Paggayagaya sa Satuyang Dakulang Kaglalang

“Mag-ogma logod an Israel sa mamuraway na Kaggibo kaiyan, an mga aki nin Sion​—maggayagaya logod sinda sa saindang Hade.”​—SALMO 149:2.

1. Sa ibong nin mga kurahaw na “sa katapustapusi katalingkasan,” ano an tunay na situwasyon nin katawohan?

AN KINABAN ngonyan dinadamat nin mga “kasakitan.” Iyan an terminong ginamit ni Jesus sa saiyang hula dapit sa “pagtatapos kan palakaw nin mga bagay,” an kapahapahamak na panahon na nagpoon kaidtong enot na guerra mundial kan 1914. (Mateo 24:​3-8) An dakol na politiko daing ibang natatanaw sa ngapit kundi kadikloman. Sa ibong nin mga kurahaw na “sa katapustapusi katalingkasan” sa Sirangan na Europa, an situwasyon sinumaryo nin sarong dating presidente sa lugar na iyan kan sia magsabi: “An pagputok nin populasyon asin an pag-init kan daga, an mga labot sa ozone asin an AIDS, an peligro sa nuklear na terorismo asin an naghihiwas na siwang sa pag-oltanan kan mayaman na amihanan asin kan pobreng timog, an peligro nin gutom, an pagdiit kan kabtang kan kinaban na maiistaran asin kan mineral na mga kayamanan kan planeta, an paghiwas kan kultura na impluwensiado nin komersial na telebisyon asin an nag-oorog na peligro nin mga guerrang rehiyonal​—ini gabos, kaiba an rinibo pang ibang bagay, nagrirepresentar sa pankagabsan na peligro sa katawohan.” Mayo nin kapangyarihan nin tawo na kayang haleon an peligrong ini na masasagkodan na kapahamakan.​—Jeremias 10:23.

2. Siisay an igwa kan permanenteng solusyon sa mga problema nin katawohan, asin ano na an saiyang ginibo?

² Alagad makapaggagayagaya kita na an satuyang Dakulang Kaglalang igwa kan permanenteng solusyon. Sa hula ni Jesus an “pagtatapos kan palakaw nin mga bagay” konektado sa saiyang dai naheheling na “presensia.” (Mateo 24:​3, 37-39) Tanganing malalang an “bagong kalangitan,” si Jesus pinatukaw ni Jehova sa saiyang trono bilang Mesiyanikong Hade, na ipinaheheling kan makahulang ebidensia na an makasaysayan na okasyon na ini nangyari sa kalangitan kan taon 1914.a (2 Pedro 3:13) Bilang kaibang hade kan Soberanong Kagurangnan na Jehova, si Jesus isinugo ngonyan na maghokom sa mga nasyon asin ibulag an mahoyo, arog-karnerong mga tawo sa daga sa matagas an payong mga arog-kanding. An maraot na “mga kanding” tinandaan para sa “pagkaparang daing katapusan” asin an “mga karnero” para sa buhay na daing katapusan sa daganon na sakop kan Kahadean.​—Mateo 25:​31-34, 46.

3. Ano an dahelan nin tunay na mga Kristiano na maggayagaya?

³ An natatada sa espirituwal na Israel digdi sa daga, na inibanan ngonyan nin dakulang kadaklan kan makinuyog na mga karnerong ini, igwa kan gabos na dahelan na maggayagaya ki Jehova, an Hade na daing katapusan, mantang dinadara nia sa kulminasyon an saiyang mamuraway na mga katuyohan paagi sa Kahadean kan saiyang Aki. Masasabi ninda na: “Siertong gayo na ako maggagayagaya ki Jehova. An sakong kalag mag-oogma sa sakong Dios. Huli ta ginubingan nia ako kan mga gubing nin kaligtasan . . . Kun paanong an daga mismo nagpapaluwas kan supang kaiyan, asin kun paanong an tatamnan mismo nagpapasupang sa mga bagay na isinabwag dian, sa siring man na paagi an Soberanong Kagurangnan na Jehova magpapangyari kan pagsupang nin katanosan asin nin kaomawan sa atubang kan gabos na nasyon.” (Isaias 61:​10, 11) An “pagsupang” na ini pinatutunayan kan minilyon na tinitipon ngonyan hale sa mga nasyon tanganing mag-awit kan kaomawan ni Jehova.

‘Pagparikas Kaiyan’

4, 5. (a) Paano ihinula an pagtipon sa banwaan nin Dios? (b) Anong pambihirang pag-oswag an naheling kaidtong 1992 na taon nin paglilingkod?

⁴ Nagririkas an pagtipon mantang nagdadangadang an katapusan kan palakaw ni Satanas. An satuyang Dakulang Kaglalang nagsasabi: “Kun manongod sa saimong banwaan, sinda gabos magigin matanos . . . , an supang kan sakuyang tinanom, an ginibo kan sakuyang mga kamot, sa pagpamuraway sa sakuya. An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” (Isaias 60:​21, 22) An pagparikas na ini makangangalas na ipinaheheling sa Report kan 1992 na Taon nin Paglilingkod kan mga Saksi ni Jehova sa Bilog na Kinaban, na ipinublikar sa pahina 12 sagkod 15 kan magasin na ini.

⁵ Pambihira sa report na ini an bagong pinakahalangkaw na bilang nin 4,472,787 parabalangibog kan Kahadean, na may nakadagdag na 193,967​—4.5 porsiento an kalabihan kan nakaaging taon. An pinakahalangkaw na bilang nin 301,002 na nabautismohan kan 1992 nagpaparisa man kan bagay na kadakol kan nag-aako kan katotoohan sa Biblia. Kanigoan an kagayagayahan niato na sa “aldaw [na ini] nin kadikloman asin karumaroman, . . . igwa nin sarong banwaan na dakula asin makosog,” na siring sa bunyog nin mga doron, pinahihiwas an pagpatotoo sa Kahadean “sagkod sa kaporoporohi nin daga”! (Joel 2:​2, 25; Gibo 1:8) Paghale sa nagyeyelong Alaska​—na duman an eroplano kan Watch Tower Society labi nang 50 beses na sinongko an mga teritoryong may yelo—​sagkod sa nakapapasong mga disyerto nin Mali asin Burkina Faso asin sa wararak na isla nin Micronesia, an mga lingkod ni Jehova minasirang bilang “ilaw kan mga nasyon, tanganing an [saiyang] pagliligtas mapasa kaporoporohi kan daga.”​—Isaias 49:6.

6, 7. Anong dai linalaoman na mga pangyayari an naheling sa nakaaagi pa sanang mga taon, asin ano an reaksion dian kan mga lingkod ni Jehova?

⁶ Si Jehova nagin garo kuta asin makosog na torre sa pagprotehir asin pagtabang sa saiyang banwaan. Sa dakol na kabtang kan daga, an mga Saksi ni Jehova kinaipuhan na magtagal nin dakol na dekada nin maisog na pan-aapi asin paglamag. (Salmo 37:​39, 40; 61:​3, 4) Alagad bago pa sana, garo milagro, nahale an mga pangangalad asin olang sa mga 21 kadagaan, kaya ngonyan libre nang ikababalangibog kan banwaan nin Dios na pinatukaw na kan satuyang Dakulang Kaglalang si Cristo bilang Hade sa daga.​—Salmo 2:​6-12.

⁷ Ginagamit daw sa marahay kan banwaan ni Jehova an saindang bagong katalingkasan? Helinga sa tsart an mga pag-oswag sa Bulgaria, Romania, asin dating Unyon Sobyet sa Sirangan na Europa asin sa Angola, Benin, asin Mozambique sa Aprika. Duman man sa Zaire, pambihira an pag-oswag. May kagayagayahan sa saindang puso, sinisimbag kan nakatalingkas niatong mga tugang an pag-apod na: “Magpasalamat kamo ki Jehova, O kamo banwaan, huli ta sia marahay . . . , sa Paragibo nin makangangalas, darakulang bagay na sia sana: huli ta an saiyang mamomoton na kabootan sagkod sa panahon na daing katapusan.” (Salmo 136:​1, 4) An pagpasalamat na ini ipinahahayag nin mahigos na paglilingkod sa pagtipon sa iba pang arog-karnero sa lado kan Kahadean.

8. Paano an bagong mga paraomaw ki Jehova “nagrurulupad na garo panganoron” sa Sirangan na Europa? sa Aprika?

⁸ Kaidtong nakaaging tig-init sa Europa, an mga kombension kan banwaan ni Jehova sa kadagaan na dating Komunista nagkaigwa nin pambihirang mga kabilangan nin nag-atender. Orog pang makangangalas an kabilangan kan mga nabautismohan sa kadagaan na iyan. Siring man, sa Togo, Aprika, hinale an pangangalad kan Disyembre 10, 1991. Kan sumunod na bulan nagkaigwa nin sarong nasyonal na kombension. Kun ikokomparar sa bulanan na promedyo nin 6,443 na parahayag sa langtad, an nag-atender sa kombension na ini nakaabot sa 25,467, na may 556 na nabautismohan​—8.6 porsiento kan kabilangan nin mga parahayag. Siring sa ilinaladawan kan Isaias 60:​8, an bagong mga paraomaw ki Jehova “nagrurulupad na garo panganoron, asin garo mga salampati sa mga gaha kan saindang harong-harong” sa mga kongregasyon kan banwaan ni Jehova.

9. Anong mga probisyon an ginibo tanganing an mga Kristiano sa mga nasyon na bago pa sanang magkaigwa nin libertad ‘magkarakan asin magkabarasog’?

⁹ Napaninigoan man an gutom sa espirituwal na kakanon sa Sirangan na Europa asin Aprika. An mga pabrika kan Watch Tower Society sa Alemania, Italia, asin Aprika del Sur nagpadara nin trak-trak na literatura, sa nagkapirang tataramon, sa mga nasyon na nagugutom sa espirituwal. Kaidto, an dakol na Saksi kinaipuhan na magsurublian nin gurunit nang magasin, pero ngonyan nag-aako na sinda nin abundang espirituwal na kakanon. Naggagayagaya sindang makikabtang sa kaotoban kan hula na: “Makarakan kamo, na nagkakarakan asin nagkakabarasog, asin ooromawon nindo an ngaran ni Jehova na saindong Dios, na naggibo nin mga ngangalasan sa saindo.”​—Joel 2:26.

Pag-asikaso sa Orog Pang Pag-oswag

10. Huli sa halangkaw na kabilangan nin mga nag-atender sa Memorial, ano an imbitasyon sa gabos na interesado?

¹⁰ Pambihira nanggad an kabilangan nin nag-atender sa bilog na kinaban sa Memorial kan kagadanan ni Jesus, 11,431,171, 781,013 an ilinangkaw, o 7.3 porsiento an kalabihan kisa nakaaging taon. Maogma mi kamong inaako, kamo gabos na bagohan! Kanigoan karahay kun an gabos na bagong interesadong iyan makinabang sa pag-adal sa Biblia kaiba nin saro sa mga Saksi ni Jehova! (Helingon an Isaias 48:17.) Ipinaheheling kan Report kan Taon nin Paglilingkod na 4,278,127 pag-adal an ginigibo kada bulan, marahayon na 8.4-porsientong pag-oswag. Minsan siring, dakol pa an puwedeng makinabang sa paglilingkod na ini. An mga Saksi ni Jehova naoogmang dayaday na songkoon an mga interesado sa pangengenot sa libreng pag-adal sa Biblia sa harong, sa siring tinatabangan an mga ini na makapanindogan nin marigon sa dalan pasiring sa buhay na daing katapusan. (Juan 3:​16, 36) Taano ta dai humagad nin siring na pag-adal? Asin girumdoma, may mainit na pag-ako na perming naghahalat sa saindo sa Kingdom Hall!​—Salmo 122:1; Roma 15:7.

11, 12. (a) Anong mga problema an inaatubang sa nagkapirang kadagaan? (b) Sa anong paagi na nangyayari an “pagkasarama” sa pag-oltanan nin mas mayaman asin mas dukhang kadagaan?

¹¹ An mga kongregasyon na may magagayon na Kingdom Hall nagkamit nin mayaman na bendisyon. Laen man an situwasyon sa kadagaan na an maimbod na mga Saksi dakol na taon na nagtagal sa irarom nin pangangalad, na hilom na nagtitiripon sa saradit na grupo. Sa nagkapirang lugar na siring kaiyan, sinda ngonyan talingkas na pero pipira an Kingdom Hall. Halimbawa, sa sarong nasyon sa Aprika, na may 93 na kongregasyon, totolo sana an Kingdom Hall. Kaya an pagtiripon sa parate ginigibo sa mahiwas na mga dagang bakante. An kongregasyon nin 150 puwedeng magkaigwa nin sagkod sa 450 regular na nag-aatender sa mga pagtiripon na ini.

¹² Sa Sirangan na Europa sa parate depisil na bumakal nin daga o magtogdok, pero may nagigibong pag-oswag. Iniskedyul an pagdusay nin magayon na bagong sanga kan Nobyembre 28, 1992, sa Polandia. An abundang mga kontribusyon sa pankinaban na gibohon kan mga Saksi ni Jehova ginagamit sa pagtabang sa pagtogdok nin mga tiriponan asin iba pang pasilidad. Kaya, nangyayari an “pagkasarama” ta an pagkamatinao nin mga tugang na nagkokontribuwir hale sa saindang materyal na “sobra” nakatatabang sa pagtao kan espirituwal na mga pangangaipo nin mga kongregasyon sa pobreng kadagaan.​—2 Corinto 8:​13, 14.

Sarong Bilyon na Oras!

13. Pirang oras an ginamit sa paghuhulit asin pagtotokdo kan 1992, asin kiisay na paghihingoa an ipinaheheling sa kabilangan na ini?

¹³ Ano an gigibohon nindo sa sarong bilyon na oras? An gabos na magkakamit nin buhay na daing katapusan makagagamit nin siring kadakol na oras, asin dakol pa dian, sa mabunga, nakakokontentong paglilingkod ki Jehova. Pero isip-isipa an pagsuso kan siring kadakol na oras sa sarong taon! Iyan an nagibo kan banwaan ni Jehova kan 1992. Sa pagsuma kan indibiduwal na mga report kan gabos na parahayag kan Kahadean, nanonompongan niato an bagong pinakahalangkaw na bilang nin 1,024,910,434 oras na ginamit sa pinakamarahay na paagi nin paggamit sa oras​—sa pag-omaw sa satong Dakulang Kaglalang, “sa pagtokdo . . . sa publiko asin sa pagharongharong.” (Gibo 20:20) Sa promedyo, 4,289,737 Saksi an nagrireport kada bulan. Hale sinda sa gabos na kamugtakan sa buhay. An iba limitado an oras na ikakokontribuwir sa gibong pan-Kahadean. Kairiba digdi an mga payo nin pamilya, na kaipuhan na magsustento sa pamilya; mga gurang; asin an dakol na may problema sa salud; saka an mga aki na nag-eeskuwela pa. Pero, an report kan kada saro mahalagang marhay na pagpaheling nin pagkamoot ki Jehova.​—Ikomparar an Lucas 21:​2-4.

14. Paano an mga hobenes ‘naggigirumdom sa saindang Dakulang Kaglalang’?

¹⁴ May mas hoben na kapag-arakian na nagdadakula sa paglilingkod ki Jehova, asin makaoogma ta an mayoriya sa mga ini nag-aaplikar kan mga tataramon ni Salomon sa Eclesiastes 12:1: “Girumdoma, ngonyan, an saimong Dakulang Kaglalang sa mga aldaw kan saimong pagkabarobata.” Sinda nagmamaigot sa saindang pag-eskuwela, saka tinotokdoan sa espirituwal na mga bagay nin debotadong mga magurang. Dakulang kagayagayahan na maheling an dakol na tin-edyer na minatindog sa bago pa sanang mga kombension, na nagpipresentar na pabautismo. Saro man na kagayagayahan na maaraman na an dakol, paagi sa pag-adal sa sarong trabaho o opisyo, naggigibo nin praktikal na pag-andam para sa pagpapayunir pagkagraduwar ninda sa eskuwelahan. Sa siring, mabubuhay ninda an saindang sadiri, arog kaidto ki apostol Pablo sa panapanahon paagi sa paggibo nin tolda.​—Gibo 18:​1-4.

15, 16. Paano an mga payunir asin iba pang bilog na panahon na mga lingkod nakakontribuwir sa pag-oswag kan gibong pan-Kahadean, asin anong bendisyon an nakamtan kan iba sa sainda?

¹⁵ Kanigoan kadakula kan ikinakokontribuwir nin mga payunir asin iba pang bilog na panahon na mga lingkod sa pag-oswag kan gibong pan-Kahadean! An mga payunir nagdakol sagkod sa pinakahalangkaw na bilang na 931,521 kaining nakaaging taon. Mantang an mga ini naghuhulit aroaldaw sa harong-harong asin nangangadal sa Biblia sa harong nin mga tawo, sinda nagigin epektibong marhay sa pagpahayag kan saboot ninda sa Kasuratan. Dugang pa, dakol an nakuwalipikar na umatender sa duwang-semanang Paadalan sa Paglilingkod Bilang Payunir, na nagtatabang sainda na makultibar an orog na kakayahan asin kagayagayahan sa pag-otob sa gibohon nin Dios.

¹⁶ An kada saro sa maimbod na mga payunir na ini makaaarog sa mga tataramon sa Isaias 50:4: “An Soberanong Kagurangnan na Jehova mismo nagtao sa sako kan dila kan mga madonong, tanganing makatatao ako kun paano sisimbagon nin sarong tataramon an napapagal.” Kadakol kan mga tawo ngonyan na pagal na sa maraot na kinaban sa palibot ninda pero narirepreskohan paagi sa tataramon na itinataram kan satong maimbod na mga payunir.​—Ikomparar an Talinhaga 15:23; Ezequiel 9:4.

Sarong Mahiwas na Programa nin Pagtotogdok

17. Apuwera sa espirituwal na pagtotogdok, anong materyal na pagtotogdok an naheling kaining nakaaagi pa sanang mga taon?

¹⁷ An lakop sa kinaban na espirituwal na prosperidad kan mga Saksi ni Jehova naghahagad man nin materyal na pagtalubo. Nagigin kaipuhan an pagpahiwas nin mga imprentahan, opisina, asin erokan na Bethel asin pagtogdok nin mga Kingdom Hall asin Assembly Hall. Kaya an mga Saksi ni Jehova naoobligar na magin mga paratogdok sa pisikal na paagi. Nangyari an kaagid na pagtotogdok kan kaaldawan ni Hadeng Salomon. Itinogdok ni Salomon an templo para sa pagsamba ki Jehova sono sa “plano . . . na napasaiya paagi sa pasabong,” ta ini itinao ni Jehova sa saiyang ama, si Hadeng David. (1 Cronica 28:​11, 12) Kaya, si Salomon bako sanang pinakosog an mga naghihinanyog sa saiya paagi sa daing kaagid sa halagang mga tataramon nin kadonongan kundi pinangenotan man an materyal na pagtotogdok na nungka naarog kan sekular na kinaban an kagayonan.​—1 Hade 6:1; 9:​15, 17-19.

18, 19. (a) Anong marikas an progresong mga proyekto nin pagtotogdok an ginigibo kan organisasyon ni Jehova? (b) Paano nahayag an espiritu ni Jehova sa materyal saka espirituwal na pagtotogdok?

¹⁸ Ngonyan, an mga Saksi ni Jehova dai nagtotogdok paagi sa mga planong ipinasabong nin Dios, pero yaon sainda an espiritu nin Dios. Arog kaidtong kaaldawan nin Israel, ini nagmomotibar sainda na magtogdok sa paagi na pinagngangalasan kan mga kinabanon. (Zacarias 4:6) Halipot na an panahon. Kaipuhan na nin daing pagkaatraso an mga Kingdom Hall asin iba pang edipisyo. Sa nagkapirang nasyon usong marhay an mga Kingdom Hall na itinogdok nin madalian. Sa nakaaging 10 taon, halimbawa, an Canada nagreport kan pagtogdok nin 306 na tiriponan, na an kada saro mayo pang duwang aldaw. Huli sa marikas na paghiwas kan gibo ni Jehova sa bilog na kinaban, 43 gabos na bagong mga edipisyo nin sanga o pagpahiwas nin sanga an itinotogdok o pinaplano sa presente. Dugang pa, madali nang matapos sa Brooklyn an 30-eskalon na edipisyong residensial, na maiistaran nin mga sangribong boluntaryo sa Bethel. Duman man sa Estado nin Nueva York, sa Patterson, naeenot sa iskedyul an pagtogdok nin sarong sentro nin edukasyon sa Biblia, an kadarudakulaing proyekto kan Watch Tower Society.

¹⁹ An mga proyektong ini nag-aabante na may pagkapulido an dalagan asin kuwalidad nin trabaho na pinagngangalasan nin may pakaaram na mga kompaniya nin pagtogdok sa kinaban. Taano? Huli sa dakulaon na kontribusyon nin dusay na mga Saksi ni Jehova. Pinahihiro sinda kan saiyang espiritu na bako sanang tumao nin materyal na pagsuportar kundi itao man nin bilog na puso an saindang panahon asin kosog. An mga lugar nin pagtogdok binuburunyogan nin eksperto, debotadong mga trabahador. Mayo nin mga welga, asin mayo nin pagbolakbol sa trabaho. An espiritu ni Jehova an nagmomotibar, kun paanong minotibar kaiyan an mga nagtogdok kan tabernakulo kaidtong panahon ni Moises asin an mga nagtogdok kan templo kaidtong kaaldawan ni Salomon. Espirituwalidad an lataw na kuwalidad na hinahagad sa mga trabahador na ini.​—Ikomparar an Exodo 35:​30-35; 36:​1-3; 39:​42, 43; 1 Hade 6:​11-14.

20. (a) Gurano pa kahiwas na ihuhulit an maogmang bareta? (b) Anong mapalad na paglaom an naghahalat sa banwaan ni Jehova?

²⁰ Ipinadagos ni Salomon an saiyang programa nin pagtotogdok pagkatapos kan templo. (2 Cronica 8:​1-6) Dai niato aram kun gurano pa an ihihiwas kan pagpatotoo sa modernong aldaw​—kaiba an pangangaipo nin pagtogdok nin mga tiriponan asin iba pang pasilidad. Pero aram niato na kun ikinahulit na an maogmang baretang ini kan Kahadean sa hiwas na ipinagboot ni Jehova, dangan madatong an katapusan, an “dakulang kahorasaan.” (Mateo 24:​14, 21) Sa sarong daga na dai na rinaraot nin paslong mga tawo, an areglo ni Jehova na “bagong kalangitan asin sarong bagong daga” matao na nin dai ikasabing mga bendisyon sa katawohan. Kun siring kita logod ‘maggayagaya asin mag-ogma sagkod lamang sa linalalang nin Dios,’ na itinatao an gabos na kaomawan sa satong Dakulang Kaglalang!​—Isaias 65:​17-19, 21, 25.

[Nota sa Ibaba]

Ikapaliliwanag daw Nindo?

◻ Ano an mga dahelan niato na maggayagaya sa satong Dakulang Kaglalang?

◻ Anong mga pag-oswag an irineport kaidtong 1992 na taon nin paglilingkod?

◻ Sa mga nasyon na dati ipinangangalad an paghuhulit, anong mayaman na mga bendisyon an irineport?

◻ Paano nakakontribuwir an mga hobenes asin payunir sa pag-oswag sa organisasyon ni Jehova?

◻ Paano nagin sibot an banwaan ni Jehova sa materyal saka espirituwal na pagtotogdok?

[Kahon sa pahina 17]

Kan nakaaging taon labing sarong bilyon na oras an ginamit sa gibong paghuhulit asin pagtotokdo

[Tsart sa pahina 12-15]

REPORT KAN 1992 TAON NIN PAGLILINGKOD KAN MGA SAKSI NI JEHOVA SA BILOG NA KINABAN

(Hilingon an publikasyon)

[Ritrato sa pahina 10]

An ginatos na ribong kandidato sa bautismo kan nakaaging taon nagpapaheling kan bendisyon ni Jehova sa gibong paghuhulit asin pagtotokdo

[Ritrato sa pahina 16]

An dakol na hobenes ‘naggigirumdom sa saindang Dakulang Kaglalang’