Kapahayagan—An Mamuraway na Kulminasyon Kaiyan Harani Na
Kapitulo 14: An Kamurawayan kan Langitnon na Trono ni Jehova
Bisyon 2—Kapahayagan 4:1–5:14
Tema: Makangingirhat na mga pangyayari sa atubangan kan trono nin paghokom nin Dios
Panahon nin kaotoban: An bisyon na ini nagtatampok nin mga pangyayari poon 1914 sagkod sa katapusan kan Milenyo patin lihis pa, sa panahon na an gabos na linalang sa langit asin sa ibabaw nin daga mag-oomaw ki Jehova.—Kapahayagan 5:13
1. Taano ta maninigo kitang magin interesadong gayo sa bisyon na ihinihiras sa sato ni Juan?
Pinonan ni Juan na ihiras sa sato an dugang pang nakapupukaw nin kalag na mga bisyon. Paagi sa pasabong sia yaon pa sa aldaw kan Kagurangnan. Kaya, an saiyang ilinaladawan may hararom na kahulogan para sa sato na aktuwal na nabubuhay sa aldaw na iyan. Paagi sa mga bisyon na ini, hinahale ni Jehova an belo nin pagkadai naheheling sa langitnon na mga katunayan asin ipinaheheling sato an saiyang mga paghokom na gigibohon sa daga. Dugang pa, baga man kita may langitnon o daganon na paglaom, an mga kapahayagan na ini nakatatabang sato na maheling an satong lugar sa katuyohan ni Jehova. Kaya kita gabos maninigong magpadagos na interesadong gayo sa kapahayagan ni Juan: “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian.”—Kapahayagan 1:3.
2. Ano ngonyan an naeksperyensiahan ni Juan?
2 An sumunod na naheling ni Juan nakalalabi sa ano man na ipinaheling sa tawo paagi sa video ngonyan na ika-20 siglo! Sia nagsurat: “Pakatapos kan mga bagay na ini ako nagheling, asin, uya! an sarong bukas na tata sa langit, asin an enot na tingog na nadangog ko siring sa sarong trumpeta, na nakikipag-olay sa sako, na an sabi: ‘Sakat digdi, asin ipaheheling ko sa saimo an mga bagay na kaipuhan na mangyari.’ ” (Kapahayagan 4:1) Paagi sa bisyon si Juan nakaabot sa dai naheheling na kalangitan kan presensia ni Jehova, na mas halangkaw pa sa pisikal na espasyo na sinisiyasat nin modernong mga astronaut, mas halangkaw pa ngani sa mga galaksia kan materyal na uniberso. Garo baga naglaog sa bukas na tata, si Juan inimbitaran na basogon an saiyang mata kan nakapaoontok sa paghangos na tanawon kan pinakaharayong espiritung kalangitan na duman mismo an trono ni Jehova. (Salmo 11:4; Isaias 66:1) Kanigoan kadakulang pribilehiyo!
3. Ano an ipinagigirumdom kan tingog na “siring sa sarong trumpeta,” asin siisay an daing duwa-duwa na Pinaghalean kaiyan?
3 Dai sinasabi kan Biblia kun kiisay an “enot na tingog” na ini. Kapareho kan makosog na tingog ni Jesus na nadangog sa enotan, iyan man nakaaapod nin atension na tanog na garo sa trumpeta. (Kapahayagan 1:10, 11) Ipinagigirumdom kaiyan an nadadangog sa harayong tanog nin amodyong na senyal kan presensia ni Jehova sa Bukid nin Sinai. (Exodo 19:18-20) Daing duwa-duwa, si Jehova an mamuraway na Pinaghalean kan pag-apod. (Kapahayagan 1:1) Binukasan nia an tata tanganing si Juan, sa bisyon, makalaog sa kabanalbanaleng lugar sa bilog na sakop kan soberaniya ni Jehova.
An Maliwanagon na Presensia ni Jehova
4. (a) Ano an kahulogan kan bisyon ni Juan para sa linahidan na mga Kristiano? (b) Ano an kahulogan kan bisyon para sa mga an paglaom mabuhay sagkod lamang sa ibabaw nin daga?
4 Ano an naheling ni Juan? Hinanyoga, mantang ihinihiras nia sa sato ngonyan an saiyang makangangalas na eksperyensia: “Pakatapos kan mga bagay na ini ako tolos-tolos na napasa kapangyarihan kan espiritu: asin, uya! an sarong trono nasa kamugtakan kaiyan sa langit, asin igwa nin nagtutukaw sa trono.” (Kapahayagan 4:2) Sa panale, si Juan ibinalyo sa espirituwal kan puwersa aktiba nin Dios pasiring sa mismong trono ni Jehova. Ini makaoogma nanggad para ki Juan! Digdi tinawan sia nin nakasusulang patanaw sa mismong kalangitan na dian may narireserba para sa saiya asin sa iba pang linahidan na Kristiano na “dai nalalapa asin daing digta patin dai napaparang mana.” (1 Pedro 1:3-5; Filipos 3:20) Para sa mga an paglaom mabuhay sagkod lamang sa ibabaw nin daga, an bisyon ni Juan igwa man nin hararom na kahulogan. Iyan nakatatabang sainda na masabotan an kamurawayan kan presensia ni Jehova asin kan langitnon na estruktura nin pamamahala na ginagamit ni Jehova sa paghokom sa mga nasyon asin dangan sa pamamahala sa buhay nin mga tawo sa ibabaw kan daga. Si Jehova talagang an Dios nin pambihirang organisasyon!
5. Anong katunayan an naheling ni Juan na isinimbolo kan takop kan kaban nin tipan?
5 An kadaklan sa namasdan ni Juan duman sa langit nakaaagid sa mga kabtang kan tabernakulo sa kapatagan. Ini itinogdok mga 1,600 na taon na an nakaagi kaidto bilang santuaryo nin tunay na pagsamba para sa mga Israelitas. Nasa Kabanalbanale kan tabernakulong idto an kaban kan tipan, asin hale sa ibabaw kan solidong bulawan na takop kan Kaban na si Jehova mismo nagtataram. (Exodo 25:17-22; Hebreo 9:5) Kaya, an takop kan Kaban nagserbing simbolo kan trono ni Jehova. Ngonyan naheling ni Juan an katunayan kan simbolikong representasyon na idto: an Soberanong Kagurangnan na Jehova mismo nagtutukaw sa makuring kamurawayan sa saiyang halangkawon na trono sa langit!
6. Anong impresyon ki Jehova an itinatao sa sato ni Juan, asin taano ini ta angay?
6 Bakong arog nin mas naenot na mga propeta na nagkamit nin mga bisyon kan trono ni Jehova, dai ilinaladawan nin detalyado ni Juan an Banal na Saro na nagtutukaw dian. (Ezequiel 1:26, 27; Daniel 7:9, 10) Pero itinatao sato ni Juan an saiyang impresyon sa Sarong nagtutukaw sa trono sa mga tataramon na ini: “Asin an nakatukaw, kun paghelingon, kaagid sa sarong gapong jaspe asin sa mahalagang pulang gapo, asin sa palibot kan trono igwa nin hablondawani na kaagid sa esmeralda kun paghelingon.” (Kapahayagan 4:3) Kanigoan kadaing kaagid na kamurawayan! An naheling ni Juan toninong, nagkikilyab na kagayonan kapareho nin makintab, nagkikilyab na tampok nin alahas. Ini tamang-tama sa paglaladawan ni disipulo Santiago ki Jehova bilang “an Ama kan langitnon na liwanag”! (Santiago 1:17) Dai nahaloy pakasuratan kan Kapahayagan, si Juan mismo nagsabi: “An Dios liwanag asin dian sa saiya dai nin ano man na kadikloman.” (1 Juan 1:5) Kanigoan kamuraway na Persona si Jehova!
7. Ano an manonodan niato sa bagay na may hablondawani sa palibot kan trono ni Jehova?
7 Mangnohon na naheling ni Juan sa palibot kan trono an sarong hablondawani, na an kolor berdeng esmeralda. An termino sa Griego na isinalin digding hablondawani (irʹis) nagsusuherir nin pormang biyong pabilog. An hablondawani enot na nasambitan sa Biblia may koneksion sa aldaw ni Noe. Kan maghubas na an tubig kan Baha, pinalataw ni Jehova an sarong hablondawani sa panganoron, asin ipinaliwanag nia kun ano an isinisimbolo kaiyan sa mga tataramon na ini: “An sakuyang hablondawani itinatao ko sa panganoron, asin iyan magigin tanda kan tipan sa pag-oltanan ko asin kan daga. Asin magigirumdoman ko an sakuyang tipan na sa pag-oltanan ko asin nindo saka kan gabos na nabubuhay na kalag sa tahaw nin gabos na laman; asin an katubigan dai na magigin baha tanganing lumaglag sa gabos na laman.” (Genesis 9:13, 15) Kun siring, ano an ipagigirumdom ki Juan kan langitnon na bisyon? An hablondawani na saiyang naheling seguradong nagpagirumdom sa saiya kan pangangaipo nin matoninong na relasyon ki Jehova, arog kan nakakamtan ngonyan kan grupong Juan. Idodoon man kaiyan sa saiya an katrangkilohan asin katoninongan kan presensia ni Jehova, katrangkilohan na malakop sa gabos na makinuyog na tawo kun ladladon na ni Jehova an saiyang tabernakulo sa katawohan sa sosyedad nin bagong daga.—Salmo 119:165; Filipos 4:7; Kapahayagan 21:1-4.
Pagkamidbid sa 24 Kamagurangan
8. Siisay an naheling ni Juan sa palibot kan trono, asin siisay an irinepresentar kan mga ini?
8 Aram ni Juan na an mga saserdote ninombrahan na maglingkod sa suanoy na tabernakulo. Kaya tibaad napangalas sia kan maheling an sumunod niang ilinaladawan: “Asin sa palibot kan trono igwa nin duwang polo may apat na trono, asin sa mga tronong ini naheling kong nagtutukaw an duwang polo may apat na magurang na nagugubingan nin mga gubing na maputi, asin sa saindang payo an mga koronang bulawan.” (Kapahayagan 4:4) Iyo, imbes na mga saserdote, yaon an 24 magurang, na nagtutukaw sa trono asin may korona arog nin mga hade. Sairisay an mga magurang na ini? Mayong iba kundi mga linahidan sa Kristianong kongregasyon, na binuhay liwat asin nasa langitnon na kamugtakan na ipinanuga sa sainda ni Jehova. Paano niato iyan naaaraman?
9, 10. Paano niato naaaraman na an 24 magurang nagrirepresentar sa linahidan na Kristianong kongregasyon sa mamuraway na kamugtakan kaiyan sa langit?
9 Enot sa gabos, sinda may mga korona. An Biblia nagtataram manongod sa linahidan na mga Kristiano bilang magkakamit nin ‘koronang bakong matutunawon’ asin nin buhay na daing katapusan—nin inmortalidad. (1 Corinto 9:25; 15:53, 54) Alagad mantang an 24 magurang na ini nagtutukaw sa mga trono, an mga koronang bulawan sa kontekstong ini nagrirepresentar sa makahadeng autoridad. (Ikomparar an Kapahayagan 6:2; 14:14.) Ini nagsusuportar sa konklusyon na an 24 magurang naglaladawan sa linahidan na mga parasunod ni Jesus sa saindang langitnon na kamugtakan, huli ta si Jesus nakipagtipan sa sainda na tumukaw sa mga trono sa saiyang Kahadean. (Lucas 22:28-30) Solamente si Jesus asin an 24 magurang na ini—minsan mga anghel dai—an ilinaladawan na naghahade sa langit sa presensia ni Jehova.
10 Kaoyon ini kan panuga ni Jesus sa kongregasyon sa Laodicea: “An makadaog totogotan kong tumukaw sa kaibanan ko sa sakong trono.” (Kapahayagan 3:21) Pero an langitnon na destino kan 24 magurang bako sanang limitado sa paggogobyerno. Sa introduksion kan libro nin Kapahayagan, si Juan nagsabi manongod ki Jesus: “Ginibo nia kitang magin sarong kahadean, mga saserdote sa saiyang Dios asin Ama.” (Kapahayagan 1:5, 6) An mga ini kapwa hade asin saserdote. “Sinda magigin mga saserdote nin Dios asin kan Cristo, patin maghahade sinda sa kaibanan nia sa laog nin sangribong taon.”—Kapahayagan 20:6.
11. Taano ta angay na an bilang kan mga magurang 24, asin ano an kahulogan kan bilang na iyan?
11 Ano an makahulogan manongod sa kabilangan na 24, ta si Juan nakaheling nin 24 magurang sa palibot kan trono? Sa dakol na bagay, an mga ini ipinanganino kan maimbod na mga saserdote kan suanoy na Israel. Si apostol Pedro nagsurat sa linahidan na mga Kristiano: “Kamo ‘rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri.’” (1 Pedro 2:9) Interesante nanggad, an suanoy na pagkasaserdoteng Judio nabanga sa 24 kabtang. An kada kabtang naasignaran nin mga semana sa laog kan taon na maglilingkod ki Jehova, kaya ikinatatao nin daing putol an banal na paglilingkod. (1 Cronica 24:5-19) Kaya angay sana na may 24 magurang na ipinaheheling sa bisyon ni Juan kan langitnon na pagkasaserdote ta an pagkasaserdoteng ini padagos na naglilingkod ki Jehova, daing pondo. Kun kompleto na, magkakaigwa nin 24 kabtang, an kada saro may 6,000 na nakadaog, huli ta sinasabi sato kan Kapahayagan 14:1-4 na 144,000 (24 x 6,000) an “binakal hale sa katawohan” tanganing tumindog sa langitnon na Bukid nin Sion kaiba kan Kordero, si Jesu-Cristo. Mantang an bilang na 12 nangangahulogan nin organisasyon na may banal na pagkatimbang, an 24 dinodoble—o pinakokosog—an siring na areglo.
Mga Kikilat, Tingog, Asin Dagoldol
12. Ano an sumunod na naheling asin nadangog ni Juan, asin ano an ipinagigirumdom kan “mga kikilat asin tingog patin dagoldol”?
12 Ano an sumunod na naheling asin nadangog ni Juan? “Asin hale sa trono igwang nagluluwas na mga kikilat asin tingog patin dagoldol.” (Kapahayagan 4:5a) Ini nagpapagirumdom nanggad sa iba pang pambihirang pagpapaheling kan kapangyarihan ni Jehova sa langit! Halimbawa, kan si Jehova “huminilig” sa Bukid nin Sinai, si Moises nagsabi: “Nangyari na kan ikatolong aldaw kan pagkaaga na nagpoon na umabot an mga dagoldol asin kikilat, asin an mahibog na panganoron sa alitoktok kan bukid patin makosogon na tanog nin amodyong. . . . Kan pakosog nang pakosog an tanog kan amodyong, si Moises nagpoon na magtaram, asin an tunay na Dios nagsimbag sa saiya sa sarong tingog.”—Exodo 19:16-19.
13. Ano an ilinaladawan kan mga kikilat na hale sa trono ni Jehova?
13 Sa aldaw kan Kagurangnan, ipinaheheling ni Jehova an saiyang kapangyarihan asin presensia sa mamuraway na paagi. Bako, bakong paagi sa literal na kikilat, ta mga tanda an naheheling ni Juan. Kun siring, ano an irinirepresentar kan mga kikilat? Bueno, an mga pagsilyab nin kikilat puwedeng magtao nin liwanag, pero iyan puwede man na makagadan. Kun siring, an mga kikilat na ini na hale sa trono ni Jehova naglaladawan nanggad sa mga silyab nin kaliwanagan na padagos niang itinatao sa saiyang banwaan asin, mas makahulogan pa ngani, sa saiyang malaad na mga mensahe nin paghokom.—Ikomparar an Salmo 18:14; 144:5, 6; Mateo 4:14-17; 24:27.
14. Paano nadangog an mga tingog ngonyan?
14 Ano man an mga tingog? Kan humilig si Jehova sa Bukid nin Sinai, may tingog na nakipag-olay ki Moises. (Exodo 19:19) An mga tingog hale sa langit nagtao kan dakol na pagboot asin proklamasyon sa librong Kapahayagan. (Kapahayagan 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Ngonyan, si Jehova nagtao man nin mga pagboot asin proklamasyon sa saiyang banwaan, na pinaliliwanagan an saindang pakasabot sa mga hula asin prinsipyo kan Biblia. Itinao man an nagtatao nin liwanag na impormasyon sa internasyonal na mga kombension, asin an mga katotoohan na iyan sa Biblia ibinalangibog man sa bilog na kinaban. Si apostol Pablo nagsabi manongod sa maimbod na mga parahulit kan maogmang bareta: “Tara, sa katotoohan, ‘an saindang tingog nakalakop sa bilog na daga, asin an saindang mga tataramon sagkod sa kaporoporohi kan inierokan na daga.’”—Roma 10:18.
15. Anong mga dagoldol an naghale sa trono sa kabtang na ini kan aldaw kan Kagurangnan?
15 An dagoldol parateng minasunod sa kikilat. Inapod ni David an literal na dagoldol na “tingog ni Jehova.” (Salmo 29:3, 4) Kan si Jehova makipaglaban para ki David tumang sa saiyang mga kaiwal, sinasabi na may dagoldol na naghahale sa Saiya. (2 Samuel 22:14; Salmo 18:13) Sinabihan ni Eliu si Job na an tingog ni Jehova garo dagoldol, mantang Sia “naggigibo nin darakulang bagay na dai niato narororop.” (Job 37:4, 5) Sa kabtang na ini kan aldaw nin Kagurangnan, si Jehova ‘nagdagoldol,’ na nagpapatanid manongod sa darakulang bagay na saiyang gigibohon tumang sa saiyang mga kaiwal. An simbolikong mga dagoldol na ini nag-aningal asin nag-aaningal sa bilog na daga. Maogma kamo kun kamo naghinanyog sa nagdadagoldol na mga kapahayagan na ini asin madonong na ginagamit an saindong dila sa pagpakosog pa kaiyan!—Isaias 50:4, 5; 61:1, 2.
Mga Ilawan nin Kalayo Asin Dagat na Salming
16. Ano an kahulogan kan “pitong ilawan nin kalayo”?
16 Ano pa an naheling ni Juan? Ini: “Asin igwa nin pitong ilawan nin kalayo na naglalaad sa atubangan kan trono, asin ini nangangahulogan kan pitong espiritu nin Dios. Asin sa atubangan kan trono garo igwa nin sarong dagat na salming na nakaaagid sa kristal.” (Kapahayagan 4:5b, 6a) Sinasabi mismo ni Juan sa sato an kahulogan kan pitong ilawan: “Ini nangangahulogan kan pitong espiritu nin Dios.” An bilang na pito nagsisimbolo nin banal na pagkakompleto; kaya an pitong ilawan seguradong nagrirepresentar sa kalubosan kan nagtataong liwanag na puwersa kan banal na espiritu. An grupong Juan ngonyan nagpapasalamat nanggad na iyan pinaniwalaan kan kaliwanagan na ini, kaiba an responsibilidad na ipaabot man iyan sa nagugutom sa espirituwal na mga tawo sa daga! Kanigoan an kaogmahan niato na taon-taon labing 350 milyones na kopya kan magasin na Watchtower an padagos na nagpapasirang kan liwanag na ini sa labing sanggatos na tataramon!—Salmo 43:3.
17. Ano an isinisimbolo kan “dagat na salming na nakaaagid sa kristal”?
17 Nakaheling man si Juan nin “dagat na salming na nakaaagid sa kristal.” Ano an isisimbolo kaini mapadapit sa mga imbitado sa langitnon na palasyo ni Jehova? Si Pablo nagtaram manongod sa paagi na pinakangbanal ni Jesus an kongregasyon, “na linilinigan iyan sa paghugas sa tubig paagi sa tataramon.” (Efeso 5:26) Bago sia nagadan, sinabihan ni Jesus an saiyang mga disipulo: “Kamo mga malinig na huli kan tataramon na itinaram ko sa saindo.” (Juan 15:3) Kaya, an dagat na salming na ini na nakaaagid sa kristal seguradong nagrirepresentar sa nakalilinig, nasusurat na Tataramon nin Dios. An mga kabilang sa makahadeng pagkasaserdote na minaatubang ki Jehova seguradong lubos na nalinigan kan saiyang Tataramon.
Helinga—“Apat na Buhay na Linalang”!
18. Ano an naheling ni Juan sa tahaw asin palibot kan trono?
18 Ngonyan namasdan ni Juan an saro pang bagay. Sia nagsurat: “Asin sa tahaw kan trono saka sa palibot kan trono igwa nin apat na buhay na linalang na pano nin mata sa atubangan asin sa likod.”—Kapahayagan 4:6b.
19. Ano an ilinaladawan kan apat na buhay na linalang, asin paano niato ini naaaraman?
19 Ano an ilinaladawan kan mga linalang na ini? An sarong bisyon na ibinabareta nin saro pang propeta, si Ezequiel, nakatatabang sato na manompongan an simbag. Naheling ni Ezequiel si Jehova na natutukaw sa trono sa sarong langitnon na karuwahe, na may kaibang buhay na mga linalang na may mga karakteristiko na nakaaagid kan mga ilinadawan ni Juan. (Ezequiel 1:5-11, 22-28) Dangan, naheling liwat ni Ezequiel an tronong karuwaheng iyan na may kaibang buhay na mga linalang. Pero, ngonyan, inapod nia an buhay na mga linalang na mga kerubin. (Ezequiel 10:9-15) An apat na buhay na linalang na naheling ni Juan seguradong nagrirepresentar sa dakol na kerubin nin Dios—mga linalang na halangkaw an katongdan sa Saiyang espiritung organisasyon. Dai iisipon ni Juan na pambihira na maheling an mga kerubin na haranihon ki Jehova, ta sa areglong tabernakulo kan suanoy, may duwang kerubin na bulawan sa ibabaw kan takop kan kaban nin tipan, na nagrepresentar sa trono ni Jehova. Hale sa pag-oltanan kan mga kerubin na ini, an tingog ni Jehova nagtao nin mga pagboot sa nasyon.—Exodo 25:22; Salmo 80:1.
20. Sa anong paagi na masasabi na an apat na buhay na linalang nasa “tahaw kan trono saka sa palibot kan trono”?
20 An apat na buhay na linalang na ini nasa “tahaw kan trono saka sa palibot kan trono.” Ano an eksaktong kahulogan kaini? Iyan puwedeng mangahulogan na sinda namumugtak sa palibot kan trono sa paagi na an saro nagtitindog sa tahaw kan kada lado. Kaya, an mga paratradusir kan Today’s English Version tinawan nin kahulogan an orihinal na Griegong tataramon sa paaging ini: “nakapalibot sa trono sa kada lado kaiyan.” An ekspresyon puwede man na mangahulogan na an apat na buhay na linalang nasa sentrong kamugtakan sa langit na namumugtakan kan trono. Posible na iyan an dahelan na an The Jerusalem Bible isinalin an frase na: “nasa tahaw, magkakairiba sa palibot kan trono.” An importante iyo an pagigin harani kan mga kerubin sa trono ni Jehova, na nakaaagid sa mga kerubin na naheling ni Ezequiel sa lambang kanto kan organisasyonal na karuwahe ni Jehova. (Ezequiel 1:15-22) Ini gabos kaoyon kan mga tataramon sa Salmo 99:1: “Si Jehova mismo nagin hade. . . . Sia nagtutukaw sa ibabaw kan mga kerubin.”
21, 22. (a) Ano an pagkaladawan ni Juan sa apat na buhay na linalang? (b) Ano an irinirepresentar kan itsura kan kada saro sa apat na buhay na linalang?
21 Si Juan nagpapadagos: “Asin an enot na buhay na linalang kabaing nin leon, asin an ikaduwang buhay na linalang kabaing nin ogbon na baka, asin an ikatolong buhay na linalang may lalauogon na kabaing nin sa tawo, asin an ikaapat na buhay na linalang kabaing nin naglalayog na agila.” (Kapahayagan 4:7) Taano an apat na buhay na linalang na ini ta magkakalaen na gayo an itsura? An magkakalaen na buhay na linalang na ini malinaw na nagtatampok nin espisipikong diosnon na mga kuwalidad. Enot, yaon an leon. An leon ginagamit sa Biblia bilang simbolo nin kapusoan, nangorogna sa paghanap nin hustisya asin katanosan. (2 Samuel 17:10; Talinhaga 28:1) Kaya, an leon nagrirepresentar sa diosnon na kuwalidad nin mapusong hustisya. (Deuteronomio 32:4; Salmo 89:14) An ikaduwang buhay na linalang nakaaagid sa ogbon na baka. Anong kuwalidad an ipinasasabong sa saindo nin baka? Para sa mga Israelitas an baka mahalagang rogaring huli sa kapangyarihan kaiyan. (Talinhaga 14:4; helingon man an Job 39:9-11.) Kun siring, an ogbon na baka nagrirepresentar sa kapangyarihan, dinamikong kosog na itinatao ni Jehova.—Salmo 62:11; Isaias 40:26.
22 An ikatolong buhay na linalang may lalauogon na siring sa tawo. Ini seguradong nagrirepresentar sa arog-Dios na pagkamoot, mantang sa daga an tawo sana an linalang sa ladawan nin Dios, na may superlatibong kuwalidad nin pagkamoot. (Genesis 1:26-28; Mateo 22:36-40; 1 Juan 4:8, 16) Daing duwa-duwa, an mga kerubin nagpapaheling kan kuwalidad na ini mantang sinda naglilingkod sa palibot kan trono ni Jehova. Ano man an ikaapat na buhay na linalang? An sarong ini nakaaagid sa naglalayog na agila. Si Jehova mismo nag-aapod nin atension sa makosog na pananaw kan agila: “Sagkod sa harayo an mga mata kaiyan nagheheling.” (Job 39:29) Kaya, an agila nagsisimbolo sa kadonongan na harayo an pananaw. Si Jehova an Burabod nin kadonongan. An saiyang mga kerubin naggagamit nin banal na kadonongan sa saindang pagkuyog sa saiyang mga pagboot.—Talinhaga 2:6; Santiago 3:17.
(Ipagpapadagos sa masunod na luwas.)