Anong Klase an Relihiyon kan mga Asirio?

AN RELIHIYON nin Asiria sa kadaklan minana sa Babilonya, asin minsan ngani ibinilang na supremo kan mga Asirio an sadiri nindang nasyonal na dios na si Asur, sa pagheling ninda an Babilonya nagpadagos na pangenot na sentro nin relihiyon. An hade sa Asiria iyo an naglingkod na halangkaw na saserdote ni Asur. An sarong pantatak, na nakua ni A. H. Layard sa kagabaan nin sarong palasyo sa Asiria asin ngonyan napepreserbar sa British Museum, ipinaheheling an dios na si Asur na may tolong payo. An paniniwala sa mga trinidad nin mga dios saka sa pentad, o limang dios, lataw sa pagsamba sa Asiria. An pangenot na trinidad kompuwesto ni Aner, na nagrerepresentar sa langit; ni Bel, na nagrerepresentar sa rehiyon na inierokan nin tawo, mga hayop, asin mga gamgam; asin ni Ea, na nagrerepresentar sa katubigan sa daga asin sa irarom nin daga. An ikaduwang trinidad kompuwesto ni Sin, an dios na bulan; ni Samas, an dios na aldaw; asin ni Raman, an dios nin bagyo, minsan ngani sa parate sinasalidahan sia ni Istar, reyna kan mga bitoon. (Ikomparar an 2 Hade 23:​5, 11.) Dangan kasunod an limang dios na nagrerepresentar sa limang planeta. Sa pagkomento dapit sa mga dios na minakompuwesto sa mga grupong trinitaryo, an Unger’s Bible Dictionary (1965, p. 102) nagsasabi: “An mga dios na ini inaarang nin makapira kun beses sa mga tataramon na garo baga ilinalangkaw nin turnuhan an kada saro sa kamugtakan nin pagigin supremo sa iba.” Pero an koleksion ninda nin mga dios may kaibang dai mabilang na iba pang minor na dios, na an dakol nagseserbing mga patron nin mga banwaan. Si Nisroc nasasambitan na sinasamba ni Senaquerib kan panahon na sia gadanon.​—Isaias 37:​37, 38.

An relihiyon na ginigibo may koneksion sa mga dios na ini animistiko, an boot sabihon, naniniwala an mga Asirio na an kada bagay asin natural na pangyayari pinahihiro nin sarong espiritu. Idto napalalaen sa ibang pagsamba sa naturalesa na lakop sa mga nasyon sa palibot ta an guerra iyo an pinakatunay na kapahayagan kan nasyonal na relihiyon. (RETRATO, Insight on the Scriptures, Tomo 1, p. 956) Kaya ngani, si Tiglat-pileser I nagsabi manongod sa saiyang pakikilaban: “An Kagurangnan kong si ASUR an nagtulod sa sako.” Sa saiyang historya, si Asurbanipal nagsasabi: “Sa pagboot ni ASUR, SIN, asin SAMAS, an darakulang dios na mga kagurangnan ko na nagpoprotehir sa sako, ako naglaog sa Mini asin mapangganang nagmartsa.” (Records of the Past: Assyrian and Egyptian Monuments, Londres, 1875, Tomo V, p. 18; 1877, Tomo IX, p. 43) Si Sargon perming inaarang an tabang ni Istar bago makiguerra. An mga hukbo nagmartsa na may sinusundan na mga estandarte kan mga dios, na minalataw na mga simbolong kahoy o metal na nasa mga palo. Tinatawan nin dakulang halaga an mga signos, na inaaram paagi sa pagsiyasat sa katoy nin iinatang na mga hayop, sa layog nin mga gamgam, o sa posisyon kan mga planeta. An librong Ancient Cities, ni W. B. Wright (1886, p. 25) nagsasabi: “An pakikilaban iyo an trabaho kan nasyon, asin an mga saserdote iyo an daing ontok na mga parasutsut nin guerra. Sinda sa kadaklan suportado kan mga sinamsaman sa panggagana, na may depinido nang porsiento na itinatao sa sainda bago makihiras an iba, ta an rasang ini nin mga parasalakat relihiyosong marhay.”