‘Bago Pa Man an mga Bukid’
“IKA an nagin samuyang erokan sa gabos na kapag-arakian. Bago pa man namundag an mga bukid o ipangaki mo an daga asin an kinaban, poon sa daing katapusan sagkod sa daing katapusan ika iyo an Dios.” (Salmo 90:1, 2, New International Version) An mga tataramon na ini ipinanongod sa satuyang Kaglalang, asin nakararanga nanggad an mga iyan—nangorogna ngonyan, na mayo nin ano man na bagay na garo baga marigon!
Sa naggagrabeng kamugtakan sa ekonomiya, kadikit kan nakamamate nin kompiansa dapit sa ngapit. Liniwat kan makatatakot na pag-oswag nin krimen asin pag-abuso sa droga an pirang siudad na magin mga kampo de batalya. Minsan an haloyon nang institusyon, an pamilya, nagriripaydipay. Nakadadangog kita nin bagong mga bagay na arog kan homoseksuwal na mga pamilya. Nagdadakol an bilang kan mga pamilyang nagsosolo an magurang, na an sarong magurang parateng kaipuhan na umatubang sa dakulang tension. Natatanyog an katoninongan nin dakol na pamilya kan makababaldeng mga bagay na arog baga nin pangongolog sa agom asin pag-abuso sa aki.
Siisay an magiya sato sa masakit na mga panahon na ini? Bueno, mayo nin kakulangan sa sadol hale sa mga sikologo, edukador, asin iba pa, pero an kadaklan kaiyan nagkokorontrahan. Para sa sarong bilog na kapag-arakian sa Solnopan, si Dr. Benjamin Spock an pinakabantog na parakonseho kun manongod sa pagtotokdo sa mga aki. Dangan inadmitir nia na nasala an saiyang sadol!
Gurano kadonong na an Dios an mani satong “erokan”! Sa maribok na mga panahon na ini, sia an gapong marigon, na nag-eeksister “poon sa daing katapusan sagkod sa daing katapusan.” Paagi ki propeta Malaquias sinabi nia manongod sa saiyang sadiri na: “Ako si Jehova; dai ako nagliliwat.” (Malaquias 3:6) An mga pamantayan nin Dios, arog kan pagkasurat sa Biblia, lubos na masasarigan. Sia nag-eksister ‘bago pa man an mga bukid,’ asin an saiyang sadol, na makukua sa Banal na Kasuratan, basado sa saiyang daing sagkod na kadonongan. Iyan an eksaktong kaipuhan niato para sa kaogmahan asin kapangganahan.
Kaya madonong na magkaigwa nin kompiansa sa Tataramon nin Dios, an Biblia. Pag-adalan iyan tanganing makinabang sa kadonongan nin Dios. Manarig sa nanonodan nindo, asin togotan iyan na magin liwanag na padagos na magiya saindo sa dalan nin buhay. (Salmo 119:105) An mga naggigibo sana nin siring an may dahelan na magsarig sa ngapit asin magkaigwa nin tunay na katoninongan sa isip.