Kapahayagan—An Mamuraway na Kulminasyon Kaiyan Harani Na
Kapitulo 8: Paghihingoa na Makadaog
1. (a) Anong kongregasyon an sumunod na nag-ako nin mensahe hale sa pinamuraway na si Jesus? (b) Sa pag-apod sa saiyang sadiri na “an Enot asin an Huri,” ano an ipinagirumdom ni Jesus sa mga Kristiano sa kongregasyon na idto?
Ngonyan, gaba na an suanoy na Efeso. Alagad an pinadarahan kan ikaduwang mensahe ni Jesus sagkod ngonyan lugar nin sarong sibot na siudad. Mga 35 milyas sa amihanan kan kagabaan nin Efeso an Turkong siudad nin Izmir, na duman manonompongan minsan ngonyan an sarong maigot na kongregasyon nin mga Saksi ni Jehova. Digdi, kan enot na siglo, an Smirna. Helinga, ngonyan, an sumunod na mga tataramon ni Jesus: “Asin suratan mo an anghel kan kongregasyon sa Smirna: Iyo ini an mga bagay na isinabi nia, ‘an Enot asin an Huri,’ na nagadan asin nabuhay liwat.” (Kapahayagan 2:8) Sa pagsabi kaini sa mga Kristianong idto sa Smirna, ipinagirumdom sainda ni Jesus na sia an enot na nagdanay sa integridad na direktang binuhay liwat ni Jehova sa inmortal na espiritung buhay asin an huring binuhay nin siring. Si Jesus mismo an mabuhay sa gabos na ibang linahidan na Kristiano. Kaya sia kuwalipikado nanggad na magtao nin hatol sa saiyang mga tugang, na naglalaom na makaibanan nia sa inmortal na langitnon na buhay.
2. Taano an gabos na Kristiano ta nararanga kan mga tataramon kan Saro na “nagadan asin nabuhay liwat”?
2 Si Jesus an nagpaarog sa pagtagal sa paglamag huli sa katanosan, asin inako nia an angay na balos. An saiyang kaimbodan sagkod sa kagadanan asin pagkabuhay liwat iyo an basihan kan paglaom para sa gabos na Kristiano. (Gibo 17:31) An bagay na si Jesus “nagadan asin nabuhay liwat” nagpapatunay na an ano man na kaipuhan na tagalan huli sa katotoohan bakong sayang. An pagkabuhay liwat ni Jesus gikanan nin dakulang pagpakosog sa gabos na Kristiano, nangorogna kun sinda hinahagadan na magtios huli sa saindang pagtubod. Ini daw an kamugtakan nindo? Kun siring mapakokosog man kamo kan sumunod na mga tataramon ni Jesus sa kongregasyon sa Smirna:
3. (a) Anong pagpakosog an itinao ni Jesus sa mga Kristiano sa Smirna? (b) Minsan ngani an mga Kristiano sa Smirna dukha, taano ta sinabi ni Jesus na sinda “mayaman”?
3 “Aram ko an saimong kahorasaan asin kadukhaan—alagad ta ika mayaman—asin an paglanghad kan mga nagsasabi na sinda Judio, alagad ta bako man kundi sinagoga ni Satanas.” (Kapahayagan 2:9) Si Jesus mayo nin ikatatsar sa saiyang mga tugang sa Smirna, mainit sanang komendasyon. Nagtios sinda nin grabeng kahorasaan huli sa saindang pagtubod. Sinda dukha sa materyal, tibaad huli sa saindang kaimbodan. (Hebreo 10:34) Alagad an pangenot nindang interes nasa espirituwal na mga bagay, asin sinda nagtipon nin kayamanan sa langit, siring sa hatol ni Jesus. (Mateo 6:19, 20) Kaya, an pagheling sa sainda kan Poon na Pastor “mayaman.”—Ikomparar an Santiago 2:5.
4. Gikan kiisay nagtios nin grabeng pagtumang an mga Kristiano sa Smirna, asin ano an pagheling ni Jesus sa mga nagtutumang na idto?
4 Partikularmenteng nasambitan ni Jesus na an mga Kristiano sa Smirna nagtios nin grabeng pagtumang sa kamot nin mga Judio sa laman. Kan enot, an dakol na kabilang sa relihiyon na ini maigot na tinumang an paglakop nin Kristianismo. (Gibo 13:44, 45; 14:19) Ngonyan, pira pa sanang dekada pagkalaglag kan Jerusalem, an mga Judiong idto sa Smirna nagpapaheling kan iyo man sanang satanikong espiritu. Bakong makangangalas na an pagheling sa sainda ni Jesus “sinagoga ni Satanas”!a
5. Anong mga pagbalo an naghahalat sa mga Kristiano sa Smirna?
5 Napaaatubang sa siring na pagkaongis, an mga Kristiano sa Smirna rinanga ni Jesus: “Dai ka matakot sa mga bagay na saimong titioson. Uya! Ibibilanggo kan Diablo an nagkapira SAINDO tanganing KAMO lubos na mabalo, asin tanganing magkaigwa KAMO nin kahorasaan sa laog nin sampulong aldaw. Patunayan mo na ika maimbod sagkod sa kagadanan, asin ta itatao ko sa saimo an korona nin buhay.” (Kapahayagan 2:10) Digdi tolong beses na ginagamit ni Jesus an pormang plural sa Griego kan Ingles na terminong “you,” na nagpapaheling na an saiyang mga tataramon para sa kongregasyon sa kabilogan. Dai ikapangako ni Jesus na an mga pagbalo sa mga Kristiano sa Smirna madali nang matapos. An iba sa sainda padagos na paglalamagon asin ibibilanggo. Sinda magkakaigwa nin kahorasaan “sa laog nin sampulong aldaw.” An sampulo bilang na simbolo nin daganon na pagkakompleto o pagigin lubos. Minsan an mga mayaman sa espiritung mga nagdadanay sa integridad na idto mag-aako nin lubos na pagbalo mantang nasa laman.
6. (a) Taano ta dai maninigong matakot an mga Kristiano sa Smirna? (b) Paano tinapos ni Jesus an saiyang mensahe sa kongregasyon sa Smirna?
6 Minsan siring, an mga Kristiano sa Smirna dai maninigong matakot o makikompromiso. Kun sinda magdadanay na maimbod sagkod sa katapusan, natatagama sa sainda bilang balos an “korona nin buhay,” sa kaso ninda inmortal na buhay sa kalangitan. (1 Corinto 9:25; 2 Timoteo 4:6-8) Ibinilang ni apostol Pablo an mahalagang premyong ini na maninigong pagsakripisyohan kan gabos, dawa kan saiyang daganon na buhay. (Filipos 3:8) Maliwanag, iyo man iyan an saboot kan mga maimbod na idto sa Smirna. Tinatapos ni Jesus an saiyang mensahe sa pagsabi: “An igwa nin talinga magdangog sa isinasabi kan espiritu sa mga kongregasyon: An makadaog dai nanggad maaano kan ikaduwang kagadanan.” (Kapahayagan 2:11) An mga nakadaog ginarantiyahan nin inmortal na langitnon na buhay na dai maaano nin kagadanan.—1 Corinto 15:53, 54.
(Ipagpapadagos sa masunod na luwas.)
[Nota sa Ibaba]
a Mga 60 taon pagkagadan ni Juan, an 86 anyos na si Polycarp sinolo sagkod na magadan sa Smirna ta habo niang talikdan an saiyang pagtubod ki Jesus. An The Martyrdom of Polycarp, sarong libro na ipinamumugtak na katemporanyo kan pangyayaring ini, nagsasabi na kan tinitipon an songo para sa pagsolo, “an mga Judio maigoton, siring sa ugale ninda, sa pagtabang digdi”—minsan ngani an paggadan nangyari sa “dakulang aldaw nin Sabbath.”