dios, kaipuhan na duwang magkalaen na persona, ta kun bako paano totoong magkakaigwa nin duwang saksi?
6. Paano ipinaheling ni Jesus, sa Marcos 10:18, na sia bakong kabtang nin pagka-Dios?
6 Orog pang ipinaheling ni Jesus na sia separado sa Dios sa pagsabi: “Taano ta inaapod mo akong marahay? Mayo nin siisay man na marahay kundi an Dios sana.” (Marcos 10:18, JB) Kaya an boot sabihon ni Jesus mayo nin arog karahay sa Dios, minsan si Jesus. An Dios marahay sa paagi na nagsisiblag sa saiya ki Jesus.
An Mapagpasakop na Lingkod nin Dios
7. Anong mga isinabi ni Jesus an nagpapaheling kan pagigin mas halangkaw nin Dios?
7 Paorootro, si Jesus nagsasabi nin mga arog kaini: “An Aki dai makagigibo nin ano man sa sadiri niang kagustohan, an magigibo sana nia an naheheling niang ginigibo kan saiyang Ama.” (Juan 5:19, The Holy Bible, ni Monsenyor R. A. Knox) “Ako naghilig sa langit sa paggibo, bakong kan boot ko, kundi kan boot kaidtong nagsugo sa sako.” (Juan 6:38) “An sakong itinotokdo bako ko, kundi kaidtong nagsugo sa sako.” (Juan 7:16) Bako daw na an nagsugo mas halangkaw sa isinugo?
8. Paano an sarong ilustrasyon na itinao ni Jesus nagpahayag kan saiyang pagpapasakop sa Dios?
8 An relasyon na ini maririsa sa ilustrasyon ni Jesus manongod sa ubasan. Ibinaing nia an Dios, an saiyang Ama, sa kagsadiri kan ubasan, na nagbiyahe nin harayo asin iwinalat iyan sa mga paralate, na nagrepresentar sa Judiong klero. Kan an kagsadiri magsugo nin oripon sa pagkua kan ibang bunga kan ubasan, an mga paralate hinampak an oripon asin pinahaleng daing dara. Dangan an kagsadiri nagsugo nin ikaduwang oripon, dangan nin ikatolo, na pareho nag-ako nin iyo man sanang tratamiento. Ultimo, an kagsadiri nagsabi: “Isusugo ko an sakong aking [si Jesus] namomotan. Tibaad pa igalang sia ninda.” Alagad ta an maraot na mga paralate nagsabi: “‘Ini iyo an magmamana; gadanon ta sia, tanganing mapasatuya an pamana.’ Kaya iinapon sia ninda sa luwas kan ubasan asin ginadan sia.” (Lucas 20:9-16) Sa siring ipinag-ilustrar ni Jesus an saiyang katongdan bilang saro na isinugo nin Dios sa pag-otob sa kabotan nin Dios, kun paano an sarong ama isinusugo an mapagpasakop na aki.
9. Ano an pagheling ki Jesus kan mga parasunod nia?
9 An pagheling ki Jesus kan saiyang mga parasunod perming bilang mapagpasakop na lingkod nin Dios, bakong kapantay nin Dios. Namibi sinda sa Dios manongod sa “saimong banal na lingkod na si Jesus, na saimong linahidan, . . . asin ginigibo an mga tanda asin ngangalasan paagi sa ngaran kan saimong banal na lingkod na si Jesus.”—Gibo 4:23, 27, 30, RS, edisyon na Katoliko.
An Dios Mas Halangkaw sa Gabos na Panahon
10. Paano an bautismo ni Jesus nagpapaheling na sia bakong Dios?
10 Sa kapinonan mismo kan ministeryo ni Jesus, kan sia bumutwa sa tubig na binautismohan saiya, an tingog nin Dios hale sa langit nagsabi: “Ini an sakong Aki, an namomotan, na sakong inooyonan.” (Mateo 3:16, 17) An sinasabi daw nin Dios sia man sana an aki nia, na inooyonan nia an saiyang sadiri, na isinugo nia an saiyang sadiri? Bako, an sinasabi kan Dios na Kaglalang iyo na sia, bilang an mas halangkaw, nag-ooyon sa sarong mas hababa, an saiyang Aking si Jesus, para sa maabot na gibohon.
11. Ano an ipinaririsa kan paglahid ni Jehova ki Jesus?
11 Ipinarisa ni Jesus an pagigin mas halangkaw kan saiyang Ama kan sia magsabi: “An espiritu ni Jehova yaon sako, huli ta linahidan nia ako na magpahayag kan maogmang bareta sa mga dukha.” (Lucas 4:18) An paglahid iyo an pagtao nin autoridad o sugo nin sarong mas halangkaw sa saro na mayo pa nin autoridad. Digdi malinaw na an Dios mas halangkaw, ta linahidan nia si Jesus, na tinatawan nia nin autoridad na mayo pa sa saiya kaidto.
12. Kan kaolay an ina nin duwang disipulo, paano ipinarisa ni Jesus an pagigin mas halangkaw kan Ama?
12 Liniwanag ni Jesus an pagigin mas halangkaw kan saiyang Ama kan an ina nin duwang disipulo makiolay na an saiyang mga aki tumukaw an saro sa too asin an saro sa wala ni Jesus kun sia maghade na sa saiyang Kahadean. Si Jesus nagsimbag: “Kun manongod sa mga tukawan sa sakong too asin sa sakong wala, an mga ini bakong sako an pagtao; iyan para sa mga inandaman kaiyan kan sakong Ama,” an boot sabihon, nin Dios. (Mateo 20:23, JB) Kun si Jesus an Makakamhan sa gabos na Dios, nasa saiya kutana an pagtao kan mga katongdan na iyan. Alagad ta dai iyan ikatatao ni Jesus, ta iyan itatao nin Dios, asin si Jesus bakong an Dios.
13. Ano an ipinaheheling kan mga pamibi ni Jesus?
13 An mismong mga pamibi ni Jesus makosog na halimbawa kan saiyang mas hababang kamugtakan. Kan si Jesus madali nang magadan, ipinaheling nia kun siisay an mas halangkaw sa saiya sa pamibi: “Ama, kun boot mo, halea an kopang ini sa sako. Minsan siring, mangyari logod, bakong an boot ko, kundi an boot mo.” (Lucas 22:42) Kiisay sia namimibi? Sa sarong kabtang kan saiyang sadiri? Bako, sia namimibi sa saro na biyong separado, sa saiyang Ama, sa Dios, na an kabotan mas halangkaw asin puwedeng laen man sa saiyang kabotan, an solamenteng Saro na kayang ‘haleon an kopang ini.’
14. Kan si Jesus madali nang magadan, paano ipinaheling kan saiyang kurahaw an pagigin mas halangkaw nin Dios?
14 Dangan, kan naghihigagdan na, si Jesus nagkurahaw: “Dios ko, Dios ko, tadaw ta pinabayaan mo ako?” (Marcos 15:34, JB) Kiisay nagkukurahaw si Jesus? Sa saiya man sana o sa sarong kabtang nia? Tunay na an kurahaw na, “Dios ko,” bakong gikan sa saro na ibinibilang an sadiri na Dios. Asin kun si Jesus Dios, kun siring siisay an nagpabaya sa saiya? Sia man sana? Iyan bakong makatanosan. Si Jesus nagsabi man: “Ama, sa saimong mga kamot idinodolot ko an sakong espiritu.” (Lucas 23:46) Kun si Jesus Dios, sa anong dahelan na idodolot nia an saiyang espiritu sa Ama?
15. Paano an kagadanan asin pagkabuhay liwat ni Jesus nagpapatunay tumang sa saiyang pagigin Dios?
15 Pagkagadan ni Jesus, sia nasa lolobngan sa laog nin mga tolong aldaw. Kun sia Dios, sala an Habacuc 1:12 sa pagsabi kaiyan na: “O sakuyang Dios, sakuyang Banal na Saro, dai ka nagagadan.” Pero sinasabi kan Biblia na si Jesus talagang nagadan asin daing pakaaram sa lolobngan. Asin siisay an buminuhay liwat ki Jesus hale sa mga gadan? Kun sia talagang gadan, dai nia puwedeng buhayon liwat an saiyang sadiri. Sa ibong na lado, kun sia bako man talagang gadan, an sagin pagkagadan nia dai kutana nakabayad kan pantubos sa kasalan ni Adan. Alagad ta talagang binayadan nia iyan nin biyo paagi sa saiyang tunay na pagkagadan. Kaya ‘an Dios an buminuhay liwat ki Jesus paagi sa paghubad kan mga sakit nin kagadanan.’ (Gibo 2:24) An mas halangkaw, an Dios na Makakamhan sa gabos, binuhay an mas hababa, an saiyang lingkod na si Jesus, hale sa mga gadan.
16. Taano an kakayahan ni Jesus na magmilagro ta dai nagpapaheling na sia Dios?
16 An kakayahan daw ni Jesus na magmilagro, arog baga kan pagbuhay liwat sa mga tawo, nagpaparisa na sia Dios? Bueno, an mga apostol asin an mga propetang si Elias asin Eliseo igwa man kan kapangyarihan na iyan, alagad ta dai sinda kaiyan ginibong labi sa tawo. Itinao nin Dios an kapangyarihan na magmilagro sa mga propeta, ki Jesus, asin sa mga apostol tanganing ipaheling na Sia nagtatabang sa sainda. Pero dai kaiyan ginibo an siisay man sa sainda na kabtang nin plural na Dios.
Limitado an Kaaraman ni Jesus
17. Taano ta dai aram ni Jesus kun noarin matatapos an palakaw na ini nin mga bagay?
17 Kan itao ni Jesus an saiyang hula manongod sa katapusan kan palakaw na ini nin mga bagay, sia nagsabi: “Alagad mapadapit sa aldaw na iyan o sa oras na iyan mayo nin siisay man na nakakaisi, ni an mga anghel sa langit, ni an Aki, kundi an Ama sana.” (Marcos 13:32, RS, edisyon na Katoliko) Kun si Jesus kapantay na kabtang nin Dios bilang Aki, aram nia kutana an aram kan Ama. Alagad ta iyan dai aram ni Jesus, ta sia bakong kapantay nin Dios.
18. Paano ipinaheheling kan Hebreo 5:8 na si Jesus dai puwedeng magin an Dios?
18 Siring man, mababasa niato sa Hebreo 5:8 na si Jesus “nakanood nin pagkuyog hale sa mga bagay na saiyang tinios.” Maiimahinar daw niato na an Dios kaipuhan na may manodan pa? Dai, pero si Jesus iyo, ta dai nia aram an gabos na aram nin Dios. Asin kaipuhan na manodan nia an sarong bagay na nungka na kaipuhan na manodan nin Dios—an pagkuyog. An Dios nungka na kaipuhan na kumuyog sa siisay man.
19. Paano ipinaheheling kan Kapahayagan 1:1 na si Jesus dai puwedeng magin an Dios?
19 An kalaenan kan aram nin Dios asin kan aram ni Cristo maheheling man kan si Jesus buhayon na liwat pasiring sa langit tanganing makaibanan nin Dios. Mangnoha an enot na mga tataramon kan ultimong libro kan Biblia: “An kapahayagan ni Jesu-Cristo, na itinao sa saiya nin Dios.” (Kapahayagan 1:1, RS, edisyon na Katoliko) Kun si Jesus kabtang nin pagka-Dios, kaipuhan daw siang tawan nin kapahayagan nin ibang kabtang kan pagka-Dios—an Dios? Segurado na aram nia kutana iyan gabos, ta aram iyan nin Dios. Alagad ta dai iyan aram ni Jesus, ta bako sia an Dios.
Si Jesus Nagdadanay na Sakop
20, 21. Ano an sinasabi sato kan paglangkaw ki Jesus pagkabuhay nia liwat?
20 Kan sia dai pa nagigin tawo, saka kan sia yaon digdi sa daga, si Jesus sakop nin Dios. Pagkabuhay nia liwat, sia nagdadanay na nasa sakop, segundang kamugtakan.
21 Sa pagtaram manongod sa pagkabuhay liwat ni Jesus, si Pedro asin an kairiba nia nagsabi sa Judiong Sanhedrin: “Pinalangkaw nin Dios sa saiyang too an sarong ini [si Jesus].” (Gibo 5:31) Si Pablo nagsabi: “Ilinangkaw sia nin Dios sa superyor na kamugtakan.” (Filipos 2:9) Kun si Jesus Dios, paano ikalalangkaw si Jesus, an boot sabihon, ilinangkaw sa mas halangkaw na katongdan kisa dati? Kutana dati na siang mamuraway na kabtang kan Trinidad. Kun, bago sia ilinangkaw, si Jesus kapantay na nin Dios, an paglangkaw pa sa saiya gigibohon na siang mas halangkaw sa Dios.
22-24. Sa anong mga paagi na an minasunod na tala manongod sa binuhay liwat na si Jesus nagpapatunay tumang sa Trinidad? (a) Hebreo 9:24; (b) Gibo 7:55; (c) Kapahayagan 4:8 sagkod 5:7.
22 Sinabi man ni Pablo na si Cristo naglaog “sa langit mismo, tangani na sia makaatubang sa mismong presensia nin Dios para sa sato.” (Hebreo 9:24, JB) Kun kamo umatubang sa presensia nin saro, paano na kamo man sana an sarong iyan? Dai puwede. Kaipuhan na kamo laen man asin separado.
23 Siring man, bago sia gapoon sagkod na magadan, an martir na si Esteban “nagtangad sa langit asin naheling an kamurawayan nin Dios asin si Jesus na nagtitindog sa too nin Dios.” (Gibo 7:55) Malinaw, an naheling nia duwang separadong indibiduwal—alagad mayo an banal na espiritu, mayo nin Trinidad na pagka-Dios.
24 Sa tala sa Kapahayagan 4:8 sagkod 5:7, ipinaheling an Dios na nagtutukaw sa saiyang langitnon na trono, pero si Jesus dai. Kaipuhan siang dumolok sa Dios tanganing kuanon an sarong balumbon sa toong kamot nin Dios. Ini nagpapaheling na sa langit si Jesus bakong Dios kundi separado sa saiya.
25, 26. Ano an komento kan Rylands Bulletin manongod sa binuhay liwat na si Jesus?
25 Kaoyon sa nasabi sa enotan, an Bulletin of the John Rylands Library sa Manchester, England, nagsasabi: “Sa saiyang langitnon na buhay pagkabuhay liwat, si Jesus ipinaheheling na nagdadanay na may personal na indibiduwalismo na laen asin separado sa persona nin Dios na arog kan nasa saiya sa saiyang buhay digdi sa daga bilang an daganon na Jesus. Sa kataed nin Dios asin kun ikokomparar sa Dios, sia tunay na minalataw na saro sanang langitnon na linalang sa langitnon na palasyo nin Dios, kapareho kan mga anghel—minsan ngani bilang Aki nin Dios, sia nasa laen man na kategoriya, asin mas halangkaw an ranggo sa sainda.”—Ikomparar an Filipos 2:11.
26 Sinasabi man kan Bulletin: “Minsan siring, an sinasabi manongod sa saiyang buhay asin mga trabaho bilang an langitnon na Cristo dai nangangahulogan o nagpaparisa na sa banal na kamugtakan sia kapantay mismo nin Dios asin biyong Dios. Al kontraryo, sa pagkaladawan kan Bagong Tipan sa saiyang langitnon na persona asin ministeryo an naheheling niato sarong persona na separado sa asin sakop nin Dios.”
27. Gurano kahaloy na si Jesus magdadanay na sakop nin Dios?
27 Sa daing katapusan na ngapit sa langit, si Jesus magdadanay na separado, sakop na lingkod nin Dios. Arog kaini an pagkasabi kan Biblia: “Masunod an katapusan, kun itao na nia [si Jesus sa langit] an kahadean sa Dios asin Ama . . . Dangan an Aki mismo mapasakop sa Saro na nagpasakop sa saiya kan gabos na bagay, tanganing an Dios magin gabos sa gabos.”—1 Corinto 15:24, 28, NJB.
Si Jesus Nungkang Naghingako na Dios
28. Paano ipinaheheling kan 1 Corinto 11:3 an pagigin mas halangkaw nin Dios ki Jesus?
28 Malinaw an paninindogan kan Biblia. Bako sana na an Makakamhan sa gabos na Dios, si Jehova, sarong personalidad na separado ki Jesus kundi sa gabos na panahon Sia an mas halangkaw sa saiya. Si Jesus perming iinaatubang na separado asin mas hababa, mapakumbabang lingkod nin Dios. Iyan an dahelan na malinaw na sinasabi kan Biblia na “an payo man kan Cristo iyo an Dios” kun paanong “an payo kan lambang lalaki iyo an Cristo.” (1 Corinto 11:3) Asin ini an dahelan na si Jesus mismo nagsabi: “An Ama orog na dakula sa ako.”—Juan 14:28, RS, edisyon na Katoliko.
29-31. An pagsiyasat sa nakaaagi pa sanang mga panahon naggiya sa nagdadakol na mga iskolar sa anong konklusyon?
29 An totoo iyo na si Jesus bakong Dios asin nungka na naghingakong siring. Ini minimidbid nin nagdadakol na iskolar. Arog kan sabi kan Rylands Bulletin: “Kaipuhan na atubangon an katotoohan na an pagsiyasat sa Bagong Tipan sa laog nin, sabihon niato, nakaaging treinta o kuwarentang taon naggiya sa nagdadakol na midbid na mga iskolar sa Bagong Tipan sa konklusyon na si Jesus . . . tunay na nungkang993 naniwala na sia Dios.”
30 An Bulletin nagsasabi man manongod sa mga Kristiano kan enot na siglo: “Kun siring, kun itinatao ninda [ki Jesus] an kagalang-galang na mga titulong Cristo, Aki nin tawo, Aki nin Dios asin Kagurangnan, an mga ini paagi nin pagsabi bakong na sia Dios, kundi na gibohon nin Dios an saiyang ginigibo.”
31 Kun siring, pati an nagkapirang relihiyosong iskolar nag-aadmitir na an ideya na si Jesus Dios kontra sa bilog na patotoo kan Biblia. Dian, an Dios iyo an perming mas halangkaw, asin si Jesus an sakop na lingkod.