Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 21: An mga Damat ni Jehova sa Kakristianohan
Pag-andam sa Pagpatanog kan mga Trumpeta
10. Ano an inandam na gibohon kan pitong anghel, asin taano?
10 Si Juan padagos na nagsabi: “Asin an pitong anghel na igwa kan pitong trumpeta nag-arandam sa pagpatanog kaiyan.” (Kapahayagan 8:6) Ano an kahulogan kan pagpatanog kan mga trumpetang iyan? Kan mga aldaw nin Israel, an pagpatanog nin trumpeta ginamit na magin senyal nin mahalagang mga aldaw o pambihirang mga pangyayari. (Levitico 23:24; 2 Hade 11:14) Sa kaagid na paagi, an mga pagtanog nin trumpeta na madadangog ni Juan mag-aapod nin atension sa mga bagay na puwedeng mangahulogan nin buhay o kagadanan.
11. Sa anong gibong pag-aandam sa daga sibot na gayong nakikabtang an grupong Juan magpoon kan 1919 sagkod 1922?
11 Mantang an mga anghel nag-andam sa pagpatanog kan mga trumpetang idto, mayong duwa-duwa na nagtatao man sinda nin paggiya sa gibong pag-aandam sa daga. Magpoon kan 1919 sagkod 1922, an napakosog liwat na grupong Juan sibot sa pag-organisar liwat kan pampublikong ministeryo asin sa pagpatindog nin mga pasilidad sa pagpublikar. Kan 1919 an magasin na The Golden Age, na midbid ngonyan bilang Awake!, ilinuwas bilang “An Babasahon nin Katotoohan, Paglaom, Asin Kombiksion”—arog-trumpetang instrumento na magkakaigwa nin pangenot na kabtang sa pagbuyagyag kan pakikilabot kan falsong relihiyon sa politika.
12. Ano an ibinabareta kan lambang pagtanog kan trumpeta, na nagpapagirumdom sato kan ano sa panahon ni Moises?
12 Siring kan satong maheheling ngonyan, an lambang pagtanog kan trumpeta nagbabareta nin dramatikong eksena na dian an grabeng mga damat makaaapektar sa mga kabtang kan daga. An iba kaini nagpapagirumdom sato kan mga damat na ipinadara ni Jehova tanganing padusahan an mga taga-Egipto kan panahon ni Moises. (Exodo 7:19–12:32) Ini mga kapahayagan kan paghokom ni Jehova sa nasyon na iyan, asin nagbukas iyan kan dalan na an banwaan nin Dios makaligtas hale sa pagkaoripon. An mga damat na naheling ni Juan naggibo nin kaagid na bagay. Alagad, bako iyan literal na mga damat. Iyan mga tanda na nagsisimbolisar kan matanos na mga paghokom ni Jehova.—Kapahayagan 1:1.
Pagmidbid sa “Ikatolong Kabtang”
13. Ano an nangyari kan patanogon an enot na apat na trumpeta, asin anong hapot an pinalataw kaini?
13 Siring kan maheheling niato, kun patanogon na an enot na apat na trumpeta, an mga damat pasasakitan an “ikatolong kabtang” kan daga, kan dagat, kan mga salog asin mga burabod nin tubig, asin kan mga pinaghahalean nin liwanag sa daga. (Kapahayagan 8:7-12) An ikatolong kabtang awad-awad na kabtang nin sarong bagay alagad bakong an kabilogan. (Ikomparar an Isaias 19:24; Ezequiel 5:2; Zacarias 13:8, 9.) Kaya arin an “ikatolong kabtang” na magigin pinakaangay sa mga damat na ini? An dakulang mayoriya kan katawohan binuta asin rinaot na ni Satanas asin kan saiyang banhi. (Genesis 3:15; 2 Corinto 4:4) An kamugtakan siring kan ilinadawan ni David: “Sinda gabos suminiblag, sinda gabos magkakaagid na maraot; dai nin siisay man na naggigibo nin marahay, dai ni saro.” (Salmo 14:3) Iyo, an bilog na katawohan namemeligrong mag-ako nin bakong paborableng paghokom. Alagad sarong kabtang kaiyan an nangorognang kulpable. An sarong kabtang—“an ikatolong kabtang”—dapat kutanang mas nakaaram! Ano an “ikatolong kabtang” na iyan?
14. Ano an simbolikong ikatolong kabtang na nag-aako kan mapandamat na mga mensahe hale ki Jehova?
14 Ini an Kakristianohan! Kan mga taon nin 1920, an saiyang rona nakasasakop kan haros ikatolong kabtang nin katawohan. An saiyang relihiyon iyo an bunga kan dakulang apostasiya sa tunay na Kristianismo—an apostasiya na ihinula ni Jesus asin kan saiyang mga disipulo. (Mateo 13:24-30; Gibo 20:29, 30; 2 Tesalonica 2:3; 2 Pedro 2:1-3) An klero kan Kakristianohan naghihingakong nasa templo nin Dios asin nagrepresentar kan saindang sadiri bilang mga paratokdo nin Kristianismo. Alagad an saindang mga doktrina harayong gayo sa katotoohan kan Biblia, asin padagos sindang nagdadara nin paglanghad sa ngaran nin Dios. Angay na irepresentar kan simbolikong ikatolong kabtang, an Kakristianohan nag-aako nin mapuwersa, mapandamat na mga mensahe hale ki Jehova. An ikatolong kabtang na iyan nin katawohan bakong maninigo sa ano man na banal na pabor!
15. (a) An lambang pagpatanog daw kan trumpeta limitado sa sarong partikular na taon? Ipaliwanag. (b) Kiisay na tingog an idinagdag sa tingog kan grupong Juan sa pagbalangibog kan mga paghokom ni Jehova?
15 Kaoyon kan sunod-sunod na pagpatanog nin trumpeta, an espesyal na mga resolusyon itinampok sa pitong kombension magpoon kan 1922 sagkod 1928. Alagad an mga pagpatanog nin trumpeta bakong limitado sa mga taon na idto. An mapuwersang pagbuyagyag kan maraot na mga paagi kan Kakristianohan nagpapadagos, daing ontok, mantang an aldaw kan Kagurangnan nagpapadagos. An mga paghokom ni Jehova dapat na ibalangibog sa bilog na uniberso, sa gabos na nasyon, sa ibong kan internasyonal na pagkaongis asin mga paglamag. Dangan pa sana madatong an katapusan kan sistema ni Satanas. (Marcos 13:10, 13) Makaoogma, idinagdag ngonyan kan dakulang kadaklan an tingog kaini sa grupong Juan sa pagpahayag kan makosogon na mga kapahayagan na may pambilog na kinaban na importansia.
An Ikatolong Kabtang kan Daga Nasolo
16. Ano an nangyari kan patanogon kan enot na anghel an saiyang trumpeta?
16 Sa pagbabareta manongod sa mga anghel, si Juan nagsurat: “Asin pinatanog kan enot an saiyang trumpeta. Asin nagkaigwa nin graniso asin kalayo na may kasalak na dugo, asin idto iinapon sa daga; asin an ikatolong kabtang kan daga nasolo, asin an ikatolong kabtang kan mga kahoy nasolo, asin an gabos na berdeng pananom nasolo.” (Kapahayagan 8:7) Kaagid ini kan ikapitong damat sa Egipto, alagad ano an kahulogan kaiyan para sa satong ika-20 siglo?—Exodo 9:24.
17. (a) Ano an irinirepresentar kan terminong “daga” sa Kapahayagan 8:7? (b) Paano nasolo an ikatolong kabtang kan daga na sakop kan Kakristianohan?
17 Sa Biblia, an terminong “daga” parateng napanonongod sa katawohan. (Genesis 11:1; Salmo 96:1) Mantang an ikaduwang damat sa dagat, na may koneksion man sa katawohan, an “daga” seguradong nanonongod sa garo baga marigon na sosyedad nin tawo na itinogdok ni Satanas asin nakatalagang malaglag. (2 Pedro 3:7; Kapahayagan 21:1) An pagkasaysay kan damat nagpapaheling na an ikatolong kabtang kan daga na sakop kan Kakristianohan nasolo kan nakapapasong init kan dai pag-oyon ni Jehova. An saiyang bantog na mga miembro—na nagtitindog na garo mga kahoy sa tahaw nia—nasolo kan pagbalangibog kan silot ni Jehova. An ginatos na milyon na miembro nia, kun sinda magpapadagos na magsuportar sa relihiyon nin Kakristianohan, gabos magigin siring sa nasolong doot, na luyos sa espirituwal sa pagheling nin Dios.—Ikomparar an Salmo 37:1, 2.a
18. Paano an mensahe nin paghokom ni Jehova ibinalangibog sa kombension sa Cedar Point kan 1922?
18 Paano itinatao an mensaheng ini nin paghokom? Sa kagabsan, bakong paagi sa mga sistema nin pagbareta kan kinaban, na kabtang kan kinaban asin parateng nagtutuya sa “oripon” nin Dios. (Mateo 24:45) Idto ibinalangibog sa lataw na paagi sa ikaduwang makasaysayan na pagtiripon kan banwaan nin Dios sa Cedar Point, Ohio, Setyembre 10, 1922. An mga ini sararo asin entusiastikong inaprobaran an sarong resolusyon na may titulong “Sarong Angat sa mga Namomoon kan Kinaban.” Sa prangkang pagtaram, pinatanidan kaiyan an simbolikong daga sa modernong aldaw, nin arog kaini: “Kun siring inaapodan mi an mga nasyon sa daga, an saindang mga namamahala asin namomoon, asin an gabos na klerigo kan gabos na denominasyonal na iglesya sa daga, an saindang mga parasunod asin alyado, an darakulang negosyante asin darakulang politiko, na iluwas an saindang pruweba bilang pagtaong katanosan sa paninindogan ninda na kaya nindang establisaron an katoninongan asin prosperidad sa daga patin tawan nin kaogmahan an mga tawo; asin mantang nasudya sinda digdi, inaapodan mi sinda na magdangog sa patotoo na samong itinatao bilang mga saksi kan Kagurangnan, asin sabihon ninda kun baga totoo o bako an samong patotoo.”
19. Anong patotoo an itinao kan banwaan nin Dios sa Kakristianohan manongod sa Kahadean nin Dios?
19 Anong patotoo an itinao kan mga Kristianong ini? Ini: “Kami nagtutubod asin nagpapahayag na an kahadean kan Mesiyas iyo an kompletong remedyo sa gabos na problema nin katawohan asin magtatao nin katoninongan sa daga asin marahay na boot sa mga tawo, na iyo an kamawotan nin gabos na nasyon; na an mga boluntad na nagpapasakop sa saiyang matanos na paghade na nagpoon na ngonyan bebendisyonan nin nagdadanay na katoninongan, buhay, katalingkasan asin daing sagkod na kaogmahan.” Sa maraot na mga panahon na ini, na an gibong-tawong mga gobyerno, nangorogna an yaon sa Kakristianohan, biyong nasusudya sa pagresolber sa mga problema kan kinaban, an garo trumpetang angat na iyan mas makosog an tanog kisa kan 1922. Totoo nanggad na an Kahadean nin Dios sa kamot kan saiyang nandadaog na Cristo iyo an sasaro asin solamenteng paglaom nin katawohan!
20. (a) Paagi sa ano na an mga mensahe nin paghokom kan 1922 asin pakalihis kaiyan ipinadangog kan kongregasyon nin linahidan na mga Kristiano? (b) Ano an ibinunga sa Kakristianohan kan enot na tanog kan trumpeta?
20 Paagi sa mga resolusyon, tract, pulyeto, libro, magasin, asin mga diskurso, ini asin an sumunod pang mga kapahayagan ipinadangog paagi sa kongregasyon nin linahidan na mga Kristiano. An enot na tanog nin trumpeta nagbunga kan paghampak sa Kakristianohan na garo tinamaan nin tuminagas na tubig nin graniso. An saiyang kasalan sa dugo, huli sa saiyang kabtang sa mga guerra sa ika-20 siglong ini, ibinuyagyag, asin napatunayan na sia maninigo sa naglalaad na kapahayagan kan kaanggotan ni Jehova. An grupong Juan, na may pagsuportar kan dakulang kadaklan sa nahuhuring panahon, padagos na inaaningal an enot na tanog kan trumpeta, na inaapod an atension sa pagheling ni Jehova sa Kakristianohan, na angay sa kalaglagan.—Kapahayagan 7:9, 15.
Siring sa Naglalaad na Bukid
21. Ano an nangyari kan patanogon kan ikaduwang anghel an saiyang trumpeta?
21 “Asin pinatanog kan ikaduwang anghel an saiyang trumpeta. Asin an siring sa sarong dakulang bukid na naglalaad nin kalayo iinapon sa dagat. Asin an ikatolong kabtang kan dagat nagin dugo; asin an ikatolong kabtang kan mga linalang na nasa dagat na may kalag nagadan, asin an ikatolong kabtang kan mga sakayan naraot.” (Kapahayagan 8:8, 9) Ano an ilinaladawan kan makatatakot na eksenang ini?
22, 23. (a) Anong resolusyon an daing duwa-duwa na nagdatong bilang resulta kan pagpatanog kan ikaduwang trumpeta? (b) Ano an irinirepresentar kan “ikatolong kabtang kan dagat”?
22 Tibaad orog niatong masabotan iyan kun rerepasohon niato an kombension kan banwaan ni Jehova na ginibo sa Los Angeles, California, E.U.A., kan Agosto 18-26, 1923. An tampok na pahayag kan Sabadong hapon kan presidente kan Watch Tower Society dapit sa temang “Mga Karnero Asin Kanding.” An “mga karnero” malinaw na ipinamidbid na iyo an mga tawong may matanos na boot na magmamana kan daganon na sakop kan Kahadean nin Dios. An sarong resolusyon na suminunod nag-apod kan atension sa pagsaginsagin nin “apostatang mga klerigo asin kan ‘mga pangenot sa saindang aripompon,’ na kinabanon na mga tawo na may makokosog na pinansial asin politikal na impluwensia.” Inapodan kaiyan an “kadaklan nin mga mamomoton sa katoninongan asin kahusayan na nasa denominasyonal na mga iglesya . . . na humale sa maraot na mga sistema eklesiastiko na inaapod kan Kagurangnan na ‘Babilonya’” asin andamon an saindang sadiri “na umako kan mga bendisyon kan kahadean nin Dios.”
23 Daing duwa-duwa, an resolusyon na ini nagdatong bilang resulta kan pagpatanog kan ikaduwang trumpeta. An mga makuyog pag-abot nin panahon sa mensaheng iyan masiblag sa grupong arog-kanding na ilinadawan ni Isaias sa mga tataramon na ini: “Alagad an mga maraot siring sa dagat na inaapwak minsan saen, kun ini dai natotoninong, na an tubig kaini nagpapaluwas nin doot-dagat asin laboy.” (Isaias 57:20; 17:12, 13) Kaya, an “dagat” naglaladawan nanggad sa maribok, dai mapamugtak, asin rebeldeng katawohan na nagpapaluwas nin kariribokan asin rebolusyon. (Ikomparar an Kapahayagan 13:1.) Maabot an panahon na an “dagat” na iyan mawawara na. (Kapahayagan 21:1) Mientras tanto, sa pagtanog kan ikaduwang trumpeta, si Jehova nagpapahayag nin paghokom tumang sa ikatolong kabtang kaiyan—an maribok na kabtang na sakop mismo kan Kakristianohan.
24. Ano an ilinaladawan kan naglalaad na bagay na siring sa bukid na iinapon sa dagat?
24 An dakulaon na garo-bukid na bagay na naglalaad sa kalayo iinapon sa “dagat” na ini. Sa Biblia, an mga bukid parate nanggad na nagsisimbolo sa mga gobyerno. Halimbawa, an Kahadean nin Dios ilinaladawan na sarong bukid. (Daniel 2:35, 44) An mapanlaglag na Babilonya nagin “tutong na bukid.” (Jeremias 51:25) Pero an bukid na naheling ni Juan naglalaad pa. An pag-apon kaiyan sa dagat nagrerepresentar kun paano, durante asin pakalihis kan enot na guerra mundial, an gobyerno nagin naglalaad na isyu sa tahaw nin katawohan, nangorogna sa kadagaan nin Kakristianohan. Sa Italia, iinintrodusir ni Mussolini an Fascismo. Inako nin Alemania an Nazismo ni Hitler, mantang prinobaran nin ibang nasyon an laen-laen na klase nin sosyalismo. May nangyaring radikal na pagkaliwat sa Rusya, na duman an rebolusyon na Bolshevik nagbunga kan enot na estadong komunista, na an resulta an relihiyosong mga namomoon sa Kakristianohan nawaran nin kapangyarihan asin impluwensia sa dati saro sa saindang mga kuta.
25. Paano an gobyerno nagpadagos na magin naglalaad na isyu pakalihis kan Guerra Mundial II?
25 An mga pag-eksperimentong Fascista asin Nazi ginadan kan ikaduwang guerra mundial, pero an gobyerno nagpadagos na naglalaad na isyu, asin an dagat nin katawohan nagpadagos na magsabo asin magpaluwas nin bagong rebolusyonaryong mga gobyerno. Sa mga dekada magpoon kan 1945, an mga ini tinindog sa dakol na lugar, arog baga kan Tsina, Vietnam, Cuba, asin Nicaragua. Sa Grecia nasudya an sarong pag-eksperimento sa militar na diktadura. Sa Kampuchea (Cambodia) an pagprobar sa pundamentalistang komunismo nagbunga nin sinasabing duwang milyon asin labi pang nagadan.
26. Paano an “bukid na naglalaad nin kalayo” padagos na nagpapaalon sa dagat nin katawohan?
26 An “bukid na naglalaad nin kalayo” padagos na nagpapaalon sa dagat nin katawohan. An nagpapadagos na pagraralaban sa gobyerno nababareta sa Aprika, Americas, Asia, asin mga isla sa Pasipiko. An dakol sa pagraralaban na ini nangyayari sa kadagaan nin Kakristianohan o sa mga lugar na an mga misyonero nin Kakristianohan nagin nang mga aktibista. An mga pading Katoliko Romano uminayon pa ngani asin nakikipaglaban bilang mga miembro nin mga gerilyang komunista. Kadungan kaiyan, an mga grupong ebanghelikong Protestante nagtatrabaho sa Central America tanganing paglabanan an inaapod nindang “maringis asin daing herak na pagkapaha sa kapangyarihan” kan mga komunista. Alagad ta mayo sa mga pag-alon na ini sa dagat nin katawohan an makatatao nin katoninongan asin katiwasayan.—Ikomparar an Isaias 25:10-12; 1 Tesalonica 5:3.
27. (a) Paano nagin dugo an “ikatolong kabtang kan dagat”? (b) Paano nagadan an “ikatolong kabtang kan mga linalang na nasa dagat” asin ano an mangyayari sa “ikatolong kabtang kan mga sakayan”?
27 Ipinahahayag kan ikaduwang tanog kan trumpeta na an mga kaiba sa katawohan na napalabot sa rebolusyonaryong mga ralaban sa gobyerno imbes na pumasakop sa Kahadean nin Dios may kasalan sa dugo. Partikularmente an “ikatolong kabtang kan dagat” na sakop kan Kakristianohan nagin garo dugo. An gabos na nabubuhay na bagay dian gadan sa pagheling nin Dios. Mayo sa radikal na mga organisasyon na naglalatawlataw na garo mga sakayan sa ikatolong kabtang na iyan kan dagat an makalilikay sa pagkalunod sa huri. Naoogma nanggad kita na an minilyon na arog-karnero nagkuyog na ngonyan sa garo-trumpetang pag-apod na sumiblag sa mga sagkod ngonyan nagtutubog sa hayakpit an isip na nasyonalismo asin kasalan sa dugo kan dagat na iyan!
An Sarong Bitoon Naholog Hale sa Langit
28. Ano an mangyayari kun patanogon na kan ikatolong anghel an saiyang trumpeta?
28 “Asin pinatanog kan ikatolong anghel an saiyang trumpeta. Asin an sarong dakulang bitoon na naglalaad na garo lampara naholog hale sa langit, asin iyan naholog sa ikatolong kabtang kan mga salog asin mga burabod nin tubig. Asin an ngaran kan bitoon Ajenjo. Asin an ikatolong kabtang kan tubig nagin ajenjo, asin dakol na tawo an nagadan sa tubig, huli ta an mga ini nagin mapait.” (Kapahayagan 8:10, 11) Sa liwat, an ibang kabtang kan Biblia nakatatabang sato na masabotan kun paano an tekstong ini minaaplikar sa aldaw kan Kagurangnan.
29. Ano an kaotoban kan simbolismong “sarong dakulang bitoon na naglalaad na garo lampara,” asin taano?
29 Nanompongan na niato an simbolismo nin bitoon sa mga mensahe ni Jesus sa pitong kongregasyon, na dian an pitong bitoon nagsisimbolo sa kamagurangan sa kongregasyon.b (Kapahayagan 1:20) An linahidan na mga “bitoon,” kaiba an gabos pang iba sa mga linahidan, nag-eerok sa langitnon na mga lugar sa espirituwal na sentido poon na sinda tatakan kan banal na espiritu bilang tanda kan saindang langitnon na mana. (Efeso 2:6, 7) Minsan siring, nagpatanid si apostol Pablo na hale sa tahaw kan mga arog-bitoon na iyan maluwas an mga apostata, sektaryano, na mandadaya sa aripompon. (Gibo 20:29, 30) An siring na katraydoran magbubunga nin dakulang apostasiya, asin an nagkasalang kamagurangan na ini magigin kompuwesto nin dakol na tawo nin katampalasanan na ilalangkaw an saiyang sadiri sa garo-dios na kamugtakan sa tahaw nin katawohan. (2 Tesalonica 2:3, 4) An mga patanid ni Pablo naotob kan an klero nin Kakristianohan naglataw sa kinaban. Tama an pagkarepresentar sa grupong ini kan simbolo na “dakulang bitoon na naglalaad na garo lampara.”
30. (a) Kan an hade nin Babilonya inapod na saro na naholog hale sa langit, ano an boot sabihon? (b) Ano an puwedeng magin kahulogan kan pagkaholog sa langit?
30 Naheling ni Juan na nahoholog hale sa langit an partikular na bitoon na ini. Paano? An mga eksperyensia nin sarong suanoy na hade nagtatabang sato na makasabot. Sa pagtaram sa hade nin Babilonya, si Isaias nagsabi: “O kanigoan an pagkaholog mo sa langit, ikang maliwanag, aki kan kaagahon! Kanigoan an pagkaputol sa saimo sa daga, ika na nampipilay sa mga nasyon!” (Isaias 14:12) An hulang ini naotob kan an Babilonya madaog kan mga hukbo ni Ciro, asin an hade kaiyan biglang buminaba hale sa paghade sa kinaban pasiring sa makasosopog na pagkadaog. Kaya, an pagkaholog sa langit puwedeng mangahulogan nin pagkawara nin halangkaw na posisyon asin pagkaholog sa makuring kasopganan.
31. (a) Kasuarin naholog sa “langitnon” na posisyon an klero nin Kakristianohan? (b) Paano nagin “ajenjo” an tubig na itinatao kan klero, asin ano an resulta sa dakol?
31 Kan an klero nin Kakristianohan mag-apostata hale sa tunay na Kristianismo, naholog sinda hale sa halangkaw na “langitnon” na posisyon na sinasabi ni Pablo sa Efeso 2:6, 7. Imbes na mag-alok nin preskong mga tubig nin katotoohan, an itinao ninda “ajenjo,” mapait na mga kaputikan arog baga kan naglalaad na impierno, purgatoryo, an Trinidad, asin patienot na pagtalaga; siring man, giniyahan ninda sa guerra an mga nasyon, na dai sinda napakosog bilang moral na mga lingkod nin Dios. An resulta? Espirituwal na pagkailo kan mga nagtubod sa mga kaputikan. An kamugtakan ninda kapareho kan sa bakong maimbod na mga Israelita kan aldaw ni Jeremias, na sinabihan ni Jehova: “Uya pakakakanon ko sinda nin ajenjo, asin paiinomon ko sinda nin tubig na may ilo. Huli ta gikan sa mga propeta nin Jerusalem an apostasiya luminuwas sa bilog na daga.”—Jeremias 9:15; 23:15.
32. Kasuarin narisa an pagkaholog nin Kakristianohan sa espirituwal na kalangitan, asin paano iyan orog na ipinarisa?
32 An pagkaholog na ini sa espirituwal na kalangitan narisa kan taon 1919 kan, imbes na an klero nin Kakristianohan, an kadikit na natatada sa linahidan na mga Kristiano nombrahan na mamahala sa intereses kan Kahadean. (Mateo 24:45-47) Asin poon kan 1922 orog na narisa an pagkaholog na iyan kan pakosogon na naman kan grupong ini nin mga Kristiano an saindang kampanya nin prangkang pagbuyagyag kan mga pagkukulang kan klero nin Kakristianohan.
33. Anong pagbuyagyag sa klero nin Kakristianohan an ginibo sa kombension sa Columbus, Ohio, E.U.A. kan 1924?
33 Lataw na gayo may koneksion digdi an proklamasyon na ginibo sa inapod kan magasin na The Golden Age na “an kadarudakulaing kombension kan mga Estudyante sa Biblia sa nag-aging mga panahon.” An kombension na ini nagtiripon sa Columbus, Ohio, Hulyo 20-27, 1924. Daing duwa-duwa na sa paggiya kan anghel na nagpatanog kan ikatolong trumpeta, inaprobaran duman an sarong mapuwersang resolusyon asin kan huri 50 milyones na kopya an iwinaras bilang sarong tract. Idto ipinublikar sa irarom kan titulong Ecclesiastics Indicted. An sarong subtema nag-atubang kan isyu: “An Banhi nin Panuga Tumang sa Banhi kan Halas.” An Indictment mismo biyong nagbuyagyag sa klero nin Kakristianohan manongod sa mga bagay na arog kan saindang pagkaigwa nin haralangkaw na relihiyosong titulo, paggibo sa darakulang negosyante asin propesyonal na mga politiko bilang mga pangenot sa saindang aripompon, pagmawot na sumikat sa atubangan nin mga tawo, asin pagsayuma na ihulit sa mga tawo an mensahe manongod sa Kahadean kan Mesiyas. Idinoon kaiyan na an lambang nagdusay na Kristiano isinugo nin Dios na magbalangibog kan “aldaw nin pamalos kan satong Dios; rangahon an gabos na nagmomondo.”—Isaias 61:2, KJ.
34, 35. (a) Ano an nangyari sa kapangyarihan asin impluwensia kan klero poon kan patanogon kan ikatolong anghel an saiyang trumpeta? (b) Ano an natatagama sa ngapit para sa klero nin Kakristianohan?
34 Poon kan ponan kan ikatolong anghel na patanogon an saiyang trumpeta, an pagdominar kan klero sa katawohan nagluya sagkod na, sa panahon na ini, pipira na sana sa sainda an igwa kan garo-sa-dios na kapangyarihan na nasa sainda kaidtong nakaaging mga siglo. Huli sa paghuhulit kan mga Saksi ni Jehova, an dakol na tawo nakarealisar na an dakol na doktrina na itinotokdo kan klero espirituwal na ilo—“ajenjo.” Dugang pa, an kapangyarihan kan klero sa parteng amihanan nin Europa haros mayo na, mantang sa Tsina asin sa ibang nasyon, estriktong linilimitaran kan gobyerno an saindang impluwensia. Sa mga parteng Katoliko nin Europa asin sa Amerika, an iskandalosong gawe kan klero sa pinansial, politikal, asin moral na mga bagay nakamantsa sa saindang reputasyon. Poon ngonyan, daing mangyayari sa saindang posisyon kundi an rumaot pa, ta sa dai na mahahaloy aagihan ninda an arog kan inagihan nin gabos na ibang falsong relihiyonista.—Kapahayagan 18:21; 19:2.
35 An pagdamat ni Jehova sa Kakristianohan dai pa tapos. Helinga an nangyari pakalihis kan ikaapat na pagtanog kan trumpeta.
(Ipagpapadagos sa masunod na luwas.)
[Mga Nota sa Ibaba]
a Kabaliktaran, ipinaheheling kan Kapahayagan 7:16 na an dakulang kadaklan dai nakaeeksperyensia kan nakapapasong init kan dai pag-oyon ni Jehova.
b Mantang an pitong bitoon sa toong kamot ni Jesus naglaladawan sa linahidan na mga paraataman sa Kristianong kongregasyon, an kamagurangan sa kadaklan sa 65,000 asin labi pang kongregasyon sa kinaban ngonyan kabilang sa dakulang kadaklan. (Kapahayagan 1:16; 7:9) Ano an kamugtakan ninda? Mantang inaako ninda an saindang nombramiento paagi sa banal na espiritu na pinaagi sa linahidan na grupong maimbod asin madonong na oripon, masasabi na sinda nasa irarom kan toong kamot nin pagkontrol ni Jesus, huli ta sinda man saiyang mga katabang na pastor. (Isaias 61:5, 6; Gibo 20:28) Tinatabangan ninda an “pitong bitoon” ta sinda naglilingkod kun saen mayo nin kuwalipikadong linahidan na mga tugang na lalaki.