Mga Hapot Hale sa mga Parabasa
Kun an sarong Kristiano may helang o nagbibiyahe asin kun siring dai nakaatender sa selebrasyon nin Memorial, maninigo daw na selebraron nia iyan pakalihis nin sarong bulan?
Sa suanoy na Israel an Paskua taonan na siniselebrar sa ika-14 aldaw kan enot na bulan, na an ngaran Nisan (o, Abib). Pero may maheheling kitang espesyal na probisyon sa Bilang 9:10, 11: “Taraman mo an mga aki ni Israel, na sinasabi, ‘Dawa kun an siisay man sa saindo o sa saindong kapag-arakian maramogan huli sa sarong kalag o nasa harayong biyahe, sia man dapat na mag-andam kan atang nin paskua ki Jehova. Sa ikaduwang bulan [na inaapod Iyyar, o Ziv], sa ikakag-apat na aldaw sa pag-oltanan kan duwang banggi, iyan maninigo nindang andamon. Kaiba nin daing lebadurang mga tinapay asin mapait na mga gulay iyan maninigo nindang kakanon.’”
Mangnoha na dai ini nagbugtak nin duwang mapagpipilian na petsa para sa Paskua (Nisan 14 o Ziv 14), na libreng pumili an siisay man na Israelita o pamilya, depende sa kun ano an kombenyente. An probisyon nin pagkakan nin Paskua sa ikaduwang bulan limitado sana. Idto espesyal na kaso para sa Israelita na maramog sa seremonyal na paagi kan Nisan 14 o harayoon sa lugar na regular na pinagsiselebraran.
An solamenteng pangyayaring nasa rekord na ini ginamit nin lakop kaidtong panahon na buhayon liwat kan maimbod na si Hadeng Ezequias an selebrasyon kan Kapiyestahan kan mga Tinapay na Mayo nin Lebadura. Daing panahon na makaandam sa enot na bulan (ta dai pa andam an mga saserdote asin dai pa natitipon an banwaan), kaya idto ginibo sa ika-14 aldaw kan ikaduwang bulan.—2 Cronica 29:17; 30:1-5.
Apuwera sa siring na pambihirang mga kamugtakan, inotob kan mga Judio an Paskua sa petsang itinalaan nin Dios. (Exodo 12:17-20, 41, 42; Levitico 23:5) Si Jesus asin an saiyang mga disipulo nagselebrar sono sa hinahagad kan Pagboot, na dai ibinilang na kaswal sana an petsang ini. Si Lucas nagbabareta: “Nagdatong an aldaw kan mga tinapay na daing lebadura, na an paskua kaipuhan na iatang; asin sinugo [ni Jesus] si Pedro asin Juan, na sinasabi: ‘Paduman kamo asin andamon nindo an paskua tanganing makakan ta.’”—Lucas 22:7, 8.
Sa okasyon na idto pinonan ni Jesus an taonan na selebrasyon na midbid nin mga Kristiano bilang Pamanggihan kan Kagurangnan. Dai mapasosobrahan sa pagdodoon an halaga kan pag-atender nin mga Kristiano. Ini iyo an pinakamahalagang okasyon sa laog kan taon para sa mga Saksi ni Jehova. Ipinaheheling kan mga tataramon ni Jesus kun taano; sia nagsabi: “Padagos na gibohon nindo ini sa paggirumdom sa sako.” (Lucas 22:19) Kun siring, an kada saro sa mga Saksi ni Jehova maninigong magplano dakol pang bulan bago kaini na dai magkaigwa nin ibang gigibohon sa petsa kan selebrasyon. An Pamanggihan kan Kagurangnan siselebraron sa Martes, Abril 6, 1993, pagkasolnop kan aldaw.
Sa pambihirang mga kaso an dai linalaoman na kamugtakan, arog baga nin helang o komplikasyon sa biyahe, tibaad makaolang sa pag-atender nin sarong Kristiano siring sa saiyang plinano. Ano daw an maninigong gibohon sa siring na situwasyon?
Sa selebrasyon ilinilibot an tinapay na daing lebadura asin mapulang arak, asin nakikakabtang an mga linahidan kan banal na espiritu nin Dios asin pinili na mabuhay sa langit. (Mateo 26:26-29; Lucas 22:28-30) Kun an saro na nakikakabtang kada taon naghehelang sa harong o nasa ospital sa taon na ini, iaareglo kan kamagurangan sa lokal na kongregasyon na an saro sa sainda magdara kan tinapay asin arak sa may helang, ipakipag-olay an mga teksto sa Biblia na angay sa tema, asin itao an mga emblema. Kun an sarong linahidan na Kristiano mayo sa sadiri niang kongregasyon, maninigong iareglo nia na umatender sa kongregasyon na yaon sa lugar na namumugtakan nia sa petsang iyan.
Huli kaini, sa pambihira sanang marhay na mga kamugtakan na an sarong linahidan na Kristiano kaipuhan na magselebrar kan Pamanggihan kan Kagurangnan pakalihis nin 30 aldaw (sarong lunar na bulan), kaoyon sa pagboot na yaon sa Bilang 9:10, 11 asin sa halimbawa sa 2 Cronica 30:1-3, 15.
An mga kabilang sa grupong “ibang karnero” ni Jesus, na may paglaom sa buhay na daing katapusan sa paraisong daga, dai pinagbotan na makikabtang sa tinapay asin arak. (Juan 10:16) Mahalaga nanggad na umatender sa taonan na selebrasyon, pero dai sinda nakikakabtang sa mga emblema. Kaya kun an saro sa sainda may helang o nagbibiyahe asin kun siring dai kaiba nin arin man na kongregasyon sa bangging iyan, puwede niang pribadong basahon an angay na mga teksto (pati an tala sa pag-establisar ni Jesus kan selebrasyon) asin arangon an bendisyon ni Jehova sa okasyon na iyan sa bilog na kinaban. Alagad sa kasong ini dai na kaipuhan an dugang pang areglo para sa pagtiripon o espesyal na orolay sa Biblia pakalihis nin sarong bulan.