Kapahayagan—An Mamuraway na Kulminasyon Kaiyan Harani Na

Kapitulo 13: Bumakal nin Bulawan na Dinalisay sa Kalayo

1, 2. Ano an lugar kan ultimo sa pitong kongregasyon na nag-ako nin mensahe gikan sa pinamuraway na si Jesus, asin ano an nagkapirang bagay manongod sa siudad?

An Laodicea an ultimo sa pitong kongregasyon na nag-ako nin mensahe gikan sa binuhay liwat na si Jesus. Asin anong nakapabubuklat sa mata, nakapupukaw na impormasyon an itinatao kaiyan!

² Ngonyan, manonompongan nindo an kagabaan nin Laodicea harani sa Denizli, mga 55 milyas sa timog-sirangan nin Alasehir. Kan enot na siglo, an Laodicea asensadong siudad. Nasa mayor na pinagkakasangahan nin tinampo, iyan mayor na sentro nin bangko asin komersio. An pagpabakal nin midbid na pampahid sa mata nakadugang sa kayamanan kaiyan, asin iyan bantog man huli sa halangkaw an kuwalidad na mga gubing na ginigibo sa lokal gikan sa pinong itom na lana. An kakulangan nin tubig, na dakulang problema kan siudad, naresolberan paagi sa pagkaigwa nin kanal na bobolosan nin tubig hale sa mainit na mga burabod sa medyo haroharayo. Kaya, an tubig mahimbong na sana pag-abot sa siudad.

3. Paano binukasan ni Jesus an saiyang mensahe sa kongregasyon sa Laodicea?

³ An Laodicea harani sa Colosas. Sa pagsurat sa mga taga-Colosas, si apostol Pablo may nasambitan na surat na ipinadara nia sa mga taga-Laodicea. (Colosas 4:​15, 16) Dai niato aram kun ano an isinurat ni Pablo dian, pero an mensahe na ngonyan ipinadara ni Jesus sa mga taga-Laodicea nagpapaheling na sinda naholog sa kaherakherak na kamugtakan sa espirituwal. Alagad, arog sa dati, enot ngunang sinisitar ni Jesus an saiyang mga kuwalipikasyon, na sinasabi: “Asin suratan mo an anghel kan kongregasyon sa Laodicea: Iyo ini an mga isinasabi kan Auot Pa, an maimbod asin totoong saksi, an kapinonan kan paglalang nin Dios.”​—Kapahayagan 3:14.

4. Paano na si Jesus an “Auot Pa”?

⁴ Taano ta inaapod ni Jesus an saiyang sadiri na an “Auot Pa”? An titulong ini nagtatao nin hudisyal na gabat sa saiyang mensahe. An “Auot Pa” pagtransliterar sa termino sa Hebreo na nangangahulogan “iyo nanggad,” “mangyari logod,” asin ginagamit sa poro nin mga pamibi tanganing patunayan an mga saboot na ipinahayag dian. (1 Corinto 14:16) Si Jesus an “Auot Pa” ta an saiyang daing kanawayan na integridad asin kagadanan bilang atang nagpatunay asin naggarantiya sa kaotoban kan gabos na mahahalagang panuga ni Jehova. (2 Corinto 1:20) Magpoon kaidto, an gabos na pamibi tama na ipaabot ki Jehova paagi ki Jesus.​—Juan 15:​16; 16:​23, 24.

5. Sa anong paagi na si Jesus “an maimbod asin totoong saksi”?

⁵ Si Jesus man “an maimbod asin totoong saksi.” Sa hula sia parateng iinaasosyar sa kaimbodan, katotoohan, asin katanosan, huli ta sia biyong masasarigan bilang lingkod ni Jehova Dios. (Salmo 45:​4; Isaias 11:​4, 5; Kapahayagan 1:​5; 19:11) Sia an kadarudakulaing Saksi para ki Jehova. An totoo, bilang “an kapinonan kan paglalang nin Dios,” ipinahayag ni Jesus an kamurawayan nin Dios magpoon sa kapinonan. (Talinhaga 8:​22-30) Bilang tawo sa daga, sia nagpatotoo sa katotoohan. (Juan 18:​36, 37; 1 Timoteo 6:13) Pagkabuhay nia liwat, pinanugaan nia nin banal na espiritu an saiyang mga disipulo asin sinabihan sinda: “Kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” Magpoon Pentecostes 33 C.E., giniyahan ni Jesus an linahidan na mga Kristianong ini sa paghuhulit kan maogmang bareta “sa gabos na linalang sa sirong nin langit.” (Gibo 1:​6-8; Colosas 1:23) Tunay nanggad, si Jesus maninigong apodon na an maimbod asin totoong saksi. An linahidan na mga Kristiano sa Laodicea makikinabang paagi sa paghinanyog sa saiyang mga tataramon.

6. (a) Paano ilinaladawan ni Jesus an espirituwal na kamugtakan kan kongregasyon sa Laodicea? (b) Anong marahay na halimbawa ni Jesus an dai nasunod kan mga Kristiano sa Laodicea?

⁶ Ano an mensahe ni Jesus para sa mga taga-Laodicea? Mayo sia nin sinabing komendasyon. Prangka, sia nagsabi sa sainda: “Aram ko an saimong mga gibo, na ika bakong malipot ni mainit. Kutana ika malipot o mainit. Kaya, huli ta ika gabinhod asin bakong mainit ni malipot, itutupga taka sa sakong ngoso.” (Kapahayagan 3:​15, 16) Ano an magigin reaksion nindo sa siring na mensahe hale sa Kagurangnan na Jesu-Cristo? Dai daw kamo magmamata asin sisiyasaton an sadiri? Tunay nanggad, an mga taga-Laodicea kaipuhan na humiro, ta sinda nagin hugakon sa espirituwal, na malinaw na pinagpapalimanlimanan na sana an mga bagay. (Ikomparar an 2 Corinto 6:1.) Si Jesus, na maninigo kutanang inarog ninda bilang mga Kristiano, perming nagpapaheling nin malaad na kaigotan para ki Jehova asin sa saiyang paglilingkod. (Juan 2:17) Dugang pa, nanompongan nin mga mahoyo na sia perming maboot asin mahoyo, na nakarirepresko arog nin sarong baso nin malipot na tubig sa mahanglason na aldaw. (Mateo 11:​28, 29) Alagad ta an mga Kristiano sa Laodicea bakong mainit ni malipot. Kapareho kan tubig na nagbobolos pasiring sa saindang siudad, sinda nagin mahimbong, gabinhod. Sinda posibleng biyong isikwal ni Jesus, ‘itinupga sa saiyang ngoso’! Kita logod perming maghingoa nin maigot, kapareho ni Jesus, na makatao nin espirituwal na pagparepresko para sa iba.​—Mateo 9:​35-38.

“Ika Nagsasabi: ‘Ako Mayaman’ ”

7. (a) Paano ipinaheheling ni Jesus an pinakagamot kan problema kan mga Kristiano sa Laodicea? (b) Taano ta sinasabi ni Jesus na an mga Kristiano sa Laodicea “buta patin huba”?

⁷ Ano an talagang pinakagamot kan problema kan mga taga-Laodicea? Magkakaideya kita sa sumunod na mga tataramon ni Jesus: “Huli ta ika nagsasabi: ‘Ako mayaman asin nakatipon nin kayamanan patin dai nagkakaipo nin ano man,’ alagad dai mo naaaraman na ika nasasakitan asin kaherakherak asin dukha asin buta patin huba.” (Kapahayagan 3:​17; ikomparar an Lucas 12:​16-21.) Huling nag-iistar sa sarong mayaman na siudad, sinda kompiado huli sa saindang mga kayamanan. Posible na an saindang pamumuhay naapektaran kan istadyum, mga teatro, asin mga dyimnasium, kaya sinda nagin “mga mamomoton sa kasingawan kisa magin mamomoton sa Dios.”a (2 Timoteo 3:4) Alagad ta an mayaman sa materyal na mga taga-Laodicea dukha sa espirituwal. Pipira sana, kun igwa man, an saindang ‘kayamanan na natipon sa langit.’ (Mateo 6:​19-21) Dai ninda pinapagdanay na simple an saindang mata, na tinatawan nin enot na lugar sa saindang buhay an Kahadean nin Dios. Sinda sa katotoohan nasa kadikloman, buta, na mayo nin espirituwal na pagheling. (Mateo 6:​22, 23, 33) Dugang pa, sa ibong kan magagayon na gubing na tibaad nabakal kan saindang materyal na kayamanan, sa pagheling ni Jesus sinda huba. Mayo sinda nin espirituwal na mga gubing na magpapamidbid sa sainda bilang mga Kristiano.​—Ikomparar an Kapahayagan 16:15.

8. (a) Sa anong paagi na an kamugtakan na kapareho kan sa Laodicea nag-eeksister man ngonyan? (b) Paano dinaya nin pirang Kristiano an saindang sadiri sa paslong kinaban na ini?

⁸ Ini nakakukubhan nanggad na kamugtakan! Alagad bako daw na kita parateng nakaheheling nin kaparehong kamugtakan ngonyan? Ano an pinakagamot na dahelan? Iyan an nagkokompiar sa sadiring kaisipan na gikan sa pagsarig sa materyal na mga rogaring asin kakayahan nin tawo. Kapareho kan mga parasimba sa Kakristianohan, an iba sa banwaan ni Jehova dinaya an sadiri, na naghohona na mapaoogma ninda an Dios paagi sa paminsanminsan na pag-atender sa mga pagtiripon. Pinoprobaran nindang makalibre paagi sa pagigin paramas sanang “mga paragibo kan tataramon.” (Santiago 1:22) Sa ibong nin paorootrong patanid kan grupong Juan, an saindang puso nasa modernong mga gubing, kotse, asin harong, asin sa buhay na nasisentro sa pag-aling-aling asin kasingawan. (1 Timoteo 6:​9, 10; 1 Juan 2:​15-17) Ini gabos nagbubunga nin paglibog kan espirituwal na pagmansay. (Hebreo 5:​11, 12) Imbes na magin daing animong gabinhod, kaipuhan na palaadon giraray ninda an “laad kan espiritu” asin magpaheling nin nakarirepreskong pagkagalaga na ‘ihulit an tataramon.’​—1 Tesalonica 5:​19; 2 Timoteo 4:​2, 5.

9. (a) Anong mga tataramon ni Jesus an maninigong magpahiro sa gabinhod na mga Kristiano, asin taano? (b) Paano matatabangan kan kongregasyon an nalalagalag na “karnero”?

⁹ Ano an pagheling ni Jesus sa mga Kristianong gabinhod? Maninigo sindang pahiroon kan saiyang prangkang mga tataramon: “Dai mo naaaraman na ika nasasakitan asin kaherakherak asin dukha asin buta patin huba.” An saindang konsensia namagol na sagkod sa punto na dai na ninda naririsa an saindang makatatakot na kamugtakan. (Ikomparar an Talinhaga 16:​2; 21:2.) An seryosong kamugtakan na ini sa kongregasyon dai puwedeng pagpalimanlimanan. Paagi sa pagtao nin marahay na halimbawa sa kaigotan asin paagi sa pagpapastor sa pagkamoot, an kamagurangan asin an iba na iinasignar ninda tibaad mahimong pukawon an nalagalag na mga “karnerong” ini sa dati nindang kagayagayahan sa bilog na pusong paglilingkod.​—Lucas 15:​3-7.

Hatol sa ‘Pagyaman’

10. Ano an “bulawan” na sinasabi ni Jesus sa mga Kristiano sa Laodicea na bakalon sa saiya?

¹⁰ Igwa daw nin remedyo sa makamomondong kamugtakan sa Laodicea? Igwa, kun kukuyogon kan mga Kristianong idto an hatol ni Jesus: “Hinahatolan taka na bumakal sa sako nin bulawan na dinalisay sa kalayo tangani na ika magin mayaman.” (Kapahayagan 3:​18a) An tunay na “bulawan” na Kristiano, na dinalisay sa kalayo asin nahalean kan gabos na ati, gigibohon sindang “mayaman sa Dios.” (Lucas 12:21) Saen daw ninda mababakal an siring na bulawan? Bakong sa lokal na mga bangko kundi ki Jesus! Ipinaliwanag ni apostol Pablo kun ano an bulawan na iyan kan sabihan nia si Timoteo na pagbotan an mayayaman na Kristiano na “maggibo nin marahay, na magin mayaman sa marahay na mga gibo, magin matinao, andam na magwaras, na nagririmpos para sa sainda man sana nin marahay na pasisikadan para sa ngapit.” Solamente paagi sa arog kaining paghihingoa na sinda makahihimong “makapangapot nin marigon sa tunay na buhay.” (1 Timoteo 6:​17-19) An mayaman sa materyal na mga taga-Laodicea kutana nagkuyog sa sadol ni Pablo asin sa siring nagin mayaman sa espirituwal.​—Helingon man an Talinhaga 3:​13-18.

11. Ano an modernong mga halimbawa niato kan mga minabakal nin “bulawan na dinalisay sa kalayo”?

¹¹ Igwa daw nin modernong mga halimbawa nin mga minabakal nin “bulawan na dinalisay sa kalayo”? Igwa! Minsan kan nagdadangadang an aldaw kan Kagurangnan, an sadit na grupo nin mga estudyante sa Biblia napapagmata na sa pagigin falso kan dakol na Babilonikong katokdoan nin Kakristianohan, arog baga kan Trinidad, inmortalidad kan kalag, pagpasakit sa impiernong may kalayo, pagbunyag sa omboy, asin pagsamba sa mga ladawan (kaiba na an krus asin si Maria). Sa pagsorog sa katotoohan kan Biblia, ibinalangibog kan mga Kristianong ini an Kahadean ni Jehova bilang an solamenteng paglaom nin katawohan asin an pantubos na atang ni Jesus bilang an pasisikadan para sa kaligtasan. Haros naeenot nin 40 taon, itinokdo ninda an 1914 bilang an taon na tinandaan sa hula kan Biblia na katapusan kan mga panahon nin mga Hentil, na matatanyog an mga kapangyarihan sibil asin eklesiastiko.​—Kapahayagan 1:​10; Lucas 21:​24-26, King James Version.

12. Siisay an saro sa mga nangengenot kaidto sa napapagmatang mga Kristiano, asin paano sia nagpaheling nin pambihirang halimbawa sa pagtipon nin kayamanan sa langit?

¹² Nangengenot sa napapagmatang mga Kristianong ini si Charles Taze Russell, na, kan pagpopoon nin mga taon 1870, nag-organisar nin sarong grupo sa pag-adal sa Biblia sa Allegheny (ngonyan sakop na nin Pittsburgh), Pennsylvania, E.U.A. Kan ponan nia an saiyang paghanap sa katotoohan, si Russell kabakas kan saiyang ama asin madali nang magin milyonaryo. Alagad ta ipinabakal nia an saiyang kahirasan sa negosyong mga tindahan asin ginasto an saiyang kayamanan sa pagtabang na may magasto sa pagpublikar kan Kahadean nin Dios sa bilog na daga. Kan 1884 si Russell nagin an enot na presidente kan korporasyon na ngonyan inaapod na Watch Tower Bible and Tract Society of Pennsylvania. Kan 1916 nagadan sia sa sarong tren na harani sa Pampa, Texas, pasiring sa Nueva York, na nanluluya huli sa saiyang ultimong paglibot sa paghuhulit sa parteng solnopan nin Estados Unidos. Sia nagtao nin pambihirang halimbawa sa pagtipon nin espirituwal na kayamanan sa langit, halimbawa na inaarog nin ginatos na ribo nin mapagsakripisyong mga ministrong payunir sa huring mga taon na ini nin 1900.​—Hebreo 13:​7; Lucas 12:​33, 34; ikomparar an 1 Corinto 9:​16; 11:1.

Paglahid nin Espirituwal na Bolong sa Mata

13. (a) Paano mapakakarhay nin espirituwal na bolong sa mata an kamugtakan kan mga taga-Laodicea? (b) Anong klaseng mga gubing an irinirekomendar ni Jesus, asin taano?

¹³ Mapuwersa man na sinasadol ni Jesus an mga taga-Laodicea: “Bumakal . . . nin maputing mga gubing tangani na ika magubingan asin tangani na dai mahayag an kasopganan kan saimong pagkahuba, asin nin bolong sa mata na ilalahid sa saimong mga mata tangani na ika makaheling.” (Kapahayagan 3:​18b) Maninigo sindang maghanap nin bolong sa saindang espirituwal na pagkabuta paagi sa pagbakal nin nakaoomay na bolong sa mata, bakong an hale sa lokal na mga parabolong, kundi an klase na si Jesus sana an makatatao. Ini matabang sainda na magkaigwa nin espirituwal na pakamansay, na tinatabangan sindang maglakaw sa “dalan kan mga matanos” na an saindang maliwanag na mata nakatorohok sa paggibo kan kabotan nin Dios. (Talinhaga 4:​18, 25-27) Sa siring, sinda makasusulot, bakong kan mamahalon na mga gubing na itom na lana na ginibo sa Laodicea, kundi kan pinong “maputing mga gubing” na nagpapahayag kan saindang mapalad na kamugtakan bilang mga parasunod ni Jesu-Cristo.​—Ikomparar an 1 Timoteo 2:​9, 10; 1 Pedro 3:​3-5.

14. (a) Anong espirituwal na bolong sa mata an yaon poon kan 1879? (b) Ano an ultimong burabod kan pinansial na suporta sa mga Saksi ni Jehova? (c) Sa paggamit sa mga kontribusyon, paano napapalaen an mga Saksi ni Jehova sa iba?

¹⁴ May makukua daw na espirituwal na bolong sa mata sa modernong mga panahon? Igwa nanggad! Kan 1879 si Pastor Russell, siring sa may pagpadangat na apod saiya, pinonan na ipublikar sa pagdepensa sa katotoohan an magasin na midbid ngonyan sa bilog na kinaban bilang an The Watchtower Announcing Jehovah’s Kingdom. Sa ikaduwang luwas kaiyan, sia nagsabi: “Kami nagtutubod na an nagsusuportar [sa magasin na ini] iyo si JEHOVA, asin mantang siring iyan noarin man dai makililimos ni maghahagad nin suporta sa mga tawo. Kun Sia na nagsasabing: ‘Sakuya an gabos na bulawan asin pirak sa kabukidan,’ dai na magtao kan kinakaipuhan na pondo, sasaboton mi na iyan panahon nang ipondo an pagpublikar.” An nagkapirang ebanghelisador sa telebisyon sa ika-20 siglong ini nakatipon nin darakulaon na kayamanan asin namuhay sa daing sopog (asin kun beses inmoral) na luho. (Ikomparar an Kapahayagan 18:3.) Kabaliktaran, an mga Estudyante sa Biblia, na ngonyan midbid na mga Saksi ni Jehova, ginamit an gabos na dai hinagad na kontribusyon sa pag-organisar asin pagpaoswag kan lakop sa kinaban na paghuhulit kan nagdadangadang na Kahadean ni Jehova. An grupong Juan sagkod sa aldaw na ini namamahala sa pagpublikar kan The Watchtower asin Awake!, mga magasin na may pinag-ibang sirkulasyon kan 1990 na labing 27 milyones. An The Watchtower makukua sa labing sanggatos na tataramon. Iyan an opisyal na babasahon nin sarong kongregasyon na binibilog nin labing apat na milyon na Kristiano na naggamit kan espirituwal na bolong sa matang iyan tanganing mabukasan an saindang mata sa falsong relihiyon asin sa pagkaapretado kan paghuhulit kan maogmang bareta sa gabos na nasyon.​—Marcos 13:10.

Pagkinabang sa Pagsagwe Asin Disiplina

15. Taano si Jesus ta nagtao nin makosog na hatol sa mga Kristiano sa Laodicea, asin ano an maninigong magin reaksion dian kan kongregasyon?

¹⁵ Balikan niato an mga taga-Laodicea. Paano ninda aakoon an estriktong hatol hale ki Jesus? Maninigo daw sindang panluyahan nin boot asin maghona na habo na si Jesus sa sainda bilang saiyang mga parasunod? Dai, bakong siring. An mensahe nagpapadagos: “An gabos na namomotan ko sinasagwe ko asin dinidisiplina. Kun siring magmaigot ka asin magsolsol.” (Kapahayagan 3:​19) Arog kan disiplina hale ki Jehova, an disiplina ni Jesus tanda kan saiyang pagkamoot. (Hebreo 12:​4-7) An kongregasyon sa Laodicea maninigong mag-aprobetsar sa saiyang mapagpadangat na pagmakolog asin iaplikar an saiyang hatol. Maninigo sindang magsolsol, na minimidbid na an saindang pagigin gabinhod pagkakasala. (Hebreo 3:​12, 13; Santiago 4:17) Bayaan logod kan saindang kamagurangan an materyalistikong mga dalan asin “palaadon na siring sa kalayo” an balaog na inako ninda sa Dios. Paagi sa pag-epekto kan espirituwal na bolong sa mata, an gabos logod sa kongregasyon makanompong nin kaginhawahan na garo hale sa lipot nin preskong tubig sa burabod.​—2 Timoteo 1:​6; Talinhaga 3:​5-8; Lucas 21:34.

16. (a) Paano an pagkamoot asin pagpadangat ni Jesus ipinaheheling ngonyan? (b) Kun kita mag-ako nin makosog na hatol, ano an maninigong magin reaksion niato?

¹⁶ Kumusta man kita ngonyan? Si Jesus padagos na “namoot sa saiyang mga sadiri digdi sa kinaban.” Ini gigibohon nia “sagkod sa pagtatapos kan palakaw nin mga bagay.” (Juan 13:​1; Mateo 28:20) An saiyang pagkamoot asin pagpadangat ipinaheheling paagi sa modernong grupong Juan asin sa mga bitoon, o kamagurangan, sa Kristianong kongregasyon. (Kapahayagan 1:20) Sa masakit na mga panahon na ini, an kamagurangan interesadong gayo sa pagtabang sa sato gabos, gurang asin aki, na makapagdanay sa laog kan teokratikong toril, na pinaglalabanan an independensia, an materyalistikong kapasloan, asin an inmoral na ramog kan kinaban. Kun kita may beses na nag-aako nin makosog na hatol o disiplina, girumdomon na “an mga pagsagwe nin disiplina iyo an dalan nin buhay.” (Talinhaga 6:23) Kita gabos bakong sangkap asin maninigong magmaigot na magsolsol siring sa kinakaipuhan tangani kitang mabago asin magdanay sa pagkamoot nin Dios.​—2 Corinto 13:11.

17. Paano an kayamanan puwedeng magin peligroso sa espirituwal para sa sato?

¹⁷ Dai niato pagtogotan an materyalismo, mga kayamanan, o an kadaihan nin kayamanan na gibohon kitang gabinhod. An kayamanan puwedeng makatabang sa pagbubukas nin bagong mga posibilidad sa paglilingkod, pero iyan puwede man na magin peligroso. (Mateo 19:24) An sarong mayaman tibaad maghona na dai sia kaipuhan na magin arog nin iba kaigot sa paghuhulit, basta sia tumao nin dakulang mga donasyon sa panapanahon. O tibaad sia maghona na huli ta sia mayaman dapat siang tawan nin mga pabor. Dugang pa, kadakol kan mga kasingawan asin aling-alingan na bukas sa sarong mayaman na dai kaya nin iba. Alagad an mga dibersion na iyan nakauubos nin oras asin tibaad makaparayo kan dai nag-iingat sa Kristianong ministeryo, sa siring ginigibong gabinhod an bakong madonong. Likayan logod niato an gabos na siod na iyan asin magpadagos na “nagpapagal asin naghihingoa” nin bilog na puso, na may paglaom sa buhay na daing katapusan.​—1 Timoteo 4:​8-10; 6:​9-12.

‘Pagkakan nin Pamanggihan’

18. Anong oportunidad an iinaatubang ni Jesus sa mga Kristiano sa Laodicea?

¹⁸ Si Jesus nagpadagos sa pagsabi: “Uya! Ako nagtitindog sa pintoan asin nagtotoktok. Kun an siisay man magdangog sa sakong tingog asin bukasan an pintoan, malaog ako sa saiyang harong asin makakan nin pamanggihan sa kaibahan nia asin sia sa kaibahan ko.” (Kapahayagan 3:​20) Kun aakoon sana kan mga Kristianong taga-Laodicea si Jesus sa saindang kongregasyon, tatabangan nia sindang mapangganahan an saindang pagkagabinhod!​—Mateo 18:20.

19. Ano an isinusuherir ni Jesus kan sia manuga na magkakan nin pamanggihan kaiba kan kongregasyon sa Laodicea?

¹⁹ An pagsambit ni Jesus sa pamanggihan siertong nagpagirumdom sa mga taga-Laodicea kan panahon na sia kaibang nagkakan kan saiyang mga disipulo. (Juan 12:​1-8) An siring na mga okasyon perming nagtatao nin espirituwal na mga bendisyon sa mga yaon. Siring man, may bantog na mga okasyon pagkabuhay liwat ni Jesus na sia yaon sa pagkakan kaiba kan saiyang mga disipulo, mga okasyon na nagpakosog na gayo sa sainda. (Lucas 24:​28-32; Juan 21:​9-19) Kun siring, an saiyang panuga na pumaduman sa kongregasyon sa Laodicea asin magkakan kan pamanggihan kaiba ninda panuga na darahan sinda nin mayaman na espirituwal na mga pakinabang kun sia aakoon sana ninda.

20. (a) Sa pagpopoon kan aldaw kan Kagurangnan, ano an ibinunga kan pagkagabinhod nin Kakristianohan? (b) Paano nakaapektar sa Kakristianohan an paghokom ni Jesus?

²⁰ An mamomoton na sadol ni Jesus sa mga taga-Laodicea may dakulang kahulogan para sa natatadang linahidan na mga Kristiano ngonyan. An iba sa sainda nakagigirumdom na, sa pagpopoon kan aldaw kan Kagurangnan, grabe an pagkagabinhod kan mga relihiyonista sa Kakristianohan. Imbes na sabaton an pagbalik kan satong Kagurangnan kan 1914, an saiyang klero napalabot sa garadanan kan Guerra Mundial I, na dian an 24 sa 28 nagraralaban na nasyon naghihingakong Kristiano. Kanigoan kadakula kan saindang pagkakasala sa dugo! Kan Guerra Mundial II, na pinaglabanan man sa Kakristianohan, an mga kasalan kan falsong relihiyon sa giraray ‘nakaabot sagkod sa langit.’ (Kapahayagan 18:5) Dugang pa, tinalikdan kan klero an nagdadangadang na Kahadean ni Jehova paagi sa pagsuportar sa Liga de Naciones, Naciones Unidas, asin sa nasyonalistiko, rebolusyonaryong mga mobimiento, na mayo man sa mga ini na makariresolber sa mga problema nin katawohan. Haloy nang isinikwal ni Jesus an klero, na kinondenar sinda asin iinapon sinda, kun paanong iinaapon nin sarong parasira an mga sirang dai nakakakan na nadakop sa saiyang hikot. An miserableng kamugtakan kan mga iglesya nin Kakristianohan ngonyan nagpapatotoo sa paghokom na iyan sa saiya. An saiya logod na kaaabtan magserbing patanid sa sato!​—Mateo 13:​47-50.

21. Magpoon 1919, paano an mga Kristiano sa tunay na kongregasyon nagkuyog sa mga tataramon ni Jesus sa mga Kristiano sa Laodicea?

²¹ Minsan sa laog kan tunay na kongregasyon, may gabinhod na mga indibiduwal na garo inomon na mayo nin init na nakapababagsik ni lipot na nakarirepresko. Alagad si Jesus may mainit na pagkamoot pa man giraray sa saiyang kongregasyon. Pinadodolok nia an mga Kristiano na nag-aakong may pag-istimar, asin dakol an nag-ako sa saiya, na garo sa sarong pamanggihan. Bilang resulta, magpoon 1919 padagos an saindang mata nabukasan sa kahulogan kan mga hula sa Biblia. Nagkamit sinda nin panahon nin dakulang kaliwanagan.​—Salmo 97:​11; 2 Pedro 1:19.

22. Anong pamanggihan sa ngapit an tibaad nasa isip ni Jesus, asin siisay an makikakabtang dian?

²² Sa pakikipag-olay sa mga taga-Laodicea, tibaad may saro pang pamanggihan na nasa isip si Jesus. Sa eroenotan pa kan Kapahayagan satong mababasa: “Maogma idtong mga imbitado sa pamanggihan sa kasal kan Kordero.” Ini an mamuraway na bangkete nin kapangganahan bilang pag-omaw ki Jehova pakatapos na saiyang hokoman an falsong relihiyon​—bangkete na pakikakabtangan ni Cristo asin kan saiyang nakompleto nang nobya nin 144,000 sa langit. (Kapahayagan 19:​1-9) An makinuyog na mga miembro kan suanoy na kongregasyon sa Laodicea​—iyo, asin an maimbod na mga tugang ni Cristo Jesus ngonyan, na nagsusulot nin malinig na mga gubing na midbidan bilang tunay na linahidan na mga Kristiano—​makakan kaiba kan saindang Nobyo sa pamanggihan na iyan. (Mateo 22:​2-13) Ini makosogon na pandagka na magmaigot asin magsolsol!

(Ipagpapadagos sa masunod na luwas.)

[Nota sa Ibaba]