Kapahayagan—An Mamuraway na Kulminasyon Kaiyan Harani Na

Kapitulo 11: An Saindo daw na Ngaran Nasa Libro nin Buhay?

1. Ano an espirituwal na kamugtakan kan kongregasyon sa Sardis, asin paano pinoponan ni Jesus an saiyang mensahe?

Mga 30 milyas sa timog kan modernong Akhisar (Tiatira) an lugar kan sumunod na kongregasyon na nag-ako nin mensahe hale sa pinamuraway na si Jesus: an Sardis. Kan ikaanom na siglo bago an satong Komon na Kapanahonan, an siudad na ini iyo an may pag-orgolyong kabesera kan suanoy na kahadean nin Lidia asin residensia kan mayamanon na si Hadeng Croesus. Kan panahon ni Juan, iyan pobre na, asin nasa kasaysayan na sana an dating kagayonan kaiyan sa pagsakop ni Croesus. Siring man, an Kristianong kongregasyon duman pobre man sa espirituwal. Sa enot na pangyayari, dai pinonan ni Jesus nin komendasyon an saiyang mensahe. Imbes, sia nagsasabi: “Asin sa anghel kan kongregasyon sa Sardis sumurat ka: Ini an mga bagay na sinasabi nia na igwa kan pitong espiritu nin Dios asin kan pitong bitoon, ‘Aram ko an saimong mga gibo, na ika igwa kan ngaran na ika buhay, alagad ta ika gadan.’ ”​—Kapahayagan 3:1.

2. (a) Ano an kahulogan para sa mga Kristiano sa Sardis kan bagay na si Jesus igwa kan “pitong espiritu”? (b) Ano an reputasyon kan kongregasyon sa Sardis, alagad ta ano an mga katunayan?

² Taano ta ipinamidbid ni Jesus an saiyang sadiri na an saro “na igwa kan pitong espiritu”? Huli ta an mga espiritung ini nagrirepresentar sa banal na espiritu ni Jehova na nagbubulos sa kalubosan kaiyan. Sa huri, inapod man iyan ni Juan na “pitong mata,” na ipinaririsa an nakalalagbas na pagheling na itinatao ki Jesus kan banal na espiritu nin Dios. (Kapahayagan 5:6) Sa siring, nadidiskobre nia asin naaasikaso an ano man na situwasyon na lumataw. (Mateo 10:​26; 1 Corinto 4:5) An kongregasyon sa Sardis may reputasyon na buhay, aktibo. Alagad naheling ni Jesus na iyan gadan sa espirituwal. Minalataw na an kadaklan na miembro kaiyan nagbalik sa pagkaindiperente na nakaaagid sa saindang kamugtakan bago sinda nagin Kristiano.​—Ikomparar an Efeso 2:​1-3; Hebreo 5:​11-14.

3. (a) Taano an “anghel kan kongregasyon sa Sardis” ta maninigong tawan nin espesyal na pagmangno an bagay na si Jesus igwa kan “pitong bitoon”? (b) Anong makosog na hatol an itinao ni Jesus sa kongregasyon sa Sardis?

³ Ipinagigirumdom man ni Jesus sa “anghel kan kongregasyon sa Sardis” na Sia an igwa kan “pitong bitoon.” Nasa too niang kamot an kamagurangan na idto sa kongregasyon, na may kapangyarihan na giyahan sinda sa saindang pagpapastor. Maninigong isapuso ninda an ‘pakaaram na gayo sa kamugtakan kan aripompon.’ (Talinhaga 27:23) Kaya, marahay na maingat sindang maghinanyog sa sumunod na mga tataramon ni Jesus: “Magpuka ka, asin pakosoga an mga bagay na natatada na madali nang magadan, huli ta dai ko nanompongan na an saimong mga gibo lubos na ginigibo sa atubangan kan sakuyang Dios. Kun siring, girumdoma kun paano ka nag-ako asin kun paano ka nakadangog, asin padagos na otoba iyan, asin magsolsol ka. Tunay na kun ika dai magmamata, ako madatong na siring sa parahabon, asin dai mo maaaraman kun anong oras ako madatong sa saimo.”​—Kapahayagan 3:​2, 3.

4. Paano an mga tataramon ni Pedro makatatabang sa kongregasyon sa Sardis na ‘pakosogon an mga bagay na natatada’?

⁴ Kaipuhan na girumdomon kan kamagurangan sa Sardis an kagayagayahan ninda kaidtong manodan ninda an katotoohan asin an mga bendisyon na inako ninda. Alagad ngonyan sinda gadan kun manongod sa espirituwal na aktibidad. An saindang ilaw bilang kongregasyon nagkikimatkimat huli sa kadaihan nin mga gibo nin pagtubod. Kaidtong dakol nang taon an nakaagi, si apostol Pedro nagsurat sa mga kongregasyon sa Asia (posibleng kaiba an Sardis) tanganing pakosogon an pag-apresyar sa mamuraway na maogmang bareta na inako nin mga Kristiano asin ipinahayag “na igwa kan banal na espiritu na ipinadara hale sa langit”​—na irinirepresentar kan pitong espiritu sa bisyon ni Juan. Ipinagirumdom man ni Pedro sa mga Kristianong idto sa Asia na sinda kabilang sa ‘rasang pinili, makahadeng pagkasaserdote, banal na nasyon, banwaan para sa espesyal na pagkasadiri, tanganing ipahayag ninda an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 1:​12, 25; 2:9) An paghorophorop sa espirituwal na mga katotoohan na iyan makatatabang sa kongregasyon sa Sardis na magsolsol asin ‘pakosogon an mga bagay na natatada.’​—Ikomparar an 2 Pedro 3:9.

5. (a) Ano an nangyari sa pag-apresyar kan mga Kristiano sa Sardis? (b) Ano an mangyayari kun an mga Kristiano sa Sardis dai kumuyog sa hatol ni Jesus?

⁵ Kaidto, an saindang pag-apresyar asin pagkamoot sa katotoohan garo kalayo na madali nang maparong. Pipira na sanang baga an mainit. Sinadol sinda ni Jesus na yapyapan an baga, palaadon an kalayo, pagsolsolan an mga kasalan na dinarahan sa sainda kan saindang kapabayaan, asin magin liwat sarong kongregasyon na buhay sa espiritu. (Ikomparar an 2 Timoteo 1:​6, 7.) Ta kun dai, kun si Jesus dumatong na dai linalaoman​—“siring sa parahabon”—​sa paghokom, an kongregasyon sa Sardis dai magigin andam.​—Mateo 24:​43, 44.

Pagdatong na “Siring sa Parahabon”

6. Paano si Jesus nagdatong na “siring sa parahabon” kan 1918, asin anong kamugtakan an nanompongan nia sa tahaw kan mga naghihingakong mga parasunod nia?

⁶ An patanid ni Jesus na sia madatong na “siring sa parahabon” sagkod sa modernong mga panahon. Iyan may espesyal na aplikasyon sa mga Kristiano na nabuhay sa aldaw kan Kagurangnan. Dai mahaloy pakalihis kan 1914, nagkaigwa nin kaotoban an hula ni Malaquias: “‘Sa panale maabot sa Saiyang templo an tunay na Kagurangnan, na saindong pinaghahanap, asin an mensahero kan tipan na nawiwilihan nindo. Uya! Sia maabot nanggad,’ an sabi ni Jehova nin mga hukbo.” (Malaquias 3:​1; Kapahayagan 1:10) Bilang “mensahero kan tipan,” si Jesus nag-abot sa pagsiyasat asin paghokom sa mga naghihingakong parasunod nia. (1 Pedro 4:17) Kan panahon na idto, kan 1918, an Kakristianohan kalabot sa pagpabolos nin dugo sa Guerra Mundial I asin biyong gadan, sa espirituwal na pagtaram. Minsan an tunay na mga Kristiano, na bago kan guerra maigot sa paghuhulit, nag-agi sa panahon nin espirituwal na pagtungka. An iba sa saindang prominenteng kamagurangan nabilanggo, asin haros napondo an paghuhulit. Kan pukawon kan espiritu ni Jehova an mga Kristianong ini kan sumunod na taon, bakong gabos andam. An iba, arog kan mangmang na mga daraga sa parabola ni Jesus, mayo nin espirituwal na kasangkapan para sa pribilehiyo nin paglilingkod ki Jehova. Alagad, makaoogma, kadakol kan, kapareho kan madonong na mga daraga, nagkuyog sa patanid ni Jesus: “Kaya magpuka kamo, huli ta dai nindo naaaraman an aldaw ni an oras.”​—Mateo 25:​1-13.

7. Taano an mga Kristiano ngonyan ta kaipuhan na magpuka?

⁷ An pangangaipo na an Kristiano magpuka dai natapos sa pagpopoon kan aldaw kan Kagurangnan. Sa saiyang dakulang hula manongod sa “tanda kun noarin an gabos na bagay na ini nakatalagang matapos,” si Jesus nagtao nin makosog na patanid: “Mapadapit sa aldaw na iyan o sa oras mayo nin siisay man na nakaiisi . . . Magbantay kamo, magpuka kamo, huli ta dai nindo aram kun noarin an itinalaan na panahon. Alagad an sinasabi ko sa saindo isinasabi ko sa gabos, Magpuka kamo.” (Marcos 13:​4, 32, 33, 37) Iyo, sagkod sa mismong oras na ini, an lambang saro sa sato, baga man kabilang sa linahidan o sa dakulang kadaklan, kaipuhan na magpuka asin labanan an pagkatorog sa espirituwal. Kun an aldaw ni Jehova dumatong na garo “parahabon kun banggi,” manompongan logod kitang mata tanganing mag-ako nin paborableng paghokom.​—1 Tesalonica 5:​2, 3; Lucas 21:​34-36; Kapahayagan 7:9.

8. Paano pinahiro kan grupong Juan ngonyan an banwaan nin Dios na magdanay na buhay sa espirituwal?

⁸ An grupong Juan ngonyan mismong puka sa pangangaipo na pahiroon an banwaan nin Dios na magdanay na buhay sa espirituwal. Sa katuyohan na ini, iinaareglo sa bilog na daga an espesyal na mga katiriponan pirang beses kada taon. Sa sarong nakaaagi pa sanang taon, an nag-atender sa 1,297 pandistritong kombension 7,020,459 gabos, asin 136,103 na bagong nagturubod an nabautismohan. Sa laog nin labi nang sanggatos na taon, ginagamit kan grupong Juan an magasin na The Watchtower sa pagpapahayag kan ngaran asin katuyohan ni Jehova. Huli sa mapait na mga paglamag kaidtong duwang guerra mundial, pinukaw kan The Watchtower an mga Saksi ni Jehova sa bagong kaigotan paagi sa pagpublikar nin mga artikulo na arog baga kan “Blessed Are the Fearless” (1919), “A Call to Action” (1925), asin “Defeat of Persecution” (1942).

9. (a) Ano an maninigong ihapot nin gabos na Kristiano sa saindang sadiri? (b) Anong pagpakosog an itinao kan An Torrengbantayan?

⁹ Arog kaidto sa Sardis, siring man sa mga kongregasyon ngonyan, an padagos na pagsiyasat sa sadiri mahalaga para sa gabos na Kristiano. Kita gabos maninigong padagos na hapoton an satong sadiri: An satuya daw na “mga gibo lubos na ginigibo” sa atubangan kan satuyang Dios? Dai hinohokoman an iba, kita daw personalmenteng nagkukultibar kan espiritu nin pagsasakripisyo sa sadiri asin naghihingoa na itao an bilog na kalag na paglilingkod sa Dios? Sa bagay na ini, an magasin na An Torrengbantayan nagtao nin pagpakosog paagi sa pagpaliwanag nin mga tema na arog baga kan “Kamo daw Mapagpagusto sa Sadiri​—o Mapagsakripisyo?” asin “Maghingoa Kamo nin Maigot.”a Igwa nin siring na Makakasuratan na tabang, siyasaton niato an kairairaromi niatong saboot mantang kita naghihingoang lumakaw nin mapakumbaba asin mapagngayongayo na may integridad sa atubangan ni Jehova.​—Salmo 26:​1-3; 139:​23, 24.

“Nagkapirang Ngaran”

10. Anong nakapakokosog na bagay an narisa ni Jesus sa kongregasyon sa Sardis, asin paano kita maninigong maapektaran kaini?

¹⁰ An sumunod na mga tataramon ni Jesus sa kongregasyon sa Sardis nakapakokosog nanggad. Sia nagsasabi: “Minsan siring, ika igwa nin nagkapirang ngaran dian sa Sardis na dai nagdigta kan saindang mga gubing, asin sinda malakaw sa kaibahan ko na maggugubing nin maputi, huli ta sinda maninigo. An makadaog gugubingan nin maputing mga gubing; asin dai ko nanggad paparaon an saiyang ngaran sa libro nin buhay, kundi mimidbidon ko an saiyang ngaran sa atubangan kan sakong Ama asin sa atubangan kan saiyang mga anghel.” (Kapahayagan 3:​4, 5) Bako daw na an mga tataramon na ini nakapupukaw sato asin nagpapakosog sa satong determinasyon na magmaimbod? Huli sa kapabayaan nin sarong grupo nin kamagurangan, an sarong kongregasyon sa kabilogan puwedeng mapatorog nin nanok sa espirituwal. Pero, an pirang indibiduwal na yaon dian tibaad maghingoa nin mapuso na papagdanayon na malinig asin daing digta an saindang pagka-Kristiano asin sa siring magpadagos na may marahay na ngaran ki Jehova.​—Talinhaga 22:1.

11, 12. (a) Dawa sa panahon kan dakulang apostasiya, paano an nagkapira seguradong nagin siring sa maimbod na “nagkapirang ngaran” sa Sardis? (b) Anong kaginhawahan an nagdatong sa garo trigong mga Kristiano sa panahon kan aldaw kan Kagurangnan?

¹¹ Iyo, an “mga gubing” nangangahulogan kan matanos na midbidan sa sarong tawo bilang Kristiano. (Ikomparar an Kapahayagan 16:​15; 19:8.) Seguradong ikinaoogma ni Jesus na maheling na, sa ibong kan pagkaindiperente kan kadaklan, an “nagkapirang ngaran,” an nagkapirang linahidan na Kristiano sa Sardis, nahihimong papagdanayon an midbidan na ini. Siring man, kan an naghihingakong mga Kristiano umayon sa Dakulang Babilonya, an pankinaban na imperyo nin falsong relihiyon, sa laog kan halawig na mga siglo kan dakulang apostasiya, segurado na dai nawawaran nin pirang indibiduwal na naghingoa, sa ibong nin masakit na mga kamugtakan, na otobon an kabotan ni Jehova. An mga ini matanos na siring sa trigo na natatago sa tahaw nin kadakol na mga doot na sektaryano.​—Kapahayagan 17:​3-6; Mateo 13:​24-29.

¹² Si Jesus nanuga na sia danay na masasa kaibanan kan garo trigong mga Kristianong ini “sagkod sa pagtatapos kan palakaw nin mga bagay.” Aram nia kun siisay sinda asin kun anong marahay na ngaran an ginibo ninda para sa saindang sadiri. (Mateo 28:​20; Eclesiastes 7:1) Isip-isipa an kagayagayahan kan maimbod na “nagkapirang” idto na buhay pa kan magpoon an aldaw kan Kagurangnan! Sa katapustapusi sinda isiniblag sa gadan sa espiritung Kakristianohan asin tinipon sa sarong matanos na kongregasyon na nakaaagid na gayo sa kongregasyon sa Smirna.​—Mateo 13:​40-43.

13. Anong mga bendisyon an natatagama sa linahidan na mga Kristiano na dai “nagdigta kan saindang mga gubing”?

¹³ An mga yaon sa Sardis na maimbod sagkod sa katapusan asin dai inaatian an saindang midbidan bilang Kristiano nagkakamit kan kaotoban nin sarong makangangalas na paglaom. Pakapatindoga kan Mesiyanikong Kahadean ni Jesus kan 1914, sinda binuhay liwat sa espiritung buhay asin bilang mga nakadaog ginubingan sinda nin maputing mga gubing bilang simbolo kan saindang daing kanawayan, daing digtang katanosan. Huling naglakaw sa piot na dalan pasiring sa buhay, sinda magkakamit nin daing sagkod na balos.​—Mateo 7:​14; helingon man an Kapahayagan 6:​9-11.

Sagkod Lamang na Nasa Libro nin Buhay!

14. Ano an “libro nin buhay,” asin kiisay na mga ngaran an nasusurat dian?

¹⁴ Ano an “libro nin buhay,” asin kiisay na ngaran an papagdadanayon dian? An libro, o balumbon, nin buhay nangangahulogan kan rekord nin mga lingkod ni Jehova na nalilinyang umako kan premyong buhay na daing katapusan. (Malaquias 3:16) Digdi sa Kapahayagan espisipikong sinambit an ngaran nin linahidan na mga Kristiano. Pero an ngaran kan mga nalilinya para sa buhay na daing katapusan digdi sa daga nasusurat man dian. Dugang pa, may mga ngaran na puwedeng ‘paraon’ sa librong iyan. (Exodo 32:​32, 33) Minsan siring, an mga kaiba sa grupong Juan na an ngaran nagdanay sa libro nin buhay sagkod na sinda magadan mag-aako nin inmortal na buhay sa langit. (Kapahayagan 2:10) Iyo ini an mga ngaran na espisipikong mimidbidon ni Jesus sa atubangan kan saiyang Ama asin kan Saiyang mga anghel. Kanigoan kamakangangalas kan balos na iyan!

15. Paano mahihimo kan mga kabilang sa dakulang kadaklan na an saindang ngaran ikasurat nin permanente sa libro nin buhay?

¹⁵ An dakulang kadaklan, na an ngaran nasusurat man sa libro nin buhay, maluwas na buhay sa dakulang kahorasaan. Paagi sa paggibo nin pagtubod sa bilog na Milenyal na Paghade ni Jesus asin sa panahon kan masunod na nagdedesisyon na pagbalo, sinda babalosan nin buhay na daing katapusan sa Paraiso digdi sa daga. (Daniel 12:​1; Kapahayagan 7:​9, 14; 20:​15; 21:4) An saindang ngaran isusurat na nin permanente sa libro nin buhay. Sa pakaaram kan ipinahahayag digdi paagi sa banal na espiritu, dai daw kamo minakuyog na may entusiasmo sa paorootrong sadol ni Jesus: “An igwa nin talinga magdangog sa isinasabi kan espiritu sa mga kongregasyon”?​—Kapahayagan 3:6.

[Nota sa Ibaba]