Bareta kan mga Parabalangibog kan Kahadean

Binakle Ninda an Saindang Pamumuhay

SIERTO na naheling nindo sindang nakikipag-olay sa iba sa mga tinampo, naghaharongharong, o nag-aatender sa Kristianong mga pagtiripon sa saindang Kingdom Hall. An sinasabi mi iyo an husay an gubing na mga hobenes kan mga Saksi ni Jehova. Tibaad inisip nindo na sinda mga Saksi ta tinokdoan sindang magin siring kan saindang mga magurang, asin iyan man nanggad an nangyari sa dakol sa sainda. Sa ibong na lado, may iba sa mga hobenes na ini na laen na marhay an pinaghalean asin an dating pamumuhay biyong laen sa pamumuhay ninda ngonyan. An totoo, an mga maheheling sa minasunod na pahina dating nakiaasosyar sa mga grupo na para sa sainda pan-aroaldaw sana an krimen asin pagdodroga. Ano an nagpahiro sainda na biyong bakleon an saindang buhay? Songkoon niato an sarong banwaan sa Norway asin makibistohan kita sa pirang hobenes na naggibo kan siring na mga pagbakle.

An Pundasyon Para sa Pagbakle

Kan si Annette manompongan nin duwang Saksi sa pagharongharong, sia kaidto 19 anyos. “Parate akong sinasabihan na dai noarin man makipag-olay sa mga Saksi ni Jehova, alagad ta interesado ako asin pinadagos ko sinda,” an paggirumdom nia. Nagdodroga sia poon kan sia 11 anyos asin napadamay na sa nagkapirang pananalakat asin paghabon nin kotse.

Nagustohan nia an maogmang bareta manongod sa Kahadean. Sia napakosog nangorogna kan paglaom sa pagkabuhay liwat, ta nagadan an saiyang ina kan sia singko anyos. Kaya inako nia an daing bayad na pag-adal sa Biblia asin nagpoon na umatender sa mga pagtiripon sa Kingdom Hall. Inestorya nia sa saiyang kailusyon asin sa iba pa an saiyang nanonodan. An reaksion? Habo nindang makadangog kaiyan asin pinagsahotan si Annette na nadodoktrinahan. Pero, kan huri an iba sa mga kontrang marhay nagpoon na mag-adal sa Biblia.

Bilang halimbawa, yaon si Espen, 20 anyos na barobata. Nadangog nia an maogmang bareta kan Kahadean sa kailusyon ni Annette asin tolos-tolos nagusto siang mag-adal sa Biblia. Minsan siring, naghahalat siang mapreso nin apat na bulan, ta napadamay sia sa pag-ismagol nin droga asin, kapareho ni Annette, sa nagkapirang pananalakat. Naggagamit man sia nin tabako, marihuana, asin iba pang droga. Ngonyan, ano an makapahihiro sa saro na naggigibo nin siring na mga bagay na magmawot na pumoon na mag-adal sa Biblia? Si Espen nagpoon na makarealisar kan kadaihan nin kahulogan asin katuyohan kan saiyang pamumuhay. Sia nagsasaysay: “Naakit ako kan mga panuga sa Biblia manongod sa ngapit na nagtao sako nin katuyohan sa buhay. Kaya nagpoon akong mag-adal tanganing aramon kun baga totoo an isinabi sa sako.”

An Iba Boot Man na Mag-adal sa Biblia

Kan mga panahon na idto, may sarong barobata sa iyo man sanang grupo nin mga hobenes na nakadangog kan maogmang bareta, asin nagpoon man siang mag-adal asin umatender sa mga pagtiripon. Sumunod, naponan an pakiadal sa saro pa sa mga hobenes na ini, asin nagpoon siang umatender sa mga pagtiripon. Dai nahaloy, may saro pang barobata na uminiba sa saiyang mga amigo sa pag-adal sa Biblia asin sa pag-oswag sa espirituwal. Dangan may saro pang barobata sa grupo na naghanga sa positibong mga pagbakle kan saiyang mga amigo, asin dai nahaloy, gusto naman niang mag-adal sa Biblia.

Si Gilbert, hoben na musikero sa grupong iyan, nagpoon ngonyan na mag-adal sa Biblia. An mga magurang nia pareho nagadan sa kanser, kaya naranga sia kan paglaom sa Biblia na pagkabuhay liwat. (Juan 5:28, 29) Sia nagmamarihuana man asin maraot an buhay, asin may ambisyon siang magin sikat sa musikang rock. Minsan siring, sa pag-agi nin panahon, marahay an saiyang espirituwal na pag-oswag asin dai nahaloy nagdesisyon siang magin Saksi ni Jehova. Ultimo, an nguhod na tugang ni Espen nagpoon na magsiyasat sa Biblia asin makiasosyar sa mga Saksi.

An Katotoohan sa Biblia Nakababakle sa Buhay

Nangyari an dakulang pagkaliwat sa mga hobenes na ini na dati durat sa paggubing, dai hinuhugay an buhok, asin kaiba sa pagdodroga, paghabon, asin iba pang krimen. Si Annette marahay na parahayag kan Kahadean asin masarong taon nang payunir. Si Espen asin Gilbert nag-auxiliary payunir na, asin sinda man ministeryal na mga lingkod. Sinda pareho nakaagom sa laog kan Kristianong kongregasyon. Apat pa sa dating grupo an mahigos man na mga parabalangibog kan Kahadean!

Kumusta man an apat na bulan na sentensia nin pagkabilanggo ki Espen? Huli sa saiyang mga pagbakle sa buhay, an sentensia saiya liniwat sa 80 oras na pagtrabaho sa komunidad. Sa pag-oyon kan pulisiya asin iba pa, ginamit nia an mga oras na ini sa pagtrabaho sa lokal na Kingdom Hall kan mga Saksi ni Jehova. Ikinaogmang marhay kan pulisiya an areglong ini.

Iyo, an dakol pang ibang hobenes sa bilog na kinaban may kriminal na ginikanan. Alagad ta an katotoohan sa Tataramon nin Dios nagtao sainda nin simbag sa mahahalagang hapot asin nin seguradong paglaom sa ngapit. Kaya, sinda ngonyan bako nang mga kriminal o paradroga, asin dai na sinda naglalakaw na durat sa paggubing. Mantang binakle na an saindang pamumuhay, kapareho na sinda kan mga nasambitan sa enotan​—hoben, husay an gubing, asin aktibong mga Saksi ni Jehova. Boot nindang ipaaram sa iba an nagdadanay na solusyon kan Biblia sa mga problema nin kadakol na hobenes ngonyan.​—Helingon an 1 Corinto 6:​9-11.

[Retrato sa pahina 8]

Si Espen, Annette, asin Gilbert