Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 14: An Kamurawayan kan Langitnon na Trono ni Jehova
Nag-aaningal an mga Pag-omaw ki Jehova
23. Ano an isinisimbolo kan bagay na an apat na buhay na linalang “pano nin mga mata,” asin ano an idinodoon kan pagkaigwa ninda nin tolong padis na pakpak?
23 Ipinagpapadagos ni Juan an saiyang paglaladawan: “Asin kun manongod sa apat na buhay na linalang, an lambang saro sa sainda may anom na pakpak; sa palibot asin sa irarom sinda pano nin mga mata. Asin sinda dai nin pahingalo aldaw-banggi sa pagsabi: ‘Banal, banal, banal si Jehova Dios, an Makakamhan sa gabos, na iyo kaidto asin iyo ngonyan asin iyo an madatong.’” (Kapahayagan 4:8) An pagigin pano nin mata nagsusuherir nin kompleto asin harayong pananaw. An apat na buhay na linalang ginagamit ini nin daing ontok, ta dai sinda nagkakaipong matorog. Inaarog ninda an Saro na manongod sa saiya nasusurat: “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.” (2 Cronica 16:9) Mantang kadakol kan mata, an mga kerubin nakaheheling sa gabos na lugar. Mayo nin natatago sa saindang atension. Kaya may kakayahan nanggad sinda na maglingkod sa Dios sa saiyang gibohon na paghokom. Manongod sa saiya sinasabi: “An mga mata ni Jehova yaon sa gabos na lugar, na nagbabantay sa mga maraot asin sa mga marahay.” (Talinhaga 15:3) Asin mantang may tolong padis na pakpak—ta ginagamit an bilang na tolo sa Biblia para sa pagdodoon—an mga kerubin puwedeng humiro na arog karikas nin kikilat sa pagpahayag kan mga paghokom ni Jehova asin sa pag-otob kaiyan.
24. Paano inoomaw kan mga kerubin si Jehova, asin may anong kahulogan?
24 Hinanyoga! Magayon an tono, nakapupukaw sa kalag, an awit nin pag-omaw na inaawit kan mga kerubin ki Jehova: “Banal, banal, banal si Jehova Dios, an Makakamhan sa gabos, na iyo kaidto asin iyo ngonyan asin iyo an madatong.” Sa giraray, an pagigin tolo nagpaparisa nin intensidad. An mga kerubin mapuwersang pinatutunayan an kabanalan ni Jehova Dios. Sia an Burabod asin ultimong Pamantayan nin kabanalan. Sia man an “Hade na dai nin katapusan,” perming “an Alpha asin an Omega, an enot asin an huri, an kapinonan asin an katapusan.” (1 Timoteo 1:17; Kapahayagan 22:13) An mga kerubin dai nagpapahingalo mantang saindang ibinabalangibog an daing kaagid na mga kuwalidad ni Jehova sa atubangan kan gabos na linalang.
25. Paano an buhay na mga linalang asin an 24 magurang nagsasararo sa pagsamba ki Jehova?
25 An langit nin mga langit nag-aaningal sa mga pag-omaw ki Jehova! An paglaladawan ni Juan nagpapadagos: “Asin sa kada pagdolot kan buhay na mga linalang nin kamurawayan asin kagalangan patin pasalamat sa saro na nagtutukaw sa trono, an saro na nabubuhay sagkod lamang, an duwang polo may apat na magurang minahorohod sa atubangan kan Saro na nagtutukaw sa trono asin sinasamba an Saro na nabubuhay sagkod lamang, asin iinaapon ninda an saindang korona sa atubangan kan trono, na sinasabi: ‘Angay ka, Jehova, na samong Dios, na mag-ako kan kamurawayan asin dangog patin kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.’” (Kapahayagan 4:9-11) Sa bilog na Kasuratan, saro ini sa pinakadakulang kapahayagan nin pagsamba ki Jehova, an satong Dios asin Soberanong Kagurangnan!
26. Taano ta iinaapon kan 24 magurang an saindang korona sa atubangan ni Jehova?
26 An 24 magurang kapareho an kaisipan sa ipinaheheling ni Jesus, na iinaapon pa ngani an saindang korona sa atubangan ni Jehova. Harayoon sa saindang isip na ilangkaw an saindang sadiri sa presensia nin Dios. Saindang mapakumbabang minimidbid na an solamenteng katuyohan kan saindang pagkasaserdote iyo an pagtao nin onra asin kamurawayan sa saiya, arog kan perming ginigibo ni Jesus. (Filipos 2:5, 6, 9-11) Mapakumbaba, minimidbid ninda an saindang pagigin hababa asin itinutuga na an saindang paghade nasasarig sa soberaniya ni Jehova. Kaya, sinda odok sa pusong kaoyon kan mga kerubin asin kan iba pang maimbod na mga linalang sa pagtao nin pag-omaw asin kamurawayan sa Dios na naglalang kan gabos na bagay.—Salmo 150:1-6.
27, 28. (a) Ano an maninigong magin epekto sa sato kan paglaladawan ni Juan sa bisyon na ini? (b) Anong mga hapot an minalataw manongod sa kun ano an sumunod na naheling asin nadangog ni Juan?
27 Siisay an dai mapahihiro sa pagbasa kan tala ni Juan sa bisyon na ini? Iyan magayonon, mamuraway! Alagad ano daw an katunayan? An mismong kamahalan ni Jehova dapat na makapabagsik sa siisay man na may mapagpahalagang puso na umiba sa apat na buhay na linalang asin sa 24 magurang sa pag-omaw sa Saiya, kapwa sa pamibi asin sa pampublikong pagbalangibog kan Saiyang ngaran. Iyo ini an Dios na para sa saiya pribilehiyo nin mga Kristiano na magin mga saksi ngonyan. (Isaias 43:10) Girumdoma na an bisyon ni Juan aplikado sa aldaw kan Kagurangnan, na namumugtakan niato ngonyan. An “pitong espiritu” perming yaon tanganing giyahan asin pakosogon kita. (Galacia 5:16-18) An Tataramon nin Dios yaon ngonyan tanganing tabangan kita na magin banal sa paglilingkod sa banal na Dios. (1 Pedro 1:14-16) Tunay nanggad, kita naoogmang basahon nin makosog an mga tataramon kan hulang ini. (Kapahayagan 1:3) Iyan nagtatao nin makosog na pandagka na magmaimbod ki Jehova asin dai togotan an kinaban na irayo kita sa aktibong pag-awit nin mga pag-omaw sa saiya!—1 Juan 2:15-17.
28 Sagkod sa puntong ini, ilinadawan ni Juan an saiyang naheling kan sia imbitaran na lumaog sa bukas na tata sa langit. An pinakatampok, sia nagbabareta na si Jehova, sa bilog na kamurawayan kan Saiyang kamahalan asin dignidad, nagtutukaw sa Saiyang langitnon na trono. Sia napalilibotan kan pinakamakosog sa gabos na organisasyon—na mamuraway sa kagayonan asin kaimbodan. May sesyon an banal na Korte. (Daniel 7:9, 10, 18) Andam na an entablado para sa sarong pambihirang mangyayari. Ano daw iyan, asin paano iyan nakaaapekto sa sato ngonyan? Helingon niato mantang nabubukasan an eksena!