Gurano daw an Ibabayad Nindo Para Kaini?

MAY aram daw kamong sarong bagay na mahalagang gayo na andam na marhay nindong isakripisyo an gabos na bagay na sadiri nindo tanganing makua iyan? Ginibo iyan ni Jesus, asin itinaram nia an manongod dian sa saiyang mga parasunod.

Sia nagsabi: “An kahadean nin kalangitan nakaaagid sa sarong parabariwas na naghahanap nin magagayon na perlas. Kan sia makakua nin sarong perlas na dakulaon an halaga, napaduman sia asin ipinabakal tolos an gabos niang sadiri asin binakal iyan.”​—Mateo 13:​45, 46.

An parabariwas na iyan andam na itao an gabos na bagay tanganing magin sadiri an “perlas,” an Kahadean nin Dios. Taano? Huli ta mayo nin ano man sa kinaban na ini na ikakokomparar dian. Reresolberan kan Kahadean nin Dios an mga problema na dai naresolberan nin tawo, arog baga kan guerra, gutom, krimen, asin pagdaogdaog. (Salmo 72:​4-8, 13, 14) Sa irarom nin Kahadean, minsan an kasalan, helang, asin kagadanan mawawara na. (Kapahayagan 21:​4, 5) Bakong makangangalas na an ikaduwang kahagadan kan Pamibi nin Kagurangnan (an “Ama Niamo”) “Dumatong logod an kahadean mo”!​—Mateo 6:​9, 10.

Ano daw an ibabayad nindo tanganing makapakikabtang sa mga bendisyon kan Kahadean? An totoo, daing bayad an mga bendisyon. Alagad tanganing makamit iyan, kaipuhan nindong maaraman kun ano an Kahadean, maniwala na iyan tunay, asin gibohon iyan na pangenot sa saindong buhay. Magigibo daw nindo iyan? Igwa nin impormasyon sa Biblia na makatatabang saindo. Taano ta dai togotan an mga Saksi ni Jehova na tabangan kamo sa pakanood manongod sa Kahadean nin Dios asin pakanompong kun paano kamo makikinabang dian minsan ngonyan.