An Dios an Nagpapatubo—Ginigibo daw Nindo an Saindong Kabtang?
IMAHINARA an eksena. Yaon kamo sa sarong magayon na hardin, na napalilibotan nin haralangkaw na kahoy, mararambong na palongpong, asin kadakoldakol na magagayon an kolor na burak. An esmeraldang natad pababa sa maingat na gayong inataman na pangpang nin sarong sapa na nagbuburakbusak nin tubig na arog kristal kalinaw. Mayo nin ano man na nagpapakanos sa tanawon. Sa paghanga, naghapot kamo kun siisay an naggibo kan magayonon na lugar na ini. Sa pagsimbag mapakumbabang nagsabi an hardinero na an Dios an nagpapatubo kan gabos na bagay.
Siyempre, aram nindo iyan. Asin nagirumdoman nindo an mga tataramon kan hardinero kan kamo pumuli asin maheling an sadiri nindong natad na maati, na kun saen mayo nin ano man na nakaaakit na nagtutubo, nagdadakol an basura, asin an tubig-oran nakapapano sa makanos na mga lukab sa daga. Minamawot nanggad nindong magkaigwa nin sarong hardin na kapareho kan pinasyaran pa sana nindo. Kaya, marigon na nagtutubod sa mga tataramon kan hardinero, kamo nagluhod asin namibi nin odok sa Dios na magpatubo nin magayon na mga burak sa saindong natad. Ano an nangyari? Siyempre, mayo.
Kumusta man an espirituwal na pagtalubo? Tibaad igwa kamo nin odok na pagmawot na maheling an mga bagay na tumalubo sa espirituwal na paagi, arog baga kan bagong mga disipulo na nag-aako kan katotoohan kan Tataramon nin Dios o sa sadiri nindong espirituwal na pag-oswag. Asin tibaad sinsero kamong mamibi ki Jehova na mapatalubo nin siring, na may hararom na paniniwala na igwa sia nin kapangyarihan na gibohon an siring kaiyan. Alagad an saindo daw na odok na pagmawot, sinserong pamibi, asin pagtitiwala sa kapangyarihan nin Dios an mismong mapatalubo?
An Dios an Nagpapatubo
Tibaad namamatean nindo na an saindong kabtang sa pagpapatalubo sa espirituwal sadit-sadit, mayo ngani nin kahulogan. Bako daw na isinuherir ini ni apostol Pablo sa 1 Corinto 3:5-7? Sia nagsurat: “Kaya, ano si Apolos? Iyo, ano si Pablo? Mga ministro na huli sa sainda kamo nagin nagturubod, sono sa itinao kan Kagurangnan sa lambang saro. Ako an nagtanom, si Apolos an nagbaribi, alagad an Dios an nagpapatubo; minsan an nagtatanom daing halaga ni an nagbabaribi, kundi an Dios na nagpapatubo kaiyan.”
Tamang-tama an pagkakasabi ni Pablo na kun an mga bagay nagtatalubo, an gabos na kredito sa Dios. Tibaad andamon kan hardinero an saiyang natad, magtanom nin saiyang banhi, asin maingat na atamanon an mga pananom, alagad sa katapustapusi huli sa makangangalas na kapangyarihan nin Dios sa paglalang na nagtatalubo an mga bagay. (Genesis 1:11, 12, 29) Pero, ano an boot sabihon ni Pablo kan sabihon niang “minsan an nagtatanom daing halaga ni an nagbabaribi”? (“Bakong an mga hardinero na nagtatanom asin nagbabaribi an mahalaga,” The New English Bible.) Minimenus daw nia an kabtang kan indibiduwal na ministro sa paggibo nin bagong mga disipulo, na isinusuherir na sa katapustapusi bakong gayong mahalaga kun paano niato ginigibo an satong ministeryo?
“Minsan an Nagtatanom Daing Halaga”
Tandaan na sa kabtang na ini kan saiyang surat, dai ipinaliliwanag ni Pablo an Kristianong ministeryo kundi an karungawan kan pagkuyog sa mga tawo imbes na ki Jesu-Cristo. An iba sa Corinto nagtatao nin dai maninigong pagpapahalaga sa midbid na mga lingkod ni Jehova, arog baga ni Pablo asin Apolos. An iba nagpapalakop nin sektaryanismo asin ilinalangkaw an mga tawong naghohona na sinda nangongorog kisa sa saindang mga tugang na Kristiano.—1 Corinto 4:6-8; 2 Corinto 11:4, 5, 13.
An pagpapamuraway sa mga tawo sa paaging ini dai nakapakokosog. Iyan makalaman na kaisipan, asin iyan nagbubunga nin pag-imon asin iriwal. (1 Corinto 3:3, 4) Ipinaheheling ni Pablo an mga kaaabtan kan siring na kaisipan. Sia nagsasabi: “Igwa dian saindo nin pagkabaranga. Ini an boot kong sabihon, na an kada saro sa saindo nagsasabi: ‘Ako ki Pablo,’ ‘Pero ako ki Apolos,’ ‘Pero ako ki Cefas,’ ‘Pero ako ki Cristo.’”—1 Corinto 1:11, 12.
Kaya kan sia sumurat na, “an nagtatanom asin an nagbabaribi daing halaga” (Phillips), pinapopondo kan apostol an siring na makalaman na kaisipan, na idinodoon an pangangaipo na helingon si Jesu-Cristo bilang Poon asin na midbidon na an gabos na kamurawayan sa pagtalubo kan kongregasyon sa Dios. An mga apostol asin iba pang magurang mga lingkod sana kan kongregasyon. Mayo nin maninigong ilangkaw ni maninigo mismo sindang maghanap nin posisyon o kabantugan. (1 Corinto 3:18-23) Kaya an nagtatanom asin an nagbabaribi daing halaga, sabi ni Pablo, “kun ikokomparar sa saiya na nagtatao nin buhay sa banhi.”—1 Corinto 3:7, Phillips.
Mga Katabang nin Dios
Kaya sa pagsabi kaini, dai minimenus ni apostol Pablo an kahalagahan kan satuyang kabtang sa pagtatanom asin pagbabaribi. Dai nia boot sabihon sa sato na pumoon na kitang mag-isip na, “Patutuboon nin Dios an mga bagay sa saiyang sadiring panahon,” asin magtukawtukaw na sana asin halaton siang gibohon iyan. Aram nia na kun ano an ginigibo niato asin kun paano niato ginigibo iyan igwa nin epekto kun paano an mga bagay nagtatalubo.
Iyan an dahelan kun taano ta parateng pinakokosog ni Pablo an mga Kristiano na magmahigos sa saindang ministeryo asin paoswagon an saindang mga abilidad bilang mga paratokdo. Horophoropa an sadol na itinao nia sa barobatang si Timoteo. “Permi mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana asin idtong naghihinanyog sa saimo.” (1 Timoteo 4:16) “Ako nagboboot saimo . . . , ihulit mo an tataramon, gibohon iyan na may pagkasibot . . . , sa bilog na pakatios asin abilidad sa pagtotokdo. . . . Lubos na otobon an saimong ministeryo.” (2 Timoteo 4:1, 2, 5) Mayo nin halaga an kahigosan ni Timoteo na umoswag sa saiyang mga abilidad kun an saiyang pagtatanom asin pagbabaribi mayo nin epekto sa pagpapatalubo sa mga bagay.
Arog ni Pablo asin Apolos, kamo man puwedeng magkaigwa nin dai ikasabi an halagang pribilehiyo nin paglilingkod bilang saro sa mga katabang nin Dios. (1 Corinto 3:9; 2 Corinto 4:1; 1 Timoteo 1:12) Kun siring, mahalaga an saindong gibohon. Dai naglalaom an hardinero na milagrosong patutuboon nin Dios an sarong magayon na hardin na mayo man lamang nin paghihingoa sa kabtang kan hardinero. Magigin laen daw dian an espirituwal na pagtalubo? Siertong dai. Siring kan paraoma na mapasensiang “naghahalat para sa mahalagang bunga kan daga,” nagkakaipo kitang maghingoa nguna sa satong sadiri sa pagtatanom asin pagbabaribi, na naghahalat mantang pinatutubo iyan nin Dios.—Santiago 1:22; 2:26; 5:7.
Gibohon an Saindong Kabtang
Mantang, arog kan sinasabi ni apostol Pablo, “an lambang saro maako kan saiyang balos sono sa saiyang pagpapagal,” marahay na hapoton niato an satong sadiri kun paano kita nagpapagal.—1 Corinto 3:8.
An eksperto sa pagtanom na si Geoffrey Smith nagsabi: “Mayo nin espesyal na mga kuwalipikasyon na kinakaipuhan tanganing magin sarong hardinero, interes sana sa pananom.” (Shrubs & Small Trees) Siring man, mayo nin kanaturalan nang espesyal na mga kuwalipikasyon na kinakaipuhan tangani kitang magin mga katabang nin Dios, tunay na interes sana sa mga tawo asin an pagigin andam na gamiton nin Dios.—2 Corinto 2:16, 17; 3:4-6; Filipos 2:13.
Konsiderara an pira sa marahay na sadol na itinao kan maabilidad na mga hardinero. Arog kan sinabi nin sarong autoridad, kun an sarong bagohan na hardinero andam na maghinanyog sa mga mas may kabatidan na kisa saiya, “an nag-aadal puwede tolos na magin sarong eksperto.” Asin, sabi kan iyo man sanang autoridad, “an eksperto perming naghahanap nin sarong bagong bagay na manonodan.” (The Encyclopedia of Gardening) Gikan sa boot daw nindong inaako an tabang asin pagsasanay na itinatao ni Jehova tanganing epektibo kamong makatanom asin makabaribi? Kun iyo, baga man kamo bagohan sa gibohon o eksperyensiado na dian, puwede kamong makapatalubo nin dugang pang abilidad bilang katabang nin Dios asin magin “kuwalipikadong marhay na magtokdo sa iba.”—2 Timoteo 2:2.
Kun sia andam na maghinanyog asin makanood, sabi ni Geoffrey Smith, “an bagohan malilikayan an pinakamaraot na mga siod.” Kun dinadangog niato an pagtotokdo na itinatao ni Jehova paagi sa saiyang Tataramon asin sa saiyang organisasyon, gigibohon ta an mga bagay sa saiyang paagi. Kun siring lilikayan niato, halimbawa, an mga siod na siring baga sa daing kamanungdanan na pakikiargumento sa mga gusto sana na makiiwal o makidiskutiran dapit sa mga tataramon.—Talinhaga 17:14; Colosas 4:6; 2 Timoteo 2:23-26.
An saro pang marahay na sadol sa pagtanom iyo na isipon nin maingat an mga bagay bago maghidale sa pagkalot sa daga. “Bago ibugtak an pala sa daga,” sabi kan The Encyclopedia of Gardening, “gumamit nin panahon na matoninong na turotimbangon [an saindong mga malalaoman].” Kamo daw nahoholog sa siod na maghidale sa Kristianong ministeryo na dai nguna nagtatao nin maingat asin may pagngayongayong pamibi sa kun ano an boot nindong magibo asin kun paano nindo iyan pinakamarahay na magigibo? Planohon nin malinaw an saindong mga katuyohan bago kamo pumoon. Halimbawa, isipon an dapit sa klase nin mga tawo na tibaad manompongan nindo asin an mga problema na tibaad maatubang nindo, asin mag-andam tanganing maatubang an mga ini. Totogotan kamo kaini na “makadara . . . kan pinakadakol [mantang kamo] nagin gabos na bagay sa gabos na klase nin tawo.”—1 Corinto 9:19-23.
“Dai Mo Pagpahingaloan an Saimong Kamot”
Kun inaapresyar niato an pribilehiyo nin paglilingkod bilang mga katabang nin Dios, dai ta lilimitaran an satong pakikakabtang sa pagtitinabangan. “Pagkaaga itanom mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa anas na marahay.” (Eclesiastes 11:6) An ultimong mga resulta yaon sa kamot ni Jehova, pero kita mag-aani sana kun kita mahigos ngunang nagtanom.—Eclesiastes 11:4.
Mayo nin hardin kasuarin man na ginibong magayon paagi sa dai isinaboot, mekanikal na pagkalot asin pagsabwag nin mga banhi. Siring man, mas dakol pa an hinahagad sa Kristianong ministeryo kisa pagtao sana nin dai isinaboot na pakikakabtang sa pagdistribuwir nin mga babasahon sa Biblia. Bilang mga katabang nin Dios, kinakaipuhan kitang magmahigos asin lubos na magpahayag kan maogmang bareta manongod sa Kahadean nin Dios, na hinahanap an mga angay na mag-ako. (Gibo 13:48) Girumdoma an prinsipyo kan mga tataramon ni apostol Pablo sa 2 Corinto 9:6: “An nagtatanom nin kadikit mag-aani man nin kadikit; asin an nagtatanom nin abunda mag-aani man nin abunda.”
Arog kan gabos na marahay na hardinero, pinagmamaigotan niatong magtanom sa marahay na daga. Pero, minsan an sarong bagay itinanom na sa pinakamarahay na daga, bako iyan an katapusan kan bagay. Sabi ni Geoffrey Smith: “Ini dai nangangahulogan na oras na ikatanom na mayo na nin hinahagad sa saro na responsable apuwera sa pagbakal nin butaka asin payong.” Dai, tanganing tumalubo an mga bagay, nagkakaipo nin paghihingoa sa pagbabaribi asin pagprotehir sa mga pananom.—Talinhaga 6:10, 11.
An totoo, an Kristianong ministeryo puwedeng mangahulogan nin halawig na panahon nin depisil na trabaho na garo baga dai nin dakol na nangyayari. Pero bigla na sana, asin kun minsan dai linalaoman, minaabot an makangangalas na mga resulta. Sabi ni Geoffrey Smith: “An pagtanom halawig na panahon nin paorootrong trabaho na sinasaliotan nin haralipot na panahon na may kahangahangang kagayonan na an gabos na pagkalot, paghawan, asin kahaditan nalilingawan.” Kamo man puwedeng magkaigwa nin mga panahon na may pagkakontentong marhay kun an bukas na puso nag-aako kan mensahe kan katotoohan—basta andam nindong gibohon an enot na pagkalot, pagtanom, paghawan, asin pagbaribi.—Ikomparar an Talinhaga 20:4.
Aram ni Pablo asin Apolos na an saindang gibohon na paghuhulit kan Kahadean asin paggibo nin mga disipulo dai nagtao sainda nin espesyal na kabantugan sa Kristianong kongregasyon. Nasabotan ninda na an Dios iyo an nagpapatubo kan mga bagay. Minsan siring, sinda talagang nagtanom asin nagbaribi—na may kahigosan. Arogon logod niato an saindang halimbawa asin ipagamit an satong sadiri sa Dios bilang “mga ministro na huli sa [sato an iba nagin] paratubod.”—1 Corinto 3:5, 6.
[Ritrato sa pahina 23]
An Dios an nagpapatubo kan gabos na bagay—pero an hardinero ginigibo man an saiyang kabtang